Pathian thu zirna, Sande Sikul kan neiin inkhawm leh fellowship heti zat kan nei chung pawha Bible hre lo satliah tak mai an lo awm ta hi a mak takzet a ni! Kristian kan ni kan tihna anga kan dinhmun dik tak sawi chhuak duh lo lo tamziate hi!
Salim Zothanpuia a lo lang a, kan hlimthla dik tak ţhenkhat a rawn tarlang ta! Mahse, he hlimthla makzia hi ka zuk ngaihtuah phak ngai lo! Kohhrana Active member nula pakhat harsatna chu hei hi a ni; a bialpa nen mipat hmeichhiatna an lo hmang a lo ni.
Mahse, chu aia mak rapthlak zawk chu hei hi a ni; ka bialpa (kohhrana inhmang tak) chuan, Pathian thuin inhmangaih tawn ţheuh rawh u, tih a phal a ti a. Kan inhmangaih chuan kan lantir tur a ni, tiin mipat hmeichhiatna kan hmang a tihna Pathian thu hriat lohna mawlh hi!
Kan rama kohhran ţhalai pawl lian ber, CKŢP lamin Apologetic zirna a huaihawt a. Chuta, Branch aiawh pha ţhiau kal khawm zinga mite zawhna ţhenkhat chu a awihawm loh zawk hial mai! Jona nghapuiin a dawlhte kha a rintlak tak tak em? tihte a ni an zawh tak ni!
Kohhrana inhmang tak ţhalai pakhat pawh a hna a chân avangin Pathian lakah a vui ta a. Pathian a lo hriat dan kha a ni mak ta chu ni! Pathian chu hna petu, engkim mamawh kan neih zawng zawng phuhruktu tiin Pathian hi a lo hre mauh mai!
CKŢP lam huaihawt bawka ţhalai fuankhawmnaa an zawhnate hlei hlei hi a ni, kohhran anga ngaih pawimawh ngai ta chu ni! Branch aiawhtu zinga kal ve si khan, Pathian a awm tak tak leh tak tak loh zawhna an zawt tlat!
Hei hian rawng kan bawl dan tam zawk a tilang chiang ngawt mai. Pathian thu chhiara fianrial hun nei ngai miah lo kan tamzia a tilang a. Pathian ţihna tak tak han nei thei tur khawp hian eng chu nge ţih tur tih hre lo hi kan tam hle ngeiin a rinawm tlat a ni.
Engvangin nge Pathian thu hi kan hriat loha kan ngàwng tak em em mai ni? A chhan ni thei awma lang chu, a thawh tam tam lansarhna, a hnatlang peih peih piangthar ţha anga tehna, hla zir leh inkhawm taima, fellowship kal ţha ţha ringtu ţhaa kan inchhuah tak vang a nih hi!
Mi tam tak chuan an fatete leh an laina hnaite, sual lam awn nun an hman ai chuan kohhrana inhmana thil ţha an tih hi a lawmawm tho tho an ti ţhin! He ţawngkamina mi a hruai sual nasat dan hi chhut ngun a va ngai ta êm!
Juda lal Amazia nun kha en ngun hle rawh. Heti hian kan Pathian thu chuan a ti; ‘Lalpa mithmuhin thil ţha a ti a, amaherawh chu a rilru a pe famkim si lo’ a tihna kohhran kaltlanga thil ţha tih nazawng hi Pathian mithmuha felna a tling pha hlawl lo!
Sual lam awn ai chuan kohhran bel zawng, chhûngkaw tân a hahdamthlak ngei e. Mahse, khawvel ngaiha fel leh dik kawng zawh mai mai hian min chhandam hlek lo ang. Ni lo se, Amazia nun tawpna kha a chhe hle lo tawp ang!
Salim-a thu sawi apianga hriat tur awm pakhat chu mi rel hrat lutuk kan nihna hi a ni bawk! Mi kan relna chhan chu mi nuna sawisel tur, dem tur leh tlin lohna kan va hmuh vang niin thutaka kan awm loh vang a lo ni zel mai a ni.
Hawh u, Pathian thu hi zir chiangin a takin nunpui i tum teh ang u khai. Ka han tarlan tak ang em ema Pathian thu hre miah lo va ringtu awma awm zawng, khawi hmun mah kan thleng lul lo'ng e.
