Hmuh theih pangtiah nΓ’ reng an awm lo,
PangpΓ’r vul lai tluka sakruang duhawm,
Thla bial vanglai ang mize ngaihawm ber,
Thinlung leh thlarau lam chawlawl nun chu;
Ngaihtuah tin indona rΓ’pthlak ber ang,
Thawk lΓ’k hnuhnung apiang a nΓ’ zel a,
Hnehtu nun reng hmΓͺlhriat phΓ’k lohna chu!
Tiang leh lung chuan ruh tliahna thlen rawh i,
Thu erawh chuan hringnun a uai tliak thei;
'Ka Θha a sin' tih chuan ser nung thupin,
Thinlung chu huan thuhrΓ»k a chang zo ta;
A hungna bang chu lawn liam rual loh tur,
Thihna ni si lova hringnuna nung thihna chu!
Dam lohna aia dam lohna dam lo;
Kehsawm azawnga thinlung keh chhe ber!
Mithmuhte'n chakna reng an thlen lo;
Thinlung ruak luah khat zo an awm hek lo,
Ngah nei nun inbuatsaih, nghah chhuah nei lo;
Thlek lam leh hawi lam reng reng mumal lo,
A tawpa mi tin hahchawlhna zawn chu-
Hahdam taka muthilh hlen riai riaina,
Harh leh tawh ngai lo tura mit chhinna;
Chu nun chu mihring thlakhlelh ber, hlauh ber!
