Darnam Sual Puanna Kamping Turu Buru!

Part - I

Kalvari Tillak Team ten sawmna an hmuh angin Darnam khaw pum tan Sual Puanna Kamping nei turin phur takin Evan Sudden Zualhranga leh Deputy Sipikar Dusty Pachuau te chuan Darnam thlaler paltlang khu vut vut chungin Darnam an thleng ta a.

Darnam khuaah hian Kohhran Dan pawna hnawl chin ngawt pawh mi 30 chuang an awm a! Kohhran kawmiti an neih tum khat khan Thlohpui rorel-in an thu ngaiah Chairman Chla’n a kirpui zing fahran lutuk ngai thei lovin Outlaw dam leh, Tuai Mk-a’n a sik hlawih mai a, kohhran dan pawlah lungrual takin an hnawkchhuak a. Tiang vel tehnuaih chu an nia!

Darnam khawlaiah tak mai chuan tualpuk an zar duai mai a, chu hmunah chuan kamping an nei ta. Kamping neihna hmun hming chu Sipikar ber chuan Evil Death tiin a phuah leh hmiah mai pek a!

Evan Zualtea aw hi tuitu haw lam ang nuah nuah a riat nawk nawk thin anih laiin Deputy Sipikar Dusty Pachua-a aw erawh tumbu ei aw ang maia chham zaih mai a ni thung a!

A mumang lama Hremhmuna a lo tlak palh a, a tuk maia a pianthar hnu atang khan Zualtea nun chu hmuithal ngila ngil nun; mi huatzawng leh pawisawi lo, a zui Beramno ang mai a ni ta hlauh kan tih tawh kha!

Tan zan boruak chu pui rem rem tak a ni. Khawtual tlangval sual haw lo intelkhawm Elkunga, Thawma, Jack, Mk-a te chuan nilengin Pi Sumhrangi Tuitling Chhemi an tlan hnuah phur thut thlarau changin puakruk hmet puak thuai thuai chungin Evil Death hmun an rawn lut kawrhma phelh huang huang mai a, an thaw hi a veng tak zet zet a ni.

Darnam nula hmeltha, valtin zantin hisap nih reng nin luat vanga inawhhlum tum, a inawhhlumna hruiin a zawh loh avanga a zawhte delh hliama, tun thlenga a zawhte Ngiau Ngiauin, “Tihpalh” a tih lawm lawm chung pawha a ngaihdam duh loh avanga rilru na, Remlo Zoremi chuan a thiante a rawn kawi ve bawk!

A parh thei ang ber mai hian a thuihhruai nula Sona Chek-i te, Mathlani Ngat te, Chatuan Manghaki te, Estee Mizo te, Remna Partei te ho chu an rawn inchei pawng vum alh mai si a! Sipikar ber chu phur hurh hian Pulpit tlang atangin a rawn chhuk, a lo welkham leh rih hrih! Pulpit dinglam pang, Tual Upate thutna, ngei ngeia bawpkhawkherh an ngaihna lam,,ah thuttir a tum!

Puakruk ri bengchheng karah zurui nui khek tuarh tuarh mai te leh Sipikar ber awmdan zozai avangin Kalvari Tillak Team Director Gary Angel-a ngaihdan a ni ta lo kher mai! Vantirhkoh chungnung ber Mikela aw ang maia ring hian, “Sitop!” a han ti a, Evil Death chhung chu khuavang kallai ang maiin a reh ta duk a!

“Si trit down! Heaven pan lovin Hell lamah Sipikar chawp hian ka thawnliam dial mai tur che u a nia!” a ti ta chher chher mai a, inkhawm an tan thei ta hram!

Sipikar chu a nawinawk kamis tlang arh hlai zet hain a rawn dingchhuak a. Tawngtainain hun a han tan ta a.

“Ka pa, you are my father. Khawngaih takin Darnam thler tina thosite hi an zuk tur awm midang lo ngaihtuah la, fanghmirte pawh malsawm ang che! Chuti anih rau rau si chuan tlumpi pawh i hmaih thiang lovang! Ngawi teh, vaivut leh eklung chenin malsawm law law mai teh!

Zan ina i hnen rawn pantute hi i ti thlawn lovang tih ka hria. I hnungzui tura duh an thlang ngam lo anih vaih chuan an chak lo hle ang, ka va sawpzi dawn rua em, tih i hriattir dawn nia. Piangthar lo apiangte chu mawngmirh veitir vek bawk ang che.

Nupui pasala insiam duh an awm pawn hriattir bawk la, min duhtu nula pawh a thinlung tihvarsak ang che. I offer you my soul....oh forever Lord-ta-da” a han ti ham ham mai a, a tawngtai tui bawk a; a tawng zawng chuan a mawngkua chu a phu hlerh hlerh mai a, a ri thlerh thlerh mai a ni.

Pulpit a thu, sipikar mawngzawna awm Dusty Pachuaua uih ti lutuk chu a rukin pawnah zun chhuak chhuanlamin a chhuah phah ta hial a!

Poetry Collection for Zopuii

1. Zopuii ka ngai mang e!

Hmartlangah Tuktinpar ka tan a vul,
To lo val lunglen tizual turan maw;
Thuva awmhar zun ngai a lo tap e!

Chung khaw riin vanrial a ngen iangin,
Senlai nau ang nawrh ka nuam chun tawnah;
Tuktinpar vullai ka tan thliah ngenin!

Khuangruah surin vanrial a ko ngai e,
Tawnmangah tal tui ang i luang hmun ang;
Vahkhuai ianga parzu thlum tlan ve nan!

Chawnin lamthang a relin rel mai se,
Hawh Zopui, zal lai i rel dun ang i;
Val riang zun ngai nau ang tah ban ve nan!

Nang ang reng ka duh zaleng an awm lo,
I runah khamrang khuai ang kai ka nuam;
Chutin ka bang ang suihlung lam len chu!

2. Lei leh Van Tuahrem nan!

Nang, angelte ianga pheilai vawrtu,
I sakruang kimtlang thuammawina tel lo;
I hmaifang kimhlel thukru bo thin a,

I thinlung dikhlelhna tuam bo thintu,
I cheimawi tlereuh tinreng tel lova;
I nihna ngai ngaia hmuh che ka nuam,

Angel leh van mi duhawm ber ni lo;
Hringmi leng i nih min hmuhfiah tirin,
I thinlung runsang lawi ngam thei tur a;

Lei leh van tuahrem zai vawr dun nan,
Zopui, ka sawm phakin kur diam diam rawh!

3. Zopui, ka tiam lo'ng che!

Anka nem thlum diai hlanna chuanin,
Tak ram nuam min thlen dawn ngai ni se'ngin;
Lunghlu zungbun nen khuavel zawng telin,
Rangka thlengah i tan tuahrem ka nuam!

Chham hla ril sain ka chung chhawrthlapui,
Ka tiam thei che chung si-ar leng zawng nen;
Ka tang i beina mai an chan dawn chuan,
Tiam loh che ka thlang zawk si mai nang e!

Pangpar vul chiai rengna ka tiam lo'ng che,
Tuipui chhula i tlakpil chang ni erawh;
I tan tuipui chhul ka do hneh zawk ang,
Thlafam ka channa i nun theih zawk nan!

Ni eng leh khuangruah sur dunna hringnun,
Thim leh eng ka dopui nang che Zopui!

4. Ka hmangaih nang che!

Ka tukchhuak khawchhak lam thlir chang hian,
Ni chhuak duhawm tantir ka hmuh thin hi;
Tlai lam lungleng khawthlang lam hawi changin,
Ni tla engmawi tak ka hmuhhmaih hek lo!

Vangpui hnuai zankhaw thiang ka chuanin,
Chhum leivak pawlh loh chhawrthlapui hmuin;
Chung si-ar eng mawi no nghial lengte nen,
Zan enna duhawm ka thlir ning ngai lo'ng!

Ni-in chhun a en chhung, Thla-in zan nen,
Zopui, ka hmangaih reng fo nang che aw!

5. Let my verse speak my mind, Zopui............

Ka thliar thiam lo ka duhthlanna insual,
Ka taksa hian nge ka thinlung zawkin;
Thlakhlehna vawrtawpa mamawh che ni!

Suangtuahna mitthla, tanga kuangkuahna,
Tisa vunte lam nang ngena murin;
Ngaihtuahna leh sakruang an indo hi!

Hunbi tehna hun ruk zan hahchawlhna,
Nang suangtuahna zan hun ruk liamta chu;
Aw, chu ngei chu zan mutchhin duhawmna!

NULA TLANGVAL INLEMNA

Free Verse

Nula :

Lukham khawngaihna hnuaiah ka tap thawm chu,
Pindan bangte chuan thuruk an zep thei a;
Tukverh biangte lamin an beng a ngawng a;
Chhuatphahte pawn tawng zai reng an rel lo ve.

Tlangval :

Khawiah nge thinlung kehsawm damna a awm?
Bul tan tur ke pen tanna hmun chu khawi lai nge?
Engkim ka tihte chuan i sulhnu min hriatchhuah tir a,
Hla thu tinreng ten i chanchin an hril vel si.

Nula :

Zan thim ngawi duk karah chuan,
Thinlung kehsawm avanga ka tahna kara’n;
Mittui leh insut thawm chu ka thian tha ber an ni e.

Tlangval :

Ka pindan tesep thim tak chhungah,
Ring takin ka tap chhuak hawm hawm a;
Khawvel chuan ka thinlung thler chhan a hre lo.

Nula :

Vawi engzata tam nge ka thinlung natna i thlen tawh,
Tia zawhna mawlmang tak mi zawh fo thin chu;
Ti hian ka chhan nang che, “Zan thla eng hnuaia,
Chung Si-ar i hmuh zat zet an ni,” tiin.

Tlangval :

Khawiah nge thinlung kehsawm damna a awm?
Bul tan tur ke pen tanna hmun chu khawi lai nge?
Engkim ka tihte chuan i sulhnu min hriatchhuah tir a,
Hla thu tinreng ten i chanchin an hril vel si.

Nula :

I thin a phut rual chiahin ka thin a phu a,
Ka hmui chuan nang fakna hla mawi a sa thin;
Ka mit chuan chhunglama i mawina a hmu reng thin a,
Ka thinlung leh thlarau mamawh hriatna ka lo nei ta.

Tlangval :
I hmuia mi fawhna chu Ni zung thlar lumna hnuaiah ka tem a,
Lungchim takin Thlasik khawvawt kara mi kuahna nen;
Nangmahah ngei chuan Zing, Chhun, Zan ka hmufiah thin a,
Nitin, mitkhapkar khat lamin hlimna chuan mi fan chhuak thin.

Nula :
Nang ngei hi ka hmangaih chu i ni e,
Thlifim kara faifuk ri hlerh hlerh chu;
Fur ruahtui bua ngawihtir thuaptu,
Nipui thli thaw kara rimawi tum ri chu.

Tlangval :
Nang hi ka hmangaih chu i ni e,
Pangparte rimtui chhuah chu;
Phaitual hnimte rimtui in chulh,
Inthawina rimtui halral rim ngei chu.

Recollection of the past - IV

Relieving the past!

"Min hmangaih em" ka han ti a.

"Aw, hmangaih e" tiin mi chhang a.

"Anih leh hlim taka awm turin mi duh em?" ka han tih chuan ka thin chu a phut hian a phu dut dut tawh a.

"Tehreng mai" nui sak pah chuan a han ti a.

"Anih leh thil pakhat chiah min tihsak thei ang em?" ka han tih chuan, lungngaih hmel takin a meng hnuai lap a, lehlam mi hawisan ta a.

A natna chu a nasat tawh em avang chuan inthlahrun hmel tak maiin, "Ka thei na meuh ang emaw chu le" a han ti a.

"I tih theih awm ang ni sela, i ti ang em?" tiin ka la zawt lui ta zel a.

Chutih lai boruaka ka awmdan chu sawifiah mai har tak a ni. Thinrimna, lungchhiatna, hmangaihna, hlauhthawnna, beiseina te chuan tuilian ang maiin mi khuh hlup hlup a ni ber a.

Ani chuan ka lam a lo hawi phei leh a, ngunthluk tak maiin mi melh vawng vawng a, chutah zet chuan ka thaw tha ngam tawhlo a ni ber.
Kawlphe ang maia rang hian ka thinlung chu tihvarin a awm nghal a, tuma lakah hetiang taka rilru tuiralna hi ka pu leh thei tawh ngai lovang tih chu ka chiang ta em em a ni! 

A mitmeng ka han thlir chiah phei chuan, hringnun thlak danglam dawrh chakna chuan namenlovin ka nun a rawn nem her sawk a. A dinhmun thlak danglam nan ka nun hian chhiatna tawp tawk dawn pawh ni sela, chu aia thil tih chak reng reng nei hian ka inring mawlh lo a ni!

Ka ngaihtuahna ril ber berte chu hrilh ka chak em em a, mahse chutih lai tak chuan tham chial hian, "Aw" tiin mi chhang ta a. A aw chu chau tawh viau mahsela, thutiam hian a khat ngawih ngawihin ka hre pek a.

Theihpatawpa insum chung chuan a kut ka la a, a hmui chu ka fawp a. A hmaifang dang lap tawh, mahse duhawmna tinreng infawhkhawmna chu ka chul ta a. A vun no zia ka hre thar a, a mitmenga zawiawina lo lang pawh ka hmuh hmaih miah lo. Ka hrawk a rawn tawt tha leh a, mahse a damna thlen turin engmah tih theih ka neih loh zia ka hrechhuak nghal si.

Kan pahniha hmalam hun pawhsei chu ka tan tihrual ni lo mahsela, a duhzawng tak tihsak erawh ka la thei a ni tih ka inhria a. Ka thinlungin a titura min duh a ni tih pawh ka hai mawlh lo! Nem thei ang berin ka nuih sak a, ani pawh chuan na vak lo, a theih tawkin ka kut chu a hum salh bawk a. 

Ka thiltih tumah chuan mi ringtawk tih hriat tak mai hian a mit chuan mi han tiphur pah bawk a!

Ka ka ka ang a, ka thinlung ril bera atanga thaw lo chhuak mil chiah chuan, "Min nei duh ang em?" ka han ti ta a!

Ka hmangaih che

"Ka hmeltha i ti em?" ti a ka zawh chuan,"Ti lo" tiin min chhang a.

"Anih, ka thau i tia mi?" ka tih chuan,"Aw" tiin min chhang a.

"Kumkhua atana keimah nena hun hman liam i duh em?" ka tih chuan,
"Duhlo" tiin min chhang leh a.

"Anih leh tunah hian kalsan ta che ila, i tap ang em?" ka ti leh a,
"Tap lovang" tiin min chhang nghut a.

Ka duhtawk ka ngah tawh tlat a, lunghnur takin kalsawn tumin ka inher lai tak chuan, ka banah a vuan a, "Kal suh, la tawi khawmuang lawk teh" a ti sap a.

Lungrun em ema mi thlek pah chuan, heng thu mawi em em hi a chham ta a ni.

"I hmeltha ka ti a ni mai lo, i duhawmin i ngainatawm chungchuang ka ti a ni zawk e."

"I thau ka tih khan i tisa lam ka thlir lova, i thinlunga thau tha ka sawi a ni zawk e."

"Kumkhua atana nang nena hun hman hi ka duhlo a ni lo, a mamawhin ka mamawh ngawih ngawih che a ni zawk a sin!"

"Chuan duhtak, mi kalsan ni la tap tur ka awm lovang, thihna chu ka chan a nih dawn avangin"


A kiangah chuan ka thu hnawk a, lungchim em emin ka kuah a, a hmui chu ka fawp ta vawng vawng a. Sakrament them ei ang maia thianghlim zuk nia!

Recollection of the past - III

Khawvel a ding!

Dawr atanga kan chhuah hnu chuan an In lam panin muangchangin kan phei dun ta a. Favang boruak anih avangin shawl a bat a, kei pawhin ka jacket chhuanvawr ber ka ha ve bawk a.

"Mi hian mak min tiin, mi min hmuh dan pawh hi a pangngai chiah lo ti raw?" tiin mi zawt thut a. 

Chhan nghal mai ngaihna ka hriat loh avangin ka hawi kual ruk ruk a.

"Nang pawh hian hmeichhe khawsak mak tak niin min hria ti raw?" a han tih zui phei chuan sawi tur ka haichham tak zet zet tawh a ni.

Mahse, "Enge i sawi awmzia chu?" ka ti lui thei hram a.

"Ka hria a lawm, zep tum duh lem suh" mi han tih takah chuan dawt sawi zui zel ka ngam tawh lo.

"Tupawh chuan maksak an ti che a lo ni thei e. Kei chuan nang aia hmeichhe duhawm leh ngainatawm reng reng ka hre lo. I nun a ngil a, mi pawisawi i hlau em em thin; i nihna ang hi ka nihna atana ka duh em em a ni" ka han tih chuan rimawi ang mai hian zawite-in a nui sak a.

"Tun atang chuan thudik chauh min hrilh tawh ang tih min tiam rawh" a han tih chuan, "Awle, tun atang chuan thudik tak bak ka sawi tawh ngai lovang a, hrilh pawh ka hrilh tawh ngai lovang che," ka ti ta a.

Thingbuk hnuai kan thlen chuan ngawi rengin a kut ka vuan a, ka lamah ka pawt hnai riai riai a, duhthawh, nem tak siin a hmui chu ka fawp ta a. Ani pawh chuan nem tak bawkin min chhang let a.

"Ka hmangaih che, tawnhriat ka neih ve tawhah chuan nang tluk renga tawnhriat duhawm ka la tawng ngai lo" ka han tih chuan rang lutukin ka kuahna ata a tal pit ta thut a.

A mittui hnam sawk chu ka hmu reng a, "Khawngaih takin, khawngaihin chutiang thu zawng sawi suh" a ti ta mai a.

A ngaihna reng reng ka hrethiam lo. 

"Ka ti tak tak a lawm" ka han tih pawh chuan, "Ni lo, chutiangin ka lakah awm suh" tih pah chuan ngui hmel tak, chauh hmel tak bawk chuan lehlam mi hawisan ta a.

"Ka tih palh a ni, min hrethiam rawh" a han tih chuan, "Ngati nge, ka thianten an sawi i hlauh vang nge, enge ni? Anni ai chuan ka ngai pawihmawh zawk che tih i hria a lawm. Anni chu eng atan mah ka ti tawh hlei nem" ka han ti leh a. 

Ka mang hi a ang em em a, hlauhthawnna lian tak mai chuan min zem chiai chiai hian ka hre tawh a.

Ka kut a la a, ka hmuiah chuan mi han fawp a, "Min hmangaih thei lovang, min hmangaih ngai suh! Thian angin kan inkawm thei a, nitin i duh chuan kan inhmu thei a lawm, mahse mi zawng i hmangaih tur a ni lo" a han tih phei chuan, thil diklo a awm tih ka hrechiang ta tak zet zet a ni.

"Engvang chuan maw, a chhan min hrilh tur a ni" ka han tih chuan, reife chhung chu a ngawi ta vang vang a. 

A mittui chu a parawl tuau mai a, zawi sap hian, "Ka damlo a, ka na tak zet a ni" a ti ta a.

Ka thaw huai a, "Chungte chu i inenkawl ang a, i dam leh thuai mai dawn a lawm" ka han tih chuan, a hma aia lungngai zual niawm tak hian a vanvadak a, "Ni lo, ka damlo ka tih hian ka thi dawn a ni zawk. Thisen Cancer ka vei a ni"

Vawilehkhatah khawvel chu a reh nghal duk a, ka khawhmuh chu a phe ruai nghal bawk a. Ka ngaihtuahna pawh chu a chawl nghal vek hian ka hria. Ka thinlung chhungril ber chu dan rualloh hian a tap ta zawih zawih a ni!

She was so young!

A thih hma lawka ka va hmuh tum khat chuan, bathlarah hian thutthleng nghenchhan neiah ni lum ai pahin a lo thu dang bam a!

"Enge i an, i mu tha thei maw?" ka tih zawng ngawt pawh chuan ka hnuk a ulh a, pachan har ka ti ngawih ngawih a ni. 

Chu zawhna chu a mize nghet tarlanna pakhat nia ka hriat ngei hmang chuan, zawite-a nui chung chuan,"Ka tha a lawm, i mut a tui zawk maw?" min ti hlauh anih kha!

Ka lam a rawn hawi a, a chalsam uai hniang hui kian pah chuan, "Ka bulah hian lo thu hnai la, khua hi a mawi bawk a; ka rilru ka hrilh mai mai ang che" a han ti a. Lungchim takin a bulah chuan ka zuk thu ta a!

"Kan intawn hmasak ber ni khan, ka thinlung chhungril ber pindan thima lei khekahte chuan Pangpar hi ka hriat miah loh hian an lo tiak a lo ni a. 'Ka hmangaih che' min tih zan phei kha chuan mutmu reng reng ka tuah thei lo. Damlaite nun chu mang ram aia a duhawm miau vang a ni"

A mitmeng chau tak chuan mi melh vawng vawng a, tawng tuma ka ka ka'n ang zauh chu a kut chak tawhlo tak chuan a rawn hup a, "Ka natna kan hriatchhuah tirh phat atang khan, engkim hmachhawn tur hian ka inpeih a sin. Ka nun pawh Ka Pathian duhdan ang taka nuam tak leh enghelh nei reng reng lova hman liam ka tum a. Mahse nang hi chu ruamhman lawknaah chuan i telve ang tih ngaihna reng reng ka hre lo a ni!"

Chu thu chuan ka thinlung chhungril ber chu hriau hmawra vih ang sawk hian a khei thi nghal a! Thu leh hla, amah kawm hlim tuma kawng ka kal laia ka khawlkhawm zawng zawngte chu kawlkilah dan rual lohvin an liam vawng vawng a ni ber!

Ka rilru ngaihtuahna chu ka hmelah chhiar theihin a lo lang chhuak a ni chek ang chu, a kut cher tawh tak chuan ka hmai chu thei leh thei lovin a rawn chul a, "Ruahman lawk ni si lovah chuan ruahman lawkna khum vek khawpa ruahmanna duhawm i ni ang tih ka hre phak lo a ni" a han tih chuan ka lungchhiat hi a zual ngawih ngawih a, tah hawm hawm baka nawmna thlentu engmah ka hriatlohna chu ka haw ta ngawih ngawih a ni.

Zawi muangin a lu a her rem a, kawlkila sava rual thlawk chu a thlir vawng vawng a, "Nang nena tarkun thleng dam dun a, hringnun duhawm ber ber chhiar dun tluka thlakhlelh reng ka nei lo! Thihna chu ka hlau a ni lo! Nang nena hun kan hmang tam thei lo tur ka ngaihtuah chang erawh chuan, ka Pathian pawisawi hlau tak chung hian ka thinlung ril ber atanga lungngaihna infawkkhawm chu ka mittuiah a rawn far thin a ni"

Vante u, lei thuahthipa sualna avanga hrem tuar mekte leh van chhawng sang bera hmangaihna par tlana hlimna kawltu zawng zawngte u, eng chu nge in fanu hian a tihsual palh a, in lungawilohna chu a chungah in burbun tak mai le?


Ka thinlung chu a saruak vek a, khuarkhurum mawng nei lova thlak pil vawn vawn ang maiin ka ngaihtuahna chuan mumal reng reng a nei thei ta lo va!

Recollection of the past - II

Confession !

"I hnenah hian thuruk sawi ka duh tlat a ni" a han tih chuan ka ngaih a tha tehchiam lo.

"Enge ni ta a?" ka ti chhuak thei hram a.

"Khawvela nui hmel ka hmuh tawh zawng zawngah, i nui ver ver tluka mawi leh hmuhnawm tih reng reng ka la nei lo" nui pah chuan a ti ta rohva!

Chutia ka rinloh tak maia mi han tih takah chuan ka hamhaih a, minute khat dawn chu amah thlir reng pahin ka ngawi ta ringawt a!

Muangchangin ka hmui ka siam rem a, "I hnenah hian thuruk sawi ve duh ka nei a" ka'n ti ve ta ngawt a!

"I duh phawt chuan thutak pawh han sawi ta poh che" mi han ti a.

"Khawvela hmuhnawm leh mawi i tih ber lo awm chhan chu tudang ni lovin nang ngei hi i lo ni e" ka'n ti ve ta hnap anih kha!

Ni, hmeichhia hi chu an mak a ni. Lawmthu sawi hi an thiam em em tlat zel! Nuih sak pahin ka kut a vuan a, ka tukhum chul pah chuan ngunthluk tak mai hian mi fawp ta vawng vawng a!

A mi fawhna chuan kan thinlungah naupan chhiatna a rawn thlen a, hringnuna ka kum tamna chenin a eiral riai riai ni ber hian ka hre ta hial a!

A Thi Ta !

(In memorialise of something good)

A natna ka'n hriatchhuah atanga kar thumna chiahah a thi ta a. Chumi hma kar khat vel a la awm anga tih turah tum khat chu kan pahnih chauha bathlara kan inawmtlei laiin,"Thil pakhat min tihpui thei ang em?" 

A aw chu zawi hle mahse a fiah tha hle a, phutna awki ka hriat tawh a zawngah chuan phutna chhan chakawm ber a ni hial ta ve ang.

"Tehreng mai, engpawh tihsak che a, tihpui che ka huam tih i hria a lawm" ka han tih chuan mawi tak, tawi tak si hian mi nuih seih a. 

"Ka nu thlanah mi zuk hruai la, hun fianrial mi zuk hmanpui la ka duh a ni" a ti ta a. 

Chutia a tih paha a mitmeng ka enchimloha mi han melh dan mawlh mai kha, hmuh leh ka chak thin!

Ni, mi hnena thil a dil emaw ngenna a siam reng reng hian, hnial har tak maia thinlung dek a thiam em em a. Mi thinlung hneh erawh a tum a ni hauh si lo! Amahah chuan mi hneh theihna thuruk a awm ni ber hian ka hre zawk. 

Motor ka zuk la a, Thlanmual thleng motor-a kal theih anih avangin muangchangin Thlanmual kan pan dun ta a.

Kan Veng Thlanmual atang hian Bangladesh ramri a lang ruih a, ralkhat atanga hmuh phak chinah Lungsen, Thehlep, Hauruang, Vanhne Thuampui khuate an awm bawk a.

A nu thlan chu a lo hnawk niaih a, tifai tura hun remchang nei an awmloh avangin ka theih ang angin hnimte chu ka han pawt fai zung zung a.

Thlanlunga thu inziak ka chhiar chuan ka rilru a na thar ta tlat a ni. Kum zat ka zuk enin, chhiarkawp dana number tam a ni tlat lo tih ka hmu a, chu chhiarkawp aia tlem ngeiin ka duhber thlan chu an la ker ve thuai dawn a ni tih ka hriatchhuah tlat avangin.

Chu ngaihtuahna chuan a rukin nasa takin mi vel chiam a! Thinlai ril bera natna vawrtawp lo thleng avang chuan thluak hnathawh a chawlawl nghal a, ngaihtuahna fim chenin chhem bovin an awm zo ta!

Ani pawh ngawi rengin a nu thlanlung chu a vuan a, tah erawh a taplo! A nu nena an intawh hun a hnai tawh tih a lo hre daih tawh a ni ngei ang! Chutiang ang ngaihtuah chhuahna thinlung lo pai ve ni ila chuan, ka thawipikna kha tlemin a kiang tur a nia!

Dar chanve dawn a nu thlan kianga a awm hnu chuan muangchangin a rawn tho chhuak a. Thlanmual thar chhipa Bukah chuan kan chho ta a. Ngawi rengin ka kut a vuan a, kawlkil eng mawi tak mai chu a hmuh hnuhnun ber tum niawm tak turin a thlir ta vawng vawng a.

Chu hun dangdai takah chuan Ni thlar chu rawng eng, a sen leh a dumpawl hian an inchawih chiai a, vanrang chhum them kara Ni zung rawn thlur sung maite chu Chhimbal rawng ang mai hian an chikim bawk a. Ni zung rawn lang hnuhnung apiang mai chu an hmuhnawm emaw tih mai tur a ni.

Vante chu rawng sen, a sendang leh rawng eng ten, Van kawngka rawn inhawng atanga, Vante ropuina lo luangchhuak ang maiin an pawlh mawi ta a!

"Sawtiang ang taka mawi, duhawm leh hmuhnawm saw ka la hmu ngai lo reng reng! An va hmuhnawmin ka Pathian hi a lo va themthiam tak em!" tiin kawlkila Ni tla tur thlir reng pah chuan a han ti sap a.

Chutia a sawilai chuan Amah chu ka thlir ngawih ngawih a ni tih reng a hre lo!

"Kei pawh tiang reng renga thil mawi, duhawm leh hmuhnawm, Pathian kutchhuak hi ka la hmu ngai bik lo" amah en reng chung chuan ka ti sap a!

A thihni a ka awmdan chipchiar sawi ka tum rih lo! Mahse khawhar lenpui zan khatna-a ka thu chham erawh ka'n tarlang hram teh ang!

'Famrolungmual i liam ni khan,
Hmangaihna mittui leh Saron par ka thliah che kha;
I sakhming ka thinlaiah rial angin dai suh se,
I sakruang ka enchimloh nen;
Ka thinlung phekah hmangaihna tui chiah ngei chuan,
Kan intawn leh huna kan chhiar dun atan ziakin ka vawng tha nang e!
Lei pangpar mawi a chuai ta, 
Duhawmna hman dak thianloh kawltu chu;
Pathian faten a partlan an chak luatah;
Hringmi thinlai na tur reng dawn lovin,

Vantual mawi ve tawh turin min chhuhluih sak ta si maw!'

Recollection of the past - I

It's been a long time ago! She was sick and about to die!

"I hlauthawng em"

Engtin emaw tak hian Amah ka hriatchian em avang zawkin 'Hlau love" tia min chhan ka ring a. Pathian remruatte chu mihring dan theih a ni lo va, puitling chuan ngaihthatnan dawt var kan sawi thin tih ka hre reng si a!

Thei leh thei lovin a lu a her remin, mi thlekna lam chu thei leh thei lovin a han sawn a,

"Aw" a tawpah chuan a han ti a.

"Englai pawhin ka hlauthawng a lawm"

"Mahse, i va lantir ngai si love?"

"Lantir ngai e, a rukin ka lantir reng a lawm"

"A chhan chu mi rintawk loh vang a ni maw?"

"Ni love, nang pawh i hlauthawng em em tih ka hria a lawm. Mahse chu aia hlauh zawk chu ka la nei cheu a sin!"

"Enge ni le?"

"Nang nena hun kan hmang tam thei dawn tawhlo tih ka hriatna hian hlauhthawnna namenlo mi thlen zawk a ni!"

Ani chu Hmeichhe dang reng a ang lo, a lo lan tawh chuan kan vai mai hian sual ta bik riaua inhriatna, Inthurual tak maiin kan nei tlang tlat zel!

Ka lam hawia a rawn inher rem phei chuan, eng sual pawh ti lo mah ila, dam ve tlakah ka in ngailo hial thin!

Hun reilote chhung niin thawnthu bua inziak ang pawh a ni lo. Mahse kan infawh hmasak berna chu engtin emaw a nuam riau a, ka thil hriatchhun pawh engtikah mah chu hun danglam bik chu ka theihnghilh tawh ngai lovang tih hi a ni thin!

"Vawiin a ka thil zirchhuah i hre duh em?" a han ti a.

"E, sawi ta che, ka lo ngaithla kiau dawn nia" ka ti a.

"Pathian hian keimahina ruahmanna ka neih aia lian hian ka tan ruamhmanna lian zawk a lo nei reng tih ka hrechhuak a. Ka damlohna avang hian nang hi ka hnenah a rawn tir ta che a. Ka hun reilote chhung chu nuam tak leh hlimawm taka hmang thei nan. Ka tan chuan van atanga hnemtu Vantirhkoh lo chhuk i ni reng si a!"

Ka nghilh dup a, aw reng reng ka chhuah thei ta lova!

Cabin Love!

Lunglei Civil Hospital Cabin kha tuna kan Cabin neih ang hi a la ni lem lova. Ka pa thahnemngaihna avang chauhin (a hnuah chu pawh chu ka hrechhuak chauh, ka la sawi ang) Cabin No. 1-ah chuan (Cabin hi 4 chiah a awm) kar khat lai a awm tawh a.

Chumi ni chuan ruah a sur cherh cherh a, chhum a zing chiai chiai bawk a. Chawhnu dar 2 vel ni ta-in ka hria, Cabin lam pan chuan ka kal leh ta a. Khua a hnim ang bawkin ka rilru chu a harhvang mawlh lo. Mite chu an duhberte hnen pana an kalkawngah hmalam beiseina duhawm tinrengte nen an kal thin tihte ka ngaihtuah a.

Keia duhber panna kawng ve lem nakin lawka thenna, thenna rau rauah pawh thenna chiangkuang ber mai; damlaite zinkawng tawp, ka zawhve tur ni bawk si lo a ni si a. Chu ka kalkawng han thim em em zia leh khawharthlak em em zia chu, thlanmual meuh pawh ka kalkawng ai chuan a khawharthlak loh ta ve ang!

Ka thiam ang tawka mawihawih leh nelawm chuan ka nui lut sang a,

 "Vawiin lam chu khua a nuam si lova, i nat a zual phah hial lo maw?" ka han ti ngawt a. Ka inchhir leh nghal tlat.

Ani lakah chuan ngaihtuahna thim lam chi reng reng hian hmun an chang ve ngai lo tih ka theihnghilh a, ka thinlung pindan thima hnukluh ka tum tih ka hrechhuak tlat a ni.

Hlim taka min nuih seih pah chuan, "Ka Pathian hnenah i hnena ka duh sawi phalna ka lo dil a, i lo lan takah hi chuan ka khawvel zim zet mai hi a tet ang ang hian a mawi a zual thin"

A theih ang tawkin rilru inhawng tih hriat em em hian a nui hawk hawk a, min hmuh avangin a hmaifangah chuan lawmna thisen zam a rawn lang chhuak hial a ni!

Chutiang mi lakah chuan engtin nge lungngaihna hmel i chhuah reng theih ang a, lungzing taka i khawsak fo theih ang ni!

Chu lungzinna hmuna min hruai chhuak a, leilung mawina tinreng an parvulna hmuna mi han chentir dan mawlh mai hi theihnghilh har ka ti thin!

"Ka thinlung pindan, tu tan maha hmun ka la pek ngai reng reng lohvah chuan hmun nuam leh duhawm ber i rawn nei thei a. Lei thil leh vaivut mai mai ka thehna hmunah ngei chuan pangpar mawi takin i rawn vultir ta si a.

Nang hi chu tawng miahlo che pawh ni ila, ka ngai veng veng che hian ka inring thin a ni!

Ka hmangaihna che hi leili hausakna khum sawi rual loh, mit hmuhna tinreng aia mawi chungchuang; zalenna ai pawh a hlu, nunna hnar boruak aia thianghlim a ni si a.

Ka nihna sual ber chu nang ka hmangaihna che hi a ni si.

Ka hriat miahloh lai khan ka timur tinah rawn vak lutin, ka thisenzam tin maite chu i rawn bei a, ka thinlungah hnehna i rawn chang ta si a" tiin khawvel a parvul tir anih kha!

Lei leh van kara kei mi suaksual tlaktlailo, hmantlakna awm lo tawp; englai pawha ke chheh sual reng lakah, Lasite tang bela duhawmna tinreng kawltu damna chu khawiah nge a awm a, a man chu thihna pawh ni se tu hnena pek tur nge min hrilh lul rawh u!


Hmeichhia a zawnga minu tih hlawh zo, a hmelthatna leh duhawmna zawng zawng belhchhah tura a hringnun vawng thianghlim a, uluk tlat mi, ama nun ngei atanga hlimna leh lawmna chharchhuaktu chuan tupawi nge a sawi a, Natna khum chu a hahchawlhna hmunah a chan tak mai ni?

Troy (Mini Epic)

Inremna thuthlung sa-ui tan dawhkan,
Zan thim hnuaia bawhchhetu hmangaihna;
Helen hmeltha-i zuna uai Paris,
Troy khawpui chhiatna bultumtu ngei chu!

Lal fapa hmeltha Paris-a zun chuan,
Kawtthler lanu lengtin thinlung pelin;
Menelaus-a pindan ril ber neitu,
Helen-i thinlung a run chim zo ta!

Greek lal ropui ber Agamemnon-a,
Duhamna tinrenga khat mi chapo;
Unaupa chhiatna hmanga hun remchang,
Bawhpelh ngai lo mi chuan indo puang ta!

Hringfa zinga pasaltha ropui ber,
Achilles, engvanga pasaltha nge?
A duhthlan reng vang zawng a ni lul lo,
Pasaltha tur renga piang, Greek innghahna!

Pasaltha, nunna titawptu atan,
Pathian ten malsawmna anchhia an pek;
Nunna nghaisa tura chhul atanga,
Hual lawk, tu thuhnuai maha leng ve lo!

Hector-a, lal lungmawl Priam-a fachuam,
Troy mipui innghahna, an hahdamna;
I nupui hmangaih la, pathiante zah rawh,
I nun chhalin i ram chhan rawh, titu!

Pathian ten itsik taka an en hringmi,
Tawp hun nei nunah engkim mai mawiin;
Hriat lawk loh vanga nitin hun mawina,
An tan chan ve rual loh thihna kut vawt!

Zalenna chu hmeichhe lawmzawng niin,
Indona kaltlanga thisen luanna;
Pasaltha tam tak fam channa hmanga,
Lalram chu tihropui a ni si a!

Pasalthate tan Troy tiau piahlamah,
Hmingthanna chuai thei ngai tawh lo tur;
Chhuan za tam liam hnu pawha an hril tur,
Chu ngei chu thih chhan tlak a ni si a!

Hringnun indona hmun tinrengah hian,
Hmeichhiate bawk hian a ni nunkawng hi;
Tibuaia ti harsa thin ni ti a,
Brises-i zuna uai buai Achilles!

Indona chu pasalthate famna,
Putar ten chapo taka an hrilchhawn;
Sipai ten hnehna an chan thinna hmun,
Ropuina erawh lal ten an khumna!

Troy indona, indona a zawng a,
Ropui ber leh leilung a hriatreng tur;
Pasaltha indona beitute hming,
Englai maha dai tawh lo tur chu le!

Greek pasaltha sing rual lo kalkhawm ten,
Mi pakhat duham vanga hriam an lek;
Troy kulh bang rinawm laka an tlawmna,
Thihnain ang khata mi a zuk chu!

Inbumna thangtlawm ber lawmpuina ngei,
Duhsak lantirna chhiatna zawng zawng bul;
Khawpui ropui kehsawmna bumna vang,
Kumkhua atan a chim tak vei ni le!

Hriatrengna duhawmah lo chang rawh se,
Mi thenkhat chuan ram zau zawk it vangin;
Thenkhat ten thiltihtheihna um vangin,
Indona atthlak an chawkchhuak si thin!

Nimahsela, hmangaihna avanga,
Indona chu a ropui zual bik a;
Chhan leh vang lo piang rau rau zingah pawh,
Pathiante thik thamin a ropui e!

Sonnet Collections

My Chapchar Kut Miss

Among the festive crowds of gathering,
Wherein each walks of maiden beauty dance;
Merry and love is in the air singing,
Mine eyes they stole with ease and burning pace!

But one stood fairer than above all else,
The field's chief flower, sweet above compare;
She red and hot as coals of glowing fire,
More red and white than doves or roses are!

She looks as fair as fiery pointed Sun,
Rushing from forth a cloud, bereaves mine sight;
Bewildered, the curtain drawn mine eyes begun,
Winking, being blinded with a greater light!

O fairest mover of this mortal soul,
Would thou answer my love for thee soulful!

Ka Hlauthawng Si Thin!

Life is but a quick apprehensive doubts,
Go forth but forswore the future unsure;
In vain but hopeful battle fought in bouts,
In thee my hope and fear doth strife for sure.

Ashamed I think thee on a spring clear night,
Alone i think thee on quiet winter night;
Thou art flee me when mine eyes lost its sight,
Thou art acquiescent when but held so tight.

Love is but a playing field full of fear,
Improvise ended in one deadly strike;
Victor arise in skillful move with cheer,
But doubts doth thrive upon my shameful praise.

Thou art deny nor admit thoust desire,
A skillful play i endure with mine heart;
Bleeds profusely upon each songs and rhyme,
Yet doth it steal sweet hours from love's delight.

But still is best, the best i wish in thee,
This love i have, still ten times happy me!

Sonnet

In accumulations of many years,
When life spent Nay, even hardly o’er spent;
Pain is in plenty joy nowhere but tears,
Death is but a graceful blessed boon sight!

O! Horror beyond all bearings to see,
Of Foulest disfigurement of the mind;
That i ever know of cruelty not free,
Insensate agony of soul be blind!

O agony! Where thou am i but lost?
Is this not my voice and cry doth i heard,
An unspeakable horror i heard most,
Too terrible a sight for eyes but fled.

My eyes grows dim and my soul hath remove,
Killing myself, death by a kiss of love.

I Do!

Is it just a dream, a most wondrous dream?
Upon the rocks, under the golden tree,
Beneath the green forest of old i scream;
A cupid's arrow pierce mine heart it free.

I fell upon the grassy green in vain,
In the land of no ill will but mine;
I roam an eternity with no pain,
She touch mine face, whispered a word so fine.

A weakened eyes saw a maiden so fair,
A sin of lustful love possesseth me;
Allure to die the very breath of air;
With softness i whispered, “Couldst thou love me?”

“Yes, i do” for dreams doth come true in life;
But dreams doth often ended up in strife.

The truth About You Is Beautiful!

If there ever come a day in this life
When ye no longer feel thou love for me;
When thy heart betrays me heart with old say,
Let that day be seize by darkness and shame;

Let the day not joined the days of the Sun,
And not come unto the number of months;
And let it be solitary shaken,
Let no joyful songs come within all songs.

Let them curse it that curse the day and chide;
Who are ready to sing their mourning song,
Let the moon be at its darkest with pride;
Let the dawn be ceased to exist upon long.

For the truth about thee is beautiful;
No other love but thou art’s wonderful.

Ode to Summer

Nipui thaw kara hringnun harh thawm,
Hringnun hlimthla duhawma inlar;
Thlasik nguaina puan ang an chul thawm,
Kum upatna lam theihnghilhna par;

Lungkham buaina lam an kimki a,
In duatna der lam an bihrukna.

Tuna theirah rimtui lunglawm kha,
Hringmi vanglai duhawm iang an par;
Tawih tura hringmi kan vul ang a,
An parlai biangno uaia chul tur.

Tunah erawh thingtin zar belin,
Sirva ten hlimzai an vawr suau suau;
Thing hmun hring cham del mawiten bawmin,
Hmangaih hla thlifim a tleh siau siau;

Thawnthu lungchhiatthlak an hril vel e,
Hringfa leili reng an ngai lo ve.

An zawipawl hla min zawm tir ve ru,
Perhkhuang hmanga hmangaih hla hrilin;
Nipui hlim thawmri chuan min tuam ru,
Berhva zuanzang iang zai remve in;

Thlipui hrang hlauhawm pawh lo hnai se,
Chhingmittui far ka khuahkhirh nang e.

Hringnun chu inngaihsak tawnna-a,
Khuanu’n a din leh duan a ni si a;
Tang nem bel tura luaithli nul a,
Lungngai thin nun pek kan ni si a;

Nipui khaw thiang duhawm tak ang hian,
Hringfate lungngaihna pawh muangten;

Kawlkungah an liam leh si thin hi,
Nipui a lo thaw, i hlim ang khai!

Blank Verse 14 Lines Collections

Blank Verse......

Ka hmangaih kumkhua atan a liam ta,
Hriatrengna ten chil an tiput si thin;
A aw tham mawi tak, a hmui no duhawm,
A kut nem no tak, a mawngbawr itawm!

A kamchhuak hla mawi, hnute khal nalh tak,
A sakruang hnawm tha tak, mitmeng lungrun;
A ruangam sawiselbo, kechheh mawi hluan,
Hriatrengna thamral lo ka duhtak chu!

Favang khawthiang nuamin a liampui tak,
Pangpar vul laite an tiltiah zawhna;
Rose par ten vullai ni an kham tan hun,
Leilung mawina tinreng an liamna iang!

Tlai ni tlak ruala tawnhriat duhawm ber,
Zan thlifim hnuaia hriatrengna chang ta!

Thou art. . . . . ?

Aigupta hripui vei tluka tuarna,
Thinlung leh mit hmuhte insualna chu;
Ka hringnun khawngaihthlak tak pachhiatna,
Ka hmaifang chuar khawlohnate ngei chu!

Meichher chu chhit en atana an siam,
Rangkachak pawh thuammawi atan an duan;
Chhang tuihnai tak pawh ei atan an siam,
Hmaifang thatna pawh hman atana duan!

Thilsiam mawi leh duhawmte fakna ri,
Leili thiamna tawp hmanga chawimawina;
Thangtlawm taka ngaihna chu sualna hri,
Thuhnu dawn lek lova i huaibakna!

Chuai tir mai suh sual huat i duhawmna,
Parvul tir rawh nun thianghlim ka mawina!

Mi chhiar rawh.....

Mi tam tak ten an chhiar theih tur atan,
Ka nunphung leh mizia ka pholang lo;
Ngawichawi tak nunphung nei mi ka ni a,
Phungthlukna nazawng ka ngaina hek lo!

Tichung a i laka ka nun ka phawrh a,
Phungthlukna nen tawngkam ka cheh si chuan;
Ka nuna mibik tlemte ka tihte,
Chung zingah chuan i tel tihna a ni!

Chaklohnaa tinrenga thuam ka ni a,
Tahna ruamah ka cheng ve fo bawk e;
Ngui taka awmchang ni ka ngah a,
Hmangaihnaa hliamin ka awm tawh si!

Mahse hlimna chu ka lak atanga,
A bo hlen ka phal ngai dawn si lo va!

An phu rual e.......

Ka duhtak thinlung pangpar huan duhawm,
A hual velin parmawi rimtui an leng;
Hriatrengna par duhawm chawm seilen nan,
A mittui thianghlim a surtir thin a!

Chung hmunahte chuan hlimten nui hiauva,
Zal chang ni ten pangpar an parvul thin;
Hmangaihna par rimtui fawn vel kara’n,
Vanram chu leiah a rawn insuan thin!

Khawvel hian hre mawlh teh se ka ti e,
Hmangaihna a awm ngai anih si chuan;
Ka hmangaihna i tan ka hlan nang e,
Hmangaih vanga pachhia an awm em ni?

Nang chauh hian a ni ka thinlung ril hi,
A ruala phut ran muan tir thei awmchhun!

Tah Hla......

Ka hmangaih kumkhua atan a liam ta,
Hriatrengna ten chil an tiput si thin;
A aw tham mawi tak, a hmui no duhawm,
A kut nem no tak, a mawngbawr itawm!

A kamchhuak hla mawi, hnute khal nalh tak,
A sakruang hnawm tha tak, mitmeng lungrun;
A ruangam sawiselbo, a kechheh tinreng,
Hriatrengna thamral lo ka duhtak chu!

Favang khawthiang nuamin a liampui tak,
Pangpar vul laite an tiltiah zawhna;
Rose par ten vullai ni an kham tan hun,
Leilung mawina tinreng an liamna!

Tlai ni tlak ruala tawnhriat duhawm ber,
Zan thlifim hnuaia hriatrengna chang ta!

Ka Thlang Zawk.......

Ka hringnun kum tam hman liam mekah hian,
Kawng hrang hrangin dawhtheihna ka tlachham;
Midang chaldelh nun ka pai ka ti lo,
Hringnun kailawnah min tihnual theitu;

Natna hmuna min hruai thei hringmi te,
Mi kherkhiap lutuk, selna chhak sam nun;
Nei mi lakah ka dawhtheilo mai zawk,
Mi ngaina lotu tihlawm chakna te;

Hmangaih lotu va hmangaih let tumna,
Chutiang rilru ka pu tawh ngai hek lo;
Hriatthiamna leh dawhtheihna nun nei lo,
Chhungril nun tuiek, mi dawheh tak leh;

Fakna derte nena khawsak tlan loh,
Ka thlang tawh mai zawk tihna a ni e!

A Kumkhaw Ro.......

Hmeichhe hmaifang khuanu kuta cheimawi,
Tisa zauthauna chunga thuneitu;
Siktui iang a thinlung kawmnel theih loh,
Hun reilote chhung pawha incheina;

Danglam thin ang thinlung bulbal nei lo,
Hmar arsi aia eng mitmeng fiah si;
Hun kartla chhung khap sual nei reng mi chuan,
Mipa khaw hawina ruk zawh sak zovin;

Mipa damchhan hlutna thlen belh ngai lo,
Ruh nei lo thiltihtheihna nei Lei ang;
Mipa thinlunga hnehna changtu chu,
Damchhung atan ka chanpual lo niin;

A nawmsip mi bawl khumna zawngte chu;
Hmeichhia, i kumkhaw ro a ni si maw?

Hun

Sana hmai kual atanga hun chhiarin,
Ni eng zan thim hnuaia pilbo thin chu;
Vanglai tha uaia chul ta ka hmuh nen,
Ram hmul dum tak lam an lo varna chu!

Thing sang ber hnahte an tlakkawlh zawh a,
Ni thlar hmasa ten thlai an chawm zawhah;
Nipui hnah chawrno lam an chul zawh a,
Hmaifang mawitu hmul reng an tuah zawhah!

Hmelthatna chu eng nge anih tak le?
Hun khawhralna nang chu liam tawh mai rawh,
Nelawm leh duhawmna pawh inban se;
Rang takin pakhat zawk thihtir mai rawh!

Hun favah lakah inhumhimna reng,
A awmlo, huai taka lo hmachhawn bak!

Min Hlan Rawh!

Hun chuan upa tiin mi thliar suh se,
Hun khata nang nen kan zal dun si chuan;
Ka hmaifang lo zur chuai deuh tawh mahse,
Thihna em tawrhna lo thleng si lo hian.

Duhawmna tinreng i khawlkhawm  zawkin,
Ka thinlung puanzar kaihthlera awm chuan;
Nang leh kei pumkhata min siam zawkin,
Hunin kei ngah upa bikah mi puan?

Aw ka duhtak, engah nge i buai ni?
Ka tan ni lo i thatna tur zawkin,
Fimkhur taka nang ka pawmtlei che ni;
Duat taka damlo an enkawl angin.

I thinlung chu hlan let tawh loh turin,
Mi hlan rawh ka vawnhim theihnan.

Dawt a sawi e!

A ni chuan thudik hmanga chawi seilen,
Inti mahse dawt a sawi tih ka hria;
Awih suh ila lungfing lo mi ti ang,
Inbumna khawvela themthiam ve lo;

Sawt lo takin mi rualpui kawm theih nan,
Hmui lei daw thei chu ka tawmpui ta a;
Hmangaihna vanga pawnlam chhe pawmna,
Hmangaihna vang veka chhungril hahchawl;

Leili’n hahdam taka min siamna chu,
Hmangaihna nungchang mawi tak a ni e;
Khuarei ka kum tam sawichhuah lohna chu,
Chuvang chuan ka hmangaihi chu duat ten;

Tangah nemten ka chawi seilian nang e,
Kan kar hmangaihna chu a tluan theih nan.

Hun

Hun, keipui tin zum lam tibil thin a,
Leilung chhulchhuak duhawm zawng zawngte pawh;
Leilung awp keu chhiatnaa lemzo thin,
Keite ha chakna lam sawinghingtu chuan;

Hunbi lawmawm leh lungngaihthlakte chu,
Hringnun a fankualna hmanrua niin;
A nawm a makin tal zalen mahse,
A lakah khapna thupek ka chhuah hi;

I hunbi darkar tin chhiar thinte chuan,
Ka duhtak sakruang chu ker chak suh se;
A chaldar leh mitko tichuar zawng paw'n,
Hmakhawsanna ziaktui chelek hek suh;

Nang hun upa, chhiatna tinreng thlenin,
Dik lo taka tite nuaichimit rawh;
Ka hmangaih erawh ka hlahril tinah,
I khawihchhiat phak lohvin a leng dawn si.

Romanticism Poetry!

Tuipui ang maia thahrui chakna pai,
A tui a fawn emaw a dam diai emaw;
A ngawi reng emaw a lem chuang lo ve,
Englai pawha tlakpil thut thut theihna;
Dinhmun hlauhawma dinna a ang si,
Nimahsela, ka tuiluang fawnte chuan;
Tuipui pawl ruih lam an panlui zel a,
Aw! Nang tuipui hrang hlauhawm leh duhawm;
Tuipuia rauthla iang ka vahvaihna,
Kumkhua 'tan i titawp thei hram lawm ni?

Terza Rima!

Hringnun laibu tual hman mekah hianin,
Hringmi mitin a hmuh ka sawifiah a;
Hringmi suangtuahna ka thairang bawk thin!

Suangtuahna ten mawihluan an tihte chu,
Tak ramah pawh an mawi duhawm ngai a;
Dik leh fel hmanga suangtuahna ngei chu!

Tak rama ka hmuhfiah leh hriatfiah chu,
Dawt thuleng mai an chang ngai lo tiin;
An nihna tak ka tem hmasak thin chu!

Rimawi lungleng benga hriat an nalh e,
Rifan duhawm suangtuahna tham thotu;
Chu ngei chu a mawi chuangchuang e!

Pachuau Lunglen Hla

Tlar Thum Zai

Hmartlangah Tuktinpar ka tan a vul,
To lo val lunglen tizual turan maw;
Thuva awmhar zun ngai a lo tap e!

Chung khaw riin vanrial a ngen iangin,
Senlai nau ang nawrh ka nuam chun tawnah;
Tuktinpar vullai ka tan thliah ngenin!

Khuangruah surin vanrial a ko ngai e,
Tawnmangah tal tui ang i luang hmun ang;
Vahkhuai ianga parzu thlum tlan ve nan!

Chawnin lamthang a relin rel mai se,
Hawh Zopui, zal lai i rel dun ang i;
Val riang zun ngai nau ang tah ban ve nan!

Nang ang reng ka duh zaleng an awm lo,
I runah khamrang khuai ang kai ka nuam;
Chutin ka bang ang suihlung lam len chu!

Parte a leng der der e!

Sawithiam a har nghilh har ka di lungrun,
Tlangza relthang phurh zawng ka zuam na a;
A ngurpui leh khawtlang ten min tuarpui,
Ka ring lo nang ngaia ka lunglen hi!

Zaleng dang tawnah hawilopar thliak la,
Lungloh tui ka tawnah khiat nang che aw;
Kawvalen chham romei zing ruai hnuaiah,
Lungrun chhawn ang ka tawnah uai reng rawh!

Ramloh laksang lam an nuar ta em ni?
Chung turni kal lai vanzawlah a a chawl,
Di ngaih vang em ni, ni a rei vawng vawng;
A len hian lunglen par a leng der der!

Miten di tawnah Ainawn par an tiam,
Kawkpui par em zawng mi tiam lul suh aw;
Hrai tam chawiin sakhmel hai ang tar se,
Bang thei hian ka mawi lo, nang ngaih lunglen!

Lunglen Hla

Sibpui zingtian lelte kiu changin,
Mi han ngai ve ang maw, Thadangi’n?

Chul thum tlan berhvate mah sawnin,
Par tin tam a lawr lo nilenin.

A iang la par ka lawr bil lo’ng e,
Pualhrang thing lenbuang cham chhung zawng chu.

Huivate, hram tin thiam lo leng la,
Ka lungdi Thadang mi kohlul roh.

Tlar Thum

Hmartlangah Tuktinpar ka tan a vul,
To lo val lunglen tizual turan maw;
Thuva awmhar zun ngai a lo tap e!

Chung khaw riin vanrial a ngen iangin,
Senlai nau ang nawrh ka nuam chun tawnah;
Tuktinpar vullai ka tan thliah ngenin!

Khuangruah surin vanrial a ko ngai e,
Tawnmangah tal tui ang i luang hmun ang;
Vahkhuai ianga parzu thlum tlan ve nan!

Chawnin lamthang a relin rel mai se,
Hawh Zopui, zal lai i rel dun ang i;
Val riang zun ngai nau ang tah ban ve nan!

Nang ang reng ka duh zaleng an awm lo,
I runah khamrang khuai ang kai ka nuam;
Chutin ka bang ang suihlung lam len chu!

Lung a leng e!

Hmar a hnim, chhimah khuangruah sur buan e,
Lungleng tawnah nun suar ang chim lo la;
Zun ngai ka tuaran ni nem duai reng se!

Chhingkhual lungdi ngaih reng a na nia maw,
Ni chhun khat mah tuanpui loh zunlengin;
Awi, ka tanglaiah mi hmer vawng vawng e!

Ka dawn lungruk Zopui mah kur lo maw?
Ka dawn loh Rengte tlang phuai lenbuangin,
Lelte a kurpui diam diam mi ti riang!

Tlar Li

Zingtian Tuktinpar vul thlang lenkawlah,
Zan thiang kara a chuai ka thlir ing e;
Thing lenbuang par dumde mei det kara,
A par tiltiak ka dawn chang nite hian;

Buannel tharsa val tha tawnah chuaiin,
Siktui luang kiang berhvate zai chawl nen;
Khua thal romei chhum tlang bawm cham rei lo,
Hringfa damchhung tawi ka dawn chang ni hian;

A ngur hraichawi chhawkhlei par iang vul,
Chawngtinleri khum tur renga chawilen;
I chungchang thu ka dawn chang nite hian,
Zawhna tin ten romei iang min bawh chiai;

Duhawmna leh thatna ten an bansan,
Tleitir tuai pianghlim khuaibel ang tam a;
Hlobet par iang i chuai hun thleng tur chu,
Sikpui ianga lo thleng ngei tur chu maw;

Ralpui iang hun do mi a ni ngai lo,
Ralven buk khuara tawmhim tumna pawh;
Khuangchera iang chak taka lo hmachhawn,
Hringfa huaisen sawifak tling i nei em?

Literary Piece Collections - II

Hringnun Literary Piece!

I hringnun chingchivet hman mekah hian,
Chapo vang emaw induh vang emaw;
Luhlul vang emaw pawh ni hek lovin!

Thil thenkhat leh mi thenkhatte tan bik;
I hringnun kawngka kharphui hmak ngam rawh,
Khawi hlimna leh lungawina hmunte mah;
Hringnuna an thlen ngai dawn loh vangin!

Hringnun Literary Piece!

Natna i tawrh vang a na ta em em,
Silawng ta vek ni lovin a chang chuan;
Rilru chhungril khak leh chhiat vang zawkin,
Mihringte kan na ngawih ngawih thin si a!

A Piece!

I ngaihtuah let chang apiang a,
I la thinrim ziah anih chuan;
I thinlungah thuk takin zung,
I la kaih tir tihna a ni!
I la theihnghilh tak tak lo va,
I la zalen tak tak lo ve!

Literary Piece!

Rilru nat phah nana i hman hmain,
I thinlung chuan tihian ngaihtuah thin se;
Ka rilru natna chhan tur hian kar khat,

Thla khat, thla ruk liam hnuah ka nunah;
Pawimawhna a la nei ang em tiin,
Aih, tia chhanna vangin na hauh suh!

Nunphung dik leh fel chu hei hi a ni,
Titura min hrilh ang pawh thlauhthla a;
Thiltha leh dik tihluih talh talhna chu!

Nunphunga thuawihna kan tih ve thung,
Titura min hrilh ang ang ti chunga;
Thil tha leh dik zawkte thlauhthlakna chu!

Quatrain Piece!

Tuma chimbuai lohva hun hman nawmna,
I pawh tak tak a, i nunpui thiam hma;
Hmangaih vang nge Khawhar vangin,
Kawppui i thlang tih i inhre dawn lo!

Modern Literary Piece!
Tunhma ang lo takin tunlai chhanah,
Inngaihzawnna nun hi a dangdai ta!
Text hmangin titi zai kan vawr tawh a,

Thinrimna pawh phone hmanga hrithlain;
Thinlunga veite lah status hmangin,
Mitin hriatah kan puangzar ta si a!

Hringnun Literary Piece!

Airport hian thinlung ril ber atanga,
Lungchim taka infawh vawng vawngna chu;
Inneihna hmun aiin a hmu zing zawk!

Damdawiin hian thinlung tak tak 'tang a,
Pathian hnena tawngtaina tak tak thawm;
Biak in aiin a hre zing hle zawk bawk!

Love Quatrain!

Thingzar bela a zalna tang tin ten,
Zing daifim rawngkai lalthutthleng an iang;
A hmangaihna thlifim leng heuh heuh ten,
Sirva, chham ang an zal luihtir tak iang!

Hringnun Literary Piece!

Hringnunah hian a chang chauh hi zawngin,
An thiamthu emaw anmahni lam a;
Insawifiahna ngaihthlak kher ngai lovin,
An khawsak zui dan zawkin thudik tak;
An puangchhuak thin tih i hrethiam si a!

Hringnun Literary Piece!

Hringnunah hian mi tam zawkte chuanin,
Hun kalta hriatreng tur an nih hma chuan;
Tun hun hlutna an hrethiam thei ngai lo!

Hringnunah vek hian a rintlak ang nge,
Rin ngam tur a ni em tih kan buk hian;
Mi kan hriatchian tawk lohzia a tarlang!

Morning Piece!

La leh val inchhaina khawvelah hian,
Inpumpekna a nasat zawh poh leh;
Phatsanna lo thlenin nat a zual bik!
Kawppuite laka inpekna thuk zawng,
I laka an inpekna thuk zawng nen;
Buklung hmangin tehchhuak hmasa thin rawh!
An inpekna mila i inpekna,
Chu ngei chu a ni La leh Val phutawk;
Hmangaihna khawvela inpumpekna!

Philosophical Literary 8 Piece!

Thu vuvuk, puarpawleng leh,
Mi relna thuthang lengvel ten;
Mifing beng an thlen rual chiahin,
An kawng zawh tawp an thleng mai thin;
Mi a beng an thlen erawhin,
An punlun nasat a zual thin!

Literary Love Verse!

Hriatthiamna an nunah a awm mai lo,
Kumkhua atan tia i kalsan chiahin;
An nuna thilthleng duhawm ber i nih,
Hriatthiamna an nunah a lo thleng si!
Nuna hlohna leh channa lo thleng ten,
Hmangaihna an kaihthawh dan mak tak chu!

Evening Piece!

Hla thu lungkuai leh lungrun ber ber te,
I thinlung chiahzawp nan phuah ka ni nem;
Kan pahniha thinlung tuiral dun nan,
Hla thuril leh mawi phuah ka ni zawk 'sin!

Monday Piece!

Hringnun hriatthiam chakna khawvelah hian,
A tawp a tawpah chuan nang hriatthiamna;
Neitu hring milengte ai chuan nangmah,
Duh tak taktu che an pawimawh zawk ziah!
Hriatthiamna ngawtah hmangaihna emaw,
Buaina chinfel pui duhna tak emaw;
Harsatna hmachhawnpui ngamnate nen,
A awm hauh lo tih i hre dawn si a!

Six O'clock Piece!

Mitin hian nungchang pathum kan nei a,
Nungchang zawiawi leh nelawm tak neiin;
Nungchang phawkphawhraw leh thawveng tak leh,
Tuman an hmuh atana kan duh loh;
Nungchang inthukru mahni pawn lungten!