𝐓𝐡𝐢𝐤𝐭𝐡𝐮 𝐜𝐡𝐡𝐢𝐚𝐭 𝐡𝐢 𝐫𝐚𝐦 𝐡𝐦𝐚𝐧𝐠𝐚𝐢𝐡𝐧𝐚 𝐚 𝐧𝐢 !

         

       Mizo hnam ze ropui ber pakhat, ţanpui ngaite ţanpui duhna thinlung kaltlangin, mi ţhahnem takin CM Relief Fund-ah pawisa an thawh khawmin, an la thawh khawm mek zel bawk a. Chung pawisa tling khawmte chu, khamkhawp nei lo mi duhamte tân chuan itawm tham a tling tak meuh a!

 

            Chung pawisa tling khawm aţanga cheng nuai 10 lai chu lehkha them (pamphlet), Covid-19 hrilêng chungchanga hriat tur pawimawh zual tarlanna, mipui hnena thehdarh tur siam nân hman a ni ta a. Ram pum huap buaina a lo chhuah chângin, hetianga hriattirna thehdarh hi hmalakna dan chi khat a ni ve reng ţhin.

 

            Mahse, kan ramah ve thung chuan, mipui nawlpuiin he hrilêng laka inven dan leh do let dan zawng zawng kan hriat hlei hlui tawh hnuah, hrilêng hmachhawntu ber sawrkar meuhin inrenchem a ruahmanna kawng khat, tih loh ni se a tih zinga mi ngei ni bawk chu, hnawhsarumin he lehkha them hi chhuttir a ni ta mauh mai a ni!

 

            Mahse, mak tak a ni mak tak! Zoram mipuite tluka thikthu chhe lo, ram rorêlna khaidiata mawhphurhna leh chanvo a neih ve pawh hlen nachâng reng reng hre lo Kristian dang hi awm ve tak ang maw? Sawrkar apiangin mipuite sum an hman danah, ram dang mipuite chu an thikthu a chhe êm êm a.

 

            Dik lo tak leh fel lo zeta mipui sum, a lo thlawna hman mai maina a lo awmin, thikthu chhiatna nen sawrkar an tawng a. Mi dik lo leh fel lo taka thiltih chingte man chhuah phutin, hremna talhfiak hmangin rorêltute an cha-chhuah hmak hmak ţhin. Cheng nuai 100 a ni emaw, cheng sâng khat pawh ni se, an thlir liam ngawt ngai lo!

 

            Chutiang bawkin ram ropui leh hlawhtling kan tihtea rorêl lo pawlte thikthu pawh a chhe tlat ţhin. Mahse, kan rama tute emaw anga mi chhiatna lai zawng ngar ngar chung leh, mi ker neuh neuh paha ţawngkam chaltlai leh huathla la thei ang ber chelek chungin an thikthu chhiatna an tilang ve ngai lo!

 

            Awmze nei takin, rorêl mektute pawhin lehlam pawlte thikthu chhiatna chhan loh theih loha an ngaih theihna tur zawkin, thinlunga mimal ni lo ram leh mipuiin hma an sawn phah zawkna turin an thikthu chhiatna a tilang ţhin a ni zawk. Mizo mipuite erawh ringtu inti siin sual huata, sual hnathawh demtu nih hlau hlum lo chauh an ni si a!

 

            Ram a buaiin sumpaiah harsatna nasa tak a lo thleng mek a. Chutih mek laia tute emaw sum siamna tur leh hlawkna tur tih hriat ngawih ngawih, chhun ên lai tluka lang chiang leh phat ngaihna awm miah lova mipui sum thawh khawm hman ral a han ni ta a. Thikthu chhiat nachâng hre lo Zoram Kristiante chu an ngawi ţhuap mai a nih hi!

 

            Rorêltute’n fel tak leh dik taka ro an rêl theihna tura an laka phut nei tur chu mipui an ni ţhin. Kan ramah erawh chuan hman aţang tawhin rorêl lo lam pawl kutah, sawrkar fel lohna leh dik lohna tinreng dap chhuaka demna thu nei turin mawhphurhna kan dah tawp a. Awmhmuna phun sep sep chungin suahsualna engzat fakau nge kan lo thlir liam tawh reng ni?

 

            Tukin Vanglaini-a Pu Laldenga thu sawi an tarlan pakhat, “Rambuai azara hlawkna hmutute hian….” tia hmana demna thu a lo sawi tawh ngei kha, tun hunah hian a kalsan tak MNF sawrkar chuan inthlahrunna chhe tê pawh nei lovin, Baffacos hun lai ang mai khan buaina denchhena mimal hlawkna lam hawia hma a lakna hi, i dem ngam lo ang maw?

 

            A hnuaia hnathawkte hlawh pûka sawrkar nuntir a ni mek laia, hmasawnna hming chhuanlama cheng nuai tam tak man Contract lo pêk chhuahte thleng hian, nang Lal Isua hnungzuitu inti hian i dem ngam lovin, ngawi rengin a thei fate’n buai denchhena kan ram an râwk mek lai hian thik i tum ngam lo maw?

 

            Chuti a nih takzet chuan nang leh he Zoram, zalenna ram a nih theih nâna amah hmangaihtute’n an thisen leh nunna hmanga an lo beih tawhna, a ram mipuite ngei pawhin tawrhna nasa tak an tawrh phahna kha a lo thlawna luangralin, nang mi dawihzep vangin chhiatna leh lungngaihna ramah a chang a nih pawhin, ţahna mittui reng chhuah hlek suh ang che!