Dar ang tawnni her leh tak ang maw?
Anka nem mangtha em pawh hlan lovin,
Thenna biahthu kawi khat pawh sawi hek lovin;
Bawhchhiat hriattirna nunrawng fawhna pawh hlan lova min liamsan lai khan,
Kan kar hmangaihna boruak chhia reng a awm ka hre lo!
Duhtak, rilru nghet nei lo leh khakna pai reng ka nih ka hai lo,
Mitmeng vakvai leh ngaihtuahna nguai nen.
I thinlairila ka cham hnuhnung ber min hrilh thei lawm ni?
Nge ni, i thinlung ata nawhreh ka lo ni reng tawh zawk?
Hmangaihna kawng chhuk chhova ka ke chhehsualna hmun ka ngaihtuah changin,
Ka ngaihtuah ngun poh leh ka tluksanna awm reng che hre si lo!
Rilru hahdam i neih theih nan ka hahdamna ka hlan che a,
Zalen nun i neih theihnan ka zalenna ka pe bawk che;
Beiseina mitthlain kan kar hmangaihna bo hnu i chhar thar leh a,
Ka hnen i lo thlenpui leh hun ka lo thlir vang zawkin!
Mahse i hriatrengna thinlung chu khawnge ni ta?
Hmangaihna hmasa ber min hlan chhan ngei zawng hmu tur khan,
Duhber, vawikhat chiah i hriatna kilber kha han dap leh lul teh!
No comments:
Post a Comment