Mi vantlang ni a inngaihna hi Hlawhchhamna kailawn zawh tanna a ni a, chuvang chuan mipa leh hmeichhia tumah mi vantlang ni ngawt tura piang an awm lo! Kum 2006 vel atang kha thu leh hla hmangin theihtawp chhuahin Zoram pawn atangin Zoram hmangaihna awka leh zilhhauna, naupan pawh dawn lovin kan au chhuahpui tan a. Kum 8 vel Zorama kan awm tawh loh hnuah kan pianna leilung kan rawn rap leh a. Kum 2009 atang khan thu mai ni tawh lovin taksa ngei chetchhuahpui na nen theih ang angin hma kan la zui anih kha! Kum 5 chhung vel tal tap chu chawlh lawk tak tak awm thei lovin hma kan la a, a changin kan hlim ve em em a, a chang erawh chuan kan beidawn bawk thin!
Kan naktuk hun hian enge min rawn thlen dawn tih hriatlohna avang zawkin kan tun hun kha am takin kan hmang liam tawh thin a. Bansanna nun neitu ni lo la, i tluk pawn a bul tan tha leh rawh. Nimin hunah engpawh lo thleng sela, naktukah chuan pawimawhna tak tak a nei tawh ngai lo. Vawiin hi ni thar danglam bik a ni a, i kawngzawhlai chhunzawm la, i thlen tum ram hnaih deuh deuh ang che tih nunpui chungin ke kan pen thin anih kha. Zan mitchhin a lo hun changa i vawiin nunah mi pakhat tana thil tha tih i neih a, an nunah hlimna leh beiseina i thlen chuan vawiin ni tha takin i hmang tih in hre rawh tiin kan infuih bawk thin.
Thian kan siam a, hmelma pawh an lo lang thin. Duhsakna kan dawng a, duhsaktu der pawh an bang chuang love! He kan khualzin tlangram chhengchhiaah hian thu leh hla tha tak tak, kawitina min fahtu, dik tak tak leh a hun taka thurawn rawn sawi thin kan tawng bawk a. Mahse a tawpah chuan an thu leh hla, fakna leh thurawn min pek ni lo, a taka min chetchhuahpui dan atangin anmahni kan teh thin anih kha! Kan tum ram thlen kan hlauhna ai chuan kan tum ram thlen kan duhna chuan min hneh tur a ni tiin hmalam kan pan hram hram thin bawk. Tlangchhip lawnchhuah a, a chung atanga khawvel thlir tur hian vawilehkhata lawnkai theih a ni lova, hmalam pana ke pen khat te te a pen chung zawk hian tlangchhip min chuantir dawn a ni tiin thurawn kan inpe bawk thin.
Tlangchhip kan lawnna kawngah nuihsantu kan tawk a, thenkhatin a min ti thin. Thenkhatin dawt tinrengin min sel a, thenkhatin thlemna tinreng kan hma-ah an rawn chhawp bawk thin. Thinlung taka tan kan hlawh laiin thinlung zawng zawnga kan chunga phuba lak tum pawh an bang bik lova, hringnun indona ruamah kan cheng tak meuh meuh thin. Kan kalkawngah chuan sum leh pai thlemna thang an awm a, khawvel mawina par ten vul len zual chang an nei a, mimal leh pawl dang atanga kan ke pen lo dan hram hram tum awm an thulh chuang bawk hek lo. Kan tawnah sumpai an hrang na a, chapona lah chuan nitin min hual reng bawk thin. Chutianga sir tawn tawna thlemna lo kal leh thang hlauhawm tawn meuh zawngin, mi fel famkimlo kan nihna a lo lang ta a. Chu chuan pumpelh rahbi min rahtirin tlangchhip kalna kawng ata min hruaibo ni a lo thleng ta a ni.
Chu kalkawng hreawm leh harsa kawi khat em pawh la zawh ve lo tu ka atanga selna awka leh hmuhsitna awka lo chhuak tawrh harzia hretu chu mi tlemte an ni, a kawng lo zawh tawh mi huaisen an tam miau loh avangin. Chung selna leh sepna awka chhuak chuan tlanglawnna hmanrua kan phurh mek rihna an belhchhah zual sauh a, ke pen chak a har em em ta a ni. Thenkhat ten an tlangchhip lawnna hmanruaah min hman chang a awm a, tlang panga kan lawn liam chang erawh chuan kan chhuah lehna tur atan an hruihrual an rawn thlak duh ngai si lo! Mahse, chunglam remruatna kaltlang zawkin hruihrual lian kan tan ban phakah lo awmin kan kalkawng ngai bawk kan zawh leh thin a ni.
I theihna sang berin fakna a dawn mai loh avangin i kalkawng tawpsan ngai suh ang che. Tun hma nun ten an lo auh chang ni che chuan lo dawngsawng duh hauh bawk suh. Thil kal tawh chu thil kal tawh a ni a, thil kal tawhna hmunah chuan cheng reng duh hauh lo la. Minute tina i thinrimna khan Second 60 chhunga i hlimna a thaibo tih i hre lovem ni? I zinkawng i chhunzawmna kawnga tunhma bungrua i chhawm zawngin i phur a zang ngai lovang! Ni khat atan vawiin ni a tawk tih hre thar leh la, hnunglam hawi tawh lovin hmalam chauh panin tlan tawh zawk ang che. Finna hi Tum Sanna tel lo zawngin Sava, thla nei lo ang mai a ni si a.
Ka tunhma nun ka thlir let changin, tahna ai chuan nuihna tur ka hmu hnem zawk a, lungngaih ai chuan lawmna tur ka chhar hnem zawk bawk. Min paihthlak tum zawngte chunga chuang ve ni a inhriat chang ka nei tawh a, ka nakin hun hi mawi zawk leh duhawm zual zela siam turin ke ka pen mek a ni zawk e. Ka nunhlui ka thlir let changa dinhmun duhawm atanga hnawl nihna dinhmuna thu nia ka inhriat chang apiang khan dinhmun tha zawk kawng kawhhmuhin ka awm a ni zawk tih ka hre thar a, kawng tha leh zual zawh thei turin finna thinlung ka lo nei a ni zawk tih ka hrechhuak ta si a. Chu ngeia chu ka kawngzawh tur leh ka hmalam huna huaisenna thar min petu chu a lo ni zawk tih ka man thiam ta a ni.
Nunhlui tah leh lungngaihna zawng lo kiang tawh la,
Zahna kawn leh hmutsitna zawng pawh tuihawk iangin luangbo rawh se;
Humsual leh tawhsual tawhna zawng pawh hriatthiam tirtu lo chang sela,
Ni thar duhawm tak leh hriatthiamna thar nen ngei chuan,
Tlangchhip a khaw thar duhawm lam panin ka kal zawk nang e!
No comments:
Post a Comment