Manganna thla khawng ri a nat luat châng te, mahni inkhawngaiha ka kun tlawk tlawk châng te, khawharnain thlipui ang maia mi chhem châng te hian, suangtuahna mitthlaa nang nena lêng dunah inngaiin, hriatna ka hloh lo hram ţhin!
Phiarruknain zan thim, sual zalen taka an chetna hnuaiah leh zel pawh, a hmêl hmang a la thup ţhin ang maiin hun liam ta theihnghilh theihna chu, ka lakah a inthup tlat a. A tlatna mual thim lutuk vangin ka zawng hmu zo mawlh lova ni!
Hmangaihna mawlh hi, chhun ên vanglai ang maiin ka nunah a inlâr leh ţhin a. Khawngaihna nun chuan, ka mitin i hmel duhawm a tih vanga a thlir nin theih loh tluk zetin mi kalsan thei si lo.
I hlimthla mai pawh hian ruahphingphisiau a han sûr zawh a, chhimbal zâm kâr aţanga ni zungin lumna min thlen ţhin ang maiin, ka nunah nawmna min thlen châng hi chuan, khawvel hi a duhawm thar lehin nun hial pawh ka thlakhlelh zual phah ţhin.
No comments:
Post a Comment