𝐍𝐮𝐩𝐮𝐢 𝐥𝐨 𝐧𝐞𝐢 𝐧𝐠𝐞𝐢 𝐧𝐠𝐞𝐢 𝐚𝐧𝐠 𝐜𝐡𝐞 𝐚𝐰...

 

     "Thil pakhat min tiam ngei la ka duh a ni..."

      A âw chuan ngaihno a bei zual tulh tulh emaw tih mai tur a ni a. Mahse, mi biak zawnga a thaw lak danah erawh, a chau tih hai rual a ni lo. 

     Ka tân chuan a âw ri chu Beethoven, Wagner, Bach leh Chopin-ate kutchhuak ropui; Mass in B Minor, Moonlight Sonata, Ode to Joy, Fifth Symphony etc te ang maia ngaihnawm leh hriat reng tawh tur ang a ni. 

      Mahse, chu âw mawi ka tih leh ka ngainat êm êm thuchah rawn ken erawh, phai vai kut dawh ahnu hmana la phâr zui ang maiin ka ngaina hlek lo thung! Thihna rim a nâm phút a, thihna hruivalh ang maiin a vawt ngaih si a. 

      He thu, ngenna lo chhuahna thinlung erawh mahni hmasialna pakhatmah awm lohna, mahni pawh inngaihtuah chang lova midang laka duhsakna thûk ber hlanna a ni tih ka hre chiang êm êm tlat. Chu mawlh chuan mi rün a, ka mit ka khap hnâm sáwk chu a mak lo reng a ni.

      "Bawihte, ka theih ve zawng a nih phawt chuan, ka tihsak ngei ang che..." tiin ka chhang ta a. Ka âw a lawi chhe miah lo chu mak ka ti zawk hial a. Pangngai taka ka âwin min phatsan lo chu ka lawm hle.

     Bawihtei hi ṭum thum zet mai thihna nen inbuan tawhin, thla chanve dáwn te, kâr khat chuangte thlanmual ang maiin min lo rehsan tawh ṭhin! Engtikah nge a lo harh chhuah leh dâwn tih pawh hriat lohin, nunna lamṭang rinawm nih tumin a lo bei faih faih tawh tlat a. He thu min zawt pawh hi a mak lo reng a ni. 

     "Ka lo kalsan ta che a nih paw'n, nupui lo nei ngei ngei la ka duh..." tiin, ngenna azawnga ngenngawl ber kal tlangin, hmangaihnaa mi tuamhlawm dan mawlh a la ngaihtuah ta fo a nih hi! He hmeichhe duhawmzia zet hi chu aw!

      Eng thu mah ka la sawi hmain, ka tâna nupui ṭha tur a tih zawng, a mizia, a nungchang engkim mai a duhthusam min hrilh nghal mawlh mawlh a. Chutiang mi ang nupui tur ka thlang fuh lo a nih chuan, ka hlim loh tur thu leh ka nun a hrehawm tur thu min fah nghal mawlh mawlh mai zu nia! 

      Min va hre chiang tak êm! Ka mize ṭha lo lai te, chhawmdawl ka ngaihna lai te, ka chak lohna lai zawng zawng a hre chiang êm êm a. Chu hriat chianna kal tlang chuan, khawvela ka hmeichhe hmangaih ber chuan ka nupui tur awm mi hmeichhia mi thlansak ta a!

      Romeo & Juliet lemchan kal tlanga W. Shakespeare-a'n, "My bounty is as boundless as the sea, my love as deep. The more I give to thee, the more I have, for both are infinite" tia Juliet-i'n Romeo-a a hmangaihna thûk leh rilzia a sawi chhuahna ṭawngkam, khuaipui zu ang maia thlum aiin Bawihtei'n a duhthusam kal tlanga min hmangaihzia a lantirna hi a nep bik chuang lo! 

       Tah zet chuan Keats-a nen danglamna reng kan awm ta lo. TB natna avanga chau tak chung pawha, a hmangaih Fanny Brawne-i hnenah, "My love has made me selfish. I cannot exist without you — I am forgetful of every thing but seeing you again — my Life seems to stop there — I see no further. You have absorb’d me" tia mahni hmasialna zawng zawng nen a thinlung a phawrh ang maiin,  "Bawihte, ka hmangaih che" ka ti ta mawlh mawlh a!

     Ṭum khat chu heti hian min ti a. "Tun aia hma zawk hian lo intawng tawh ni ila chuan, tun ang mai mai hian i awm hauh lo ang. Kawng engkimah hma ka sawnpui chein, nun ṭha leh duhawm zawk nei turin ka kaihruai ngei ang che. I bialnu hmasate an nep ka tihna a ni lo. Mahse, nang chu nawr kal chawp ngai, theihna nasa tak nei si i nia" tiin, kan intawng har pawi a tih thu min hrilh melh melh a nih kha! 

      Aw vante u, lei thuahthip hnuaia cheng zawng zawngte u, in fanu hian in pawi eng nge a sawi a, heti tak maia pawisawi lo pawi in han sawi tak mai ni le? He hmeichhe duhawm lutuk bulah hi chuan, ka sualna tinreng, fel lohna zawng zawngte hi meihawl kâra lunghlu ang maiin an langsar fal nalh zel a. 

      Hnem rual loh, chhuak êm êmin ka ṭap ta zawih zawih a!

      "Bawihte, hmangaih theih hmeichhia ka tawng a nih phawt chuan, nupui chu ka lo nei ngei ang" tiin ka intiam ta a!