Life, Love & Death

"Mihring chuan a hnathawh zawh hun a nei a ni thei e,
Inzirna erawh chuan tawpintai reng a nei si lo va"

"Hausak nawmna a hrin, a chak zawng apiang nei thei,
Chumi tan chuan khawvel nun hlimna thuruk awmzia hriat a har tluk zet in,
Lawng kehchhe them rinchhana khawchhe hnuaia tuipuia a nunna humhim tum mek tan chuan,
Khaw tha hlutna chhutchhuah phak rual a ni lo"

"Hmuh theihna chi hnih a awm a,
Pakhat chu tisa mit a ni a, pakhat erawh thinlung mit a ni thung,
Tisa mit hmuhna chuan theihnghilh chang nei mahse,
Thinlung mit erawh chuan kumkhua in a hre reng thin"

"Hriamhrei leh silai ai chuan,
Pen, pentui leh lehkhapuan chu englai pawn ka tih khai zawk si a"

"Zirna hian Lehkhathiamna a siam lo,
Hriatna nei leh Hriatthiamna nei mihring an awm a ni zawk a,
Hriatna nei tur chuan hriatrengna neih a ngai a,
Hriatthiamna nei tur erawh chuan thil bul awmdan hriatfiah a ngai thung a ni"

"Eng ang mi pawh nise, hmeichhe hmangaihna tak tak chuan,
Mipa nun a siamtha ngei ngei thin"

"Mitthi tawh ten duhthusam kan panna kawngah,
Mi nungte duhdan kan tawrh nachhan tur a awm lo"

"Tawpna thlengin ka zui ang che,
Hremhmun meipui alh chhungril ber thleng in"

Pain & Affliction Quotes

"Khawvela mi chak ber pawh ka chungah inluling se la,
Khawvela mi thiltithei ber pawh ka lakah inhrosa rawh se,
Thinlung kahpathir ang pu mi ka ni ve bawk a,
Ka pa fapa pawh ka ni ve bawk e,
Beidawnna satliah lo, hmangaih avanga beidawnna tawp ka pu a,
Chu nun avanga tawrawtna thinlung ka pai hi,
Mi lian leh mite pawn hlauh nachang hre mawlh rawh se"

"Eng kan ti zo ta nge ni ngai le?
Fapa chuan pa a phum tur a ni lawm ni ngai?
Kei chuan ka hun hma in a hun lovah fapa ka phum dawn si a maw?
Upate nun chu zuah in a awm a,
Thalaite nun erawh pawh tawi in a awm ta si a!"

"Thihna emaw khawvel natnate ka hlau lo ve,
Sal tanna bawm a khung erawh ka hlau zawk si a,
Tangkaina reng nei lo emaw kum upatna avanga hmantlak loh avanga,
Pasalthatna reng reng hriat phak tawh lohna leh,
Awtna pawh bo rawk khawpa inkhung bona zawk chu,
Khawvel damchhunga ka hlauh ber a ni e"

"Ka hmalam hunah chuan hreawmna leh thihna chu,
Mathei lova i paltlang tur a ni - ka hnena i kal ve anih ngai dawn chuan,
Ka thinlung leh ka thlarau lamin chu hmelma tawk tur ngawt in,
I hmangaihna thinlung mi pek hi ka pawm thei lova ni!

Ka thinlung hmangaihna hi i tana ka thilthlawnpek a ni a,
Thilthlawnpek hnar chu mipa zahawmna nen a in mawi ang maw?"

"Khawpui chu lungngaihna boruak avang in a reh tlawk tlawk a,
Khawpui entu Ni eng pawn lumna reng a nei ta lo,
Nimahsela, tihtur ka pek che ni lovin,
An hun hmang zo tawhte tana mittui seng lovin,
Damlaite chawimawi nan zawk,
I nui hmel lo lantir zawk ang che"

"Hlimthla leh ngaihtuahna mai a ni zawk i hmangaih hi,
I thinlung in a chak chu ka tan pek che a rem ngang lo a ni"

"Lalte chuan damlaite in aia ropui leh nuam zawk in an thlan an sa a,
An thlahtute hming pawh an fapate hming aia duhawmin an phuah lovem ni?"

He khawvelah hian Thatna chhete a la awm a,
Chu chu thih chhan tlak a ni lovang em ni?"

"Khawvel kut ni vangthla lo thleng chungah hian thunei tur kan ni lo,
Kan hun tawn meka suahsualna lo thleng mekte laka hnemtu nun,
Kan hun a liam hnua lo la awm tura te tana,
Khawvel thianghlim an chan theihnan kan bei a ni zawk si a,
An tawna kut ni vangthla nawm leh hreawm thuah chuan thu reng kan nei lo a ni zawk e"

"Hringfa finna zawng zawng chu heng thumal pahnih hian a funkhawm vek a -
Dawhtheihna leh Beiseina"

"Mihring naran ve mai chuan,
Heti tak maia pawisakna nei lo huatna lakah hian,
Enge tih theih reng a neih ang ni?"

"Hmeichhiate chu an thianghlim si a,
Hmangaihtu nun nei lek phei chu serhhran thianghlim a ni a sin"

"Chhangban tuina reng hre tawh lovin,
Thingzar hnah tum ri pawh hriatna bo vek in,
Thlifim chhem nawmna chen in min laksak ta!"

"Thinlung ril bera hliam chuan danglamna bik a nei a,
Thuhruk in awm thin mahse khar hnan thei erawh a ni lo,
Tih cheta a awm apiang in thisen thar lama chhuah reng a,
Englai mah in a na a dai ngai lo va,
Nitin a thar zual zel thin"

"Tawrhna rei tak lo nunpui tawh tan chuan,
Hlimnaa lo thlen a vanneihna ni a lo herchhuah hi a tak anih rin a har reng a ni"

Humor Quotes

"Mipa chu ui note duhawm ang an ni,
An duhawm leh lawmawm ang ang in inah i hawn a,
I inchhunga i thil neih hlut apiang an zunkhum in,
An ek khum si thin, Aw Hmeichhia, fing mawlh teh"

"Dawt reng reng chu thawnthu ropui tak,
Mi tuemaw in dawt thu hmanga an tih bawrhban a ni"

"Pathianin hmeichhia aia mipa a siam
hmasak zawkna hian chhan dang a nei lo,
Ani meuh pawh hian a thilsiam mawi ber a duanna kawngah,
In enchhin nan mipa ruangam a duanglawk a ni zawk e"

"Pathian hian thlai chauh ring mi tura min duh anih chuan,
Heti takin Vawksarep siam a ti awlsam in a ti tui lovang"

"Mipa fing chuan hmeichhe hnenah a hriatthiam thu a sawi mai a,
Mi mawl erawh chuan a taka lantir talh tum in a bei thin"

"Chetdan mawi taka kalpuitu zawng zawngte hian,
An hmangaih vek lo che, i mawl leh at an enchhin mai a ni zawk e"

"Kan thenawmte hi ka ngaina thin hle a,
Mahse tunah chuan ka haw tawh hle,
An Wifi-a password an dah tak avang in"

"Nang nena kan inthianthatna hi ka tan chuan a hlu a sin,
I tah chuan ka tap ve thin a,
I nuih lahin a nui uar uar ka ni leh a,
Kawngkhara i zuang thla anih phei chuan,
Lem chin nei lovin ka nui uar zual ngei ang"

"Hmanna awmlo hlawl chu ka ni bik lo ve,
Entawn tlak loh entirna atan tal chuan ka entawn tlak ve a sin"

"A chang hi chuan mipate hian remhriatna reng ka nei lo em ni aw ka ti thin,
Kan hun tam zawkah hian kan kekawra ka lu awm chungin,
Ka dar chunga kan lu awm lo zawk hian,
Ngaihtuahna kan seng nasa hle thin a ni si a"

"Zirlai thiam thei lo ka ni reng reng lo,
Zir laklawh laia chawlh ka lak thin hi,
Midang chawlh lak aiin a rei mai thin a ni zawk e"

"Thu tha leh mawi sawi tur i hre lo anih chuan,
Lo kal la, ka bulah hian lo thu teh khai,
Kan pahnih in midang nuihzatbawl tur ka zawng dawn nia"

"Nupui neih ka va chak tawh tak em!
Hmeichhe pakhat, damchhung atana ka zar buai theih han neih chu,
A ropui dawn hian ka hre em a ni"

"Chaw leh mut hi ka thil duhber an ni a,
Eitur ka pe che a, zana ka rawn be thin che anih ngai chuan,
Ka tana mi pawimawh tak i ni tih inhria ang che"

"Thinlung duhzawng bawhzuina hi,
Rilru atna chi khat zawng a lo ni ngei e"

"Pawisa hian hlimna a lei theih loh tih ka hria e,
Mahse bicycle chuang chunga tah ai chuan,
Honda car chhunga tah zawng a thlanawm zawk a lawm"

Lungngaih Quotes

"Ka kawng zawh han thim em em zia hi maw,
Kawlkilah sawn eng hian a zia a chhuah ngai dawn ta lo em ni zawk le?"

"Mihring tawh phawtin a rilru dik tak a sawina tawngkam engpawh,
A mawl leh tawi ang angin a ril a ni zawk ngai a;
Ril kan tih zawng zawng erawh dik an ni vek si lo"

"Ka damchhung vanglai tak,
A ni, chhun lai takin ka nunna chu;
Thlan kawngka lam panin a kal dawn ta!
Thihna chuan zan khat em pawh mi nghak lovin,
Hremhmun kawngkaah chuan mi lo nghak si a!"

"Van chu ka lakah khuhin a awm ta a,
Arsi pawh ka lakah an thim zo ta,
Ni pawh chhum dumin a hlaih thim a,
Eng apiangte chu ka lakah an thim zo ta si a!"

"Duhamna avangin ka awhna tur thang an lo kam ru a,
Mahni hmasial luatna avangin ka nunna lak an tum bawk a,
Inhumhim nan ka lakah chhiatna tawp a thlen an remti maw?
Khawlohna chuan mi tha ber chungah pawh thihna hmangin ro a rel ta a,
Sual chu an haw lova, tha erawh an ngei hle si,
Mi suaksual phiarrukna tenawm ber chuan,
Kei leh ka thiante min phuar nghet hle si a"

Hringnun Ze Duhawm (In Comparision with the Old & the Young; the Rich & the Poor)

Tun hnai mai khan Thingtlang khaw lian ve fu fu, motora kal theihna hmun pathum laiah zanriak meuhvin ka han cham a. Ka kal chhan leh ka thil han tihve erawh beng ti thleptu leh mit timim an chan mai ka hlauh avangin ka ziak lang kher dawn lo. Chung hmunah chuan ka thinlung mit tihvarin a awm a, ka beng hriatna pawn hausakna thinlung mi pek phah hial a! Mahse, chung zawng, keini ang duang tawn awm tawk lek a lo niawm mang tak e, tihna rilru erawh thinlaiah a cham reng thova, mi tawn tawh leh ning hluia an hmuh tawh hnu atanga inhnangfakna lo chhar ve pawh hi chhar loh ai zawngin a la hlu ta reng reng fo zuk nia!

Changkanna thopa zuana a zuanna hmun atanga Sephung kal muang an sawi tluk zeta changkanna tawngve lo an lo awm ngai anih ngat zawngin Thingtlangah hian a takin hmuh theih a lo la ni a, chu chuan khawvel famkimlohzia a rawn lantir leh thin. Changkanna hian awhna thinlung nei vek turin kan chungah hnehna reng a lo puang chhuak bik bawk hek lo tih a taka lantirin a awm a. Silh leh fen awt reng renga nitin rilru buaina nena hun hmang an awmlai hian hak tur thul mawngdap chauh neia lungawi si a lo awm theih reng a lo ni a. Ei leh intur changkang ngaihtuah reng renga Hnam dang thleng va dap lawr dun dun an awm zingtin zantin lai hian puar leh fanna atana Leipui lungawina nunpui pawh an lo bang bik chuang hauh lo! 

Thlain a mawina zawng zawng chhuaha hringfate hnena mawina leh duhawmna, pawlh dal loh hlutzia min kawhhmuh zan ka han tawn khan mutmu tuah a har ka ti a. Chung chhawrthlapui khian a mawina leh duhawmna zawng zawng nena kan hnena inpuanchhuah a tum thlatin lai hian hringfa lungmawlna chuan siamchawp eng, mawina leh duhawmna nei hauh lova, khawsak tiawlsamtu thlazar hnuai a belh tak avang zawk hian Thingtlangah chuan siamchhan anih ang ngeiin hringfate lungawina leh lengi leh vala inchhaina atana van hnuai boruak mawi leh duhawm, thianghlim tak a siam ta zawk a lo ni a. Planetarium hnuaia van thengreng thlir ang mai a ni ve lova, Rose Garden-a khawnvar chhit eng hnuaia inlem ang mai a ni ve bawk hek lo! Thil siam leh thil siam intawng chuan hringnunah sawithiam ruallohva thuk hringnun awmze dik tak min puanchhuahsak a lo ni zawk a, chutiang hmunah chuan mitmeng a lo fiah a, thinlungin a lo thianghlim thin a lo ni!

Thut hmun inawmtleina hmanrua tinreng nitin vaifa nei an sawi ang maia an pun zawih zawih hunah hian keini chu awmtlei kan lo ni tawh a. Khawvel zau zawk thlirin dawhkan kan bawh peih loh leh thut dup kan bel a. Kuta sak naupang inawmtleina tinreng hmangin hringnun kan hman liam chang hian, mihring kutchhuak chuan lungawina famkim min pe love, thinlai takin min awmtlei thei hek lo! Mahse, Thingtlangah zawng, zan thla eng hnuaia naupang tualchai ri nak nak thawm a la reh lova, an tan chuan X-Box, Birbie Doll, PC Games, Pool leh Kindengarten Items te hian hlutna an nei lova, an rilru a luah nahek lo. Chaw thing keng chunga Tirameikai leh inburchhevawm leh awrawl tawp chhuaha hlim nuihna ri hmangin khawtlang an mawi a ni zawk a, chu aia nu leh pa tana thawm bengchheng ngaihthlaknuam a awm chuang lo! An beiseina chu an hmuh theih leh neihve chhunah a tawp mai a, beisei belh leh chuan tur an nei lova, a nachang pawh an hre bawk lo. Mahse chutah ngei chuan lungawina famkim an chhar a lo ni zawk si! 

PVR Cinema Hall a Hollywood leh Bollywood film chhuak thar ber ber en paha, Popcorn leh Cola hmanga nuam kan tawl a, mahni inlum atanga hmehchhuah senloh en tur kan neih lai reng pawh hian thinlung riltam leh mit chakna reng a reh thei lova, zawnbelh nun chu kan nitin hnathawh pakhat a lo chang zo ta! Thingtlangah chuan Pathianni chawhnu a AIR Station ten kar khat chhung hla thlan an tih chhuah chuan lawm takin an inawmtlei a, phur tak leh lungrun em emin hla thlangtu an lo chhiar a, an hla thlan apiang rilru takin an lo sa vawng vawng thin a! Kartluana an nitin lo hnathawh an zawh hnua, an inawmtleina ber pawh TV bak a ni chuang lova, hmehchhuah tin maite chuan an lung a tiawi a, a dang an zawn belh tawh chuang lo a lo ni! 

Bike chu sawiloh Car chhuak thar ngena nu leh pate vau behna khawvelah cheng tawh mah ila, ka kalna hmunah zawng Fanghma no khat lekin fate lawmna thlen theih a lo la ni a! Rilru lungsiklohna leh phuloh duhsakna mihring atanga lo chhuak vang chauha pawisa tam tham tak hlawh theihna hmuna nitin fehchhuak leh sum leh pai vana rah ang thawhchhuahna hmuna nu leh pa leh thalai fehchhuak zawng, tehkhim thamah reng ka ruat si lo! Office hmun nuam leh Danin a pek bak TV, Carpet, Fridge leh AC nena inkulh chunga biak hreawm taka la thu thu em em thinte leh mahni sahmim puarna tellova thawkrim ngai lo nun atang chuan hlim taka ruahsur hnuaiah pawh khel lova Inrinni thlenga beka thlantui chu sawiloh, mal no lai tak ngial pawh zuah lova thlantui bual hup hnap khawpa thawhrimnaah  chuan hlim thawm hriat tur kan hai lova, duhsakna nena thlai thar intem chu nundan pangngai a lo ni zawk a lo ni. Lengi leh vala inchhai rite chuan thinlai an fan ngawih ngawih mai a. Thianghlimna hi sum leh paia lei chi a ni lova, ropuina leh mawina pawh sumpai ngahna avanga lo awm a ni lo tih a chiang thar thin!  

Office bana mahni kut ngeia sak, a sakna hmanrua atana thenawmte leh hmeithai chan thleng pawha laksakna hmun, inchhung bungrua tin India khawtuala awm ve a mawi pawh ni lo thlen chang a, hlim thawm leh inchiau thawm reng hriattur awm lo, chaw ei kawnga rualtin khum tuma Mizo chawi ei bansana malte tea chaw ei hranna leh inhawp tawm nun tel tawh lo dawhkan khawhar riangvai nun atang chuan ka thil hmuh hi a mawiin a duhawm ka ti a ni! Feh hawng thliah thliah, an ip leh em tin mahni thawhchhuah a puar ve khat tlat, in lama lo nghaktu fanau rochan ten phur taka an han hawng a, fanghma leh vaimim an hmuha lungawina hmel mawi an lantir tluka feh kal hawngte thlantui ti daitu awm hian kei chuan ka ring mawlh lo! Phak ang tawk kuta sak in leh lo, a chhunga meikhu zam chiai nena inchiahpiahna, bungraw mawihnai awm hauh lo, a dup chi phei chu suangtuahna pawha leng ngai lo, Hmangaihna leh Rinawmna Runah chuan khuavel duhthusam, Aizawl milian ten an neih loh chu hmuh tur a awm si a lo ni!

Miliante dawhkana bungchangrum leh sa tinreng, nitin khel lova chhawpna hmuna puarna thleng ngai si lo, chawi ei tuina tinreng inchhawp chunga ei reng a tui chuan lohna hmun, thleng parmawi ber ber a chhawp chawhmeh laka tlaina awm chuang si lo “In accumulation of many years; Pains is in plenty and joy not anywhere, When life is over-spent” lakah chuan chuan ka han zinna hmuna chawi ei zawng “Pass onward to your home; Great ones, lovers of honour, Thus God and fate reconciled; Then let every voice, Crown our song with a shout of joy” an lo tih hi a dan zawng a va han dang tak em! Hriselna hi damdawi hmanga neih zawng theih a ni ngai a, mahse chu chu a kumhlun ngai lova, taksa peng dang tuartu an awm tho tho! Mahse ka chawi eina hmunah chuan hriselna hi pa ber kuttum atanga nu ber nau chaw fahnaah chuan a lo awm reng a ni si a, chu hmunah chuan hriselna hi famkim takin a leng vel zawk a lo ni e.

Thawnawm khawveng chu sawiloh, plywood bang khatin a daidan run khatah pawh hmelhriatlohna chu thawveng takin khawpuiah chuan a leng vel mek tawh a. Ka han vah harhna hmunah erawh chuan a khawpum hian inhriattawnna zemawi a lo la awm a, veng hnai zual bikah phei chuan intawm nunin par a la chhuang mek a lo ni zawk a. Kawi tinah damlai inbe nui thawm hriattur awm chuan khawtual nuam a chan a, beisei leh chuan tur tam lohna hmunah chuan lungawina pawh lungawi takin a leng vel a ni si! Zing thawh hlim atanga tlai ni nem leh zanriah eikham inlen pawh nun chu hman vang ni hauh lo, tihtur tih thulh phahna ni bawk hek lo, Siamtu’n inpawhtawnna nun nei tur zawka min dinna atanga mawi taka parchhuah tirna a ni tih kan hai lo! 

Khawpui nula tlangval ten Barista, Caffe Coffee, Mc Donald leh Pizza Hut nun an tem tawh laia Chaw eikham thingpui hangin dang a fah em emna hmunah hian thinlung tleina a awmlo a ni bik si lova. Wrangler, Levis, LEE, PEPE Jeans kan hak thinte meuh pawh duhtawk tawh lova, thui chawp mawngthla lang Design kan hak chiam chiam tawh lai hian, kan unaute tan chuan feh kawngah a mawngpawp bel ngei mai hlutna chu hmasang atanga tun thleng hian a hlutna a la danglam chuang lova, design thar zawn tumna rilru pawh an nei chuang lo. 

Hringnun zemawiah chuan awhna a awm lova. Lungawina nun chuan kan nunah thu a nei a, neih chhun ang ang leh phak ang ang rohlu; A tam emaw tlem emaw, a hlu emaw a ropui lo emaw a lem lo, Dai leh kawtthlerahte chuan kan chan ang chang phak lo; kan nun an hmuh changa awhna mita min thlirtu kan nei reng a lo ni zawk a. Rilru leh tisa puarna leh fanna thu-ah pawh neih ang ang hlimpui leh ngaihhlut thiamna chu hringnun zemawi a lo ni ngei e. 

I hringnun zawhlai siamtha tur leh dinhmun duhawm zawkna hmuna ding tur chuan, Nangmah ngaihsakna reng nei miahlo um zui duan duan tawh lova, Mahni chauh pawha hringnun hman a tha zawk tih i hriat hun hunah, I duh ang ngei hringnun i hmang tawh ang!

‘Suangtuahna hmanga hmalam pan thin te,
Rinna neia hmalak ching mi te,
Huaisenna nena harsatna sukiang ngam mi te,
Boruak rit kara hlim taka awm thei mi te,
Ruahmanna reng a awm loh laia ruahmanna siamtu te,
Che chhuak an awm loh lai pawha thawkchhuak thin te,
Chung mite thlazar hnuaiah chuan nang pawn i hringnun hmang thin rawh,
Mi hlawhtlingte khawhawi chuan van a tawng a, 
Mi hlawhtlingte leilung nghah chhan pawh a nghet thin,
An hlawhtlinna thuruk chuan nangmahah phurna namenlo siam sela,
Hringnun khawvel hi nuam leh tha zawkin i chhuahsan ve dawn nia!’

Hmangaiha & Nun Quotes

"Infawhna hi hringnunin bumna thianghlim tak a duan,
Tul lo tawp tawngka chhuak palh tur vengtu atana hringfate min pek a ni"

"Hmangaihna hian damna dawi reng a nei lo,
Hmangaih leh zual mai loh chu"

"Hringfa mita hmuh rual loh pawh hi,
Hmangaihna thinlungah chuan chhun eng ang maiin a chiang si a"

"Thih chhan tlak thil pakhat em pawh nei lo chuan,
Dam chhan tlak pakhatmah a neih chuan loh avangin thi tlak a ni si a"

"Mahni intihhlumna hi hringmi lengten Siamtu laka,
'Min ban thei lo, ka bansan zawk a che'
Tia a inhrosakna atthlak mai a ni si a"

"Hringnuna hla thu ngaihno bei beite hi,
Hringnuna lungngaihna vawrtawp chanchin hriltu an ni si maw"

"Hun rei tak chhung i lo hmelhriat tawh hnu,
Vawilehkhata i mi hriat thin an ni ta mai hi a va lungchhiatthlak tak em"

"Hmangaihna nuna tlukluhna avanga,
Tiang em a Tawrhna laka mahni inven zawh lohna hi a awm ngai lova,
Hmangaihna kaihhnawih leh hmangaih chawpa channa avanga,
Tiang em a tanpui rual lohva hlimlohna hi a awm thei ngai bawk hek lovang"

"Hringnunin a kaihhnawih tawrhna leh tharum thawhna zawng zawngte hi,
Hmangaihna avanga hlimna tawite emaw,
Boruak thianghlim hipa thawk lang vang vang nawmna emaw,
Kawl eng tan tirha leilung mawina thlir vang vang aia,
A hlutna sawi thei tur tu hringfa nge piang tawh reng reng awm?"

Hmangaihna Chavai Unfinished

a

Thihna, Tawrhna Quotes

"Thih chhan tlak thil pakhat em pawh nei lo chuan,
Dam chhan tlak pakhatmah a neih chuan loh avangin thi tlak a ni si a"

"Mahni intihhlumna hi hringmi lengten Siamtu laka,
'Min ban thei lo, ka bansan zawk a che'
Tia a inhrosakna atthlak mai a ni si a"

"Hringnuna hla thu ngaihno bei beite hi,
Hringnuna lungngaihna vawrtawp chanchin hriltu an ni si maw"

"Hun rei tak chhung i lo hmelhriat tawh hnu,
Vawilehkhata i mi hriat thin an ni ta mai hi a va lungchhiatthlak tak em"

"Hmangaihna nuna tlukluhna avanga,
Tiang em a Tawrhna laka mahni inven zawh lohna hi a awm ngai lova,
Hmangaihna kaihhnawih leh hmangaih chawpa channa avanga,
Tiang em a tanpui rual lohva hlimlohna hi a awm thei ngai bawk hek lovang"

"Hringnunin a kaihhnawih tawrhna leh tharum thawhna zawng zawngte hi,
Hmangaihna avanga hlimna tawite emaw,
Boruak thianghlim hipa thawk lang vang vang nawmna emaw,
Kawl eng tan tirha leilung mawina thlir vang vang aia,
A hlutna sawi thei tur tu hringfa nge piang tawh reng reng awm?"

"Aw ka thinlai!
Tawrhna lo thleng tur hlauhna chu;
Tawrh na aiin a tawrhhlehawm zawk tih i hre thiam ngang lovem ni?"

"Thihna meuh pawh hian khawngaihna thinlung a nei an ti si a!"

“Putarte chuan Indo puang mahsela, thalaite zawkin tharum thawhin thihna an hmachhawn tur a ni ngai e!”

Hringnun Indona Quotes

"Hringnun Indona khawvela Pasaltha thiltithei ber pahnihte chu,
Hun leh Dawhtheihna an ni si a"

"Sakeibaknei sipai rual, Beramno hruaitu nei chu ka hlau love,
Beramno rual, Sakeibaknei hotu nei erawh ka hlau a ni zawk si a"

"Hun khirh lai ber leh hun harsatna tawpkhawk tawhlai pawh a,
Tanlam nei tura mahni tanhmun pheh ngamna nun nei lote tan,
Hremhmunah khuan hmun sa lai ber chanvo siamsak an ni"

"Hringnun hi hla mawi a ni a - sa rawh,
Hringnun hi infiamna a ni a - khel rawh;
Hringnun hi chona a ni a - hmachhawn rawh,
Hringnun hi duhthusamna a ni a - a takah chantir rawh;
Hringnun hi mahni inhlanna a ni a - pechhuak rawh,
Hringnun hi hmangaihna a ni a - chen rawh"

"Mifing tawnah chuan Hringnun hi Duhthusam ram a ni a,
Mi mawl tawnah erawh infiamna chi khat a ni thung;
Mi hausa tawnah chuan Hringnun hi fiamthu mai a ni a,
Mi rethei tawnah erawh chuan Thawnthu Lungchhiatthlak ber a ni"

"Mahni hmakhua chauh haina kawnga,
Mahni aia thiltitheilo zawkte laka dan lo ang taka thiltihna,
Vantlang zahna nei lek lova inhneh chhuhna tluka,
Suahsualna nunrawng, rapthlak zawk a awm thei ngai lovang"

"Hringnun hi Indona khawvel a ni a,
Hnehtu i chan chang a awm a, tlawm zawk i nih chang pawh a thleng thin;
Mahse mahni leh mahni inhnehna nun neitu chuan,
Tlawm chung pawn hnehna a chang leh thin a lo ni"

"Nula tlangval kara hmangaih indona-naah hian,
Hnehtu nih tum lova zuanluh ve ngawtna chuan;
Tlawmna a zawnga hniam ber tlawmna a thlen thin"

"Lungngaihna mittui luang hrufaitu kut pakhat chauh pawh hi,
Hringnun hlawhtlinna lawmpuitu kut sangkhat bengri ai pawn a hlu zawk si a"

"Furpui haw lai ang maia mittui surtir kawngah zawng inthlahrunna reng nei suh,
Rilru kehchhiat na avanga tahna mittui chu a thianghlim si a"

"Hmeichhe lei leh mipa mit chu,
A neitu hringmi thih ve leh a hahchawl chauh thin"

"Ral hmatawngah i tawnah chuan silai mu ka tawn ngam e titute hi,
Ral do laia a silai fawng vuantu an ni si thin a"

Hlawhchhamna Quotes

"Hlawhtlinna hian thinlung taka lawmpui zawng a phu teh meuh mai,
Mahse hlawhchhamna avanga zirlai bengkhawn hi a pawimawh zawk si a" 

Hlawhchhamna hi chhiat vekna a ni lo,
Hlawhchham avanga danglam ngam lohna erawh chhiatpui vek theih a ni"

"Thinlung khawngaihthlak nei mi,
Hnehna maw Tlawmna emaw nunpui tura che chhuak ngai lo;
Hmun ralmuang tak atanga hringnun chen thinte nena zai khata luanza ai chuan;
Thil ropui tak beih tura chetchhuah ngamna,
A changa hnehna ropui chang a;
A changa tlawm zawk nun nena inbuan thial thialna chu a thlanahawm zawk hle si a"

"Hlawhchhamna hi rilrem takin ka lunglai thei,
Mahse hlawhchhamna em pawh thleng lova tumna awm lo erawh ka thinlai thei mawlh lo a ni!

Thuneihna Quotes

"Hringmi tam zawk chuan Harsatna, Buaina leh Lungngaihna an tuar thei mai ang,
Nimahsela, mihring nihna dik tak i hre duh anih chuan;
A kutah Thiltihtheihna han pe la, a nungchang dik tak i hre thei mai ang"

"Hriat tamna chuan Thiltihtheihna a pe ang che,
Nungchang tha erawh chuan mite zah a kaitir thung ang che"

"Thiltihtheihna hian bulthut pahnih a nei a,
Pakhat zawk chu midang laka hrem tawh hlauhna avang a neih a ni a;
A pakhat zawk erawh chu Hmangaihna a chet avanga lo awm a ni;
Hmangaihna avanga Thiltihtheihna lo awm hi a hmasa ai chuan,
A let sang chuangin a thawk chak a, a tlo zawk bawk"

Midangte thuhnuai theihna hi Chakna a ni a,
Mahni inthuhnuai theihna erawh Thiltihtheihna thuruk a ni" 

Ngawi renga en liamna tluk a,
Thuneitute tha tichaktu thil engmah a awm lo"

Political Quotes Collection

"Tuichawngah chuan Air-Conditioner hi Politician an ti,
An thawm ri chang a ring a, nun nawmna reng an thlen si lo"

Church & Politics

"Politics chu Tisa khawvel thil a ni a,
Politiciante chu mipuite chhiahhlawh atana inpe an ni,
Sakhua erawh a Thianghlim a, Thlarau lam thanlenna kawngah a pui thin,
Mihring hlutna kaihhnawih tawhah chuan Politics aia hniam a awm lova, 
Mihring hlutna kaihhnawih thilah pawh Sakhuana tluka sang a awm hek lo,
Sakhua leh Politics chu thil hrang daih an ni a,
A sang zawkin a hnuai zawk laka inrawlh a thian laiin,
A hnuai zawkin a sang zawk laka inrawlh a tum chuan a rem ngai lovang!

Sorkar Thupui :

"A kehchhia anih loh zawngin,
A kehchhiat hma zawng chuan siamtha rawh"

NGO, LC & Wine :

"Mihring cheng ho zingah nun susamna hi nunphung pangngai a neih tawh chinah chuan,
Rei rial lovin Dan kalphung an insiam chawpin thuneihna an inpe a,
Chhia leh tha hriatna dan zam mawi takin an chawimawi thin a lo ni"

"Politics-ah chuan Rilru Dikna hi Oxygen ang mai a ni,
I kal sang tual tual a, hip tur a tlem tual tual si a"

"Sorkar reng reng a ruangam awmsa hungna pela a than chinah chuan,
Zalenna hi a hmawm zo vek thin a lo ni"

"Kan dikna kan zawh hi kan dikna a ni a,
Sorkar hian kan dikna min pe emaw pe lo emaw,
Kan dikna dila chhel taka kan tawrh hi kan dikna a ni"

"Retheite chanchhiat chhan hi khuarel thil vang anih si lova,
Rorelna diklo leh kalphung fello vang anih zawk chuan,
Hnam dang ngaiha kan ropuina hi kan Sualna a ni ang"

"Mahni famkimlohna leh tihsual thin pawh hrechiang lo chuan,
Midang chungchangah sawisel tur nei lul suh se"

"Midangte fellohna sawichhuak tur chuan mitin tuan a rang a,
Mahni diklohna hmuhchhuah kawngah erawh mitin tuan a fum leh si"

"Hriatthiam awlsam theihtawpa i sawi thei lo anih zawngin,
I lo la hrechiang tawk lo tihna a ni e"

"Politician tawh phawt chuan a hna a vawn zui zel theihna anih phawt chuan,
A taka ram leh hnam hmangaih thlengin a ngam si a"

"Zoram Politiciante hian tun hma ang khan an Rilru Dikna hmun an pan leh thei ang em?
Chu hmun chu chemte hmawr zum anih ngawt loh chuan,
An tan tihmi rual a ni lo"

"Tum khat chu Politician hian Ui a lo kai a,
Eu! Ran leh ran han kal dun chu ka ti a,
Mahse duhthlan tur min pe se la chuan,
Ui ka la thlang tho ngei ang"

"Politician suaksualte chu Zoram mipui tha leh fel ten,
An vote loh avangin Aizawlah thawn phei an ni"

"Kan rama Politician hlawhtling ber ber te chu,
Mipui ten ring tak taka an ngaihtuahna hmanga an sawi,
A taka auchhuahpui thinte hi an ni"

"Kan rama puitling zaa 80 te hi mi taima, rinawm leh tha an ni a,
A bak zawng mi tenawmte zawngin mi lar leh hriat an hlawh thung a,
Mahse, kan thlang tling miau sia lawm le"

"Hriat tak tak reng a nei lova,
Engkim hria angin a in ngai lawi a;Hei baka Politics a eizawn tum kawnga lanchianna a awm lo"

"Mut hahdamna hi englai pawhin ka lungten a ni,
Khawvela mi ropui ber pawh thihna ang maiin an hnung a chhawn si a"

"Thuneihna kalkawng chu that derna leh hliam tawrhna kaltlanga sial a ni si a"

"Tupawh thuneihna inkhaidiat hmuna awm a,
Thuneihna vawrtawp thlen tum tan zahngaihna rilru neih a thiang lo,
Vehtu i nih loh pawn an veh ngei dawn si che a"

"Rinhlelhna them lo awm hnehna tha ber chu,
Thudik lawnga vawmthluk tawp mai hi a ni"

"Thuneihna hi In leh Lo sumdawnna ang mai a ni,
A pawimawh ber chu a thut hmun a ni a,
A bul thut i hnaih tial tial chuan,
In man a sang tual tual a ni ngai e

"Natna chi hnih an awm a,
Natna pakhat min tichaktu leh natna hmantlak loh,
Tangkaina reng nei lo an awm,
Natna hmantlak loh tana dawhtheihna reng ka nei si lova"

"Thian nihna vuana nunpui tawhte tluka hmelma hlauhawm leh duh chhia an awm lo"