Khawvelah hian mak hi a lo tam viau mai a. Mihring rilru puthmang a zira mak kan tih pawh hi danglam mai mai thin a ni tih a chiang hle. Kohhran chungchanga a fahrah puanhlai sin pha ve tawk tawkin a kohhran hawn chungchang han ziahte phei chu Lalfaki (mi haw mai teh suh) a zaithiamlo tih tluk chauh a awihawmloh a ni ngei ang tih ka hria! Mahse mihring thinlunga duhna awm thin te, chakna lo thleng thinte hi a pangngai reng lova, sik leh sa ten hunbi tiama inthlak hun an nei ang hian mihring ngaihtuahna leh chak zawng pawh danglam mai mai thin an nih tlat avangin chutiang ang mize nghet lo ka nei pawh chu thil siam ka nihna ti famkimtu lek a lo ni reng mai!
Champhai Bialah hian kohhran pakua kan awm ve ta reng mai a, BCM Lianpui hi kohhran piang hnuhnung ber a ni ta mek a ni. Heng kohhran tlawh chhuah vek hi Bialtu Pastor tan hian a awlsam fahranlo hle a. Sunday vawi kua, Inrinni chama kal ngai kohhran pali leh kal vang vang ngai chhunga awm an nih hlawm tlat avangin May atanga September thla tawpah chauh kei pawn Bialtu Pastor zarah kan kohhran te hi ka tlawh kim thei a ni, tih hi ka thiante tan chuan mak tih leh nuih ti za tak tur a ni tihte ka ngaihtuah lo thei lo!
Kum 1990 chho vela Bialtu Pastor Rev Lianngaia, kan GS hovin Pangzawl Upa leh CR-i te Lunglei atangin an lo chho a. Aizawl lam atangin Mafaki, Champhai BMP ten kan Nula an tih ngam khawpa an ngaihsan leh ngaihzawn em em, Bial BMP Meet a an sawm lai vela a lo kal theih loh tur thu fiamthu a Bial President an hrilh tuma, BMP Vanpui chim ta ang hiala ngaitu leh Khawmpui chhim a phurna bo vek khawpa a nupui chunga tuan ta chiam chu riang ang reng takin a lo chho bawk a.
Mimkut Thla, Tahrik Ni sawmhnih pasarih, zing dar sawm vel atang chuan Champhai atangin Lianpui kan pan ta vawn vawn mai a. Lianpui hi khaw tawp a ni a, N. Khawbung pawh a ni thova, chutiang bawk chuan Tualcheng pawh hi khaw tawp a tih theih tep! Bial Zaipawlte pawh an in en uluk bawk a, chaw an eikhawm zing teh a nia! Kei pawh Upa Easter-a, Bial TKP President nilai, TKP Entu a thu a chhuah ve lai a, Nl. Esther-i an lo tih pek thin leh Champhai nula zaithiam Rengpuii, Leitlang Dingdi CR-i leh Zawlkhawpui rohlu Mafaki te nen chuan Sakuh kawng tum zawhin phur takin kan kal ve ta a ni.
Zaithiam bula chuang tih takah zinkawng chanve kan zawh hma atangin seat hnung lam atangin rimawi kan la hriat ngai reng reng loh, a ang awm leh thei ngai tawhlo tur chuan kawngtluan maiin min han awi ta a! Ka fiamthu hi sang viau mahse, tun tum chauh hi zawng ka fiamthu mawlh lo! Chuti em a rimawi rawn ri chhuak tharlam dangdai, aw ri mawi fan nem, aw ri chak tliang tham mawi, aw ri a zawnga thinlung chhungrila khurhna thlen chawpchilh thei, zahmawh ang maia mihring ti phur thei, mihring beng hriat atana mawi pawh ni zozai lo, a mawizia sawifiahna tawngkam reng he lei tawnga la pianglo, van miten Bethlehem dai an tlawh tum aia nepna awm miahlo chu ka la hre ngai lo!
Kan driver pawh chuan pawlna danglam bik a dawng a ni ngei ang a, a pawlna dawn chuan a chhungril mit a tidel a ni ngei bawk ang. Boulder kawngtum ing-euh tak maiah chuan Fast & Furious tluk zeta chakin min han limpui tak tak ta mai a! Lianpui thleng hmasa ber nih kha a tirah zawng a tum mawlh love. GS chena an thlen vek tawh hnuah muangchanga Khuallian ang deuhva min thlenpui kha a tum a ni zawk a. Mahse Sesih kan thlenin kan zaithiamte hrawk a ro laklawh a, Thingpui Dawr awmchhun kan hmu fuh hlauh mai bawk nen, dang leh pum puarna kan han dap leh mauh pek a! Mi zawng zawngin min tlanpel ta vek anih kha! Din chhen hi ka hreh em em a ni hran lo, mahse din apianga ka wallet thawl ziah hi ka ning ve mai mai a ni zawk!
Lianpui kan thleng ta! Kut ni vangthla lo thlen chang chuan mitin mai rilruah beiseina sawifiah hleih theih loh, thil engemaw tak lo thleng tura awma hriatna, thil lo thleng tura beisei boruaka inchiahzawp chakna ngei mai chuan mitin angkhat vekin min man a lo ni ber a! BMP, BKHP leh TKP lamin, kan GS motor aia kan chuanna motor man a tlawm vei nen, a chhunga chuangte pawh kan tet tlan ang angin Khuallian lo thleng ta ang ziazangin kan motor ber kher chu NLUP sem vanglai ang maiin an han bawr ta luih luih mai anih kha! Lehkha zir hrep hnua duhsak ngai thiamna zir chhuak chuang si lova thiamna kawl ai chuan zaite hi ka lo zir ta mai mai lova ni aw, te ka tih rum rum phah hial zuk nia! Mahse, a mipui nawlpui lah hian Mipa zaithiam ai chuan Hmeichhe zaithiam, chu a chhapah hmela van Pathian malsawmna dawng pha chin chiah ngaihhlut thiamna tawk thinlung no an pai tih ka hriat tlat avangin ka beidawng ka hawi kual ruk ruk ta mai!
Bial Puipate thahnem ngaihna a zara Vawkpa lian tawk tak mai talhtu BMP ho ka zuk kan ta ngawt a! Pu Liana hova phur em ema eirawngbawltu ho zinga ka tal avang chuan ka pumpui ruak, pawisa ka neih tlem em avanga Nula duhawmte ka khilai na lama ka insum ruk riltamna pawh chu Sakhi luite chak Siktui luang kianga tlaina a hmu ang mai khan ka pumpui pawh a puar thar ta hle mai a! Tichuan kan hun hmanna tur lam Hall pan chuan La a zawnga duhawm ber berte chu ka chhawm ta hnak hnak a.
Chuti takin chu khua chuan Lirthei a la hmu tam lo ang bawkin khual tha pawh a la thleng ngai lovang! Chumi avanga phawk lekna lo thleng chu Sorkar thuneihna hmanga khap daih ngawt chi lah a ni lo. Hall chhung chu chu khaw mil tak mai chuan an lo chei nalh ve hle a, thawk lak pawh a nuam sawt mai. Hun kan hmang chhova, Pathian programme a retheih pachhiatna lo thleng avanga setana ka huatna a zual sawt mai. Duh anga mawi leh nalh lungkuaiin kan zaithiam ten Pathian atanga an dawn malsawmna an hlan hlei thei ta tlat lo mai kha pawi ka ti lungrun em em a ni. Mahse, zahngaihna Pathian hi zawngin titi phungleng mai mai pawh hi a hun taka thutaka chantir a lo thiam khawp mai a lo ni a, kalkawnga an zai dun kha mawi kan tih em avangin Duet rawh u kan tih kha thuawih tak maiin an han zawm ta tehreng a! CR-i leh Mafaki te Duet ang reng renga mawi kha ka bengah hian rimawi lut ka la hre hauh lo zuk nia! Hun kan hmanna apiangah an Duet ta ziah reng a, kei chauh hian mawi ka lo ti lo tawp mai a lo ni e.
Rev Lianngaia, kan GS hi zawng riltam tak chung pawha puarna thuchah sawi thei kha a ni hrim a, a thusawi lai khan mi tlemte ni mai tur kohhran laka puarna, hun rei tak chhunga rin theih tur a sawi pawh khan kan hotupa nih a tlinzia a tilang chiang em em a ni. Kan hotute hian duhsakna phutawk he leiah hian dawng thin lo mahsela, vanah erawh kan la chung en dawn chiang tih hi CR-i nui ri-ina mi a tihlim tluk bawkin ka hrechiang a ni. Pawn atanga inchhung en tura mipui an fuankhawm chiam chiam hian thil pakhat a thleng dawn tihna a ni a, Mafaki a zai dawn! Chutiang ang taka mipui mimir khawsak phunga danglamna rawn thlen thei mihring hi an tam fahranlo a sin! Zaithiamna aw petu Lalpa pawh hian a aw pek ngeia ten Amah fakna hla an hlan lai hi chuan a tihtur thulh thakin van atang khian a rawn thlir ve fo ta ve ang! Thusawi tha leh zaithiamna inkawp rem aia fuh hi kohhranah a awm thei chuang dawn em ni?
Puarna leh tlaina hian vanram min thlen dawn ni ta sela, BMP hovina chaw tuihnai, sa bawlhlo kima min hrai puar ang kha chuan vanram min thlen ngei ang! Leiah pawh kohhrante chu kan puar a, vanah phei chuan eng ang takin puar dawn ni ang i maw? Zanah hun hlimawm kan hman chhunzawm leh zel a. Khaw hla deuh chuan min han hawnsan tak na-in, sangha pahnih leh chhangper panga chuangbang ang maia tam kha kan la ni miau a, hun hlimawm hian min khamlo a ni ber mai. Ni a lo chhuah chang a tlak hun a nei leh ngei dawn tih hriatna chuan chu kan hun hman nuam tak mai pawh chu hun vekin hnial rual lohvin tawpna min rawn siamsak lo thei ta lova. Mihring rilru a chakna tawpchin neilo lamin hun hian a rawn thunun thin avangin BCM Lianpui, member sawmli chuang awrhte chu ngai tak chungin kan then a tul ta a ni.
Rinna kawnga kan hotupa anih leh nih loh chu ka hre chiah lova, kohhran lama kan hotupa ber chuanna motor chu ramhnuai pilril lai takah Chl-a haw hreh ta lutuk chuan an khalh chhe ta tlat mai pek anih kha! Duhsak ang reng taka kan nulate ei atana kan lei Biscuit lah chu kan GS chuan inthlahrunna chang hre lek lovin min han mal nuai sak zui leh nghal vei nen! Mahse tui ti tak maia a han thial tawlh tawlh leh a lungawi puar hmel vei thauh thauh hmuh erawh kha chuan a ei lovang tih kan hlau leh hnuhnawh hle si a. Motor chhia hian kawng min dal chiah loh avangin Rinna kawnga kan Upate chu keini chuan kan tlansan ta hlawm a, Champhai pawh zan dar sawm velah kan thleng phei leh ta a. Kan hotute erawh chu zan dar sawmpahnih bawr velah an rawn thleng ve ta chauh anih kha!
A tuk lamah chuan kan GS leh Bialtu Pastor leh zaithiamte nen N.Khawbung a Biak-in tha ber BCM Biakin-ah hun kan va hmang phei leh a. Inkhawm bana he khuain chindan mawi tak an neih, mikhual duhsak bikte tana an dah that liau liau, Grep tui um tuihnai tak mai, khawlum tidai sawng sawng thei khawpa Fiara Tui iang kan han khawn zet kha chuan titi a tam teh a sin! N.Khawbung kohhran ho pawh chawhnu lamah kan tinsan leh ta a.
Zan lamah thung chuan Kahrawt biakin-ah Champhai khaw chhunga kohhrante kan inkhawm tlang ta a. Biakin hi saklai anih avangin N. Khawbung kan kal hlanin inkhawm theihna turin an lo buatsaih fel vek a, hla erawh ka va zir hman chiah chiah! Zanah chuan tawpna hun a ni tih hriat tak maiin lungsi takin inkhawmna kan nei leh a. Thuchah ropui reng reng hi Mal zai leh Zaipawl ten mawi taka an chhawn hi zawngin kohhran mite thinlungah puar leh fanna a thleng ngei ngei thin a lo ni e.
