Politician Tenghneng!

    Tukin ka office kalkawnga ka tlan laiin ka hnung atang hian Siren a rawi ri ruai ruai a. Thinlung hriatna chuan Lal a lo kal dawn a ni ngei mai, khawnge khua leh tui tha nihna lantir a khat em hi tiin ding meuhin kawngsirah chuan Bike chu ka’n tiding nghat a. Uipui tuilian thlir ang vung vungin Lal lo kal chu Lal berin VIP a tih ngei chuan hmuhnawm ti takin ka lo thlir ta vauh vauh a. Hetih hunlai tak hi Petrol leh Diesel van lai tak mai a ni a, motor tha tak tak maite chu Midum hlawhla hlim ang zutin kawng te takte-ah chuan an rawn lim ta piat piat a! Khuangchawithla Arkaiden lawm luhai damna zawng hmanhmawhte pawh an ang thei viau hian ka’n hre ngawt pek a!

    Chuti taka lo thlir ngun ta chu an Designation Plate thlir remchanlohna hmun tak maiah ka lo inhung ve khanglang bawk si a, kawng a tawt nen kan Lalte khan min tai palh ta sela, thiamloh ka chang ngei awm si a, ka ti zui nauh nauh nghe nghe a! A khawi bera chu nge Lal chu ni ta ang le tih hriat hran har khawp chuan motor intiramekai an tam avangin vailiam ber tur ka hre ta hauh pek lova. Ka thlang lawka ke-a kalna hmuna sikul naupangte pawh an buai ve tho a ni chek ang a, motor zawng zawng kha an lo vailiam vek mai hi a lo ni a. Keini pawh chuan kan Lalte zar zo chuan sikul naupangte zarah VIP nihnawmna kan tem ve ta hram a, Lal hi a lo nuam ngawt mai a lo ni!

    Pawisa leh Thuneihna hian mihring a hruai sual ngai lova, mihringa nihphung diklo awmsa vulh lenna hun remchang a pe mai zawk a ni. Politician ropuina chu zuitu a ngah lamah a ni lova, a mi zui tlemte te tana chhenfakawm thiltih a neihah a in nghat a ni zawk si a. Politician ropui tak takte nihna sikula kan zir thinte chu Mi tupawh thuneihna tlem tal a kutah pek a nih chuan, rinngam tawk lohna thinlung ramri khamchin kan nei ngei tur a ni tiin tuna kan Politiciante hian min thlak sak tan ta mek a. Thuneihna an lo chan avanga ram ropui nihna dinhmuna hruai thlengtute chanchin kan zir thinte pawh Mihring tam zawkte nunah hian, Thuneih chakna thinlung nghet taka tuhin a awm a, mi tam zawkte tan thuneihna hmansualna remchang a lo thlen a, Thuneihna hmansual hi thil thleng pangngai ve reng a ni bawk tih ngaihdan kan Politiciante hian min hrilh chho ta mek a ni.

    History a dai ngai tawhlo tur, hriatna a bo palh pawha hriatreng tlak mi ropui Mahatma Gandhi te, Abe Lincoln etc an nih laiin Damchhung hun hnuhnung ber hmanlaia, Zorama mi thiltithei ber berte hming Pu Hawla, Pu Zorama leh Pu Duhawma te an lo ni reng ang tih ka hlau ber tih chu kan changchawi chho ta mek bawk a. Sorkar chu mi retheite dawm kangtu, pachhiate thlamuanna thlentu an ni tih kan hriatbel em emte pawh Sorkar hi chhia leh tha hriatna a ni lova, Thusawi thiamna pawh a ni bawk hek lo. Sorkar chu tharuma tihluihna hahthlak, Fawng vuantu hlauhawm tak nei a ni zawk si a tih chu kan hriatthan tak a chang zo ta tep a ni! Rorel thiam hmingthang chanchin kan zirlai a, engtin nge chuti taka ram tana ro an rel thiam tih hriatchian kan tum em em thinte pawh Ram rorel thiam mi chuan chhuan lo la awm tur a ngaihtuah thin a, Politics a eizawng mi chuan inthlan leh hun chiah a ngaihtuah thin tiin kan titi ta sup sup mai zawng anih hi!

    Sum leh paia harsatna tinreng kan tawhlai a, phur taka mipui hrilh hretu ni chunga sum leh pai harsatna chinfel dan kawng zawng thiamlo leh a ngaihna hriat loh em avanga sorkar hmasa mawhpuhtu lakah chuan mipui tana kum sarih tla ei tharchhuah beiseina chu tuifinriat mawnga Nghalim man tum ang mai a ni a. Sum renchem thei ang bera khawsa tura mipui hrilh hrilh laia a hautak thei ang bera sum hmang hektu lakah chuan beiseina chu kawlkilah vanrang chhum ang maiin a bo thuai thin a lo ni. A ngaihna hria leh a tihdan phung hre chinte tana NA em em mai Midang awpbeh duhlo mite chunga hremna na ber thleng thin chu, mahni aia hnuaihnung zawkte awpbehna hnuaia kun hi a ni tihte chu Politician thankin, hriatna lama nausen pawmlai ang maia Nu rinchhantu la ni si lakah chuan hrilhfiah zawh rual a ni bawk hek lo! Hmuhsitawm ngawih ngawih an nihna chhiar tur nitin hmu reng chunga nitina Coat suit nena mipui pawisa hmanga in la LAL satliahte hian chhiarna tura Mit an neih leh hriatfiahna tura Thinlung pek an nihte hi an hmansual rei tawh lutuk avangin Mawlna chu Atna-ah lungsi takin an pawm ta mai mai a ni si a.

    Politician ropui tak takte thusawi chhiar tur kan zawn luai luai laite chuan Mizorama  sokar tinte hi mi dawheh tena an kaihhruai anih avangin, an thusawi rintlak tur reng a awm chuang lo tiin kan inhnem chawp ta vel mai mai a ni. America sorkar hi Himalaya Vurkhawn phena ro phumruk hai chhuak turin ka ring tawk kan tih laiin Mizoram sorkarte reng reng hi Rihdil enkawl turin dah ta la, Kum Nga a ral meuh chuan Tuia indaihlohna a thleng ngei ngei ang tih chu kan hriatchian thil a ni zo ta bawk a ni! Hun kal tawh chanchin inziak a chhiar hnu pawh Inzir finna leh thil tha zawk pawchhuak lo chu, hun kal tawh tihnawn leh anihnaah chuan Thiamchanna reng a nei lovang tih chu an chunga kan Thuvuakthlak rolum tur a la ni mawlh ngei ang!

Lalpa Hmantlak Tlemte

Ref : II Timothea 2:20-21

    Chu Biakin chhungah chuan Thalai rual hian hla an lo zir tluk tluk a. An tawngtai Thupui pakhat chu, “Member atanga hun puma Missionary atana thawk tur kan awm theihnan” tih a ni bawk. Thalai rualte chu ka han enchiang a, an hmel a va thain an va han duhawm tehlul em! An zai ri a mawi em em a, an nungchang pawh a bu ang thlap a chhiar nuam a ni. Thalai rualho zingah chuan Officer lian tak tak te, Zirna In-a thiam Zirtirtu sang tak tak te, Ph.D, MA, BA rual leh Pawl Sawm pawh pass lo thleng hian an lo chikim em em a lo ni a. Lalpa Biakbuk chhungah chuan Rangkachaka siam bungbel te, Hluma siam leh Thing a siam te chu kan Thalai rual ang maiin an tla za a ni si a.

    Kum khat dawn Tawngtai rualna an hman tawh hnu pawh chuan an zing atanga Hun puma Missionary ni tura chhuah tum reng reng an la awm ta chuang lova, an zai erawh a mawiin a tui pawh an tui tulh tulh em ni chu aw tihtur a la ni reng lawi a! Inkhawm leh Fellowship, Bial Pawn Fehchhuah engkim maite lah chu an hnehsawh pangngai rengin an la thawk thiam bawk a. Kohhran Nu leh Pate lah chuan an fate chu Lalpa Biakbuka an tel hram theihna anih phawt chuan engkim maiah an ngaithiam a, chhungkaw buaina chungchang thlenga ngaihnathiam pawh an inhuam em em a ni.

    Chung thalai rual hmeltha leh duhawmna kawnga Pathian malsawmna leihbuak dawng niawm takte chetla chu ralkhat atanga englai pawha thlir reng thin leh an zinga telve chak em em Thalai rual dang ka hmu bawk a. Chuti nafam chu tiin huaisen theihtawpin an zingah chuan an va tel ta nge nge thin a. Mahse ral atanga engkim mawi tak leh mit la taka an hmuh thinah chuan hahchawlhna reng reng an hmuh loh avangin ngui takin chu hmun ata chu an tlatna mual ngaia rilru hah taka chawl leh turin an let leh ta thin chu ka hmu bawk a ni.

    Chutih lai chuan Van atangin Meipui rawn tla thla ka hmu a, Biakin chhunga Pathian faka hlazir hote chungah chuan Meipui chu rawn kalin, an zain an kang ta vek hlawm a. Chutia ka thlir reng lai chuan thalai rual hmeltha leh duhawm tak takte chu Thingtang ro ang maiin an kang zawih zawih a, reilote-ah Meipui chuan a kang ral ta mai a. Chung thalai rual zinga mi Sawmriat chuangte dinhmun rapthlak tak ka thlir reng lai chuan Mi Sawmhnih awrh tur la awmte chungah chuan thil mak tak a lo thleng ta a. Vantirhkoh ang maiin Meipui lakah chuan an awm a, mei a na tulh tulh a, an var tulh tulh tih ka hmu reng a, ka ngaihtuahna chu a buai ta em em a ni!

    Nimahsela, reilote-ah chuan Lalpa hmantlak chu chutiang mi an ni tih hriattirin ka awm ta thuai a. Ngaihhlut hlawh ngai reng reng lo, a hlutna pawh Lalpa tana hriattur awm chuang lo, nimahsela Kohhrana a kur a taia tang ve em em si, Kohhran tan pawha mi tangkai zingah hian an lo tam em em mai a lo ni a! Bungbel thianghlim, Lalpa hmantlak chu Ngaihhlut tur a ni si a! Ringtu dik tak chu Rangkachak ang mai a ni a, Meipui vam harsatna leh manganna ten; Rawhtuina mei tluk zeta sa-a an hliau pawhin, A mawina a zual a, a tle nalh tulh tulh thin. Ringtu dik tak pawh chutiang chu a ni si a, Harsatna leh manganna tawp a tawh zin poh leh; Hmuh theihin a mawi a, A ringtu nihna chu midang tan hmuhnawm a chang thin!

    Chumi zan ka han mu ka thangharh chuan ka leng kual vel chiam chiam a. Khawpui chhungah chuan thil tam tak ka mithmuhah an rawn inlar ta a. Graduate Za zela Sawm pawh tling manglo hi Lalpa tana hmantlak an lo ni a. Lalpa hian kan mithiamte zingah hian chan a va nei tlem em! Chhungkaw tina thalai rual, an that vanglai taka Lalpa tana hman theih zat hi Za a Sawm an tling lo. Lalpa hian fanu fapa tha ber ber lakah chan a va nei tlem em! Class I Officer leh an Hotute zingah hian Za a Panga bak Lalpa hmantlak an awm lo. Mithiam rual zingah pawh a ni e. Kohhran Upa leh Rawngbawltu zingah hian Bungbel Thianghlim, Lalpa hmantlak, ngaihhlut tur awm mi an tam lo hle!

    Missionary hmelchhe deuh ai chuan Missionary hmeltha thawhhlawk tur zia ka ngaihtuah a. Khawvel thil pawha fing em em leh Zirna In sang ber rap tawh Pathian tana Team neia a fehchhuakin mipui a hip tur zia ka ngaihtuah bawk a ni. Office khata Lalber thuta thut a, Pu leh chhawngte thiltih that faka kutbeng ai chuan Pathian faka kut beng thlep thlep hmuhnawm bikzia chu kei chang hian ka haiin a rinawm loh a ni!

    Bungbel Thianghlim, mitin ngaihhlut hlawh ngei ngei tura Bible-in a sawi kan tlem em em hian kan ram dinhmun a tarlang chiang hle. Nula tlangval hmeltha em em rual zingah Lalpa hmantlak an va tlem tehlul em! Ni lo, Lalpa hi a chhe ber ber pek reng tur a ni bik love! Mi hnuaihnung Pathian faka lam reng ai chuan Mithiam kutben chuan thu a sawi ring zawk lovem ni? Graduate chin Lalpa hmantlak Speaker chu HS pass tawk aiin a thawhhlawk lovang maw? Paula nge Petera? Lalpa, mi tha leh duhawm tak tak hmantlak nei ni la, i hnathawh chu nasa takin a sawt tur a ni si!