𝐏𝐨𝐞𝐭𝐫𝐲 𝐅𝐨𝐫𝐦 𝐋𝐚𝐧𝐠𝐬𝐚𝐫 𝐙𝐮𝐚𝐥𝐭𝐞

 
 
            Thiam bik vang ni hauh lovin, ţhahnemngaihna luangliam avang zawkin mi tam takin an lo ziah del dul tawh hnu kha, tlai khawhnuah kan han tarlang ve dâwn a ni a. Chuvangin, thu ziak kan chhiarna rilru pawh thianghlim thei se a lawmawm ngawt ang. 

            Tun hnaiah nasa takin hla hril (poetry) huangah hma kan sawn a. Hla hril hlang awmna lehkhabute pawh a chhuak ta ur ur a nih hi. Chutih mêk laiin, kan thlen chinah hmasawnna tur a la tamin, kan hla hril phuahte hi kalhmang nei lem lo, kalhmang nei chhunte pawh tlânglawn tak tak hlir an la nih miau avangin, hma kan sawn belh zel a ngai niin alang. 

            Chutiang dinhmuna kan la din miau avangin, phâk ang tâwkin lehkhabu leh mi thu leh hla ka han bih kual ta a. Tichuan, thiam ang angin saphovina hla hril an phuahna form hrang hrangte ka han tarlang ta a ni e.

 Acrostic - Tlar tina thubulte’na thuchah emaw hming emaw tarlanna ang hi a ni a. Edgar Allan Poe-a siam A Valentine ang hi a ni a, syllable leh rhyme hman a ngai lem lo. Zakaria-a’n Tharbawihi puala a phuah hi lo tarlang ta ila.

 THARBAWIHI

 T- hliah loh sakhmelṭha,
H-ringnun ti mawitu chu.
A-lo ni, Phaizawl lily,
R-am tuktinpar-i.
B-eisei fuankhawmna,
Aw-mhar dawn ti seitu.
I- ni e, Rose pârmawi,
H-ling zinga vul ṭhin chu;
I- mawi e, i mawi ber e.
 
Ballad - Ballad hi Mizote chuan kan nei tam lo hle a. Hei hian hmabak kan la ngahzia, thu leh hla khawvela kan chim chin la san lohzia a tarlang kan ti thei awm e. Thawnthu emaw hmanlai thil hmingthang tak tak behchhana  siam, thawnthu hla tawi kan tih ang, thunawn neia siam ţhin a ni. Ballad Stanza abcb emaw abab hmangin an phuah tlangpui. Border Ballad by Sir Walter Scott te hi a pui riau!
 
Awmlai a hrâng Liando rûna’n,
A zua awmlai a vei;
A thai leh hrai ti riang tura’n,
Awmlai ţiahţâng a bei........................tiin hetiang ang hian châng 20-30 phuah a ni ţhin.
 
Ballad hi chi hrang hrang a awm leh a, chungte chu - Broadsheet Ballads, Folk Ballads, Literary Ballads, Opera Ballads, Jazz Ballads te an ni.
 
Ballade - Châng thum nei hla, tlar 7, 8 emaw 10 a sei a siam, châng tawpna berin tlar 4 emaw 5 emaw a neih ang hi a ni a. Châng tin tlar tawp ber hi thunawn ngaiin an siam ţhin.
 
Blank Verse - Mi tam takin Free Verse nena kan ngaih pawlh ţhin a ni. Iambic pentameter a siam anih avangin tlar tin hi Syllable 10 a ni tur a ni a, metrical verse a phuah a ni bawk. Entirna ţha tak chu  Alfred Tennyson's "Ulysses" te hi a ni awm e. Hman a nuam a, dipdaltu em em a nei lo.
 
Aw! Nipui vanglaia hmangaihna hian,
Thal laia khawchin danglam reng ţhin chu;
A iang zo ngei hian ka hre si a maw!
 
Thal romei tlang tin bawm paw chiai chiai te,
Chhemdam thli-in an chhem kian zawh meuh a;
Chimtu awm lova Ni a tarlan hi!
 
A duhawmna tinreng infawkkhawm te,
A mawinate nen Hmangaihna Thianghlim;
Pengte atanga siam chhuah an ni si!
 
Burlesque - Subject serious tak, fiamthu hmanga chhaih kualna lam hawi hla a ni a, E. E. Cummings "O Distinct" tiha nula hmeltha a tih a sawi elna ang hi a ni e.
 
Canzone - Medieval hun laia Italy rama an siam ţhin a ni a, châng 5 emaw châng 6 emaw neia siam a ni ţhin. A châng tawp ber erawh tlar an ti tlem bik ţhin. WITHOUT ANABEL'S SMILE by Andrew Crisci hi a mawi khawp mai.
 
Carpe diem - Latin tawng a ni a, vawiin hman dan chungchâng bik hmanga hla siam a ni. A rhyme hi aaab tlar tinah hman a ni ţhin. Sooner or Later by Clayborn Todd hi a nalh khawp mai.
 
Cinquain - Tlar 5 nei, tlar khatna thu hlawm khat, tlar hnihna thu hlawm hnih tlar khatna thupui sawi fiahna, tlar thumna, thu hlawm thum, tlar hnihna sawi fiahna, tlar lina chuan thu hlawm li neiin tlar ngana chuan tlar khatna thu a tarlang leh ţhin.

 
Classicism - Greek leh Roman Art kaihhnawih hmanga mihring hmêlthatna, mawina leh duhawmna puanchhuahna a ni.
 
In these deep solitudes and awful cells,
Where heav'nly-pensive contemplation dwells,
And ever-musing melancholy reigns;
What means this tumult in a vestal's veins?
Why rove my thoughts beyond this last retreat?
Why feels my heart its long-forgotten heat?
 
Couplet - Tlar hnih a ni a, rhyme leh ryme loh theih a ni.
 
Mi derthawng leh mi chak lo tak mi chuan,
Inhliahkhuh nân phuba lak a nuam ţhin.
 
Nuih hian vanram tlafual min chentir a,
Thlaler hmuna tuihna a ni si.
 
Dramatic Monologue - Hmanni khân pakhat chu group-ah hian ka post tawh. Mi pahnih emaw pathum emaw an lang ţhin a, pakhatin thu a sawi a, midangin an lo ngaithlain an lo chhang ţhin.
 
Terza Rima - Italy rama piang, châng khata tlar thum zel awm, tlar khatna leh thumna rhyme ang hi a ni.
 
Chhingmit keu i hlimthla thlirtu vanga,
Hmangaihna awpkeua awm a ni lo;
Vawitam hmuh sual neih hmang a ni si a!
 
Hriatna beng, i anka ngainatu vanga,
Hmangaihna chawm thaua awm a ni lo;
Hriatna kumhlun pai a ni si lo va!
 
Ka ţhinlung zawk hian a lungten ţhinte kha,
Thlema awmin nang awi turin min ko;
Hripui veinaa ka lawmna awm kha!
 
Stanza Form hrang hrang : Hla châng kan han tih mai hi Stanza chu a ni a. Hla châng nei mumal hi chu thlir a nuam a, a mawi pawh a mawi bik a ni.
 
Ottava Rhyma/Rima – Sir Thomas Wyatt an kum zabi 16 na lai vela a chin chhuah a ni a. Châng khata hla tlar 8 awm, iambic pentametre hmanga phuah ţhin a ni. Chumi awmzia chu tlar tin hi lambi 10 zel tihna. Tlar 1-3-5 an in rhyme a, tlar 2-4-6 an in rhyme bawk ţhin. Rhyme scheme chu abababcc a ni e.
 
PB Shelly The witch of Atlas, Keats Pot of Basil en rawh.
 
Chaucerian Stanza/Rhyme Royal – Hming pahnih nei mah se Father of English Poetry Chaucer-a hming chhala phuah a ni. He stanza-ah hian châng khatah tlar 7 zel an awm a, Iambic Pentametre hman a ni. Rhyme scheme chu ababbcc a ni e.
The Rape of Lucrece by Shakespeare en rawh.

Spencerian Stanza– He Stanza-ah hi chuan châng khatah tlar 9 a keng a, a hmasa tlar 8 te hi Iambic Pentametre (Lambi 10) hmanga rem an ni a, tlar 9 na erawhin lambi 12 a nei bik tur a ni. Rhyme scheme chu ababbcbcc a ni a, mi thiam chungchuang lo chuan he Stanza Form hmang hian hla chhenfakawm an siam ngai meuh lo!
 
Spencer Faerie Queen en rawh.
 
Quatrain – Hla châng khata tlar 4 awm a ni a, iambic hmanga phuah an ni leh a, abab rhyme a hmang! A lambi zat erawh chu bituk chiah a awm lem lo. Hei chu a nawlpuiin kan hriat kha.


Sonnet–Sonneto tih thumual Greek tawnga lak hi Ri tihna mai a ni e. Hla tlar 14 nei, thenzawm dan erawh hrang nuaih mai chauh a ni e.
 
Shakespearean Sonnet – Pu-a sonnet hi tlar li (quatrain) pahnih leh tlar hnih (couplet) pakhat a ni a. Rhyme scheme hi abab cdcd efef gg a ni.
 
Ka Sonnet
 
Ka Hmangaihna che hi Tuipui ni se,
Leilung reng hmuh tur a awm tawh lovang;
Ka hmangaihna che hi Thaler ni se,
Vaivut bak hmuh tur i nei tawh lovang!
 
Infawhna hi ruahmal far ang ni se,
Ruah baw hawk i hnenah ka surtir ang;
Inkuahna hi mitkhapkar ang ni se,
Darkar tam i hnenah ka rawn tir ang!
 
Ka hmangaihna che hi Arsi ni se,
Zantin Chawngmawii iang a eng zual ang;
Ka hmangaihna che hian thla nei ni se,
Thlawk chungin ka invawrh sang tual tual ang!

Hmangaihna kan tih hi mihring ni se,
I hnenah keimah ka rawn kal ang e!

Italian/Petrarchan Sonnet – He hla tlar 14 hi tlar 8-Octave leh tlar 6-Sestet a then a ni a. Octave bik rhyme hi abba abba a ni a, Sestet erawh cdedce, cdecde emaw cdcdcd a rem a ni ţhin.
 
Spencerian Sonnet – Kan tarlan tak pahnih ti danglam a, form thar siamtu hming chawia an phuah hi a rhyme scheme chu abab bcbc cdcd ee a rawn hmang thung mai a ni e.
 
Prosody – Hla kan siam a, rimawi a chan theihnan a pawimawh em em chu Prosody hrang hrang te hi an ni, tawite tein I lo bih thuak teh ang.
 
Metre – Mizo tawnga har tak mai hi chi hrang hrang a awm a. Hla a rhythm kan tih, ri fawn hi metre chu a ni mai e.
 
I)Iambic–Hla kan han siam ta a, foot khata lamrik hnih kan han tithe chu rihniam stress loh lam khat leh risang, stress khat te an ni tur a ni. Tuanna kan han tih hi lam hnih a ni a, tuan chu rihniam niin na chu risang…………chhuahtlang chu lam hnih a ni a, chhuah chu lam hniam niin tlang chu lam sang….kan hrethiam mai em aw?
 
Tlar khata feet 5 a awm chuan Iambic pentameter, feet 4 awm chuan tetrameter, feet hnih dimetre, feet 3 trimetre, feet 8 octametre an ni chho ta zel a ni.
 
A bak sawi ka tum lem lo. Metre hi dik taka hman a har a, hla flow tha tak tak kan phuah theih tho avang hian metre hi chuan min phuar em em lo mahse pawi ka ti lem lo.
 
Rhyme – Ri-inpawl/Ri-inrem kan han tih mai hi chi hrang hrang a awm leh a.
 
End Rhyme – Hla tlar tawpna thumalte ri inang, hla phuahtu tam ber ten an hman tlanglawn em em a ni.
 
Hmangaihna kan tih hi mihring ni se,
I hnenah keimah ka rawn kal ang e!
 
Heta ka han sawizau duh chu Saptawngah chuan commits leh befits in rhyme dan ang chi, English sonnet, a bik takin Shakespeare-an a hman ţhinah hian a ni. Commits chu lam hnih a ni a, Befits pawh………a lam hnihna fits in rhyme chu end rhyme a ni ta a ni.
 
Zotawnga chângin tih leh hmangin tih pawh hi a in rhyme ta a lo ni e.
 
Internal/Medial Rhyme – Hla tlar khat chhûnga thumal lamrik in ang awm ţhin hi a ni.
Hnukpui chahna tahna ruamah – han tiha chahna leh tahna in rhyme ang hi.
Beginning Rhyme – Hla tlar bula thumal in rhyme ang hi a ni.
 
Thlawn lovin nang nen leng ila,
Dawn lungruk biahzai mi hlan rawh……………..tiha thlawn leh dawn ang chi hi.
 
Eye/Vision Rhyme – En thuaka in ang em em, rhyme hauh si lo an awm thei. Wind tih leh Bind han tithe hi in ang tak, rhyme hauh si lo an ni. Chak (strong) leh chak (eager) han tih ang chi hi Eye Rhyme chu a ni e.
 
Single rhyme thliak leh tliak tithe an awm a, double rhyme lungngui leh lungvui an awm bawk a. Triple rhyme sa tin an hnawl tih leh iangin an zawl tihte a awm a, Perfect rhyme chungtlâk leh chungtlâk thlengin an awm bawk.

𝐀𝐔𝐅𝐖𝐈𝐄𝐃𝐄𝐑𝐒𝐄𝐇𝐄𝐍

A hmel chu ţo inmûng ang maia dûrin,
A thinlung chhûngril ber a khur hlawk hlawk a,
Mang ram ni hlauh zawk se tia rumin,
Tak ram khawvel chu a nghilh dûp si a.

A beisei ngai loh thil lo thleng ta phût chu,
Dawnsawn dan tur reng reng a thiam si lo,
A thluak hnathawh làm a chawlawl zo a,
Thûk takah a ţap chhuak ta ráwih ráwih a.

Ţap thawm hriat tur erawh a awm hauh lo,
Ngaihtuahna dîng tak, mumal reng nei lo,
Huatna leh thinrimna pai si lo,
Khâknate’n hmun reng an chan lohna chu!

Mak tihnain a pûm khah a ni zawk,
Awih phal lo chunga thu dik ni si chu,
Chuti kaua amah veltu tha chu,
A chak lutuk, a ni a chak lutuk!

A thinlung nâ lutuk rûm hrawih thawm chu,
Tu beng mahin an hriatsak ngai lovang,
Hri chhia ang maia amah rûntu chuan,
Eng ang hreawmna nge a pêk tih nen!

Vân chuan duhsak takin chhawmdawl fo se,
Leilung paw'n duat takin venghim ţhin se,
Khawvel chuan malsawmnaa vur chungin,
Khuanu'n zahngaihna nen chawm fo rawh se.

𝐋𝐢𝐭𝐞𝐫𝐚𝐫𝐲 𝐃𝐞𝐯𝐢𝐜𝐞 𝐇𝐫𝐚𝐧𝐠 𝐇𝐫𝐚𝐧𝐠 - 𝐈𝐈

           

            Thu leh hlaah ka tui ka tih reng laia Literary Terms hrang hrangte awmzia hriat miah si loh chu khuang lo va chai tum nen thuhmun reng a nihna lai a awm thei awm e. Thu leh hla ti thu leh hlatu leh timawi zualtu, a chei mawitu an nih tlat avangin hman thiam pawh tum tur a ni reng a ni.

            Chung Terms hrang hrang zingah chuan hmanrim bik an awm leh zel a. A pawimawh zualpui nia ka hriat, entirna nen tarlan ka han tum dawn a ni. Mahse, entirnaah hian Mizo lehkhabu tun hnaiah ka bih tam loh avangin sap lam ka hawi tam ang tih erawh ka sawi hram duh.

 

Alliteration : Thu ziaktuin thu lam rik inang hmanga thu a chheh phei hi Alliteration an ti a. Entir nân; A khawngaihna khan kan khawlohna a khuh a! tih ang chi hi. Sapţawnga Peter Piper picked a peck of pickled peppers tih ang hi a ni.

 

Anachronism : Hei hi hman zen zen ni lo mah se, Shakespeare-a khan Julius Caesar Chan II, Lan I-naah khan heti hian a hmang a. Brutus: “Peace! Count the clock.” Cassius: “The clock has stricken three.” He lemchan hi histawri kan en chuan 44 AD hun lai bawr kha a ni tih kan hria. Mahse, khatih hun lai khan sana a sawi ang hi a la awm hauh si lo. He lai sentence-a sana a rawn hmana hi Anachronism chu a ni ta a ni.

 

Allegory : Allegory chu thawnthu chhûnga thawnthu awm kan tih ang hi a ni ber. Sazupui leh satel chanchin kha kan hre vek awm e. Sazupui, satel leh intlansiakna lam hawi thawnthu a nih reng lai khan a phenah inring renga awm chu hnehtu nun a nihna thawnthu dang chhiar tur a awm a nih kha.

 

Allegory hmingthang berte zinga mi pakhat chu George Orwell-a lehkhabu Animal Farm kha a ni. Kum zabi 20 bul lama Russian Revolution leh Stalin-a hun chungchang thu a Allegor-na a ni a. Kha thawnthua Old Major-a khan Lenin-a leh Karl Max entirin lo neitupa Mr Jones-a ve thung kha chu Czar lalpa kha niin vawkpa Napoleon-a kha Stalin-a.

 

Anaphora : Sentence inţanna zela thu inang hmanna ang hi a ni. Entirna ţha tak chu Martin Luthera thu sawi hmingthang tak, I have a dream…kha a ni. A thu sawiah khan i have a dream tih hi a hmang chho zel a nih kha.

 

Assonance : Sentence-ah emaw ţawngkauchheh angah emaw vowel ri inang tlar phei hi Assonance chu a ni a. Romeo & Juliet Chan II-naa Now old desire doth in his death-bed lie tihah hian vowel O ri khi i chhiar phei zai zai thei mai em? And young affection gapes to be his heir tihah pawh vowel A ri hi kan chhiar phei thei ti raw?

 

Hyperbaton : Thu chheh dan pangngai, thumal thlak danglam si lo va ziak dan thlak thleng sawina a ni. Sweet, she was han tih ang chi hi.

 

Hyperbole : Thu sawi uarna ţawngkam kan tih hi a ni. Midsummer Nights Dream kan en chuan, ‘Verther takin ka fanu thinlung chu hnehin ka laka a thuawih  ţhinna làm  ţhiahsakin hmeichhe luhlul tawpah min chhuahsak ta a nih hi’ tiin a fanu thinlung rûksak a nih dan a sawi uchuak thiam hle.

 

‘Lalpa leh! Kan inhmuh lohna khua han sei tawhzia mai hi!’ tihte pawh hi thu uarna kan tih chu a ni mai e.

 

Oxymoron: Thumal inhal tak anga lang, dah duna awmze thûk tak nei. 

Shakespeare-a’na inţhenna ‘Lungngaihna duhawm’ (Sweet Sorrow) a tih te, Laisaizawka'n Sudden Muanga a tih angte hi.

 

𝐋𝐢𝐭𝐞𝐫𝐚𝐫𝐲 𝐃𝐞𝐯𝐢𝐜𝐞 𝐇𝐫𝐚𝐧𝐠 𝐇𝐫𝐚𝐧𝐠 - 𝐈

            Kum zabi 21-na a han ni a, tlangval kum 20 chuang awrh turin lehkhabu, ‘Chawlhna Tuikam’ a rawn tichhuak ta a. Mafa-a vanga huaisenna thlarauin a thuam chak, thu leh hla lama tuihalna rawn nei thar ta kha mi engzat tak awm ang maw?

            Thu leh hla khelmual kotlâng aţanga thlirtu mi tam takin, thu leh hla khelmual chhûng an luhchilh ngamna chhan kha Mafa-a vang kan tih hian, thu kan uar lutuk lo ang! Zep nak emaw, kei chu heng ka mi sawite zingah hian ka tel ve leh pèk lo a! Lehkhabu chhiar hi naupan tet ata chin ţhanah nei mah ila, a Literature ang zawng hi chuan ka tui lo chiang, tih ka inhria!

            Mahse, hun a lo kal zel a. Khawharna khawvelah zet chuan thu leh hla aia hnemtu ţha an lo awm lohzia ka hre chho ta chauh a nih hi. Aristotle-ate kha chuan, ‘Metaphor hmang thiam tak nih tluk a awm lo’ an lo ti daih tawh a. Kan mi hmasate zingah khan, heng hmanraw chi hrang hrang hmang thiam em em, chuvanga tun thleng pawha ngaihhlut leh zir tham tling an tam a nih hi. Chuvangin, thu leh hla lama tuite tâna ţangkaina a neih tak mialah, tiin heng hi ka han ziak ta a ni.

            SIMILE : Mi tam tak buaina chu, Simile hi khaikhinna emaw an ti tlat hi a ni. Tehkhinna niin, thil inang lo pahnih inanna siamtu a ni. Chu ta tân chuan; ang, iang, dungthul, bang, buan etc hmangte hian thil pahnih kan tehkhin ţhin. ‘Ţah lai bangin…Pâr ang a chul…Ţhuva ianga zaidam nun nêm…Duhte’n buan ang ka pawm etc tihte hi lo en ta ila. Pâr ang a chul han tihte hian mihring nun, tawp hun leh uai hun nei a nihna hi pangpâr nen an tehkhina, hla thu mawi tak a lo pian phah ta a nih hi.

            METAPHOR : Metaphor hi tehkhinna a ni lova, khaikhinna/hmehbelna a ni thung a. Simile nena lo hriat pawlh nâwk an awm ţhin pawh hi, an nihna hriat chian loh vang chauh a ni. Kum 1915 chhovah Harhna vawi 3-na a rawn thlen khan, Patea, Damhauhva, RL Kamlala etc te’n an hla phuahah metaphor mawi tak tak an rawn hmang chho a. Rumna thlaler, dam lai lui dung, sual thlipui, lungloh tui dawnin, rihsang kaiin etc tihte kan hmu chho ta a. Hun a lo kal zel a, nula hmelţha sawi nân; Ainawn pâr, Sensiari, Ngaihzual tihte pawh kan hmu chho ta mawlh mawlh a nih kha. 

            SYMBOL : Symbol hi Simile leh Metaphor nena inhnìmhnai tak an nih avangin, hriat chian loh theih tak a ni bawk. Thil pakhat aiawha thu leh hla an hman hi Symbol chu a ni mai a. Kan hla phuahtute’n Vanram sawina aia Eden-thar nuam, Isua aia Beramno-Varparh Arsi an hmang ang hi a ni. Symbol leh Metaphor inlaichinna hnaivai tak hi hriat reng a ţha ang. Ka bialnu kha hlain; Ka Ainawnpâr ka han tih hian Symbol a ni a. Ka hmangaih chu ainawnpâr ka han tih thung hian, metaphor a ni ta thung a ni. 

            IRONY : Kâwl a thim ruih mai a, thli a thaw vûk vûkin  hnahthel a lêng cûm chûm bawk. Chutih lai taka, ‘Khua a va han nuam êm!’ lo tih hlauhna ţawngkam ang hi Irony chu a ni mai a. Kangţhelh lirthei (motor) a kang, police hmunpui an rawk, traffic police license an chhuhsak, han tih angte pawh Irony vek an ni. Thil awmze letling hlauh sawina a nih rualin, in ţawng elna ang a ni thei tih kan hmu fiah mai awm e. Siamthangi hlaa, ‘A ţha par tin lawri, lênglerhi’ tihte kha in hre ve emaw chu?

            ALLUSION : Thu leh hlaah Literature a ni emaw, thawnthu, baibul thu, histawri lama chuang, a nawlpuiin an hriat lo zeh zeuh hi a ni. Entirna ţha deuh pakhat chu; I zûnlêng chhawl uai chat zo lo hi/ Nang vang Thangzawr iang ka zawr zo va/ Nêmte’n mi chhawn la/Aihniar ka chang mai tur, tih hi a ni. Patea khan a hla pakhatah, Lalpa khawiah nge hmun min buatsaih/ Daniela angin tukverah ka thlir ang, a tihte pawh hi Simile kan hmuh rualin, Baibula Daniela chanchin zehna Allusion kan hmu tel a nih hi.

            IMAGERY : Suangtuahna hlimthla, thu leh hla hmanga thlir theih hi a ni. Thu ziaktu emaw hla phuahtuin, kan rim hriatna, kan mit hmuhna, kan beng hriatna, kan lei hriatna, kan kut khawiha thil hriatna hmanga thu a chheh ang chi reng reng, suangtuahna mitthlaa a nemkai ang hi a ni. Luite dam diai, tuipui fawn hlup hlup han tihte hian a sawi fiah mai awm e. 

           PERSONIFICATION : Thil nung ni si lo, nunna nei leh mihring ang maia chana zuk biakna, hmuha khawih theih loh, nunna nei anga zuk chantirna hi Personification chu a ni leh a. Shakespeare-a Sonnet ka chinlehna chhiar tawh chuan, Personification kan hriat fiah tawh ngei ka ring. Ka tir nang che chhim thlifim, va lêng ta la mi û rûnah, tia han phuahchawp mai hian a chiang zual emaw chu le? 

            PARADOX : Paradox: Han en maia thu inkalh anga lang, mak taka dik bawk si hi: Ei tam i duh chuan ei tlem rawh, tih ang chi te, Dawn a sei poh leh a tawi si ţhin han tih daih ang chite hi a ni.

            Hman ni deuha Word Play awmzia leh entirna ka ziakah khan; Oxymoron, Alliteration/Consonance, Double Entendre, Onomatopoeia, Malapropism awmzia bakah Rhyming chungchang ka tarlan tawh avangin, tunah hi chuan ziak tel ve ta lo mai ila. Heng bakah hian Literary Terms chi hrang hrang, thu leh hla hausakna leh chei mawitu, ngaihno tibeia tilungrûntu, lung kuai taka min siam theitu hla rua chi hrang hrang hman tur a la tam hle a.