NULA TLANGVAL INLEMNA

Free Verse

Nula :

Lukham khawngaihna hnuaiah ka tap thawm chu,
Pindan bangte chuan thuruk an zep thei a;
Tukverh biangte lamin an beng a ngawng a;
Chhuatphahte pawn tawng zai reng an rel lo ve.

Tlangval :

Khawiah nge thinlung kehsawm damna a awm?
Bul tan tur ke pen tanna hmun chu khawi lai nge?
Engkim ka tihte chuan i sulhnu min hriatchhuah tir a,
Hla thu tinreng ten i chanchin an hril vel si.

Nula :

Zan thim ngawi duk karah chuan,
Thinlung kehsawm avanga ka tahna kara’n;
Mittui leh insut thawm chu ka thian tha ber an ni e.

Tlangval :

Ka pindan tesep thim tak chhungah,
Ring takin ka tap chhuak hawm hawm a;
Khawvel chuan ka thinlung thler chhan a hre lo.

Nula :

Vawi engzata tam nge ka thinlung natna i thlen tawh,
Tia zawhna mawlmang tak mi zawh fo thin chu;
Ti hian ka chhan nang che, “Zan thla eng hnuaia,
Chung Si-ar i hmuh zat zet an ni,” tiin.

Tlangval :

Khawiah nge thinlung kehsawm damna a awm?
Bul tan tur ke pen tanna hmun chu khawi lai nge?
Engkim ka tihte chuan i sulhnu min hriatchhuah tir a,
Hla thu tinreng ten i chanchin an hril vel si.

Nula :

I thin a phut rual chiahin ka thin a phu a,
Ka hmui chuan nang fakna hla mawi a sa thin;
Ka mit chuan chhunglama i mawina a hmu reng thin a,
Ka thinlung leh thlarau mamawh hriatna ka lo nei ta.

Tlangval :
I hmuia mi fawhna chu Ni zung thlar lumna hnuaiah ka tem a,
Lungchim takin Thlasik khawvawt kara mi kuahna nen;
Nangmahah ngei chuan Zing, Chhun, Zan ka hmufiah thin a,
Nitin, mitkhapkar khat lamin hlimna chuan mi fan chhuak thin.

Nula :
Nang ngei hi ka hmangaih chu i ni e,
Thlifim kara faifuk ri hlerh hlerh chu;
Fur ruahtui bua ngawihtir thuaptu,
Nipui thli thaw kara rimawi tum ri chu.

Tlangval :
Nang hi ka hmangaih chu i ni e,
Pangparte rimtui chhuah chu;
Phaitual hnimte rimtui in chulh,
Inthawina rimtui halral rim ngei chu.

Recollection of the past - IV

Relieving the past!

"Min hmangaih em" ka han ti a.

"Aw, hmangaih e" tiin mi chhang a.

"Anih leh hlim taka awm turin mi duh em?" ka han tih chuan ka thin chu a phut hian a phu dut dut tawh a.

"Tehreng mai" nui sak pah chuan a han ti a.

"Anih leh thil pakhat chiah min tihsak thei ang em?" ka han tih chuan, lungngaih hmel takin a meng hnuai lap a, lehlam mi hawisan ta a.

A natna chu a nasat tawh em avang chuan inthlahrun hmel tak maiin, "Ka thei na meuh ang emaw chu le" a han ti a.

"I tih theih awm ang ni sela, i ti ang em?" tiin ka la zawt lui ta zel a.

Chutih lai boruaka ka awmdan chu sawifiah mai har tak a ni. Thinrimna, lungchhiatna, hmangaihna, hlauhthawnna, beiseina te chuan tuilian ang maiin mi khuh hlup hlup a ni ber a.

Ani chuan ka lam a lo hawi phei leh a, ngunthluk tak maiin mi melh vawng vawng a, chutah zet chuan ka thaw tha ngam tawhlo a ni ber.
Kawlphe ang maia rang hian ka thinlung chu tihvarin a awm nghal a, tuma lakah hetiang taka rilru tuiralna hi ka pu leh thei tawh ngai lovang tih chu ka chiang ta em em a ni! 

A mitmeng ka han thlir chiah phei chuan, hringnun thlak danglam dawrh chakna chuan namenlovin ka nun a rawn nem her sawk a. A dinhmun thlak danglam nan ka nun hian chhiatna tawp tawk dawn pawh ni sela, chu aia thil tih chak reng reng nei hian ka inring mawlh lo a ni!

Ka ngaihtuahna ril ber berte chu hrilh ka chak em em a, mahse chutih lai tak chuan tham chial hian, "Aw" tiin mi chhang ta a. A aw chu chau tawh viau mahsela, thutiam hian a khat ngawih ngawihin ka hre pek a.

Theihpatawpa insum chung chuan a kut ka la a, a hmui chu ka fawp a. A hmaifang dang lap tawh, mahse duhawmna tinreng infawhkhawmna chu ka chul ta a. A vun no zia ka hre thar a, a mitmenga zawiawina lo lang pawh ka hmuh hmaih miah lo. Ka hrawk a rawn tawt tha leh a, mahse a damna thlen turin engmah tih theih ka neih loh zia ka hrechhuak nghal si.

Kan pahniha hmalam hun pawhsei chu ka tan tihrual ni lo mahsela, a duhzawng tak tihsak erawh ka la thei a ni tih ka inhria a. Ka thinlungin a titura min duh a ni tih pawh ka hai mawlh lo! Nem thei ang berin ka nuih sak a, ani pawh chuan na vak lo, a theih tawkin ka kut chu a hum salh bawk a. 

Ka thiltih tumah chuan mi ringtawk tih hriat tak mai hian a mit chuan mi han tiphur pah bawk a!

Ka ka ka ang a, ka thinlung ril bera atanga thaw lo chhuak mil chiah chuan, "Min nei duh ang em?" ka han ti ta a!

Ka hmangaih che

"Ka hmeltha i ti em?" ti a ka zawh chuan,"Ti lo" tiin min chhang a.

"Anih, ka thau i tia mi?" ka tih chuan,"Aw" tiin min chhang a.

"Kumkhua atana keimah nena hun hman liam i duh em?" ka tih chuan,
"Duhlo" tiin min chhang leh a.

"Anih leh tunah hian kalsan ta che ila, i tap ang em?" ka ti leh a,
"Tap lovang" tiin min chhang nghut a.

Ka duhtawk ka ngah tawh tlat a, lunghnur takin kalsawn tumin ka inher lai tak chuan, ka banah a vuan a, "Kal suh, la tawi khawmuang lawk teh" a ti sap a.

Lungrun em ema mi thlek pah chuan, heng thu mawi em em hi a chham ta a ni.

"I hmeltha ka ti a ni mai lo, i duhawmin i ngainatawm chungchuang ka ti a ni zawk e."

"I thau ka tih khan i tisa lam ka thlir lova, i thinlunga thau tha ka sawi a ni zawk e."

"Kumkhua atana nang nena hun hman hi ka duhlo a ni lo, a mamawhin ka mamawh ngawih ngawih che a ni zawk a sin!"

"Chuan duhtak, mi kalsan ni la tap tur ka awm lovang, thihna chu ka chan a nih dawn avangin"


A kiangah chuan ka thu hnawk a, lungchim em emin ka kuah a, a hmui chu ka fawp ta vawng vawng a. Sakrament them ei ang maia thianghlim zuk nia!

Recollection of the past - III

Khawvel a ding!

Dawr atanga kan chhuah hnu chuan an In lam panin muangchangin kan phei dun ta a. Favang boruak anih avangin shawl a bat a, kei pawhin ka jacket chhuanvawr ber ka ha ve bawk a.

"Mi hian mak min tiin, mi min hmuh dan pawh hi a pangngai chiah lo ti raw?" tiin mi zawt thut a. 

Chhan nghal mai ngaihna ka hriat loh avangin ka hawi kual ruk ruk a.

"Nang pawh hian hmeichhe khawsak mak tak niin min hria ti raw?" a han tih zui phei chuan sawi tur ka haichham tak zet zet tawh a ni.

Mahse, "Enge i sawi awmzia chu?" ka ti lui thei hram a.

"Ka hria a lawm, zep tum duh lem suh" mi han tih takah chuan dawt sawi zui zel ka ngam tawh lo.

"Tupawh chuan maksak an ti che a lo ni thei e. Kei chuan nang aia hmeichhe duhawm leh ngainatawm reng reng ka hre lo. I nun a ngil a, mi pawisawi i hlau em em thin; i nihna ang hi ka nihna atana ka duh em em a ni" ka han tih chuan rimawi ang mai hian zawite-in a nui sak a.

"Tun atang chuan thudik chauh min hrilh tawh ang tih min tiam rawh" a han tih chuan, "Awle, tun atang chuan thudik tak bak ka sawi tawh ngai lovang a, hrilh pawh ka hrilh tawh ngai lovang che," ka ti ta a.

Thingbuk hnuai kan thlen chuan ngawi rengin a kut ka vuan a, ka lamah ka pawt hnai riai riai a, duhthawh, nem tak siin a hmui chu ka fawp ta a. Ani pawh chuan nem tak bawkin min chhang let a.

"Ka hmangaih che, tawnhriat ka neih ve tawhah chuan nang tluk renga tawnhriat duhawm ka la tawng ngai lo" ka han tih chuan rang lutukin ka kuahna ata a tal pit ta thut a.

A mittui hnam sawk chu ka hmu reng a, "Khawngaih takin, khawngaihin chutiang thu zawng sawi suh" a ti ta mai a.

A ngaihna reng reng ka hrethiam lo. 

"Ka ti tak tak a lawm" ka han tih pawh chuan, "Ni lo, chutiangin ka lakah awm suh" tih pah chuan ngui hmel tak, chauh hmel tak bawk chuan lehlam mi hawisan ta a.

"Ka tih palh a ni, min hrethiam rawh" a han tih chuan, "Ngati nge, ka thianten an sawi i hlauh vang nge, enge ni? Anni ai chuan ka ngai pawihmawh zawk che tih i hria a lawm. Anni chu eng atan mah ka ti tawh hlei nem" ka han ti leh a. 

Ka mang hi a ang em em a, hlauhthawnna lian tak mai chuan min zem chiai chiai hian ka hre tawh a.

Ka kut a la a, ka hmuiah chuan mi han fawp a, "Min hmangaih thei lovang, min hmangaih ngai suh! Thian angin kan inkawm thei a, nitin i duh chuan kan inhmu thei a lawm, mahse mi zawng i hmangaih tur a ni lo" a han tih phei chuan, thil diklo a awm tih ka hrechiang ta tak zet zet a ni.

"Engvang chuan maw, a chhan min hrilh tur a ni" ka han tih chuan, reife chhung chu a ngawi ta vang vang a. 

A mittui chu a parawl tuau mai a, zawi sap hian, "Ka damlo a, ka na tak zet a ni" a ti ta a.

Ka thaw huai a, "Chungte chu i inenkawl ang a, i dam leh thuai mai dawn a lawm" ka han tih chuan, a hma aia lungngai zual niawm tak hian a vanvadak a, "Ni lo, ka damlo ka tih hian ka thi dawn a ni zawk. Thisen Cancer ka vei a ni"

Vawilehkhatah khawvel chu a reh nghal duk a, ka khawhmuh chu a phe ruai nghal bawk a. Ka ngaihtuahna pawh chu a chawl nghal vek hian ka hria. Ka thinlung chhungril ber chu dan rualloh hian a tap ta zawih zawih a ni!

She was so young!

A thih hma lawka ka va hmuh tum khat chuan, bathlarah hian thutthleng nghenchhan neiah ni lum ai pahin a lo thu dang bam a!

"Enge i an, i mu tha thei maw?" ka tih zawng ngawt pawh chuan ka hnuk a ulh a, pachan har ka ti ngawih ngawih a ni. 

Chu zawhna chu a mize nghet tarlanna pakhat nia ka hriat ngei hmang chuan, zawite-a nui chung chuan,"Ka tha a lawm, i mut a tui zawk maw?" min ti hlauh anih kha!

Ka lam a rawn hawi a, a chalsam uai hniang hui kian pah chuan, "Ka bulah hian lo thu hnai la, khua hi a mawi bawk a; ka rilru ka hrilh mai mai ang che" a han ti a. Lungchim takin a bulah chuan ka zuk thu ta a!

"Kan intawn hmasak ber ni khan, ka thinlung chhungril ber pindan thima lei khekahte chuan Pangpar hi ka hriat miah loh hian an lo tiak a lo ni a. 'Ka hmangaih che' min tih zan phei kha chuan mutmu reng reng ka tuah thei lo. Damlaite nun chu mang ram aia a duhawm miau vang a ni"

A mitmeng chau tak chuan mi melh vawng vawng a, tawng tuma ka ka ka'n ang zauh chu a kut chak tawhlo tak chuan a rawn hup a, "Ka natna kan hriatchhuah tirh phat atang khan, engkim hmachhawn tur hian ka inpeih a sin. Ka nun pawh Ka Pathian duhdan ang taka nuam tak leh enghelh nei reng reng lova hman liam ka tum a. Mahse nang hi chu ruamhman lawknaah chuan i telve ang tih ngaihna reng reng ka hre lo a ni!"

Chu thu chuan ka thinlung chhungril ber chu hriau hmawra vih ang sawk hian a khei thi nghal a! Thu leh hla, amah kawm hlim tuma kawng ka kal laia ka khawlkhawm zawng zawngte chu kawlkilah dan rual lohvin an liam vawng vawng a ni ber!

Ka rilru ngaihtuahna chu ka hmelah chhiar theihin a lo lang chhuak a ni chek ang chu, a kut cher tawh tak chuan ka hmai chu thei leh thei lovin a rawn chul a, "Ruahman lawk ni si lovah chuan ruahman lawkna khum vek khawpa ruahmanna duhawm i ni ang tih ka hre phak lo a ni" a han tih chuan ka lungchhiat hi a zual ngawih ngawih a, tah hawm hawm baka nawmna thlentu engmah ka hriatlohna chu ka haw ta ngawih ngawih a ni.

Zawi muangin a lu a her rem a, kawlkila sava rual thlawk chu a thlir vawng vawng a, "Nang nena tarkun thleng dam dun a, hringnun duhawm ber ber chhiar dun tluka thlakhlelh reng ka nei lo! Thihna chu ka hlau a ni lo! Nang nena hun kan hmang tam thei lo tur ka ngaihtuah chang erawh chuan, ka Pathian pawisawi hlau tak chung hian ka thinlung ril ber atanga lungngaihna infawkkhawm chu ka mittuiah a rawn far thin a ni"

Vante u, lei thuahthipa sualna avanga hrem tuar mekte leh van chhawng sang bera hmangaihna par tlana hlimna kawltu zawng zawngte u, eng chu nge in fanu hian a tihsual palh a, in lungawilohna chu a chungah in burbun tak mai le?


Ka thinlung chu a saruak vek a, khuarkhurum mawng nei lova thlak pil vawn vawn ang maiin ka ngaihtuahna chuan mumal reng reng a nei thei ta lo va!

Recollection of the past - II

Confession !

"I hnenah hian thuruk sawi ka duh tlat a ni" a han tih chuan ka ngaih a tha tehchiam lo.

"Enge ni ta a?" ka ti chhuak thei hram a.

"Khawvela nui hmel ka hmuh tawh zawng zawngah, i nui ver ver tluka mawi leh hmuhnawm tih reng reng ka la nei lo" nui pah chuan a ti ta rohva!

Chutia ka rinloh tak maia mi han tih takah chuan ka hamhaih a, minute khat dawn chu amah thlir reng pahin ka ngawi ta ringawt a!

Muangchangin ka hmui ka siam rem a, "I hnenah hian thuruk sawi ve duh ka nei a" ka'n ti ve ta ngawt a!

"I duh phawt chuan thutak pawh han sawi ta poh che" mi han ti a.

"Khawvela hmuhnawm leh mawi i tih ber lo awm chhan chu tudang ni lovin nang ngei hi i lo ni e" ka'n ti ve ta hnap anih kha!

Ni, hmeichhia hi chu an mak a ni. Lawmthu sawi hi an thiam em em tlat zel! Nuih sak pahin ka kut a vuan a, ka tukhum chul pah chuan ngunthluk tak mai hian mi fawp ta vawng vawng a!

A mi fawhna chuan kan thinlungah naupan chhiatna a rawn thlen a, hringnuna ka kum tamna chenin a eiral riai riai ni ber hian ka hre ta hial a!

A Thi Ta !

(In memorialise of something good)

A natna ka'n hriatchhuah atanga kar thumna chiahah a thi ta a. Chumi hma kar khat vel a la awm anga tih turah tum khat chu kan pahnih chauha bathlara kan inawmtlei laiin,"Thil pakhat min tihpui thei ang em?" 

A aw chu zawi hle mahse a fiah tha hle a, phutna awki ka hriat tawh a zawngah chuan phutna chhan chakawm ber a ni hial ta ve ang.

"Tehreng mai, engpawh tihsak che a, tihpui che ka huam tih i hria a lawm" ka han tih chuan mawi tak, tawi tak si hian mi nuih seih a. 

"Ka nu thlanah mi zuk hruai la, hun fianrial mi zuk hmanpui la ka duh a ni" a ti ta a. 

Chutia a tih paha a mitmeng ka enchimloha mi han melh dan mawlh mai kha, hmuh leh ka chak thin!

Ni, mi hnena thil a dil emaw ngenna a siam reng reng hian, hnial har tak maia thinlung dek a thiam em em a. Mi thinlung hneh erawh a tum a ni hauh si lo! Amahah chuan mi hneh theihna thuruk a awm ni ber hian ka hre zawk. 

Motor ka zuk la a, Thlanmual thleng motor-a kal theih anih avangin muangchangin Thlanmual kan pan dun ta a.

Kan Veng Thlanmual atang hian Bangladesh ramri a lang ruih a, ralkhat atanga hmuh phak chinah Lungsen, Thehlep, Hauruang, Vanhne Thuampui khuate an awm bawk a.

A nu thlan chu a lo hnawk niaih a, tifai tura hun remchang nei an awmloh avangin ka theih ang angin hnimte chu ka han pawt fai zung zung a.

Thlanlunga thu inziak ka chhiar chuan ka rilru a na thar ta tlat a ni. Kum zat ka zuk enin, chhiarkawp dana number tam a ni tlat lo tih ka hmu a, chu chhiarkawp aia tlem ngeiin ka duhber thlan chu an la ker ve thuai dawn a ni tih ka hriatchhuah tlat avangin.

Chu ngaihtuahna chuan a rukin nasa takin mi vel chiam a! Thinlai ril bera natna vawrtawp lo thleng avang chuan thluak hnathawh a chawlawl nghal a, ngaihtuahna fim chenin chhem bovin an awm zo ta!

Ani pawh ngawi rengin a nu thlanlung chu a vuan a, tah erawh a taplo! A nu nena an intawh hun a hnai tawh tih a lo hre daih tawh a ni ngei ang! Chutiang ang ngaihtuah chhuahna thinlung lo pai ve ni ila chuan, ka thawipikna kha tlemin a kiang tur a nia!

Dar chanve dawn a nu thlan kianga a awm hnu chuan muangchangin a rawn tho chhuak a. Thlanmual thar chhipa Bukah chuan kan chho ta a. Ngawi rengin ka kut a vuan a, kawlkil eng mawi tak mai chu a hmuh hnuhnun ber tum niawm tak turin a thlir ta vawng vawng a.

Chu hun dangdai takah chuan Ni thlar chu rawng eng, a sen leh a dumpawl hian an inchawih chiai a, vanrang chhum them kara Ni zung rawn thlur sung maite chu Chhimbal rawng ang mai hian an chikim bawk a. Ni zung rawn lang hnuhnung apiang mai chu an hmuhnawm emaw tih mai tur a ni.

Vante chu rawng sen, a sendang leh rawng eng ten, Van kawngka rawn inhawng atanga, Vante ropuina lo luangchhuak ang maiin an pawlh mawi ta a!

"Sawtiang ang taka mawi, duhawm leh hmuhnawm saw ka la hmu ngai lo reng reng! An va hmuhnawmin ka Pathian hi a lo va themthiam tak em!" tiin kawlkila Ni tla tur thlir reng pah chuan a han ti sap a.

Chutia a sawilai chuan Amah chu ka thlir ngawih ngawih a ni tih reng a hre lo!

"Kei pawh tiang reng renga thil mawi, duhawm leh hmuhnawm, Pathian kutchhuak hi ka la hmu ngai bik lo" amah en reng chung chuan ka ti sap a!

A thihni a ka awmdan chipchiar sawi ka tum rih lo! Mahse khawhar lenpui zan khatna-a ka thu chham erawh ka'n tarlang hram teh ang!

'Famrolungmual i liam ni khan,
Hmangaihna mittui leh Saron par ka thliah che kha;
I sakhming ka thinlaiah rial angin dai suh se,
I sakruang ka enchimloh nen;
Ka thinlung phekah hmangaihna tui chiah ngei chuan,
Kan intawn leh huna kan chhiar dun atan ziakin ka vawng tha nang e!
Lei pangpar mawi a chuai ta, 
Duhawmna hman dak thianloh kawltu chu;
Pathian faten a partlan an chak luatah;
Hringmi thinlai na tur reng dawn lovin,

Vantual mawi ve tawh turin min chhuhluih sak ta si maw!'

Recollection of the past - I

It's been a long time ago! She was sick and about to die!

"I hlauthawng em"

Engtin emaw tak hian Amah ka hriatchian em avang zawkin 'Hlau love" tia min chhan ka ring a. Pathian remruatte chu mihring dan theih a ni lo va, puitling chuan ngaihthatnan dawt var kan sawi thin tih ka hre reng si a!

Thei leh thei lovin a lu a her remin, mi thlekna lam chu thei leh thei lovin a han sawn a,

"Aw" a tawpah chuan a han ti a.

"Englai pawhin ka hlauthawng a lawm"

"Mahse, i va lantir ngai si love?"

"Lantir ngai e, a rukin ka lantir reng a lawm"

"A chhan chu mi rintawk loh vang a ni maw?"

"Ni love, nang pawh i hlauthawng em em tih ka hria a lawm. Mahse chu aia hlauh zawk chu ka la nei cheu a sin!"

"Enge ni le?"

"Nang nena hun kan hmang tam thei dawn tawhlo tih ka hriatna hian hlauhthawnna namenlo mi thlen zawk a ni!"

Ani chu Hmeichhe dang reng a ang lo, a lo lan tawh chuan kan vai mai hian sual ta bik riaua inhriatna, Inthurual tak maiin kan nei tlang tlat zel!

Ka lam hawia a rawn inher rem phei chuan, eng sual pawh ti lo mah ila, dam ve tlakah ka in ngailo hial thin!

Hun reilote chhung niin thawnthu bua inziak ang pawh a ni lo. Mahse kan infawh hmasak berna chu engtin emaw a nuam riau a, ka thil hriatchhun pawh engtikah mah chu hun danglam bik chu ka theihnghilh tawh ngai lovang tih hi a ni thin!

"Vawiin a ka thil zirchhuah i hre duh em?" a han ti a.

"E, sawi ta che, ka lo ngaithla kiau dawn nia" ka ti a.

"Pathian hian keimahina ruahmanna ka neih aia lian hian ka tan ruamhmanna lian zawk a lo nei reng tih ka hrechhuak a. Ka damlohna avang hian nang hi ka hnenah a rawn tir ta che a. Ka hun reilote chhung chu nuam tak leh hlimawm taka hmang thei nan. Ka tan chuan van atanga hnemtu Vantirhkoh lo chhuk i ni reng si a!"

Ka nghilh dup a, aw reng reng ka chhuah thei ta lova!

Cabin Love!

Lunglei Civil Hospital Cabin kha tuna kan Cabin neih ang hi a la ni lem lova. Ka pa thahnemngaihna avang chauhin (a hnuah chu pawh chu ka hrechhuak chauh, ka la sawi ang) Cabin No. 1-ah chuan (Cabin hi 4 chiah a awm) kar khat lai a awm tawh a.

Chumi ni chuan ruah a sur cherh cherh a, chhum a zing chiai chiai bawk a. Chawhnu dar 2 vel ni ta-in ka hria, Cabin lam pan chuan ka kal leh ta a. Khua a hnim ang bawkin ka rilru chu a harhvang mawlh lo. Mite chu an duhberte hnen pana an kalkawngah hmalam beiseina duhawm tinrengte nen an kal thin tihte ka ngaihtuah a.

Keia duhber panna kawng ve lem nakin lawka thenna, thenna rau rauah pawh thenna chiangkuang ber mai; damlaite zinkawng tawp, ka zawhve tur ni bawk si lo a ni si a. Chu ka kalkawng han thim em em zia leh khawharthlak em em zia chu, thlanmual meuh pawh ka kalkawng ai chuan a khawharthlak loh ta ve ang!

Ka thiam ang tawka mawihawih leh nelawm chuan ka nui lut sang a,

 "Vawiin lam chu khua a nuam si lova, i nat a zual phah hial lo maw?" ka han ti ngawt a. Ka inchhir leh nghal tlat.

Ani lakah chuan ngaihtuahna thim lam chi reng reng hian hmun an chang ve ngai lo tih ka theihnghilh a, ka thinlung pindan thima hnukluh ka tum tih ka hrechhuak tlat a ni.

Hlim taka min nuih seih pah chuan, "Ka Pathian hnenah i hnena ka duh sawi phalna ka lo dil a, i lo lan takah hi chuan ka khawvel zim zet mai hi a tet ang ang hian a mawi a zual thin"

A theih ang tawkin rilru inhawng tih hriat em em hian a nui hawk hawk a, min hmuh avangin a hmaifangah chuan lawmna thisen zam a rawn lang chhuak hial a ni!

Chutiang mi lakah chuan engtin nge lungngaihna hmel i chhuah reng theih ang a, lungzing taka i khawsak fo theih ang ni!

Chu lungzinna hmuna min hruai chhuak a, leilung mawina tinreng an parvulna hmuna mi han chentir dan mawlh mai hi theihnghilh har ka ti thin!

"Ka thinlung pindan, tu tan maha hmun ka la pek ngai reng reng lohvah chuan hmun nuam leh duhawm ber i rawn nei thei a. Lei thil leh vaivut mai mai ka thehna hmunah ngei chuan pangpar mawi takin i rawn vultir ta si a.

Nang hi chu tawng miahlo che pawh ni ila, ka ngai veng veng che hian ka inring thin a ni!

Ka hmangaihna che hi leili hausakna khum sawi rual loh, mit hmuhna tinreng aia mawi chungchuang; zalenna ai pawh a hlu, nunna hnar boruak aia thianghlim a ni si a.

Ka nihna sual ber chu nang ka hmangaihna che hi a ni si.

Ka hriat miahloh lai khan ka timur tinah rawn vak lutin, ka thisenzam tin maite chu i rawn bei a, ka thinlungah hnehna i rawn chang ta si a" tiin khawvel a parvul tir anih kha!

Lei leh van kara kei mi suaksual tlaktlailo, hmantlakna awm lo tawp; englai pawha ke chheh sual reng lakah, Lasite tang bela duhawmna tinreng kawltu damna chu khawiah nge a awm a, a man chu thihna pawh ni se tu hnena pek tur nge min hrilh lul rawh u!


Hmeichhia a zawnga minu tih hlawh zo, a hmelthatna leh duhawmna zawng zawng belhchhah tura a hringnun vawng thianghlim a, uluk tlat mi, ama nun ngei atanga hlimna leh lawmna chharchhuaktu chuan tupawi nge a sawi a, Natna khum chu a hahchawlhna hmunah a chan tak mai ni?