𝕭𝖆𝖎𝖇𝖚𝖑 𝖑𝖊𝖍 𝕾𝖍𝖆𝖐𝖊𝖘𝖕𝖊𝖆𝖗𝖊-𝖆 𝖙𝖍𝖚 𝖑𝖊𝖍 𝖍𝖑𝖆 𝖎𝖓𝖑𝖆𝖎𝖈𝖍𝖎𝖓𝖓𝖆.

Lengzem April chhuakah khan, ‘Tu nge i hming?’ tih hmangin L.B Tluanga’n article ngaihnawm ang reng tak a ziak a. Chu a thu ziakah chuan Shakespeare-a chanchin rawn sawiin, hriatna kawnga Shakespeare-a nun  kalh kim loh dan nia a hriat heti hian a ziak a – Heti chung pawh hian Shakespeare-a hriatna chu a la khingbai thei tho tih hi lo pawm ve phawt mai teh, tiin thu min pe a. 

Khawvela Literature huaisen ber, darh zau ber chu Baibul niin, thu leh hla khawvela Sailo Ngûrpui an sawi thung chu Shakespeare-a hi a ni. Hei vang hian Shakespeare-a hian Baibul hi a hman rim ka ring ţhin a, mahse chu mi zuk finfiah tur chuan a kut chhuak piah lamah, Baibul belhchian ve a ngaih tlat avangin, Baibul leh Shakespeare-a kut chhuak hriat chian chu tihmâkmawh a ni lo thei lo. 

Shakespeare-a hian khawvela English Baibul chhuak hmasaho kha a lo la khawm nasa mai a lo ni a. Geneva Baibul copy ringawt pawh za chuang neiin, Baibul chi hrang hrang, ţawngţai hlate thlengin a lo la khawm a lo ni.  Ngun taka thlithlaina rah chhuah aţanga lo lang ta chu, Elizabethan Poets kut chhuak Lemchan zawng zawngah aiin Shakespeare-a hian, Baibul thu leh hla a lo hmang rim zawk tih hi a ni ta a ni. 

Shakespeare-a khan Baibul hi a hre bel hneh hle tih, a lemchan hrang hranga Baibul thu leh hla a hman dan aţangin kan hmu thei ta a lo ni. Hamlet leh Othello lemchante khan Baibul thu leh hla 50 aia tam hman an nei reng a lo ni a. Tin, Baibul thu leh hla chheh dan chiah hmang si lovin, Baibul thu leh hlain a sawi tum ang chiah ni si hmanga thu leh hla a rem hi tam tak hmuh tur an awm bawk. 

Tichuan, Shakespeare-a hian a lemchan 38 aţangte khan, Allusion leh Quotation a hman zat niawm hriat theihte chu Baibul lehkhabu 42 aţangin an ni a. Chung lehkhabu zingah chuan thuthlung hlui bu 18 leh thuthlung thar bu 18 bawk leh, Apocrypha aţangin bu 6 te an ni. Hei hian Shakespeare-a’n Baibul a belhchian thawkhat turzia a tarlang chiang hle awm e.

Amaherawh chu, tuna Baibul kan hman lâr ni lo hian, Geneva Baibul zawk kha a chhawr rim ber a ni tih lo hre ta ila. Entirna han pe ta ila; ‘If it were done when ’tis done, then ’twere well. It were done quickly… (Hamlet, Scene VII) tih a rawn chher chhuahna chu, John 13:27 (Geneva Bible): Then said Jesus unto him, That thou doest, do quickly, tih aţanga a kaihlek angte hi hmuh tur a tam hle a lo ni. 

Shakespeare-a thu leh hla ka duh tak zinga mi, The Merchant of Venice lemchana Poria-i’n; How far that little candle throws his beam! So shines a good deed in a naughty world, a tihte khan Philipi 2:15 thu; …among whome ye shine as lights in the worlde, tih aţanga a rawn chher chhuah a ni. Kum 1611 khan KJV Baibul hi tihchhuah a nih chauh avang leh, tihchhuah a nih hnu khan, Shakespeare-a hian kut chhuak a neih tam tak loh avangin, Geneva Baibul kha a hman rim ber tih loh rual a lo ni lo.

Hamlet kan en chuan, Horatio-a’n, carnal, bloody and unnatural acts…and in the upshot, purposes mistook, Fall’n on th’inventor’s heads, a han tihte kha, Ì Lalte 2:32 thu - the Lorde shal bring his blood upon his owns head, tih nen chhul khat chhuak an nihna kan hmu a nih hi. Two Gentlemen of Verona lemchana, follows the shepherd for food, tihte pawh Ezekiela 34 thu aţanga lak a ni tih a hriat mai a.

Shakespeare-a hian Sam leh thuthlung thar ringawt ni lovin, thuthlung hlui thlenga a chhiar nasat turzia min hriattir mai awm e. Chu mai a la ni lova, Apcrypha thlengin, a kut chhuak chei hnûm nân a hmang tih a kut chhuak kan zir chuan kan hmu thei bawk. Baibul thu leh hla a hman rim bera an sawi chu, Kaina leh Abela thu aţangin a ni a. Baibul bu zinga a hman rim ber erawh Sam Bu hi a ni thung. 

Chhuitu ţhenkhat phei chuan Baibul thu leh hla 1200 chuang Shakespeare-a hian a hmang a, hei aia tam pawh hmuh tur a la awm ring pawh an awm bawk. Genesis, Matthaia leh Joba hi a hman rim pawl tak an ni a. Lemziak thiam hmingthang berte zinga mi Picasso-a khan, ‘Good artist copy, but great artist steal’ tia a lo sawi hmang thiam ber zinga mi ni kumkhua tawh tur chu Shakespeare-a kha a lo ni. 

Thufing 5:15-18 thu-a, tui hna leh tui bel thute kha Othello lemchanah Desdemona-i ţawngkamah kan hmu a. Khawvela thiamna lama sulsuttu leh thluak ţha ber ber an tihte hi Juda mi an ni zel a. Chumi ka zuk chhuinaah chuan, Baibulah hian hriatna engkim a awm a, chu chu an zuk zir chhuak mai a ni, tiin hriattir ka ni. L.B Tluanga sawi ang deuh hian, Shakespeare-a hriatna hi a famkim lo hlea ngaih theih zawng a ni.

Mahse, Shakespeare-a thu leh hla tuipui tak tak mi chuan, zirna lam a ni emaw, eizawnna a ni emaw, vantlâng nun leh kalsiam a ni emaw, retheih pachhiat a ni emaw, kawng engkim hrut loh ahleih a nei lo tih a chhiar chhuak ve fovin ka ring. Tin, heti taka Baibul hre chianga hmang rimtu a lo nih tawhna pawh hian, finna leh remhriatna kawng tinrenga thuam a nihna a nemnghet hlein ka hre bawk. Chuvang tak chuan he thu hi ka han thai ta mai mai a ni e.

𝐀𝐰 𝐦𝐢𝐧 𝐡𝐫𝐢𝐥𝐡 𝐫𝐚𝐰𝐡 𝐳𝐚𝐧𝐢𝐧𝐚𝐡 𝐧𝐠𝐞𝐢 𝐛𝐲 𝐏𝐒 𝐂𝐡𝐚𝐰𝐧𝐠𝐭𝐡𝐮

     William Shakespeare-a’n, “O most delicate fiend! Who is't can read a woman? Is there more?” ti meuha hmeichhia leh a nungchang hriat thiam harzia a lo au chhuahpui tawh ngei khân, angkhat veka mipate a thununna hrui valah, he tribal lû la hnam pawh hi min zuah bik chuang lo. “Women's weapons, water-drops” tia kan pu vekin a lo tlângaupui tawh hmanrua nen zet hi chuan, mipate thinlung a la duai duai reng mai a nih hi!   

     Mi fate themthiamzia tlai khawhnuah kan lo tem ve luklak a. Mi fate thluak ţhatzia, a tlai luat hmain kan han hre chawhnu ve leh tum hrang a. Mi fate’n mi fate thluak ţhatzia hahipa an lo säwr fû tawh hnuah, kut kan han tifûk chawp ve leh ngawt zel bawk a! Mahse, chu taka chu hla phuah thiam tak tak, tun lai lemchan khawvela hla phuah thiam lem lem nazawngte nihna ni lo nihna (signature) a ni si a nih hi ti raw bawihte?

     Tleitir sakhmêl meuhin a cho loh thlasik zing ni chhuakin ka lunglên khawharna a rawn her chhuahpui a. Pawltlak thlain kum tina hri chhia mi kai ziah hi, tun thlengin ka la thing thla thiam lo. Ka hawi vel a, ka mit hmuh phak thilsiam tinrengte hian ka lung min lên ţhin a ni si a! Van lam ngaihna leh khawvela luanliamna lo thleng dun rial ţhinte hi, a man tamzia tu nge sawi thei ang?

    Thil siam tam tak zingah, mipa thinlung zial â tlat a, thunun mai duhtawk lova sal bet thei, a mitmeng leh ţawngkam khat lek pawhin mipate thih leh dam thu hril thei khawpa thiltihtheihnaa thuam hmeichhia hi, a va buaipuiawmin buaipui tlak a va ni mawlh êm! Mipa sehhel ber ber, rorum leh thinchhia, hausa leh rethei thinlung thliar hauh lova angkhata pâwnglak theihna neitu hmeichhia, mipa chungah hian i va suaksual thiam kher êm!

      A hmêl a hmuh tirh phat ata, a chhan leh a vang sawi mawi ngai lovin, a nu leh pa, a chhûngkhatte hnenah insawi fiah mamawh hek lovin, thilsiam azawnga mit la ber nula tawngtu tlangval khawngaihthlakzia hla hi, engtin nge heti êma lungrûna PS Chawngthu hian a lo phuah chhuah thiam ni? Nunrâwnnna azawnga duhawm ber chanchin min han hrilh thiamziate hi a mak a ni! A thlûk tinah rem taka hla thu tin a han nemkai thiamziate mawlh hi a ni, sawi thiam har chu!

      Hmeichhia chu nula a nih avangin rim tur a ni. Hmeichhia a nih avangin zäwl thiang pawh a ni. Hnute bu mawi tak, heh kual mawi êm êm, mitmeng lungrûn taka meng thiam, pheichheh mawi tak a nih vangin, mipate thinlung aikaih tur renga Pathianin a siam a ni. Âwmnêm hmêl taka siam a nihna phena a nun thurûk pai tamziate hi, tu mipa fa hian nge hmu chhuak fai kilhkelh tawha inngai ang le?

      A hausakna chhuang chunga amah rimtu chu biak tinah pawh a tin lo fo. A pachhiatna chhuanlama hmangtu lah a khawngaih thla zen hek lo. Tlangval a nih vang ngawta amah rimtu chu eng hûah a ngai lo fo. A duh zawng tê a tawn chinah erawh, sakeibaknei koham ber nungchang a pu hmak a. A saseh tawh humhim turin lei leh van a cho hial ngam a nih hi maw le!

 Hun hei leh chen hi i sulhnu zuiin,

Biahthu di sawi ni tam renga’n,

Engtin nge nang ngaih biahthu di kan hril,

Damte’n min chhan ve dawn ang le?

      Amah duh ngawih ngawihtu, a chezia engkim mai thlir ning thei lotu, a ţawngkam chhuak tinrenga rimawi lo chhuak ngaithla thei khawpa a beng hriatna lam rûksaktu, thu reng a sawi loh thu tam a pai, a mitmeng leh chezia zeizia engkim aţanga man thiam mipa chuan, a huaisenna neihchhun tak meuh meuh hmachhuanin, “Ka duh che asin. Min duh ve mial lo maw?” a han ti a. Mahse, chu hmeichhia sualzia chu tu nge hrilh fâk tawh ţhin kha?

      Thla khat a liam a, ni tam a ni ta. ‘Hun hei leh chen’ rei zawng hi sana hmanga chhut chhuah chi ni pawhin alang lo. A rei thaw khat a ni ang, mipa thinlungah manganna chî a tuh ţiak hman tlat a nih hi! Mipa hi ţawngkam sang khat neia siam ni ta se, hmeichhe hneh nân a nih phawt chuan, inngaihtuah nawn miah lovin â takin a neihchhun apiang a hmang zo nghal duak ang! Chutiang chiah chuan kan tlangvala pawh hian kan nula hi a ţawngkam hriat chhun ang angin, a thiam tâwkin a rim nasa tih kan hmu chiang si.

 

Engtikah nge maw kei ka lawm nân reng,

Ka lam hawia ânkâ nêmin,

Biahthu di damte’n thlah ve zai rêl a,

I lunglên thu min hrilh dawn le?

       Aw lunglian! Luhlulnaa khat! I duh chuan i kâ hi Seol ang maiin i chip reng thei a! I duh hunah lem, tlâng chhipa tuikhawthla liam pur pur angin i âng leh thei lawi si! Sana bânin ni tam a her chhuahpui tawh hnuah meuh, ‘Aw le, i lam ka lo hawi nang e’ han tih mai rêl ta lo chuan, thlanmual ang maia rehin mipa thinlung sahalna min han tuah nun belhsak sauh a! ‘Ka duh che, ka duh lo che’ ti mai lova han inchelh khawmuanna hnuaiah, tu mipa mah awm hle hle thei an awm lo tih, i hriat chian êm avangin em ni, suahsual räwng min bawl khum ţhin?

 Mahriaka lunglên tuar zawng ka zuam lo,

Lung ka mawl tinkim dawn hianin,

I suihlungrûkah i duhlêng thlang la,

Tum tawk helin ka liam ta’ng e.

       Chhai tur renga Siamtu’n a siam hmeichhia hian, chhaitu zawng a tawng ngei tur a ni. Mahse, amah chhaitu hnenah chhanna pe duh lova, nun lailaklawh taka min chentir nuamti êm êmtu hmeichhia, Siamtu hian a siam sual ve hial che a ni lo maw? Chu zawng ka ring thei lo, ka ring phal meuh si lo. Lungtum chhai ai pawha beidawnthlaka min siam zet duh khawp thinlung neihtirtu che hian, van rim erawh a nâm hauhvin ka ring si lo!

 A falte’n kan intawng leh tawh lo’ng e,

Zan a rei khua ka tlai thlawn e,

Ka hril tam lua e, i ţawngkam nghakin,

Aw min hrilh rawh zaninah ngei.

        Zanin chiah in rûn rawn kai nân hun ka nei ta. Zan tam chhiar sen loh, i kiangah hun hmanga i rilru hriat ka tumna zawng zawngte kha, zanin ngeiah hian a chhanna hriat ka mamawh ta. Mipa zawng ka ni, mahse beidawnna thinlung nei mi ka ni si a. Tlangval zawng ka ni meuh mai, chuvanga duh che pawh ka ni reng asin. Mahse, zanin ngeiah, ‘Aw’ nge ‘Aih’ tia min chhan hi ka phut ve tlat che a ni.

        Nang meuh ka phu lo che a nih si chuan, ka phutâwk hmeichhia chu, ka thinlung zawng zawnga ka zawn theih nân, min chhuah zalen hi i chanpual a ni ve tlat. Tunah erawh ka thinlung chabi kawltu i ni si a, i thinlung hawnna chabi ka kawl ve si lo a nih chuan, khawngaihna chuan vawi khat chiah i nunah thu sawi ve se, ka chungah zahngaihna lantirin chhanna min pe ang che aw…

       Ni ni ni, he hmeichhia hi a ni, khawvel thil azawnga thil buaipuiawm ber hmuh theih chu lo ni! PS Chawngthu lah hian chu hmeichhe nungchang pakhat, a mize kumhlun, a pian ni ata a thih ni thlenga a nun chhuahsan ngai lotu chu, a ropui thei ang bera chawisâng chungin, mipate inphahhniam theihzia leh dawhtheihzia, hmangaihna lemchan tualah dawih zawk chan chang kan nih sizia min tarlansakna hla hi, a mawi dan a tak ngâih a, a nat dan a thûk râih a nih hi.

 

            A thlûk lah chu he Zopa thinlung leh beng mil êm êmin a han siamzui hi chu maw! Ka thinlung hian a tuar thiam ta ţhin lo. Nilenga mi awitleitu atân ka thlang leh ţhin. Ngaihruatna khawvel min hruttir a, suangtuahna khawvelah duhthusam hlimthla min chentir theihna thurûk hi, ţhangthar hla phuah thiam zingah pianpui an awm ve ta lo em ni, tih châng ni a tam ta. Mahse, hmeichhia chu mawina a khat, duhawmnate’n an chei mawi, ngaihawmnaa khat zawng a ni chiang si a!

      Hmuh theih loh khawvea hmangaihnaa khat, Kalvari kraws-a rawn luangliama hian nang ngaih banzai min reltir thei lo a nih chuan, keia chan zet chu suangtuah thiam ngaihna reng a awm lo ang!

 

 

𝐏𝐢𝐥𝐚𝐭𝐚’𝐧 𝐓𝐢𝐛𝐞𝐫𝐮𝐬 𝐊𝐚𝐢𝐬𝐚𝐫𝐚 𝐡𝐧𝐞𝐧𝐚 𝐋𝐚𝐥 𝐈𝐬𝐮𝐚 𝐜𝐡𝐮𝐧𝐠𝐜𝐡𝐚𝐧𝐠 𝐥𝐞𝐡𝐤𝐡𝐚 a 𝐭𝐡𝐚𝐰𝐧 𝐫𝐨𝐩𝐮𝐢 𝐜𝐡𝐮 !

Lal Isua dam laia Rome lalber (Emperor) chu Tiberus Kaisara niin, Pilata khân Lal Isua khenbeh a nih hnuin Rome lalber hnenah chanchin kimchang tak, lehkhathawn hmangin a va hriattir a. Kohhran hruaitu hmasate khân he lehkhathawn hi a tak (genuine) ni ngeiin an hria a, Lal Isua khenbeh a nih dan leh a hnua thil thleng chanchin a va hriattirna a ni. Lehkhathawn pathum; Pilata’n Tiberus-a leh Heroda hnena a thawn bakah, Heroda’n Pilata hnena lehkha a thawnte hi Syriac-a British Museum-ah hmuh theih an ni. 

“He mihring hian hna ţha tam tak thawkin, mi tam tak a ti dam a. Mitdel mit a ti var a, phâr a ti dam bawk. Mitthite hial a kai tho a, zengte pawh a ti dam bawk. Kal tura thu pein an hnenah hian thu kam khat chiah a sawi ţhin. Tin, kan pathiante tân meuh pawha mak tih turin Lazara, ni 4 lai thlana phum tawh, a taksa ngei pawh lùng nuaih tawh chu thlan aţanga lo tho turin thu a pe a. Lazara chu puana tuam chungin, rimtui êm êm hian lo nung leh a!

Tin, ramhuai man leh tihbuai, thlalerahte khawsa ţhin, anmahni taksa ngei ei a, ramsa leh laikingte nena khawsa ţhinte chu, khawpuia an in ngeia cheng leh turin a ti dam a. Ramhuaite lah chu vawk kaw chhûngah luhtirin, tuiah a zuanthlâktir vek bawk! Mi pakhat, a kut vuai vek tawh, lûngngaihna nasa tak nei mi pawh rilru pangngai tak pu leh turin thumal pakhat chiah sawiin a ti dam bawk.

Khatia kraws-a khenbeh a han nih khân, lei pumpui hi a rawn thim ta vek a. Khaw en lai ni reng chung siin, Ni kha a biru bo daih emaw tih mai tur niin, vanahte chuan arsi an lo lang a. An êng erawh zawiin a thim tial tial thung. Thla lah chu a bial vanglai tak e ti lovin, thisenin a khat tlat emaw tih mai tur a ni bawk! Tin arsite leh Chhohreivung pawhin Judate chu an thiltih tenawm tak avangin an sûn nia maw le!

A thih hnu kâr khata ni hmasa ber zanah lah chuan Ni a lo lang êng kulh mai a, vante pawh zanah an êng uar mai nia! Fur laia ţek tla zuai zuai ţhin ang mai hian vanahte chuan mi, thuam ropui tak tak inbelte an rawn inlâr sup sup a. Anmahni rual vek hian vantirhkoh tam tak lo lang vein, anni chuan, ‘Chungnungberah Pathian ropui berin awm rawh se. Lei chunga a lawm êm êm mihring chungah remthu lêng rawh se. Lei hnuai mitthi khuatea (Hades tiin a ziah bakah mitthi khua leh a chhehvel a ti kher bawk) hun rei tak chhûng saltangte pawh lo tho chhuak rawh se’ tiin an sawi bawk!

Vantirhkohte âw rik rual chiah hian tlângte chu an nghing dur dur a. Lungte pawh an keh phel rem rum bawk. Tin, lei nasa taka rawn khi chatin, khuarkhurum thûk tak leh a chhûngte hmuh theihin a awm bawk. Chu hun râpthlâk takah chuan mitthi tam tak kaihthawhin an awm a. Judate chuan chung mitthi tho lehte an hmuh chuan, ‘Abrahama, Isaka leh Jakoba bakah Upa 12, kum 2500 liamtaa boral tawhte kan hmuh bakah, Noah ngei kha taksa puin a rawn inlâr kan hmu’ tiin an sawi bawk!

Aw ka lalpa, lalber, he mi zan hian zankhuain êngin min kiansan bawk hek lo. Tin, Lal Isua chungchang thu dik lo tak taka sawitu Juda tam takte chu lei khi chatin a lem bo zo vek a, an taksa reng hmuh tur a awm bawk hek lo. Jerusalema biak in (Synagogue) pakhat tih chauh loh chu, Lal Isua dodaltu biak in zawng zawngte pawh lei khi chat hian a lem zo vek bawk!” tiin Pilat-a hian Rome lalber hnenah lehkha a thawn a ni. Pilat-a vek hian Heroda hnenah heti hian lehkhathawn a ziak bawk!

“Khatia a chung thu rêl tura ka hnena Isua i rawn tirh phei khân, amah chu ka khawngaih avangin a lakah ka kut ka sil a. Tunah lah chuan amah khengbettute leh a thlan vengtute hnen aţang ngeiin thlan ata a rawn tho leh tih ka hre ta! Chung ka thu hriatte chu dawt mai an nih lohzia a tak ngeiin ka finfiah bawk. Galili-ah a dam lai taksa puin a zirtirte nen, tun hma zawng aia huaisenin a thawh leh thu bakah a chatuan lal ram chanchin a puang lai kan va hmu a ni. 

Tin, ka nupui Procla-i, a mang lama inlârna hmtu pawhin thlan aţangin a tho leh tih a hriat ve leh, Longinus-a leh Isua thlan vengtu sipai 12-te nen Isua hi an va hmu bawk. Isua chuan ka nupui hnenah, ‘Tunah min ring tawh em? In thlahtute hnena Pathianin thu a thlun ang ngeiin, ka thihna chuan mi zawng zawng tân damna tur a rawn thlen ta a nih hi. Chuvangin, keimaha Pa awm chu ring rawh. Thihna hrui valh leh mitthi khaw kulh kawngkharte chu ka hawng ta si a’ tiin a sawi ta a ni.

Aw Heroda, chutia amah kan va hnaih lai tak chuan, van aţangin âw ropui trak lo ri chhuakin, nasa takin khawpui a rawn ri rum rum bawk. Chu ve leh nasa takin lei chu a nghing dur dur a, chutih rual vek chuan Jerusalem temple-ah pawh a rim kan la hriat ngai loh thil rimtui êm êm hi a rawn nâm ta chiai chiai mai nia! Lalpa chuan kei leh ka nupui min rawn pan hnaih lai chuan, a kuta an khen behna ser chu chiang takin ka hmu bawk a ni” tiin a ziak a ni.

Heroda pawhin Pilata hnenah hian lehkhathawn a ziak let ve bawk. Lehkhathawnah chuan Baptistu Johana a tihhlum hnua a chunga vanduaina leh chhiatna chi hrang hrang thleng chanchin ziakin, a fanu thih dan mak tak te, a fapa Azbonius-a thih dan te, a nupui mitdel dan te Pilata hnenah hian a hrilh a ni. Tin, Rome lalber Tiberus-a kha nâ taka a dam loh avang leh, Isua’n mi a ti dam ţhin tih a lo ral hriat avangin Pilata hnenah chhiahhlawh tirin a hnena Isua rawn kaltir turin thu a pe a.

Mahse, Pilata’n Isua a khengbet tih a hriatin Pilata chu Rome-a rawn hruai tur leh, thi turin a chungthu a rêl ta a ni. Nula pakhat Veronica-i a awm a. Ani chuan ţhelret puanah Isua hmêl ang tak, lemziak thiam hnenah a ziahtir a. Tichuan, Tiberus-a hnenah Isua lemziak keng chung hian a kal ta a ni. A kalkawngah Isua tâwkin, Isua chuan a lemziak chu lain a hmêl ang tak a nemkai ta a. Tiberus-a’n Isua lemziak a en ve leh a dam tur thu hrilhin, chutiang tak chuan thil a thleng zui ta bawk!

Rome khawpuia Pilata lehkhathawn chhiar chhuah a han nih chuan, Tiberus-a leh a kianga awmte chu nasa takin an khur ta a. A chhan pawh Isua thih laia thil thlengte kha a tak ngeiin an hmu si a. Tiberus Kaisara chuan a tawpah Isua chu Krista ngei a nih thu puangin, a thu sawi zawh ve leh an awmna kianga Rome pathiante lim an dah zawng zawngte chu chhuatah tlain, an kehsawm ta vek mai a ni! 

𝐓𝐮𝐚𝐢, 𝐏𝐚𝐭𝐢𝐥 𝐞𝐭𝐜 𝐭𝐞 𝐡𝐢 𝐏𝐚𝐭𝐡𝐢𝐚𝐧 𝐬𝐢𝐚𝐦 𝐚𝐧 𝐥𝐨 𝐧𝐢 𝐫𝐞𝐧𝐠 𝐦𝐚𝐢 (?)

             Tun hnai maiah ka thu ziak hlui ka thlir let a, chutah chuan harh thar záwkna (revelation) kan ti mai dâwn nge ka chang ta niin ka inhria! Baibul châng pakhat, vawi tam tak ka lo chhiar liam tawh ngei chu, ngaihtuahna thar nena ka han chhiar thiam chinah, he khawvela tuai leh patil, mawngkawhûr etc te lo pian theih chhan, Pathian kutchhuak an nih sizia ka ngaihtuah thiam ta a ni.

             Gen 1:27-na thu hi ngun takin i han chhiar nawn leh teh ang u. “Tichuan, Pathianin ama anpuiin mihring a siam a, Pathian anpui ngeiin a ni a siam ni; mipaah leh hmeichhiaah a siam a ni” He thu hi ngun takin i han chip darh dâwn teh ang. Mihring siam an nih thu kan hmu a, mahse he mihring siama hi mi pakhat chauh. Evi tel lo Adama a ni tih kan hre thei ang.

             A sapţawng kan en pawhin, “in the image of God created him; male and female created he them” tiin a inziak kalh mai. Eng nge he thuah hian i chhiar chhuak theih le? Pathianin Adama a siam a, chu Adama-ah chuan mipa leh hmeichhia an awm tih i chhiar thiam ta em? Ngaihtuah nawn leh la, han chhiar nawn leh teh! Chhun vanglai ang maiin a chiang a nih hi.

            A fiah ta kuar lo maw? Adama-ah chuan Pathianin mipa leh hmeichhia a siam kawp tihna tluk a lo ni ta a. Chu mihring Adama aţang ngei chuan a ni Pathian pawhin hmeichhia, Evi kha a lak chhuak tak ni! Evi siam a nih dan kan hria, Adama angin Pathianin eng hmanraw dang mah hmangin Evi kha a siam tlat lo. Adama chhûnga awm hmeichhia kha Adama nakruh Pathianin la chhuakin, Evi-ah a siam ta a nih kha.

             Tichuan, an thlah kal zel mihring tawh phawtah chuan mi pahnih, mipa leh hmeichhia an awm tiin ngaihdan kan siam thei ta tihna a lo ni a. Mipa chhûnga awm reng hmeichhe zia kha, mi ţhenkhatah chuan thunun rual lohin a lo lang chhuak ta ţhin a. Chutiang bawkin hmeichhe chhûnga awm mipa zia pawh, thunun zawh lohin a rawn lang chhuak ta ţhin a ni.

             Chuvang tak chuan, mipa kha a rawn tuaiin hmeichhia kha a rawn patil ta ţhin a lo ni, tiin ngaihruatnain kan sawi thei ta. Kan Pathian thu khi han en nawn leh ţhin la, Adama chhûngah Pathianin mipa leh hmeichhia a siam kawp ngei tih min hrilh tlat a nih hi. Hei hi Pathianin mihring min siam dan dik tak chu a lo ni reng mai.

            

𝐃𝐫𝐢𝐯𝐞𝐫 𝐍𝐮𝐧

Thingtlângah a vawi khat nân ka service ve dék dék a !

Lirthei hnunga a body kan sak belh kahpathirahte chuan, ar hi a bâwmah an ţawn ri náwk náwk a! Favai, thlai hnah chi hrang hrang, parcel maksak tak tak, bâwm eng emaw zat, vaihlo, hmarcha, zawngţah khai bawr, anţam, khuang, engkim mai hi an ekbeng khat tlat a!

Naupangho lah chuan khuallian ang maiin min zim tuau tuau reng bawk! Chutih rual vekin nuho zingah, ţhahnemngai taka eng thu thu emaw min chah mawlh mawlh tâwk lah bo hek suh! Ka chuktawlh (phone) lah chuan nunna a nei thar ta hluai emaw tih mai turin, thawm a lo chhuah reng bawk!

Lirthei chhûngah lah chuan bungrua leh mihring hi, an inekbeng khat tlat emaw tih mai tur a ni! Chutah, nuho zinga min duhsak zualho an lo lang. An thlai tharte chu ui hauh lovin, in lama ka hawnah tiin nûla mi a hranpa taka an zuk lak ngat min lo pe a! 

Kawtah chuan khuaa mi zawng zawng an rawn pungkhawm ta emaw tih mai tur niin, nunau, naupang, puitling zawng zawngte chu kan kal hma loh chuan kalsawn reng an tum lo. A tawp a tawpah chuan lirthei chu ti nungin, ka khalh kal thei ta hram a. Kan han bawrzia mai chu, sawiin a siak lo a ni ber!

Lirthei seat-ah chuan nunau leh kum lama upa deuhte an chuang a. A hnung lamah erawh ţhalai rualho. An tân seat chan loh tih vel kha buaina tham a tling lo reng reng! Phunnawi tumna lah an nei bawk hek lo. Lûngmuang takin, nuamsa thei ang berin an chuang thiam tlat mai a ni.

Kan tum ram kawng chanve vel kan thlen aţangin, a khât mawi tâwk hian ka chuktawlh chu a ri ta reng mai! Pu Rema maw, Marema a ni em, Rema maw, Remliana em ni, tiin hming hrang hranga min betu ka tâwk chho ta mawlh mawlh a. Hun a han kal deuh hlek a, a ngaite bawkin min betu pangngai rengte khân, khawi lai ngei thlen tawh tiin chanchin min rawn zawt nawn reng mai a ni! 

Chutah, seat-a chuang pha zingah lirthei rui an han awm ta ngei a. Duhsak takin ka lirthei bangte chu an han luak khum ta bawrh bawrh mai a nih kha! An inthlahrun thu an han sawi ve ngei a, mahse han tih vak ngaihna a awm chuang lo. a tawp a tawpah chuan kan tum ram kan thleng ta.

Vanduaithlâk takin Lunglei kan luh hun hi, sapţawng takin Peak Hour an tih lai, traffic a tawt vanglai tak a han ni ta a. Rahsi Veng Sikul Mual aţangin, nghakhlel taka min lo thlirtute chuan min lo chang chhuak a. An chhûngte rawn thawn an bungrua zawngin rei fé an han buai ta.

In lampang zuk be pâwl an awm. Eng ang bungrua nge an thawn tihte chu lo inhrilh dim diam awm tak hi a ni a! Rahsi Veng kan pel a, Venglai biak in thlangah, kan rawn chhuahna lam pan tur Sumo chhuah dâwn vanglai takin kan han ding ta! Kan han buaizia kha sawi thiam har tak a ni! Kan dinna kawta in neitute lahin min lo hau thûl!

A tawpah Tlabung Pêng kan thleng phei ta. Traffic lah a lo zam nasa mai! Tihngaihna vak a awm lo, ka ding chawt a. Min lo hmuaktute leh ka khualzin phurhte chuan an bungrua an han hlang thla ta a. A khât mawi tâwkin Traffic Police lamin, “Hmanhmawh rawh u!” tiin min lo tur chhen bawk! Thlanfim hi a luang zaih zaih thei nia maw le! 

Chuti taka ka buai phili lai chuan, in lam aţangin, “In va rawn thleng har tawh ve, khawi lai chin nge in rawn thlen tawh?” tia zawhna ka dawng chhen bawk! A tawpah in ka thleng ta hlawl a, ka hah a dam ve dâwn ta ka ti a. Ka inbual fai hman chauh ang tihah, ka chuktawlh a rawn ri leh nghal zat a!

“Naktuk lamah bungraw thawn tur ka nei, engtikah nge i chhuah dâwn, khawi aţangin nge i chhuah dâwn etc” tiin, zawhna chi hrang hrang hmangin min han vawmzui leh ta tak tak mai a nih kha! Hei ha, hui ha…Thingtlâng khuaa lirthei service zet chu, thil namailo tak a lo ni chiang e!

𝐀𝐛𝐢𝐬𝐚𝐠𝐢 𝐭𝐞𝐥 𝐥𝐨𝐯𝐚 𝐭𝐥𝐞𝐢 𝐳𝐨 𝐥𝐨 𝐋𝐚𝐥 𝐑𝐢𝐚𝐧𝐠𝐯𝐚𝐢𝐚 !

(Hmangaih thawnthu lûngkuai ber chu!)

          He khawvela a mit it zawng apiang hlah lotu, a thlarau chan a fuh ţum chuan ramngaw thar diai siam chawp thei khawpa thil ti thei, a tuk fuh ţum chuan a hun lai khawvela thei kung zawng zawng la khawm thei khawpa theihna nasa tak nei, mipa piang tawh zingah nula lama luck filawr lák, a chaw vawi khat ei leh in senso hmanga ram tenau ruai ţhehsak thei Lal Solomona meuh pawh khân, duh lotu zu tawng tlat a!

             Khatia Lal Davida a lo tar tak hle hnu, amah maia a mut lum zawh tawh loh hnu khân, a khum laizawla mut lumpui tur Sunam nula hmelţha êm êm Abisagi a lal inah a la lut ta a. He nula zet hi chuan Israel lal chhûngkua a chawk buai hneh teh e! Davida a enkawl dan kawng tinrengah lal chhûngkaw mit a tlung zo ngang mai. Chu mai a ni lo, Solomona ngei pawh Abisagi zûnah a uai ta tlat mai le. Chu mai a ni lo leh zel! Solomona û Adonija pawhin Abisagi chu a lo ngaizawng ve ngawih ngawih bawk!

       Kan Sunam nula hian tha reng thawh lovin lal fapate inkârah hem a thlâk a. Adonija-a’n Solomona a lo lal ve leh, Abisagi chu nupuiah a va dil ta hial a, a va ti sual chiang êm! Solomona thikthu chhiatna va chawk thovin, Adonija chuan a thihna tur thang a invalh ta hial a. Chhechham meuhin Solomona chuan Adonoja a thah tur thu a puan phah ta a ni! Solomona thikna zet chu, Hremhmun ang maia nunrawng niin, a rawn alh chhuak chuan nunna hial a la ta a nih kha.

       Abisagi a hmangaihna meipui chu, tuifinriata tui zawng zawng pawhin an ti dai thei lo nia maw le! Lal fanu ţhah nupui 700 neiin, hmeiah lah khaw khat nula hmelţha chin ţhah 300 nei si khân, “Sangsawm zingah a chungnung ber e” tiin, thingtlang nula ve mai, beram a venna lama ni sain a vun a êm hânsak, grep huan enkawltu chhiahhlawh nula laka dawl zawr taka a zawr thu, khawvel hriatah a puang chhuak ta dur mai a nih kha!

      A lal in ropui tak, a sai ngho lalţhutthleng ropui berahte chuan kan lal ropui ber hi a tlei zo mawlh lo. A rûka insiam danglamin, a lal in ata Abisagi zawng turin a chhuak ru ta hial a. A vanduaia leiah khawpui vengtu sipai rothap tak takte chuan mi sual emaw tia lo manin, an vaw hrep a. Chutia an sawisak mawlh mawlh lai pawh chuan, “Jerusalem fanute u, ka duh tak chu in hmu hlauh a nih chuan, hmangaihnaah ka uai zo ta tiin lo hrilh nang che u” tiin, a tisa hliam aia a thinlung hliam nat zawkzia a la puang ta hram nia!

     A khum nuam chungchuang takahte chuan a muhil thei lo a. Zan a rei poh leh Abisagi a ngaih a zual ting mai.

 Zantiang laikhum chunga ka zawn ruai ţhin ka hmangaih chu,

Ka zawng ruai e, tawn ni reng a awm si lo

       - tiin! Solomona mitah Abisagi chu van chung nula ang maia sawiselbo, lasi ţhalbea chawm seilen, khuavang ţanga awihtlei duhawm zu ni tlat a.

I mawi kumtluan e, ka hmangaih,

Nangmahah selna tur reng a awm lo e…

       - a ti thlawt mai a ni. He mipain hmeichhia a va hmangaihna, nulain tlangval a hmangaihna zet hi chu, a siamtu kan Lalpa ngei pawh sal ang maia hniama hnuk hniamtu, lûngngaih nei mia siamtu, chak lohna neia chhuah hialtu a ni si a. He mihring thinlûng dawrawm lutuk hian, engtin nge a dawl zawh reng ang ni?

𝐀 𝐓𝐡𝐚𝐫 𝐋𝐞𝐡 Ţ𝐡𝐢𝐧 𝐛𝐲 𝐕𝐚𝐧𝐬𝐚𝐧𝐠𝐤𝐢𝐦𝐢.

Kum zabi 19-na hun laia Romantic Poet ropui berte zinga chhal ngam, a dam lai huna chawimawi leh ngaihhlut hlawh pha lo, Keats-ate anga mual a liam hnu chauha a hla hril 43 a phuahte’n an chawisân chuan, khawvela thu ril tawi ropui leh dik berte zinga chhal kumkhua tawh tur, “Kan hla mawi ber berte hi, hringnuna tawnhriat lûngchhiatthlâk ber ber puanchhuahna an ni si a” tih thu dik leh khä chu, ‘To a Skylark’ hla hril kal tlangin a lo phuah chhuak tawh a nih kha.

       Amah vek hian, “Kan hlim nui ri mawi ber ber phenahte hian, chhûngril bera natna vawrtawp thuhrûkin an awm ţhin,” tiin hringnun nunräwnzia a lo chham chhuak tawh bawk. Mawi leh lûngrûn thei ang bera hmangaihna khawvel chanchin min hrilhtu, ‘Nunrâwng Hmêlţha’ hla hmanga hmangaihna khawvel duhawm lohzia lo phuah tawhtu Vankhama thlah kal zela thu leh hla khawvela a hniak rawn chhuitu, Vansângkimi hian a pu dûng a va rawn thûl fuh kher êm!  

Hla thu mawlmang leh hriat thiam awlsam thei ang ber, tunlai ţhangthar hla phuahtute’n prose hmanga hla an zial mum ang ni si lovin, Vansângkimi hian nula leh tlangval inkâra inţhenna lûngchhiatthlâk tak chanchin min hrilh a. Rimawi chu benga ngaihthlâk tur, ri hriatna hmanga a mawina leh a tuina tem fuh tur a nih miau avangin, hla thu aiin a thlûkin min tàwk thûk zawk zel a. Vansângkimi hian hla rua a rawn phuah chhuahte chu, a milpui tur reng niawma khuanu duan hla thlûk hmangin, lal puan ang thluama a hla phuah a han thuam mawi zet chu, tawrh ngaihna awm lo khawpin a deh a nâ nuam ta mai a nih hi! 

He hla phuahtu hi hmangaihna thlipui hrâng ber chuan engtin chiah nge a lo nuai a, engtin chiah nge a lo hliam le? Eng ang taka thûkin nge hmangaihna chuan a favah hmanga a lo ah nat a, eng ang taka zauin nge a thinlung a zai thlersak? Hmangaihna chu rose par sen tai ték ang maia duhawm ni mah se, a mawina phenah hliampui thlentu hling zum takin a inthuam a ni si a. Hmangaihna chuan hringnun hi, ruah phingphisiau a sûr zawh chiaha chhimbal hmanga lumna nuam tak hmanga min tuam chiai ang hian, nuam zawng min thlen ţhin ngei mai. Mahse, a leh lamah thung chuan duh lo chunga khanghu kung kuah ang mai hringnun min temtir ţhin lawi si a nih hi.

Hmangaihna a vul vanglai tak tak chuan, “I tâna ka inpumpêkna chu tuifinriat ang maia zau leh thûk niin, i tâna ka inpumpêk nasat poh leh ka lûngawina a zual nitin ţhin. Nang ka hmangaihna che zau zawng leh thûk zawngte chu teh chhuah rual loh an ni si a” tiin Shakespeare-a’n Juliet-i kâ hmanga mihring âtso dan min lo hrilh tawh a. ‘The course of true love never did run smooth’ (A Midsummer Night’s Dream – Act 1, Scene 2) tiin, Shakespeare-a vek hian hmangaihna zinkawng ulhzia, chu zinkawnga mi tam tak an lo tluk hlum tawh ţhinzia min hrilh nghal zat a nih hi.

He hla phuahtu pawh hian chu hmangaihna zinkawng bumboh ber mai chu a rawn zawh ve ta a. A tawpah duh lo chungin, ‘A nâ êm mai, ka tuar zo dâwn lo,’ tiin mittui nen a zinkawng a zawh tawp ta a nih hi. Ngawi renga ţhuthmuna ţhut laia suangtuahna ril ber, mittuia rawn chang, bianga rawn luang thla ngiai ngiai hi hmangaihnain chem lovin mi lû a lak ţhin dan, favah ruai hauh lova thinlunga ser nung a hnutchhiah dan a ni si a!

Chutiang teh hrep chu hmangaihna zinkawng ni mah se, ‘The stroke of death is as a lovers pinch, Which hurts and is desired’ (Antony & Cleopatra – Act 5, Scene 5) tiin, hre reng chung pawhin hliampui tawrh huamin he thinlung a inpeih reng sizia, Shakespeare-a bawkin min lo hrilh hi a va dik tehlul êm! Hmangaihna avanga thinlung kehsawm thawm ri ang reng renga ri chhuah si lova thawm ri ring an awm thei ngai lo. 

Hmangaihna khawvel dai pawp tawhte nunah chuan, matheilovin vawi tam nunhlui thlir kir châng ni a lo thleng ţhin. ‘Hmanlai, aw hmanlai kan ti váwng váwng’ tia ţahzai sakin a zui zat ţhin. Thup hlen tura kan duh, thamral tura kan ngen ngawih ngawih tawnhriat duhawm ber berte chu, nimin liamta ang maia rawn inlâr châng nite a thleng chamchi a. Suangtuahna khawvelah tu mahin an chim buai lohin nuam tawrhna a lo thleng ţhin a nih hi.

He hla phuahtu leh a tlangval inkârah hian eng thil chiah nge thleng kan zuk hre hauh lo. Mahse, engtik lai maha inkawp rem leh thei tawh lo tura bang chhah leh sang, an inkârah hian a awm a ni tih kan hre thei. Chu mi zuk hriat chianna chuan, ‘A pawi êm mai!’ tih thu lûngchhiatthlâk a rawn hring chhuak ta a nih hi. Chu pawi tihna phena chauh thubarawhna thu hnuhnung, ‘Mang lamah tal lêng dun ang aw’ tih khawvel nunrawnzia hi, a taka tawn fiah chi a lo ni. 

Vansângkimi’n oldies taka he hla a sakna link ka han dah a. Chutih rualin Leitlângpui lelthang zai thiam Lalenkawli Pautu-in tun lai zawk leh lûngrun zawka he hla a sakna, Awmhar Lûnglên Album link pawh ka han dah teh bawk e. Hmangaihnain a hliam tawh, hmangaihna avanga thinlunga ser nung reh thei lo pai ve tân chuan he hla hi ngaihthlâk ngei chi a ni. Mahse, hliam nawna awm tur leh, suangtuahna mu hnua cheng leh tur erawh chuan inpeih a ngai thung tih hriat a ţha thung ang.

 
Thinlai mu hnu a tho leh ţhin,

I sakhmêl mawi ka tawn châng hian,
Eng dang ngai lova kan lên lai ni,
A thar leh ţhin thinlai lûngrûkah.

#A rem tawh si lo nang nena lên dun,
A nâ êm mai ka tuar zo dâwn lo,
A nâ êm mai ka tuar zo dâwn lo.

Engtin nge ka tuar ang lûnglên,
Nghilh thei che hian ka mawi nem le,
Lên dun zâi rêl leh mah ila e,
A pawi êm mai a rem tawh lo.

Khiangawiin mual liam mah ila e,
Mahse nghilh zawng i har ngei e,
Tawnmang mawlah tal i lêng dun ang aw,
Tuahrem loh di aw lûngrunpui. 

𝐕𝐞𝐫𝐭𝐢𝐜𝐚𝐥 𝐄𝐱𝐩𝐫𝐞𝐬𝐬𝐢𝐨𝐧 𝐛𝐲 𝐁𝐞𝐥𝐥𝐚𝐦𝐲 𝐁𝐫𝐨𝐭𝐡𝐞𝐫𝐬

 

(Hmangaihna vawrtawp tarlanna hla duhawm, mipat hmeichhiat hmanna thianghlim ber chu!)

Hmangaihna chu mipa leh hmeichhe inkâra mipat hmeichhiatna, mihringin nuam a tawn theih sâng ber leh thûk ber, vawrtawp nun hmanga puan chhuahin a awm ţhin a. Mipa leh hmeichhe inhmangaihna thûk ber, mipat hmeichhiatna hmanga luang chhuak, sual leh bawlhhlawh tel hauh lova mihringin nawmna vawrtawp a tem dan chanchin hi, hla hmanga puang chhuak ngam leh a nihna ang taka phuah chhuak thiam Mizo zingah kan awm meuh lo a nih hi!  

Mipat hmeichhiatna lam hawi hla hril, Mizote’n thli chi hrang hrang kan neihte hmanga ka phuah hi ka han tarlang ve hrim hrim teh ang. He hla hril hi Sonnet (ababcdcdefefgg) rhyme scheme hmanga phuah a ni.

Musing Sonnet

Nipui tlai lam thaw lum vam hiam iang a,
A thaw lum sa huam huam mi chelh dingtu;
Nawmna vawrtawp thlipui an tleh lai a,
Kil tin aţanga min chhem nghing ţhintu!
Faifuk ri iang chhemdam thlifim tleh chuan,
Nawmna vawrtawp thinlung phurna siamin;
Huih chhoh thlifim bah nuaiha thleh chuan;
Hun hlimawm vawrtawp thleng tur an hril ţhin!
Telphawk thlipui a kâ ‘ţanga chhuakte’n,
Thinlung hmun kilkhawr fan chhuak zovin;
Hriatna thazam inphaman chho chiaite’n,
Nawm vanga thlarau khurhna hial thlenin,
Vahtlai thli iang a âwrâwl sângah tak,
Tisa ngaihtuahna ruak a thlen chhák!

Kan ţawng hausakzia i hmu thiam mai em? Kei tehlul hian kan ţawng hausakzia ka phuah chhuak thiam ngang lo a ni e. He khawvelah hian ka phâk ang china ka zawn kualnaah, Zofate anga thu tluang ziahna bik thumal leh, hla phuahna tur bik thumal nei hrang thlap, Hebrai-ho bak an awm ka hre mang tlat lo. Hla rua mawlmang leh hriat thiam awlsam, thlûk nêm no raih mai kan neihte hmanga, puan tah thiamin zei tak maia lal puan a tah ang thluama hmangaihna hla, nula leh tlangval inkâra thuhrûka awm an han phuah chhuakte hi zawng, a mawi a ni ngawt tawh lo. A thianghlim tel tlat tawh ţhin a nih hi!

Chu chanchin ngeia chu hranghlui unau zai thiam, Bellamy Brothers-te chuan Vertical Expression tih hla hmangin an rawn phuah chhuak ta a ni. Thawnthu lûnglênthlâk êm êm, tawnhriat azawnga duhawm ber leh ngaihawm ber chanchin ka han hrilh teh ang che. A hun thu hlaah chuan Khuangchawi thla niin, kum khat chhûnga thla bial ên ber ţum a ni a. Aizawl-ah pawh veng thlang tla tak, mi zawng zawng kawmthlangah, phul hmun zawl nuam taka in fal tak kawtah, ri mawi tumna hmanraw chikim nen mi kan fuankhawm a.  

Kawta lamtualah chuan nula leh tlangval rual, thla êng lawma rawn fuankhawmte chu ri mawi remin an lam dual dual a. Chung pungkhawm zingah chuan hmeichhe pakhat, thla mang vanglai taka hmar arsi êng ang maia langsâr fal nalh chu ka en reng a. A sam chuan a dar an vaw siau a, a mitmeng lian kel kawl, a mit hmul er mawi tak hmanga mi han melh zet chu, sawi fiah thiam rual loh tisa châkna hian ka pumin min fan chhuak nghal a ni ber!

Tisa châknain nâ taka mi fan chhuah mêk reng lai chuan, chu hmeichhe itawm lutuk chu ka lam panin a rawn kal ta hnáp hnáp mai le! Ka kiang a rawn thlen chuan, zei fahran hian mi rawn hnaihchilh a. Châkna avanga ka kut khur der der chu, a kut no tak chuan a rawn hum chat a. A thaw lum ham ham aţang chuan âw azawnga no nalh ber tih mai tur hian ka beng bulah, “Tisa châkna avanga ka pum khurh hlawk hlawk hma loh zawng, dimna tel hauh lova mi hrawm chungin mi han lampui rawh le” tiin mi rawn be ta sàp a! 

Chu sawmna ţawngkam mawi lutuk chuan ka timur zawng zawng fan chhuak nghalin, a âw thawpsát chuan muangchangin ka thisen zâmte a rawn bitum ta chat a. Ka thinlung kulh bang rinawm ka thisen varte chu tham lo taka rawn hneh zovin, ka thinlung chhûngrilah hneh hlado a rawn chham ta. Chutah zet chuan zep rual loha khawvela ka nihna sual ber chu, ka thinlungin chu hmeichhe duhawm lutuk hnár tur a chakna thahrui reng a neih lohna ngei chu a lo ni ta a ni. Mipa hi pa takin ka tlawm a, tlangval hi väl pap khawpin ka tlusawp ta nuaih mai a ni!

Kei hi eng lai maha lam thiam tia an sawi tur ka nih loh mai piahah, ka ke chheh hi a la han felhlel zui lehnghal a! Mahse, chu sawmna âw duhawm lutuk chu tuin nge hnar tura chakna thahrui sawm khawm thei tehlul ang? Khawvela mi chak ber pawh, chu sawmna âw lakah kher kher chuan dawl zawrin a zawr ngei dâwn si a. “Tisa châkna so sâng vawrtawp, hmulthi lam an din sáng sáng a, thinphu a inthum rawn tluk tluk avanga châkna nasat lutukin thlanfim hmanga min luan huh zaih zaih thlengin mi kuah la, mi han lampui teh le” tia sawmna âw ka’n hre zui zat phei chu! 

Tichuan, chu van lamtual tlafualah ngei chuan taksa insi chiala inkuah chungin kan lam dun ta a. A rim tui tak chuan ka hnâr a nam chëm chëm a, tui a kuam chhûnga awmze nei taka a fawn ang, tui fawn sâng tui fawn hniamin a zawm phei del del ang mai hian kan taksa chu, pumkhat ang mai hian lamtualah an fawn ta del del a. Chu hun dangdai taka chu hmeichhiain mi tawh danglam dan chu, leili hmanga han sawi chhuah thiam theih a ni mawlh lo! Suangtuahnain van ram a ngaihtuah a, van ram nawm turzia erawh a ngaihtuah phâk si lo ang hi a ni ber.

Kan lam rei tulh tulh a, kan duhthawh tulh tulh ta mai! Mei alhin Mercury a han hliau a, rei rial lova a rawn so bawrh bawrh ţhin ang hian, ri mawi fán raih chuan chhûngril bera tisa châkna a hliau kän mêk chu a han ţhawng tho ta a le! Tisa peng tinte chu an rawn insangmar zawt zawt a, tisa nêm lai takte pawh lung ang maiin an rawn ruh chho ta! Ri mawi tum ri a rang tial tial a, kan taksa insep dun dan pawh ţang chho tial tialin, a rang chho ta tulh tulh bawk! Thaw a rang tial tial a, thinphu inthum rawn ri pawh rang taka khuang ben ang maiin a ri ta dup dup mai! 

Thiam pawha ka inhriat loh lam dan chi hrang hrangte chuan, ka taksa chu awlsam takin an rawn thunun chho ta mawlh mawlh a. Chu lamtuala chatuan han hman mai châkna thinlung chu, eng thahrui mah hian a beng dai thei tawh lo. Mahse, a hun takah chu hmeichhia chuan lamtual aţang chuan mi kai hrang ta nalh a. Pindan lam panin min kai phei a, chu zan thla êng no nghial hnuaiah chuan pindan chhûnga kâwlphetha êng chu a hmet thim ta riai riai a, khumah chuan mi pawt mu ta a ni. 

Mihringin kan inthuam mawina thuamhnaw hlip thla a, saruaka mipat hmeichhiatna hman bawrh bawrh chu thil har a ni mawlh lo. Mipat hmeichhiatna hman khawloh chungchang thuah zawng, Hamlet-a hmanga Shakespeare-a’n, “Nay, but to live in the rank sweat of an enseamed bed. Stewed in corruption, honeying and making love over the nasty sty..” tia a nu a chhuahchhalna, Dungtawia’n (JF-a) mawi lutuk maia, “Hetia khum khata mut dun a, hnawmhnawk zinga tal a, êk lung nena vawk huang chhûnga zan tin mai inchhaih vel hi…” tia a lehlin, Hamlet-a nuin ngaithla zo ngam lova, “O, speak to me no more! These words like daggers enter in mine ears. No more, sweet Hamlet” tia tawp tura a ngen láwm láwmna bak, tisa châkna satliah hian lawmman hmuh tur a nei lo! 

Mahse, hmangaihnain mihring thuam hlip thla vek a, saruaka taksa, thinlung leh thlarau inhlan tawn chunga hmangaihna lipuia chen dun erawh, he khawvelah hian thil awlai leh awlsam tak a ni mawlh lova ni! Chu hmangaihna lipuia chen dunnaah erawh hmangaihna chu a mit a del zo a. Inhmangaihte pawhin thil âtthlâk duhawm ber ber an tih dunteah chuan, sualna hlimthla reng hmuh tur an nei tawh ţhin lo. As You Like It lemchan kal tlangin Shakespeare-a vekin, ‘The sight of lovers feedeth those in love’ tiin, inhmangaihte inhmangaihna vul mawi ber chuan, inhmangaih mêkte nun a chawm thau zawk hlauh ţhinzia min hrilh ta a nih hi. 

Pindan tukverh dârthlalang aţanga thla êng züng lo lut darh chiaite’n, khuma a sam darh niaia mu hmeichhia an han chhun zet chu, hmuh thianglo hmu ang mai ka ni zo ta! Hmangaihnaah chuan thuamhnaw an hnawk zo a, Pathianin mihring a siam tirh lai, ţha a tih êm êm saruak nun ngei kha hmangaihna vawrtawp thuam a lo ni ta! Van riai chunga mi melh pahin a bânin mi rawn ban a, khumah mi kuai mu ta riai riai mai.

“Duh tak, thangvana arsi leh thlate’n an mawhphurhna hlen a, hahchawl ve tawh tura vanthengreng pang leh lam pana mual an liam hma loh zawng, hmangaihna lipuiah mi chenpuiin chawlhzai reng rêl lo nang che aw” tiin, duhawm êm êma mi melh pahin mi ngen ta ngawih ngawih a! A mi ngenna chu a thianghlima a zahawm tel tlat avangin, chu ka hmeichhe hmangaih êm êm nen chuan, mihringa hriatna paruk awmte’n a ruala nawmna vawrtawp an tem hun dangdai berah duhthawh takin kan cheng dun ta a ni! 

Chu hun dangdai takah chuan kan inhmangaihna Thlapui chu tuipui kotlâng aţangin, zawi muangin chung lam panin a rawn chhuak paw riai a. Hmangaihna lipui dum kúk maite chu; hmangaihna êng zùng hrang hrangte chuan mawi takin an rawn kap darh ta chiai  a. Chung êng zùng hrang hrang tle sep septe chu, hmangaihna tui fawn chuan bung hrang hrangah chhuahin an fawn darh ta sáng sáng a! Hmangaihna tui fawn kâra êng zùng inchhawih hnuhnung apiangte chu, a hmasa aiin an duhawm zual ta emaw tih mai tur lah ni!

Chu hun duhawm zual lai tak chuan hmangaihna Nipui pawh awm hle hle thei lovin, kâwlkil atangin a rawn êng chhuak ve ta bawk! Hmangaihna thangvan chu chu rawng sen, a sen dâng leh rawng engte’n van kawngka rawn inhawng aţanga vante ropuina lo luangchhuak ang maiin an chei mawi ta! Hmangaihna tuipui rawng chu a rawn var tle ta chiai a, tuite pawh chu an fawn phe ta hlep hlep bawk. Hmangaihna ni zùng rawng danglam ang zelin an rawng pawh a inthlâk danglam zel a. 

Chu hmangaihna vawrtawp nun chu eng ţawngkam mah hian a sawi fiah zo lo. Hun bul intanna ang maiin a ropui hial ta ve ang! Chutah, Ni chu kâwlkilah hniam lam panin muangchangin a tawlh thla ta riai riai a, a êng ral ta. Hmangaihna Chhawrthlapui pawh muang fan raihin vanlaizawl panin a her hret hret a. Khawvel pum êna a duhawm lai ber hun ropui pawh, muangchangin a êng ral ta riai riai mai a lo ni.

Pathianin mipa leh hmeichhe inkâra inhmangaihna lan chhuahtirna hmanraw thûk leh ril ber, thianghlim leh duhawm ber min duansak hi, tun huna ţhangtharte chuan thil lawilo leh hnawmhne tluk chauhah chhuahin, inkhualtelemna hmanraw pakhat ve maiah an chhuah zo ta! Bellamy Brothers hla phuahte ang erawh a dan a dang zak, a thlûk a nêmin a ngaihtlâk a nuam hle. An âw country raih mai han ngaihthlâk hi chuan, hah hi a dam sáwng sáwng zel a nih hi. 

Vertical Expression.

When she asked me to dance I said, "I have two left feet."
And the she took my hand and whispered a song so sweet
And she said, "Hold me as close as you can 'til my bodies on fire."
It's just a vertical expression of horizontal desire.
So we moved like water bein' poured over polished steel
And I really can't translate the way she made me feel
And the music played on and the mercury just went higher
It's just a vertical expression of horizontal desire.
We did the samba, the mambo
The tango, the two-step while we romanced
And when the music got fast
We just held to each other and slow danced.
I took nothing for granted but I wished I could stay all night
And as we walked in to her place she reached out to dim the light
She said, "Dance with me darlin' 'til the moon and the stars retire."
It's just a vertical expression of horizontal desire.

Ka thâi tur di.......

Ka chhimhlei tualah nipui rengpa,
Thlang ai di chawiin ka lûng mi lên riai e;
Ka thai tur lênna tlâng awm ve maw? 

Chute zaivawr reng a bâng thei lo,
Lêlthang ṭahna Chhimtlângpui thing lenbuanga'n;
Mi han ngai ve ṭhin che maw, di hlui?

Hriat loh di ngaiin ka kûr diam diam, 
Khua ṭhal romei iang ka zâm ka zâm ang a;
Vanhnuai khua fangin zawng zel nang e.

Lam kawia’n April pâr a lo tla,
Zaia pelin chhar zai rêl kei ka nuam lo;
Ka di tur rim reng a nâm si lo.

Chunnu, ka thâi tur i dil ang aw,
An sawi kâwlngo paw’n sira hâr thing chawiin;
Kumtluang thâi tur a dil ṭhin ngai e.

𝐀𝐰 𝐤𝐚 𝐥𝐮𝐧𝐠𝐥𝐞𝐧𝐧𝐚 𝐤𝐡𝐚𝐰𝐡𝐚𝐫𝐭𝐡𝐥𝐚𝐤 !

 

Tu chu nge ni van râng chhum mal ding iang, 
Pan lam bik nei lova thlawk del del chu?
Tu chu nge ni a khawharna khawvel,
Sawi chhuahna tur pawh nei lova lêng chu? 

Chelh din rual loh, hneh rual loh thahrui chak,
Suangtuahna ngei chuan nunhlui mual liamta,
Auh kir leh rual loh tawnhriat duhawm ber,
Engah mi chhui kirtir leh ţhin ni le?

Suangtuahna chuan khawharna lûnglênthlâk ber,
Hnêm rual loh natna bupui hmun rehah,
Mi chak lo ber iang mi keuh thlu si a,
‘Tah chuan ţahna mittui bak a luang lo.

Nui hmêl phena lûngchhiatna inphum ru,
Hlim thawm phena ţaprâwl thuhrûkna hmun,
Mal thuam inbela lûnglênna diar mawi,
Lûngchim lo chunga khima ka lênna! 

Chhak kâwlrâwna chung turni chhuak ţhin iang,
Nang ngaih lûng ka lênna tawpintai lo,
Ka chung chhawrthlapui lo her chhuak ţhin iang,
I zûn ka ngaih ban ni reng a her lo.