Tlangval :
Ni meuh paw'n chhuah hreha a thlir mek chu,
Ka duh tak, rose pâr iang tai duhawm ber;
Thla ênna ti duhawm zualtu ngei chu,
Ka hmangaih, thil siam zinga hmuhnawm ber!
Nula :
Ka duhawmna tinreng khum zo val chu,
Kumkhua atâna ka hmangaih a ni;
Ka ţhatna tinreng hliah bo zotu chu,
Dam chhûng kawppui atân ka thlan a ni.
Tlangval :
Va kal ta la, ka duh tak, i hmangaih,
I laichin i nu leh pa hnenah chuan;
Ka tân leh i tân va dil rawh khawngaih,
Runhmun len zaivawr dun a rem theih nân.
Nu leh pa :
Ânchhia, hremhmun, mawlna lûngrûnthlâk ber,
Fing rawh, harh chhuak la i khaw hawi zauh rawh;
Mi ţha an awma, engah a ni kher,
Meng la, i beng pathumte chu dawh rawh!
Hmelţhatna chuan man a neih si loh chuan,
Hlutna dang eng nge a neih chuan ang ni?
Duhawmnain man a neih si loh chuan,
Mawina chu a mawi thlawn mai lo’m ni?
Mihring chuan hmangaih pahnih a neih hi,
Nawmsakna leh lungngaih hreawmna te;
Nun khawlohna thlen thei châkna pai si,
Duhthlanna thiang chu i tân kan dah e.
Rose pâr vanglai chu hun rei lote chhûng,
Ni a lo satin a chul leh mai ţhin;
A rim tuina pawh dumde mei dêt chhûng,
Khua a lo ţhalin a chuai leh mai ţhin.
Hmangaihna pachhia a awm ang bawkin,
Hmangaihna hausa a awm ve bawk hi;
Hmangaihna chhenfakawm a awm angin,
Hmangaih tlak mihring an awm ve bawk hi.
Mipa hmaifang ţhatna chuan nawmsakna,
Mipa duhawmna chu hausakna nen;
Mipa tha chakna, rosûma vulhna,
Mipa rintlakna a neihnunna nen.
Nula :
Ka hmaifanga Derhken leh Ainawn pâr,
Ngawi renga an inbuanna chu en r’u;
An pâr mawina chu mawina lal pangpâr,
Phatsantu tenawm an lo nih tak chu.
Hringnunin a tum ber nun chawm seilen,
Zahawmna, hausakna leh nawmna-in;
Chu nunkawngah chuan innghirnghonate'n,
Zahawmnain nawmsakna an lei thin.
Eng nge ka hlawh, ka duh tak ka neih hian?
Duhthusam, rei lotê chhûnga hlimna,
Kâr khat hreawm thai bona mai hian;
A lei zovang maw kumtluana hlimna?
Tlangval :
Khaw dur vanglai tluka ka hmai thimna,
Ruah a buak hmaa khaw thiang hmuhnawm ber;
Ruahthimpui tluk, a nelawm loh takna,
Mangang tawpa nunkawng mi sialsak kher!
Ka hausakna chu ka hmangaihna hen,
Ka pachhiatna pawh ka khawngaihna tluk;
Châk taka i lam hawia ke ka pen,
Lungmuang taka tual ka chai ni U-phùk!
Nula :
Khawvel chuan ka chungah demna tinreng,
Chhak chhuakin selna chuan mi vawm rawh se;
Mi tinin ka chungah ânchhe tinreng,
A burpui chawpin min barh mai rawh se.
Tlangval :
Hringnun hmasialna khawvela’n mahni,
Hringnun thlir thiam tura nun zir kawnga’n;
Mahni inngaihhlut tlatna thinlung hi,
Vaivit iang mit men a tihfiah lo thin.
Pangpar chi te tak tê kan tih pawh hian,
Pâr mawi duhawm tak a chhuah theih nân;
A seilen a ngai, lei hâng berh kârah,
Ni zung chakna hmanga a ţhanlen nân.
Zahthlak - Thudik tak hriatchianna lûngrûn,
Huatna - Hmangaihna-a huatna awm lo;
Ngenna - Ani chu ka tân a ni lo,
Ka thahrui chakna hriat thiamnaah chuan.
Nula :
Aw, huaisenna leh a tha chakna chu,
Mualphona tawpkhâwkah lo chang rawh se;
Ka zalna thlan thim ber, ka rûn nuam chu,
Piansualna bupui hmun lo chang rawh se.
Ka duhna chu ka duhthlan ni lovin,
Ka chhia leh ţha hriatna a ni si;
Ka theihna chu ka ta ni hek lovin,
Ka finna pawh ka mawlna a ni si.
Tlangval :
Engkim neia engmah tlachham lo mi,
Ka kawppui awm mi ka zawng mawlh lo ve;
Thil dang zawng aia min thlahlel tur mi,
Dam chhûng kawppui atân ka thlang zawk e.
(Ballad anih si chuan 8-6 syllables a ngai ang, mahse kei chuan 10 ka hmang thung si. Ballad anih si chuan, Quartrain tina tlar 2-na leh tlar 4-na an in rhyme tur a ni si ang, mahse kei chuan tlar tin end word rhyme ka hman bakah, begining words rhyme ka nei zeuh zeuh thung a. Mahse, chu chu a pawimawh ber lo ve. Shakespeare-a Lucrece leh, Venus and Adonis leh, A Lover's Complaint rilruah a lo lang lian zawk tih erawh ka sawi duh. Nula leh tlangval inkâr hmangaihna, nu leh pa rilru, hmangaihna aia nawmsak thlahhlehna avanga uaia chul ta chanchin chu!)
