Narrative Poem (Rhyming abab, 10 Syllables)

Sava a bua a lungmuang angin, A tangbelin ani chu a zâl thin; Ruahin tuikuang a tipung thin angin, Tangah hmangaihna a punlun zual thin! A tan hmangaih mai loh chu a har e, A ni chuan a mittui luang hrufai-in; Inrem lailawkna nen a chhawn ta e, Fawhna hmuia bat tlingtlak ngennain! Hrilhhai taka hmaifang tai sen chungin, Ani chu a hmangaih ngawih ngawih si a; Hlauhthawng taka tisa dang lap chungin, Hlimna nasa tak nen a hmangaih kha! Aw nang mi rilru sak, tlangval nunnem Vawikhat fawh, chu chu a ni ka ngen ni; Aw, khawngaihthlakin! Nang naupang nunnem, Engah chuan nge i zahzum tlat vei ni? Fawp rawh, ka hmui i heh thianghlim tak chuan, Mahse nang angin ka no ve si lo; Infawhna chu kan ta anih si chuan, Lei lam i bih reng nachhan ka hre lo! Ka mitmu dum tliang tak hi bih rawh aw, Tah chuan i mawina thuruk a awm si; Hmui leh hmui intawklawi karah maw, Mit leh mit an intawk thin a ni si! Hmangaihna ruaipui nuam nasa tak chu, Mi pahnih rem taka inkawp nunah; Hmuh theih loh tura a thuhruk thin khu, Mi pahnih huai taka chetchhuahnaah! Hmangaihna chu meihlawm sakhat muk tlat, Tuia pil tur khawpa sakhat si lo; Tui chunga lang der der tura zang tlat, Beiseina lo thlawn thlen ve ngai hauh lo! Hun lawmawm chu liamtir mai lo la, Hun tha lo inherchhuak chu thlir liam suh; Pangpar vul vanglai uai mai lo se la, Thliah lovin mual liamtir mai mai hek suh! An vul vanglaia pangpar thliah loh chu, Hun reiloteah uaiin an chul dawn si; Hmelthat vanglai duhawmna chen loh chu, Amah siamtu pawisawina a ni si!