Hringnun pumpui thlak danglam tum a,
Zankhata thil thua atso chiam tur a ni ngai love,
Hringnun ze khat te te a thlak danglam tumna,
Ni khat atan zela i neih infawkkhawm hian,
Hringnun pumpui inthlak danglamna zawk,
A hun takah a rawn thlen mai thin a ni ngai e,
Bei la, bei zel rawh!

Boy vrs Gentleman

Tlangvalte hmelthatna chauh hi zawngin,
Hmeichhe atna mit lakah bak hnehtu nihna a chang ngai lova,
Tlangvalte puitlinna erawh chuan,
Hmeichhe finna thinlungah kumkhua atan hnehtu nihna a chang thin

Hmangaih hriatna!

I tlangvalin:
Favang ni tla tur ang maia no nalh i ni a tih chuan,
Tisa chakna nen i sakruang itawmna a thlir a ni duh hle a,
Turnipui ang maia hmeltha i ni chiang e a tih chuan,
I hmaifang thatna a thlir a ni chawk a,
Thlasik zing ni chhuak ang maia duhawm i ni a tih hian,
I thinglung thatna en chungin hmangaihna anka nemten i tawnah a hlan che a ni zawk e!

Mihring kan ni si a!

Mi tha tak taka kan ngaihte pawh hian,
Thutlukna laktlakloh zet zet siam tum an nei ve fova,
An va sual ta duai e tihna lam a ni chuang lova,
Famkimlohna khawvelah famkimna tluantling reng a awmlohzia,
Lantirnan an zia an rawn chhuah thin a ni zawk e!

Thinlung Hmangaihtu

Hmangaih tlattu che nun chuan,
A chhan leh vang pawh awm chuang lovin,
Inhnialna atthlak nun hman a chotuah thin che a,
Nimahsela, hmangaih tlattu che nun vek chuan,
I hringnun ngui chang a lo thlen in,
I lungngaih nguaina zawng chhuak a,
Hlimna tuikhur i chawi leh theihnan,
Khawvel nena inchotawn a huam zek zek thin!

Erase

I hringnun thawnthu ziakah hian,
Hriatrengna kawltu lemchang thiam lemchan,
I hringnun thawnthu kal zel turah,
An chanchin ziahlan chhunzawm zelna phek a awm ve tawh loh avanga,
Nawhrehna hmanga i nawhbo an ngaih chang a lo thleng thin!

Worthy Time

I hringnun hmangaihna luangliamah hian,
Tu tan mah hian an,
Hman hun, Remchan hun, Theih hun, Duh hun emaw,
Hun hlimawm chikhat ni lul suh ang che!
I tan an hunpum an hlan ngamlo anih ngai chuan,
An tan i hun reng an tawnah phuloh Saron par ang thliah bik ngai suh ang che!

Dependent

Hringnun khawvel buaina karah hian,
Rinchhan nghet innghahna tur am duh suh,
Harsatna hun thim a lo thlen meuh hi zawngin,
Thim hnuaiah zawng, mahni hlimthla meuh pawn,
Kan lak atanga tlanbona zawngin min liamsan thin si a!

Ka chau mang e!

Ka kamding hna leh lunglen tuar lovin,
Chham ang laikhum ka zal, pangti reng dairial a iang zo ta!
Zanriah buatsaih tha reng a zam love,
Taksa leh rilru damlo mahten tuar zawh ka zuam lo,
Enteh, Ngur tlang luahtu chhum tlafual iang sawn,
Awmlai na min tuam dam tur leh thinlung tuamtu reng,
Zotlangsangah a mi leng an awm na nge maw?

"I hmangaihna Tuikeplung hlu ber chu,
Vawkpui iang hringmi hmaah paih suh!"

For all mothers out there!

"I hraileng chawi in awih tleina tur,
Thudik, Nunchang Mawi leh Duhawm,
Finna, Thianghlimna leh Hmangaihna zawng,
An hringchan tuallai tunah,
Chunu nunah a par tlanin an tlei lawk tur a ni si a"

Hmeichhe Chakna

Ka chaklohnate ka hriat reng thin avangin
Chakna thuruk ka nei tawh si a!
Ka diklohnate ka hriatrengna chuan,
Duhawm nihna hmun min thlen si a!
Lemchanna leh a tak ka hriat hran thiam tawh avangin,
Hlauh reng ka nei tawh lova!
Ka tihsual palh lak atanga ka inzir chhuahte chuan,
Finna thinlung min pe si a!
Huatna thinlung ka lo neih tawh avangin,
Hmangaihtu chan ka chang thiam tawh si a!
Lungngaihna a sawizawi ka nih tawh avangin,
Hlim takin ka nui thei tawh si a!

Fimkhur Rawh, Lanu!

"Hmeichhia hi zawng a fimkhur leh rinawm bera kan ngaihte pawh,
Englai tak khan nge an lo chetsual hman tih reng hriat hma hian;
Tlang an thang duh viau thin.
Chuvang chuan nula rinawm leh tha ber bera kan hriatte pawh hian,
Tlang rel chu an pumpelh thei bik lo!

Pangpar pawh a kuhmum lai ngetin a kher tawh chuan,
An hun hmain par an chhuah thin a,
Thliah tlakin an par hman ngai lo reng a ni!

Chutiang bawkin mihring pawh hi kan tlei tan ek ek lai hian,
Ngetin min eichhiat a hlauhawm ber hunlai a ni si a;
Chuvang chuan finkhur nain lo khat la,
Hlauhthawnnaah hian himna a intuh ber tih hre reng rawh!

Taksa vanglai meuh hi zawngin,
A hnaivaiah thlemtu pawh awm lo mahse,
Mahni chauh pawh hian kan ngaihtuahawm ta reng reng a ni,
Tih hi Thupuiah lo vawng tlat ang che aw"

Hringnuna chona pawimawh ber a chu,
Hringmi in a hringmi nihna a hriatchianna hi a ni a,
Chona pawimawh ber dawttu pawh engdang ni lovin,
Chu hriatchianna hlimpui tura a nun a siamremna hi a lo ni e!
Mahni inhriatchianna nun tak atanga hlimna aia tlo a awm si lo!

Biakhlatna simeikhu iang thawm chuan,
"Just take my heart" biahzai rawn hlanin,
Aw, van mite u in lo hre tawh ngai em?
Aw leilung rimawi zawngte u ka zawt a che u,
Ka duhtak anka ang renga rimawh inchhuah tawh ngai em?

Thenloh mangtha kan hlanna thla a liam ta,
Anka nem tawnni her thei reng reng lo anka ngaihawm chuan,
Zotlangsang tlai ni liam tur mawina a belhchhah zual a,
Ngur tlangsang pawn a chhunga tla vahui leh vanva hram mawiin,
Ka duhtak anka nem duhawm an rawn chhawih mawi zual e!

Anka tam lo thinlunga fiah si,
Anka fing lua lo thlamuanna pai,
Anka rei lo thinlaia cham reng tur,
Anka ngaihnobeinb khat no lo,
Van lal fate meuh pawn a thuken an bihthlak i chuan,
Ka thinlung khawhar leh vai tan harhna leh chakna thar a rawn thlen ta!

Heart Remains

Hunten an liampui a,
Hriatrengnate pawh an ral zo ta,
Rilru vei zawng an danglam a,
Hringmi'n mual an liam bawk thin,
Thinlairil fantu thin-lung erawhin nghilh zai reng a rel thei lo!

I Miss You

Hun rei leh tawi sawi lova,
Intawnni a zin leh khat ni hek lovin,
A thim a var phungthlukna pawh ni chuang lova,
Thinlung lairil ber atanga rawn luangchhuak,
"Ka thlahlel che" 
Tihna anka lungmawl hian hmangaih berte nunah danglam a thlen thin!

"Hringmi, a sakhua vawn tana a nun a hlan ngamna hi mak ka ti lutuk a,
Ngaihtuahna lairil hi a khur ru der der thin!
Mahse mak ka tih pawh hi mak ka ti zozai tawh love,
Kei pawn ka sakhaw vawn thihchilh ka zuam reng a lo ni si a!
Chu ka sakhaw vawn chu Hmangaihna Sakhua hi a ni a,
Ka thurin bul pawh hringfa kara Hmangaihna Thuchah hi a ni;
Duhber, nang hi a lailum luahtu Sakhaw Lungphum chu i lo ni si!" 

Ka lungpui nghet Lalpa

Manganna tawpkhawk, tuman min hriatpui loh ka tawn chang te,
Beidawn em em, tuman an hriat ve loh ka neih chang te,
Lungngaihna vawrtawp, a ruka ka tawrh chawrh chawrh lai te,
Tumah hrilh tur pawh ka bula an awmloh buaina ka tawh lai ten.

Hlimna tlangsang ber ka chuan lai te,
Khawvel mawina tinreng ka hmaa an inhun lai te,
Ka duh apiang ka nei zawt zawt hunlai te,
Ka tana engkim a kaltluan em em lai te pawn.

Nang chuang i banin min lo chelh reng a,
Ka ding leh veiah i vantirhkoh i hung reng a,
Ka pensual, ka boral tur, ka nat min lo veng reng si a,
Aw Lalpa, ka lungpui nghet, nghing ve ngai lo i lo va ni em!

Hmeichhe Chakna chuan.................

Chakna zawnga ka tlan laiin,
Tawrhchhelna nun ka neih theihnan Hunkhirh kawng ka zawh a tul a;
Pasalthatna ka sual laiin,
Huaisenna nun ka neih theihnan Hlauhthawnna leh Rinhlelhawmna nen indona hmunah kan luangza a; 
Hmangaihna ngena ka chiau vawng vawng laiin,
Midang rawngbawlsak zawkna nun atanga hlimna ka chhar thung thin!

Duhsakna ngena ka phi ruai laiin,
Mahni ngeiin a thawhchhuah a remna hun remchang ka tawnah an parvul thin a;
Hausakna dila ka vahvel ruai laiin,
Thiantha leh chhungkua hlutna zirthiam tir ka ni si;
Finna dila vartian ka thlen laiin,
Chona leh tawnhriat ten min lo nghak a;
Hlawhtlinna ka zawnga thlantui a luan zawih zawih laiin,
Hlawhtlinna ka chan theih nana ka hlawhchhamnate laka hnehna thuruk ka chhar chhuak thung thin!

Hringnunah hian ka duhthusam reng pekin ka awm love,
Hringnunah hian ka mamawh zawng zawng erawh pek ka lo ni zawk si a!

Ka Bahhnukte chuan:

Amah an duh theihna turin,
A thawmhnawte chu langtlang lungman tam rengin chei a ngai lova;
A din ngheh theihna turin,
Amah hualhimtu mipa chakna a mamawh lo;
A duhawmna parvul tir turin dawt nun a nei lova,
A rilru ngilna chu a mawina ber a ni si;
A rilru ngaihtuahnate chu a fing fel a,
A thinlung ngaihtuahna pawh huaisenna a khat a ni si;
A rilru ngaihtuahna chu inrintawkna-in a khat thin a,
A ngaihtuahna luangchhuakte chuan lainatna a pai thin;
A tlinna tlang a sang a, midang erawh a rinchhan lo,
A chaka, zahngaihna nun a tlachham hek lo;
Ani chu hmeichhe vantlang satliah a ni lova,
Ani chu kha Hmeichhia kha tia ka koh ngeia chu a ni e!

Hringnun Hlawhtlinna ropui,
Hlawhtlinna thlentu ten rihsangmual an liam tawh hnu pawh a;
A chanchin an sawi ban theih lohte hi,
Mahni inhlanna thuk ber atanga lo thleng an ni fo thin;
Mahni inhmangaih uchuak hmasialna nun atanga chuan,
Hringnun hlawhtlinna chhiar tur a lo thleng ve ngai thung lo!

City of Zion

Aw ka nghakhlel Zion khawpui len hun tur, 
Lalpan ka tan a buatsaih ram engmawi,
Lei hreawm kalsana ka kumhlunna tur,
Thisen vangin ka tel ngei dawn si!

Lalpan ka siam zo ta in chenna tur,
Ramtina ka fate sengkhawm tan rawh u,
Ka lalthutphah mawitu atana ka thlante,
Aw, khawngaihna avangin ka telve ngei dawn si!

An lungngaih tah mittui tlak a tam ta e,
An hreawm mangan chhung a rei ta e,
An retheihna khua reng a sei ta e,
An tan lawmman ka siam zo tawh si a!

Lallukhum chuai theilo ka tan dahin a awm ta,
Rangka tual ka fanni chuan leia retheih ka hai tawh ang,
Nunna thing zar ka belh hun chuan,
Lei thihna rengin min ti hreawm tawh lovang!

Sakeibaknei ha leh Sihal ha hriam tinreng,
Ka tawnah an hriam lua, an mi seh ka zo lo,
Lalpa, lo haw rawh tlante kan chau zo ta,
Engchen nge ni kan la nghah dawn le?

Lalpa Sawi Leh Rawh!

Ka nunkhua a har mang tak e,
Khawvel thu hla min chimpil mek tu,
Ngainat an awl mang e, an zun a uai nen,
Lalpa sawi nawn leh rawh!

An mawi mang tak e,
Hringfa hmangaih thuchah,
Ngaih an va awl em, lunglai an luah leh thin,
Lalpa sawi nawn leh rawh!

Khawvel parmawi fakna tinreng,
Ka thinlai an luah thin mang e,
An laka hnangfak a nuam fo,
Lalpa sawi nawn leh rawh!

Mahse ka hriat ka sawi nunkhua ti har tu,
An par zuthlum dawnin ka chau zo ta,
Thinlung ruak an luah khat zo mawlh lo,
Nunruak leh khawhar an chang zel,
Lalpa sawi nawn leh rawh!

Sawi nawn leh rawh Kalvari hmangaihna,
A chanchin mawi ka lairil fantu,
Kristan ka tan a tuarna hmun ngei chu,
Aw, a chanchin ngaihnawm ka tibang mawlh love!

Ka lawm e, Lalpa!

Ka chenna khuavelah hian,
Ka ta soi tur ka ngah lo,
Thenrual an kiam, rosum ka nei lo,
Runhmun nuam ka nei lo,
Khawvel nawmsak rohlu nen,
Miten min hre lo, ka neih zawng pawh,
Milian ka tan hriat an awm hek lo,
Khawvel lunglen leh malna ka tawh,
Hlimna khuavel thian ten an chan,
Ka tan dah a ni ve lo, 
Rualawt min ngai mahse,
Thinlung chhung thlamuanna,
Vana ka rosum erawh min hriatpui lo,
Ka lawm e, Lalpa!

World Cup Fever

Thiam tinreng infawk khawm,
Theihna chungnung bera beihna,
Inbuatsaihna zawnga hautak ber,
Hnehna chang tura beihna ropui ber chu!

Ramtin a thangvel khuavel zawng a fan zo ngei,
Lanu valrual ten an thinlung zawng an pe,
Ramtin mahni ram tan ui reng nei lovin,
Hnehna chang ngei tura beihna khawvel ngaihsan ber chu!

Khawvek hnehna zawnga ropui ber hi,
Ka dawn changin Lalpa chhandam kalkawng,
Hringmi zingah Kross chanchin a thangtlawm lua,
Hnehna zawnga duhawm ber kan hmuah dan mawlh hi!

Hringfa zawng harh se,
A thawm thangva mitin lairil fantu ni se,
Hnehna ropui ber van zaipawl nen,
Van ruai theh hlan kei zawng ka nghakhlel mang e!

Thihpui Tham Sual 7 an awm a!

Tisa chakna, Awhna, Virna, Thatchhiatna, Thinurna, Chapona leh Duhamna an ni.
Inveng tha rawh; heng sual pasarih lak atang hian,
Pawisak leh lungkham reng an nei si lova;
Hruihruala phuarbeh ni suh se, zalenna kawng an zawng reng si!

Tisa chakna chuan :
Hmangaihna tak a awm love,
Tisa hi chakna a khalh kal a ni a;
Pianhmang itawmna hmanloh a rapthlak tiin!

Awhna chuan :
Mi neih zawng it-in a awm a,
Dawt tinreng hmangin inthup mahse; 
A mitmeng chu thikna avangin a thip vek a ni!

Virna chuan :
A mit it zawng apiang ei zawng a tum a,
Uchuak taka eiral chakna hripui a vei bawk a;
Amah leh amah pawh chhe vek khawpin!

Thatchhiatna chuan :
Thatchhe thei ang berin zawk takin a khuh a,
A hmelhmang chu Thinlunga vei neihlohna a ni;
Kumkhua atana thlun ber chu a thlang si a!

Thinurna chuan :
Amah leh amah intihchhiat vekna kawng zawhin,
Hmun khawhar ber a pan thin;
Kumkhua atana khungbeh a ni thin!

Chapona chuan :
A pianhmang thatna chiah a lantir a,
Hlauh reng nei lo khawpa chapo chungin,
Darthlalang hma ngeiah a hlimthla a thlir thin!

Duhamna chuan :
Zilhhauna zawng zawng a thlir liam a,
Sum leh hausakna bak ngaihtuah a nei lo;
A tawpah erawh engkim a chan dawn si a, nuihzat a hlawh ang!

Run Away!

Hringfa zingah Hringnun harsatna tawh chang a,
Hmachhawn aia tlanchhiatsan nunpuitu tan zawng,
Hringnun intlansiak kawngah hnehtu chan a har reng a ni!

Ego

Hringnun mahni hmasialna khawvelah hian,
Hringnun thlir thiamna nun zir kawngah;
Mahni inngaihhlutna nun vawn tlatna thinlung hi,
Vaivut mit ti mimtu ang mai a hnawksak a ni a,
Thenfai anih hma loh chuan midang ngaihhlutna nun reng hre lovin,
Khawvel thlir thiamna nun pawh neih theih a ni ngai lo!

Hmangaihna Lungphum!

Hnukte, Thawhnaw cheimawi dawra ka luh ni kha,
Kil khata lunghlu leh tuikeplungmawi a chei ni lo thawmhnaw,
Hmangaihna, Duhawmna, Rinawmna leh Beiseina nena chei,
A khaina atana rilru chhungril chakna ngei kha ka thlang anih kha!

In run chhung ka lo lawi ni khan,
I mal chunga lu nghah ka rawn dil che a,
"I ti ho mang e" tia min chhawn lai khan,
Mihring mihrinna chu Lu anih thu fah chung chein Lu nghahna mi pe ta anih kha! 

Nang nena kan inhriatrengna lungphum phum i rawt ni khan,
Zungbun thianghlim ka ngaina lo a ni love,
Mahse hriatchhuah chawp ngai Hmangaihna Zungbun chu enge anih a,
Thinlung hriatrengna aia a ropui zawkna ka hriatloh mi tawmpui theihna khan kan lungphum a sawh nghet rua! 

Hringnun - XIX

Hring chan khuavelah mim ang kan lo piang ve,
A chhan avang erawh chhui thiam lo hianin, 
Virthli leng ang hian kan lei hring nun hian,
Mual a lian erawh ka hre chiang ngei!

Kan vul lai tawite hi hlimten hmang za i,
Awmlai piallei vaivut kan chan hma hian,
Fam dairial changa zing phul kan liam chuan e,
Ningzu leh zai sak kan bang dawn si!

Duhaisama sum par vai lungmawl zawngte,
An lunglai luahtu kar lova senmei chang thei,
Raltiangah an tan awrawl lo ri e,
"In taksa, thinlai a rim thlawn e"

Thiam sang leh fingvar inti zawng ten,
An sep thin lei nun, chatuan ram nen,
A hriltu mifing pawhin famkhua changin,
An biahthu chawpin rial ang dai e!

Lungrualte hianin lamtluang i chhui dun ang,
A fingvar ten hmuh phak loh ram chu sep se,
Hringnun a ral zel tih hi thil chiang tawk,
Tawnmang ram chanvo chu thildang zawng!

Thlafam chan hi kei zawng ka zuam lo,
Ka chung chhawrthlapui khi a lo eng ang a,
A riangin piallei ram hi ka chhuahsan chuan,
Hril pawh hai ve hian ka ring mang e!

Dairial changa ka zalna hmun hring cham del,
I fan ni chuan mi han nghilh bik suh la,
A riang ka zalna piallei hmun daiah chuan,
I dawnlai ningzu mi han chiah la! 

Hringnun - XVIII

Siamtu kut hian a ziak zel a,
Khuavel finna, sa leh khua zawng pawn,
Bei mahse chhun han te pawh an nuaibo lovang,
Lungchhe luaithli hnawk tui meuh pawn!

Hringmi pianna chu lei vaivut ngei,
Piang hnung ber siamna pawh a dang chuang lo,
Siamtirh ni kawl eng khan tawpna,
Hai rual lohin hril chhuak e!

Chhui thiamin dawn thiam ve la hringnun hi,
Thangvan mawi a her liai chung si-ar zawngte,
Kumsul hai lo, an lenna hmunte khian,
Khuavel kan tawpna min hrilh chiang ngei!

Laibang dana ka nun tithlabar thin tu,
Thlunglu ti hai, rianghlei min chantir tu,
Hnehna chahbi hlana min tihlimtu,
Ka duatlai ka Bahhnukte ngei a lo ni e!

Ka chhar chhuah rohlu hei ngei hi lo ni,
Lunghnur ni leh lawm chang nei chhuihthangvalan,
Sappui run lian pawh cheng i, ka hloh ai chuan,
Ka chharna tualpuk ka thlang zawk e!

Hringnun - XVI

Lawmlai lungduh leh ngaih zawng lenrual duhte,
Hringchan rama an vanglai par tlan tawh ten;
Thihna mual an rawn liam chatuan panin,
An ngaih chang ni zawng a sei ngei e!

An sun i hnu pualleiah zai kan vawr ve e,
Sikni eng lawmin hlim lai kan chen ve a;
Khawvel hnutiang chhawnin kan la liam ve ang,
Thangthar ten piallei an lawm ve thung ang!

Kan vullai tawite am ten i hmang za ang,
Awmlai piallei vut kan chan hma ngeiin;
Fam dairial changa zing phul kan liam chuan e,
Biahthu hlan leh lawmlai kan bang dawn si!

Thiam sang leh fing far inti zaleng zawng ten,
An sep, lei nun, chatuan ram nen;
A hriltu mifing pawh famkhua changin,
An biahthu chawpin ral riai riai e!

Lungrualte hian lamtluang i chhui dun ang,
A fing var ten hmuh phakloh ram chu sep sela;
Hringnun liam zel tih hi thil chiang tawk,
Tawnmang ram chanvo erawh thil dang a ni!

Hringnun - XVI

Lawmlai lungduh leh ngaih zawng lenrual duhte,
Hringchan rama an vanglai par tlan tawh ten;
Thihna mual an rawn liam chatuan panin,
An ngaih chang ni zawng a sei ngei e!

An sun i hnu pualleiah zai kan vawr ve e,
Sikni eng lawmin hlim lai kan chen ve a;
Khawvel hnutiang chhawnin kan la liam ve ang,
Thangthar ten piallei an lawm ve thung ang!

Kan vullai tawite am ten i hmang za ang,
Awmlai piallei vut kan chan hma ngeiin;
Fam dairial changa zing phul kan liam chuan e,
Biahthu hlan leh lawmlai kan bang dawn si!

Thiam sang leh fing far inti zaleng zawng ten,
An sep, lei nun, chatuan ram nen;
A hriltu mifing pawh famkhua changin,
An biahthu chawpin ral riai riai e!

Lungrualte hian lamtluang i chhui dun ang,
A fing var ten hmuh phakloh ram chu sep sela;
Hringnun liam zel tih hi thil chiang tawk,
Tawnmang ram chanvo erawh thil dang a ni!

Hringnun - XV

Nulat Tlangval Kara Hmangaihna

Hmangaih chaka leng kan tam ngei e,
Hmangaihtu zawng pawh kan banglo,
Hmangaih chaka tuihal leh,
Min hmangaihtu zawngin kan tlan narawh!

Mahse a taka tawng lo hmangaih,
A awmze ril pawh hre hek lo,
A nihna leh awmze dik man lo,
A ralkhat duhawm leh mawina chauh hria kan tam si!

Hmangaihna chu tawntirh a mawi,
Tawntirha duhawm tha hluan,
Tawntirha hlimna kulhpui leh inhumhimna,
Tawntirha muttui veng veng na a ni!

Hmangaihna dik erawh khuarei thil,
Hun reilote chhung atan ni lo,
Vawikhat atana khuanu duan fo,
Thihni bantlang nun kengtu a ni si a!

Hmangaihna dik kawng erawh a chhuk chhova,
A kawng pawh a bumboh fova,
Tah leh rumna, phatsanna nen,
Kawng nuam reng awmlo ni a lan chang a tam hle thin!

Hmangaihna ze duhawm leh mawi erawh,
Dawhtheihna leh ngaihdamna,
Tawrh hram hram leh hriatthiamna,
Fel loh haiderna leh tlawmna nun a khat a ni si a!

Hmangaihna hi i hrechiang tawk em?

Hringnun - XIII

Buai em em a mihring kan awmlaiin hriatloh kawnah then ten hlim takin nupui pasal an lo nei a,
Then ten hlim an lo thai a.

Chutih laiin rinloh takin then ten zamual an lo liam thung.
Chutiang khawvela kan awm tawh laia kan kalna tur kan chingfel lo anih si chuan nakinah zawng a lo tlai tawh ang!
Mahse chumi dawn tura ngaihtuahna sen tak takna hmun chu,
Thlen mai mai a har em em lawi si a,
Nitina kan thil hmuh leh hriat ten,
Kan ngaihtuahna zawng zawng an la peng a,
Thutak erawh chu kawngsirah a lo let mai mai a,
Mahse nakinah zawng kan duh emaw duhlo emaw,
He Thutak ngei hi kan buaipui tur leh min buaipuitu tur a la ni dawn si!

Hringnun - XII

Amen! I thu ang zel ni rawh se,
Hlim lawm laia Amen zawng a har lo,
Kan Amen thawm a ring a, 
Kan hlimna pawn van a tawng fo!

Mahse harsat, mangan, buai a lo thlen in,
A har ka ti si maw?
Amen tak nun neilo ang thawm leh demna,
Chunglamah meikhu ang maia kan kaltir fo!

Abrahama en la, Isua nun en rawh,
Anni zawng Amen harsat leh buaina karah,
A ni, Mari pawn a tawn tur hre reng a,
Amen nun a pek kha, malsawm anihna a ni a sin!

Rawngbawlpui leh thawhpui lakah,
Chenpui leh chhung zingah,
Thenrual hmelma karah,
Amen nun nei lo a leng kan tam lua em?

Hringnun hlim leh lawmna thuruk,
Thlamuan leh malsawm dawnna thlen tu,
Chakna thahrui leh remna hnar,
Amen nun ngei hi a lo ni si!

Hringnun - XI

Panlai hun leh ni te chuan kei ngei pawh hian,
Mifing belin an biahthu za tam sang tam,
Ka dawng thin, lunglam erawh a vai,
Bul ka tan ka kir lehna ngei.

An sawi fin thiamna ka zir ve,
Rim chaia bei hian phei lai ka vawr a,
Ka zirchhuah hei zawng,
Virthli leng iangin ka ka then vel e.

Khawvel fin sang tual tual a ropui ngei,
Thangvan mawitu si-ar zawng chhui velin,
Leilung nunphung leh hringnun an zirthiam ngei e,
Awmlai lian hrang erawh dang zo chuang lo.

Ka chung hliaptu thangvan zawtin,
Mitdel laitual leng ang a hraite tan,
Hruaitu khawnvar awm lawm maw, zawhna chu,
Lungmawlna biahzai min hlan si.

Piallei ngei hi ka vahvaihna ram niin,
Thiam leh finna tinreng zirin,
Hei chauh maw ka chhar finna chu,
Hlim lai chen ral atan, i pamhmai lua e.

Piallei chenna hmun zauvan,
Nui hiau thingte tlangrawnah hlimzai sa e,
Hmangaih biahthu karah hlim chang awm mahse,
Eng chen hlim i maw, hringfa zawng hi!

Hringnun - X

Lengi tawnna hmun chung Pathian run,
D tawn nan a dang chuang ngei e,
Hmangaih Pathian anihna,
Hringmi karah a takin rawn parchhuak e!

Chutin amah fak leh chawimawina nen,
Hnuktei tawngtai thawm, ka thla ti chak tu,
A nungchang mawi, ka nunchan zirna,
A kamchhuak reng vanrim nam thin!

Thiangten inkhawm, pawlho kan telna,
Tunah zawng riangten ka pawl chhingkhualah,
A chhing zo reng ka tawng lo, ka Bahhnukte,
Ar ang vaihna khua a tawnah a sang lua e!

Ka biak erawh a dang chuang lo,
Nitin a thar fo thin, a hmangaihna,
A tangbelh changin lunglen a kiang,
Hringmi ngaihlai erawh a bang thei lo!

Nang pawh hlimten Tai nun nen leng zel la,
Ama hualhimna hnuaiah tawnni a herchhuak ang,
Chutin kawpten Amah fakin,
A zarah Hmangaih parzu kan tlan leh dawn nia!

Hringnun - VIII

Nawrna na tak lo kal chang hian,

Mihring hi enge a nih a,

Eng ang chakna nge a pai ruk,

Thailanin a awm thin.

Nawrna hmanhmawhthlak a lo thlenin,

Mihring hi eng ang chiaha tlo nge a nih a,

Amaha rintlak awmna chu a rintlak tak tak em,

Tih a taka tarlan leh fiahin a awm thin.

Nawrna thinurthlak a lo thlen changin,

Mihring hi eng anga dawhthei nge a nih a,

Eng ang chiaha rilru khauh pu mi nge a nih,

Fiah leh tarlanin a awm thin.

Hringnun - VII

Hringnun - VII

Hring kan chan chhung leh thih hnu chatuan pialral,
Lungkham reng reng hian sang tan an chi-ai,
Keini zawng vawiin hmang tha in,
Lungrual ten chhun ni i leng zawk ang!

An sawi Rose par mawi khi thlir ve teh,
Ngawi reng biahthu hlan, chhui thiam ve la,
Parmawi ten hring chan khuavel ka rawn hmang ve,
Ram daiah uaiin ka til leh thin.

Lungmawl valinwduhthu leng an sam thin,
A tak chan leh thamral chang a awm bok thin,
Tak pawh chang se vul lai a tawi lua e,
Romei chhum ang hian a ral leh thin.

Mualkil mitha leh malsawmna khumtute,
Riang hlei hluan daikil kara leng zawngte nen,
Rihtlang mual an liam zo, hleiten an dang chuang lo,
Piallei hnuaiah chham ang zal zain.