𝐏𝐀𝐂𝐇𝐔𝐀𝐔 𝐇𝐋𝐀 𝐇𝐑𝐈𝐋 – 𝐗𝐗𝐗 (Myanmar tleirawl sûnna hla hril)

Myanmar politik kal sual vangin sipai lamin, lainatna nei hauh lovin mipui chunga nunrâwnna chem an vilik a nih kha. Sipai rorêlna duh lova mipuiin lungawi lohna an lantirnaah, Myanmar tleirawl tê, kum 19 mi vel lêk chu silaimuin a deng fuh ta hlauh mai a. A nunna hial a chân phah ta a nih kha.

Zalenna ţana ke a penna kawnga a thu sawite chuan, Zoram mipuite mai bakah khawvel thinlung a dek zár a. Mi tam takin an sûna, ropui taka vuiliam a ni ta a nih kha. Kha tleirawl pual khân hla hril ka phuah ve a, hei hi a ni e.

- - - - - - - - - - - - - - - - - - - - - - - - - 

Aw thihna, uangin intivei mai suh,
Mi tin hlauh leh ţihkhai zawng i ni ngei,
Chelh din rual lohva hringfa lem zotu,
Angkhata mi tin zûk hlum zotu chu!

Khuavang nau ianga duhawmte meuh pawh,
Thil lüng leh rim chhia maia chhuah theitu,
Lalna leh thuneihna tukdawl zawh loh,
Leilûng chhulchhuak laka hnehtu ropui!

Hei en rawh, nang ngamtu che a lo kal,
Mi azawnga lâ tuaitir tê mai chu!
Lainatna tel lova i hriam hmanga,
I âh thlûk ngei chu, a nun reng si hi!

I chhuantawlawl, hun diriam phak loh,
I hriam, khuarei hmanga chhilh bo zawh loh,
I hun favah hriamin a fîk chhum loh,
Kumkhuaa nang tithângtlawmtu tur chu!

Lâ tuaitir chuan hmangaihna hriam lêkin,
I chhiahhlawh nunrâwnna a hmachhawn ta,
Lâ duhawm chuan zalenna chawi sângin,
I thlunglû a tihhai tak váwn váwn hi!

Thihna kut vawta i man niah chuan,
Sûnna mittui aia’n huaisenna dâr,
Khawtlâng dûng tluanah a rik tak zawk hi,
Romei iang thâmral lo tur zalenna!

Kil tinah nang hnehtu fakna hla mawi,
Van phaiphulêng iang a fawn del del e,
Khawvel rumţhaihtu deuhsawhna lûngrûn,
Lungchim taka hringfate’n an rem chu! 

Zofa, lâ duhawm ruang chu chung si-âr,
Zalenna khuahkhirhtu leilung êntu,
Beiseina nung tuhtu duhawm berah,
Mi tin hmuh turin thangvanah chhiah rawh. 

Zalenna nghaisak ni lo chhuah chângin,
Huaisenna kawng botu tân hruaitu nghet,
A hlutna teh phâk loh leh cho rual loh,
Hun thuhnuaia kun ngai lo ni tura’n!

Ţhenkhat pianpui ropuina chang an awm,
Ţhenkhat thawhrim vanga mi ropui pawh,
Ţhenkhat ropuina an bel luih an awm,
Nang zawng, ropui taka thihna hnehtu! 

Tuaitê, nang ang reng tu nge awm tawh ngai?
Kum tamnate chuan i lakah hnehna,
I kimtlâng mawinate uai chûl turin,
Thiltihtheihna reng an nei ngai lo ang!

Thihna lem thiam kawngah nang tluk tur reng,
A tuk ţhat ber ţumah meuh pawh Khuanu’n,
Tlak lei a hrual puitling tawh lo’ng e,
I tenawm lai ber pawha hriak thïh tlak! 

Thihna thinlung sahal, chawlhna hmu lo,
Tukdawla thunun thei an awm ngai chuan,
Nang, hmei alaia lâ lehnghal tluk hi,
Piang leh hian khuavel a mawi ang em ni?

Nang chuan thihna chu pasalah neiin,
Lûngchim taka i kuangkuah tak hi le,
Hun lo taka nipui pangpâr duhawm,
Vur tlate’n chhilh bo hlen an tum ang chu.

Mahse, ka tuai duhawm, i mawi chuang e,
Thihnain mi tin min zûk zawhah pawh,
Nunrâwnna meuh thlana an vui liamah,
He hla hril hmangin i nung reng zawk ang!  

𝐋𝐮̂𝐧𝐠𝐧𝐠𝐚𝐢𝐡𝐧𝐚 𝐇𝐥𝐚 𝐏𝐮𝐢 !

Aw, ka lûngngaihna leh manganna hi,

A kuam chin zau zawng, thûk zawng leh tam lamte,

Teh theih, buk theih leh hlam theih ni teh se,

Hriatpuitu a’n lei leh van ka au tur!

Tuifinriat mawng ang maia thim chhah ber,

Leia ţiau vaivutte buk rihzawng ang,

Vana arsite anga chhiar sen loh,

Chuti takin ka nun a nâ si a!

Mit khaw hmuhnate làm a vai zo a,

Beng hriatna pawh tihpin a ni zo ta,

Thâwl lâk hlekah ruh chùktuah a nâ a,

Nunna pawh thih châkin a sahal e!

Beidawnna chuan nâ takin mi diriam,

Beiseina paw’n fahrah iang mi thlauhthla,

Thling kâra ka nun tui kâng chat mêk chuan,

Tuihnà tharlam reng a mamawh hek lo!

Manganna hruihrualin mi hlapna chu,

Dam lai tân tawrh zawh mi rual a ni lo,

Lûngngaihna fei hmawrte’n min chhûnna pawh,

Rawhtuina mei let sarih tluk a thîp!

Vanrţian chu thim chhah mûp ang a ni a,

Chhun vanglai ber khawkhênna ram ang,

Tlai ni nêmah tawrhna a zual ting a,

Zan thim hnuaia mi mangang aurâwl chu!

Khuanu zahngaihna chuan mi thinhrik a,

A lainatna kâng ngai lo paw’n mi kalhlen,

Ka tuhrah phurtu nghâwngkawl a tliak e,

Hmangaihna, ţhuam ang mi dotu hmêlma!

Tuifinriat zau taka lawnglêng vakvai,

Nawr kaltu thlifimte’n an hransan,

Thihna thlan khur pan tura chakna reng,

Lawng karfunga pai lo mi khawngaihthlâk! 

Ka laka hriat thiamna pai hringmi reng,

Ka lûngngaihna ruam mi fanpuitu nen,

Ka ţahna mittui sûntu tu mah reng,

Ka tawng lo, kâwlkil piah lam ram thlengin! 

Aw, vawi khat chiah mi khawngaih thei lo’m ni?

Vawi khat chauh mi chhanchhuak leh dâwn lo’m ni?

A ni, vawi khat chiah mi chhâwk hahdam rawh,

Ka nun, hremhmun mei hliau iang a nat hi! 

𝐈𝐧𝐩𝐮𝐚𝐧𝐧𝐚

Leilung hi tûr chak ber a lo nih a,
A chhia leh a ţha hriatna thing pawhin,
Pathian anpui tân thihna a thlen chuan,
Bumtu rûl ber ânchhia vanga thihna,
Tem si lo a nih laiin kei engvang?
Tumna leh duhthlanna ka pianpui kher?
Ka tihsual rah, sual tawpkhâwka puan paw'n,
Pathian nen kan inzawmna a tihchah kher?
Heti khawpa zahngaihna awlsam leh,
Thilthlawnpêk ni si engvang Pathianin,
A thinrimna berhbu hmanga mi vau?
Lalpa, tu ka nih chung thuahte zawng,
Engtin ka hnial ngam tehlul ang che ni?
Mahse, thisen thianghlim kaltlang khera,
Tlanna i rawn thawh dan hi mak ka ti!
Nang chuan kei hi mi âtchilh a lo ni,
I mi ngaihtuahnate chu ţiau vaivut,
A tam lam ka hriat rual loh ai pawhin,
A nasain a lo tam hle si a,
Ka sualnate chu mite'n hrem tlakah,
Bata ruatah an ngai lui a nih paw'n,
Nangin mi theihnghilhsak ţhinnate chu,
I mi khawngaih vang a ni reng fo ang!

𝕿𝖊 𝖊𝖈𝖍𝖔 𝖉𝖊 𝖒𝖊𝖓𝖔𝖘...

Hriatna tura duan ka beng hian ri mawi,

Beng hriatna luhkhunga thinlung verhtu,

Thisen zam tin fan za chiai chiai ţhintu,

I âwkâ a hriat lohna a rei ta!

 

Nipui laia siktui luang hër hër ang,

Favang sirva chiap thawm mawi tak ang khâ,

Ţhal laia zo thlifim tleh heuh heuh ang,

Nunna làm siam ţhatu i nui ri khâ!

 

Hriatna beng tihpin a ni ta em ni?

Beng hmulte'n hriatna an khuh  zawk em ni?

Aigupta ţam tlak vanglai ang mai khân,

I âw châkin ka beng a ţam zo ta!

 

Van phaiphuleng ri fán ang i âw khân,

Vantirhkohte lemlawi ri ang ri fëk,

Thinlunga hlimna thlipui tlehtirtu,

Khâ ngei khân biahthu min hlan nawn lul rawh!