Ruam Vakvai !

Mi hnutchhiahna  hmun hi khawi nge ni ngai?
Lei nge van tih reng ka thliar thiam lo e,
Tuipui hnâwng kâr nge meipui vâm zinga'n?
Tun hun pawh eng dârkâr bi nge ni le?

Hah rimtawngna nge lû sunna hmun zawk?
Thih nawmna nge dam thlakhlelhna nun zawk?
Nunna meuhin thihna a zãr buaia,
Thinlûng taka a lo kuangkuah tak hi!

Vawi khat mai ni lo mi tihlum nawnin,
Mitmeng remhriatna phena thinlung sak;
Chêksāwlhna leh entleuna pai chunga,
Bumna tinrenga chawivul inlemna!

Ka thinlung pachhiatna laka hnehtu,
Ka khawhmuhnate'n an chawisân lalnu;
I kâm chhuak ri mawi tinreng zingah hian,
Khawngaihna ri fán thawm a dai ta si!

I heh thianghlimna pârzû ka tlan chuan,
Eng intiamkamna khawlhkham nge a pai tel?
Mahni lam insal beta intiamna,
Chu chuan lungawina zawng mi thlen tak a.

Nang chuan sal angin mi lei ta zawk a,
Hnuaichhiah nun mi hnawn ta hlauh zawk si a;
Hralh suma mi tlanna avangin,
Ka kâm chhuak tihtlawma phuarbeh a ni.

Vawi tam tak i mi fawhnate ngei chuan,
Thinlung lei khêk hmunah chanvo neiin;
Nawmchennain a man mi ţhing let si,
Vawi tam mi khawih chingpenna chu eng nge?

Kâwlphe tluka rang nawmna pai si lo,
Batna lehkha phek erawh tichhahtu;
Rulh zawh loh tur thleng thleng bat belhna chuan,
Vawi za fawhah pawh mi tlan chhuak si lo!

𝑨 𝒍𝒆̂𝒏𝒈 𝒄𝒉𝒖𝒂𝒏𝒈 𝒆 !

Ka chung khua reng nuam a tling zo lo,

Di zûn leh sikserh ţangkawpte'n ţang belin,

Val rianga a phâng e min lo ti.

Pang a dam lo lunglai a zîng ruai,

Chhun a rei zan mu reng ka chhing thei lo,

Min hnêm ţhin Lalngo, khawiah i ţuan?

Chunglûm huivate, ka tir ang che,

Hmar tlângpui mawitu tawnah va hril ta la,

I zûn bân chhâwl ang a uai ti rawh.

Keia thinlai chhum ang zîng chîai e,

Ka lûngdi khan min la ngai ve ţhin tak maw e?

Ka biak loh khua reng a sei zo ta.

𝐾𝑎 𝑡𝑙𝑎𝑖 𝑚𝑎𝑖 𝑛𝑎𝑛𝑔 𝑒 !

 

Ṭuanṭul leh khua tlai reng ka dawn lo,

Kei zawng ka lungkham hmar tlâng aiâwnpâri;

A chhingzo hmu hian ka inring lo.

Zâr khatah lungrualpui lo mah i,

Thla khâwng chang dun ila, chunglûm vân zawlah;

Lên kan mawi dawn êm e, nang nen chuan.

Chu tawnmang tak ruai ruai mai chu e,

Tawng lova lungmawl valin hril ka nuam chuang;

Ngaih luat tawnmang zêmtu biangnotê.

A ngaiin khua ka tlai mai nang e,

Zûnzâm kai chiai nena khua tuah loh ai chuan;

A thleiin lunglen thlei ka nuam zawk.