My Muse...

I hmai fangah fel lo palh lai zawngin,
I mit, hnâr leh biang fel lo ka hmu lo,
Ka chu laite chu an fuh hlawl lo ve,
I tih laite chu ka kuta chulin,
Kei atân chuan an fuh vel vek si a,
Ka mit chu khawvel hawhtir ka châk a,
Ka dah chungnunzia che hi biangnote,
Mahse, ka chuktawlh chhihhri lak ata,
Ka kutţang ka la sawn ta zawk si a,
Ti zawng hi nang nen kan inhnaih lai ber!

Meditational Verse!

Inthawina leh halral thil hlante chu,
Bansan lovin thuawih takin ti rawh;
Chu aia thil pawimawh Lalpa ngaihin,
A awm tih erawh theihnghilh suh ang che!

Thuawih taka Lalpa tân chet chhuahna,
Kalkawnga mahni thuneihna hum tel;
Mihring bawkin chawimawi a hlawh ţhinna,

Chu ngei chu kan huntawn mek a ni si!

Thuawih taka hnehna nunah ngei chuan,
Lalpa tân tiin inthawina atân;
Bawng thau ţha a mante a tân ânchhia,

An lo chân tak dan chu ngaihtuah chiang rawh!

Dân zawma felna hlenchhuah kawngah zawng,
Zoram aia champion an awm chuang lo;
Mimal nuna Lalpa dân zawm kawngah,
Kan Zero, kan ram pum mutân ngei chu!

Mimal nuna Lalpa dân zawm ţhin a,

Râlţitna hmuna Lalpa thu awih ţhin;

Thil dang zawng aia A thu pawm ţhinte,

Lalpa ngaiha mithianghlim an ni si!

Ţawngţaina Hla`- IV

Engah mal chunga chawilen ka nih a,
Hnutetui hnek tur pêk ka nih chu le?
Ni lo se la ka muhil hlen tawh tur,
Ka tisa pawh a hahchawl tur aw!

Hreawm tuartu hnenah ênna pêk a,
Rilru manganna nei mi hnenah;
Muanna thlifim pêk a nih chu le?
Chaute chawlhna pawh a awm bawk kha le!

Ka pa thununna chu hre thiam lovin,
A mi zilhhauna pawh ngaina lovin;
Ka éngthawlna pawh khuareiah niin,
Hriat thiamnate'n min tlansan mah se la :

Ka Pa lam ka la hawi cheu dawn si a,
A hnenah ka chungchang thute thlenin;
Vuina avanga âtna ka chungah,
A thlen ka phal ngai reng reng dawn si lo!

Ţawngţaina Hla - III

 

Hripui kâra ţawngţaina!

Mangţha, leilung malsawmna vawng ţhintu,
Mumalna reng nei lo khawvelah hian;
Inngainatna chu tisa châkna rah,
Thihnain inchhaina tia a koh;
A thangvàlh laka chhuahna reng awm lo!

Hausakna chu mihringin chhuang suh se,
Hriselna chu lei theih a ni lo ve;
Sakruang mawina an la chuai vek dawn a,
Engkim hian tawp hun an neih vek hi;
Chùlna hripui a tleh bâng ngai lovang!

Hmelţhatna pawh pangpâr ang chauh a ni,
An chuaiin mawina an hmawm zo vek a;
An êngte lam vutah an thâmral ţhin,
Khuavangte meuh pawh an fâm duhawm ţhin;
Vut paw'n Chawngtinleri a lem zo ta!

Chakna pawh thlanah an vuiliam ţhin a,
Chhura pawh thil lüng lakah a tlawm e;
Khuanu rorel lakah thal leh feite'n,
Chakna chhuan tur reng reng an nei si lo;
Thihna chuan, "Lo haw rawh, lo haw rawh khai!"

Chhia ţha hriatna leh châk tinrengte nen,
Thihna tûr chuan angkhatin min zûk a;
Hremhmuna thihna thlentu râpawm chuan,
Kan ngenna hre turin beng a nei lo;
Lalpa chuan kan chungah zahngai rawh se!

Chuvangin hmanhmawh la, muangchang hek suh,
I hmabak i chanpual chu hre reng rawh;
Vanram chu kan rochan tur a ni a,
Hremhmun pawh kan tân a ni thei si;
He lei erawh hringmi tâna fiahna!

Ţawngţaina Hla - II

Ka ţawngţaina chu boruakah thâmralin,
Ka ţawngţainate chuan chhangtu a tawng lo,
Ka nun khawhar tak chuan hnemtu a nei lo,
Aw Lalpa, ka lak ata i bo e.

Ka nun hian thlamuanna thu duh lovin,
Hnemna lam hawi thu reng a mamawh lo,
Boruaka thâmral daih chu ka châk a,
A ni, awm ata awm lo va awm chu!

Nun chu a nâin a saruak huai a,
Ngaihtuahna zawng a chawmawlh zo ta e,
Dam lai nun chu ka kham hluah hluah si a,
Ka nun hian chawlhna tur a hmu zo lo.

Zan rei takah Lalpa chu ka au  a,
Ka khum laizawlah ngei amah ka zawng,
Varţianah a hming ka lam lawm lawm a,
Chhanna erawh pêkin ka awm si lo.

Ka chhûngrilah hian ka thunun rual loh,
Hruihruala ka phuar beh zawh hauh loh leh,
Keimah kalha mi do rengtu ngei chu,
Ka manganna leh ţahna mi thlentu!

Ţawngţaina Hla - I

Ka hriat rengna vangin ka mangang a,
Hlauh vangin ka tha hial a khur bawk ţhin,
Engvang nge mi chimawm dam khua a sei,
An lo upata thu an neih tial tial?

An thawhrahte làm tihngheha awmin,
An rîla rahte an lo ţhan len hi?
An in leh lote paw'n chhiat tawk loin,
Pathian talhfiak reng an hmachhawn loh hi?

An fate ranrual anga tualchaiin,
Ri mawi remin hlim takin an lam a,
Anmahni pawh nuamsa taka nungin,
Thlamuang takin thlanah an zâl ţhin hi.

Khâknaa khat mi pawh a boral a,
Nun nuamin vawi khat pawh a ei si lo,
Angkhat vekin vaivutah an zâl a,
Changpatte chaw mai an ni tlâng si a.

Aw ka Pathian, i remruat awmzia reng,
Ka hriatna beitham tak hian a hre thiam lo,
Mak tihnaa khatin ka rum ţhin a,
Ka ngaihtuahnate vangin ka chau ta.

Nimahsela, sual lakah min veng la,
Thil ţha lo lakah min humhim ang che,
Ka sualnate vangin mi hlat suh la,
Ka lakah zahngaiin min awm fo rawh.

PEOTRY - VIII

Hringnun hahthlak tak vanga tlusawpin,
Thihna hahdam diai ngenin ka ţah hi,
Hlawhtlin phute'n chhiahhlawh nun an chân a,
Mi tlawktlawte'n ropuina thuam sinin,
Thutiam thianghlim meuh bawhchhiatna nunah,
Zahawmna leh lawmman chu phurna reng,
Nei lote hnenah hlan a ni si a,
Nula thianghlimin nawhchi a zuar a,
Mi felte pawh dawt vanga mualphoin,
Mi chakte pawh rorêltu'n thununin,
Ziak mite lam an ngawihtir ţhuap si a,
Thu dik tlâwm tak pawh âtnaah changin,
Sual chuan ţha leh dik a hnehchhiah zo ta,
Heng zawng zawng tlanchhiatsan vek ka duh ţhin,

Mahse, thihna âng chhûngah zâl ila,

Ka hmangaih malin ka kalsan si ang.

POETRY - III

 

Ka chetze mawi vangin min hmangaih suh,

Mitmeng leh hmaifang nelawmna vang leh;

Pawn lam lan dan duhawm tak vangte paw'n,

Silhfen man tam ka inbel avangte'n!

Thinlung ze nghet pu mi ka nih vang paw'n,

Chungte chu pamţula nuamsam lovin;

Kan inzawmna an tichat thei si a,

Chuvangin hmeichhe mit dik tak pu rawh!

Mi hmangaih la, a chhan hre si se suh,

Tichuan mi hmangaihna chhan leh vang reng;

Hre lova mi hmangaihna avangin,

Eng lai paw'n nangin kei mi hmangaih ang!

POETRY - II

Khawharna tawp hripui kâra lunglên,
Zan thim belhchhahtu thim thuah thum kârah;
Ngaihtuahna fim reng a nut burh kara'n,
Mumal reng nei lo ngaihtuahna fimah!

Sikserh natna serh leh sang pai si lo,
Tum bulfuk nei lo thlipui hrâng thleh iang;
Nun thlakhlelhna thlawh botir chuang si lo,
Chul tawh nun hlui suangtuahna a nâ chuang!

Hun liamta a suangtuah vawng vawngna chuan,
Amah ngaihna nei tawh lo thlakhlelhna,
Hremhmun mei vâm iang a nung rengah chuan,
Thinlung inhmu tawn lo luaithli nûlna!

Iau! chhehei, nunrâwnna, ânchhia vangin,
Natna vawrtawp ṭahna mittui ngei chu;
Zan anchhia tipunluna mi velin,
Ṭahna mittui puar nân mi pêk tak chu!

POETRY – IX

Kiang rawh, chhîng rawh, kumkhua atân ka ti,
Sathau khawnvar êng tluk chauha en tawi;
Zing daifim tluk leka daih rei lo hi,
Dam lai nun aia ka thlakhlelh zawk chu!

Ţingţang hrui herh mil loh ri ang maia,
Ngaihthlakna beng lam tikhawlo zotu;
Rim hriatna lam tituitang khawlo zo,
Thlàn hrukfaina nawhfe tuitang lo ang!

Hahchawlhna duhawm thim riai riai tawh la,
Hringnun chu lemchangtu khawvel duhawm;
Chapo leh intivei taka lênna,
Mi mawlte’n fakna hlaa an chawimawi!

Thinrimna leh innghirnghonaa khat,
Thihna in angkhat veka min manna!

Midday Poetry

Dâr, lung, lei leh tuifinriatte meuh paw'n,
Thihna hmêl lungchhiatthlak dodal tura,
An chak zawh tawk si loh chuan engtin nge,
Duhawmna, pangpâr tluk pawha tlo lo chuan,
Thihna anchhia chu a do zawh ang ni?
I hmelţhatna, favang thlifim tluka,
Derthawng chuan hliam rual loh lung leh thir paw'n,
Hun vanga ţawihralna kawng an zawh chuan,
I tân hmelţhat reng ngaihna a awm lo,
Hun vekin lei pangpâr mawi ber mi pêk,
Mi laksak loh nân eng nge ka tih tak ang?
Tu nge i duhawmna chûl tur khap ang?
Thilmak a thlen a, ka lehkhatuiah,
Ka hmangaih a vûl a nih ngawt loh chuan?

PACHUAU POETRY - XII

Sana hmai kual aṭanga hun chhiarin,
Ni êng zan thim hnuaia pilbo ṭhin chu;
Vanglai tha uaia chul ta ka hmuh nen,
Ram hmul dum tak lam an lo varna chu!
Thing sang ber hnahte an tlakkawlh zawh a,
Ni thlar hmasate'n thlai an chawm zawhah;
Nipui hnah chawrno lam an chul zawh a,
Hmaifang mawitu hmul reng an ṭuah zawhah!
Hmelṭhatna chu eng nge anih tak le? 
Hun khawhralna nang chu liam tawh mai rawh,
Nelawm leh duhawmna pawh inban se;
Rang takin pakhat zawk thihtir mai rawh!
Hun favah lakah inhumhimna reng,
A awm lo, huai taka lo hmachhawn bak!