POETRY - XV

Aw thihna, uangin intivei mai suh,
Mi tin hlauh leh ţihkhai zawng i ni ngei,
Chelh din rual lohva hringfa lem zotu,
Angkhata mi tin zûk hlum zotu chu!

Khuavang nau ianga duhawmte meuh pawh,
Thil lûng leh rimchhia maia chhuah theitu,
Lalna leh thuneihna tukdawl zawh loh,
Leilûng chhulchhuak laka hnehtu ropui!

Hei en rawh, nang ngamtu che a lo kal,
Mi azawnga lâ tuaitir tê mai chu!
Lainatna tel lova i hriam hmanga,
I âh thlûk ngei chu, a nun reng si hi!

I chhuantawlawl, hun diriam phak loh,
I hriam, khuarei hmanga chhilh bo zawh loh,
I hun favah hriamin a fîk chhum loh,
Kumkhuaa nang tithangtlawmtu tur chu!

Lâ tuaitir chuan hmangaihna hriam lekin,
I chhiahhlawh nunrâwnna a hmachhawn a,
Lâ duhawm chuan zalenna chawisângin,
I thlunglû a tihhai tak váwn váwn hi!

Thihna kut vawta i man niah chuan,
Sûnna mittui aia’n huaisenna dâr,
Khawtlâng dûng tluanah a rik tak zawk hi,
Romei iang thâmral lo tur zalenna!

Kil tinah nang hnehtu fakna hla mawi,
Van phaiphulêng iang a fawn del del e,
Khawvel rumţhaihtu deuhsawhna lûngrûn,
Lungchim taka hringfate’n an rem chu! 

Zofa, lâ duhawm ruang chu chungsiâr,
Zalenna khuahkhirhtu leilung êntu,
Beiseina nung tuhtu duhawm berah,
Mi tin hmuh turin thangvangah chhiah rawh. 

Zalenna nghaisak ni lo chhuah chângin,
Huaisenna kawng botu tân hruaitu nghet,
A hlutna teh phâk loh leh cho rual loh,
Hun thuhnuaia kun ngai lo ni tura’n!

Ţhenkhat pianpui ropuina chang an awm,
Ţhenkhat thawhrim vanga mi ropui pawh,
Ţhenkhat ropuina an bel luih an awm,
Nang zawng, ropui taka thihna hnehtu! 

Tuaitê, nang ang reng tu nge awm tawh ngai?
Kum tamnate chuan i lakah hnehna,
I kimtlâng mawinate uai chûl turin,
Thiltihtheihna reng an nei ngai lo ang!

Hunbi mila khawvel chin ţhan dan ang,
Lan dan hrang hranga an inchei thiamna,
Mit la reng tura pheichheh i vawr dan,
Chhuah ţhing theitu reng i tawng ngai hek lo’ng! 

Thihna lem thiam kawngah nang tluk tur reng,
A tuk ţhat ber ţumah meuh pawh Khuanu’n,
Tlak lei a hrual puitling leh lo’ng e,
I tenawm lai ber pawha hriak thïh tlak! 

Thihna thinlung sahal, chawlhna hmu lo,
Tukdawla thunun thei an awm ngai chuan,
Nang, hmei alaia lâ lehnghal tluk hi,
Piang leh hian khuavel a mawi ang em ni?

Nang chuan thihna chu pasalah neiin,
Lûngchim taka i kuangkuah tak hi le,
Hun lo taka nipui pangpâr duhawm,
Vur tlate’n chhilh bo hlen an tum ang chu.

Mahse, ka tuai duhawm, i mawi chuang e,
Thihnain mi tin min zûk zawhah pawh,
Nunrâwnna meuh thlana an vui liamah,
He hla hril hmangin i nung reng zawk ang!  

𝗧𝗵𝗲 𝗕𝗲𝗴𝗶𝗻𝗻𝗶𝗻𝗴 !

Ka timûr tinah rawn vak lutin,
Muangchangin ka thisen zâmte rawn beiin,
Ka thinlung kulhbang rinawm thisen var hnehin,
Ka thinlung chhûngrilah hnehna i chang ta si a,

Ka thinlung pindan,

Tu tân maha hmun ka pêk lohnaah,

Hmun nuam leh duhawm ber rawn neiin,

Lei ţhil leh vut mai ka thehnaah,

Hmangaihna pangpâr mawi ber,

Aw! nang hian i rawn tuh ţo ta si a!

Khawvela ka nihna sual ber chu,
Ka thinlungin nang hnar tur che a,
Chakna reng a neih lohna ngei chu a lo ni!

𝐊𝐡𝐮𝐚𝐯𝐚𝐧𝐠 𝐤𝐚𝐥 𝐥𝐚𝐢 !

 
Khuavang kal lai ang, ka thlakhlelh nun chu,
Thlanmual anga reh, ngaihtuahna chawlhna,
Thlaler ang, ţawng ri reng chhuah lohna ram,
Leilung hahchawlna zan thim reh riai ang.
 
Kâwl phe tluka rang ngaihtuahna vakvel,
Thluak hnathawh chawlh zai rêl thiam lo zâ ruai,
Mit khaw hmuh tin beidawnna inphaman,
Khawvel kalchhet nin vawrtawpna chu!
 
Nawmsakna awmzia; nun ruak mawng nei lo,
Chhûngril saruakna hnawh khah zawh rual loh,
Nun engmah lo mai a nih zir chhuahna,
Angkhat renga hringfa nuna bet chu.
 
Ngaihtuah a tam poh leh hah a rimtawng,
Hmangaihna pawh thinrimna nen lêng dun,
Thawhrimna pawh chauhna nena zâl dun,
Hausakna pawh duham zualna mai mai!
 
Vanthengreng ang maia ngawichawi nun chu,
Arsite’n thawm reng an chhuah lohna hun,
Ngaihtuahnain a kawng a zawh tawpna,
Muthilh hlen riai riaina ka duhthusam!
 
Hahchawlhna chatuan, tisa chawlh hlenna,
Piah lam ram kân tur reng awm tawh lohna,
Thil siam tinreng borâl hlenna nun chu,
Dam lai nuna ka thlakhlelh ber a ni.
 
Siam a nih chhan kawng zawh lotu nun zawng,
Luang thli chhem nghin chhem nghin ang lo niin,
Tuipui hnahthel ro hahchawhna hmu lo,
Aw ka nun thurûk, mi sawp chau zo ta!

POETRY - XI

Hmeichhia, nang ang reng tu nge awm tawh ngai?
Kum tamnate chuan a lakah hnehna,
A kimtlâng mawinate uai chul turin,
Thiltihtheihna reng an nei si lo a!

Hunbi mila khawvel chin ţhan dan ang,
Lan dan hrang hranga a inchei thiamna,
Mit la reng tura pheichheh a vawr dan,
Chhuah ţhing theitu reng a tawng ngai hek lo! 

Hmeichhe dangte chuan engkim an pêk chhuah,
Chhangkhamnain hnu a dawl zel ţhin a,
Ani erawh zawngin kawng tinrenga,
Min hrai tlai poh leh min tiţam zual ţhin!

Mipa lem thiam kawngah amah tluk tur,
A tuk ţhat ber ţumah meuh pawh Khuanu’n,
Tlak lei a la hrual puitling thei hek lo,
A tenawm lai ber pawha hriak thïh tlak! 

Mipa thinlung sahal, chawlhna hmu lo,
Tukdawla thunun thei an awm ngai chuan,
Nang, hmei alaia chhia lehnghal tluk hi,
He khawvelah tu an piang tawh ngai lo’ng!

BRIGHTEST OF THEM ALL

Thou art the best decision I hath ever made,
But along the way among the winds of change;
The mind forgot what the heart hath chosen,
Realization came upon mind of late;
Why doth thou art lay these trouble thoughts,
Upon that of already troubled mind?
What can man do against such reckless hate?
What grace hath giveth me,
Let it be pass unto thee and please be save;
For hope hath forsaken this trouble mind,
What thou art tell thyself doth will;
Tear thee down or push thou up,
And realized that more strength was needed;
To let go than to hold unto thee,
And mistake turns me of a more mature man;
Than i once was acclaimed to be,
Fair thee well most beloved Star;
For Stars are still bright upon the Sky,
But the brightest of them fell!

Happy Birthday to You ! (Champhai Lungdi)

Suangtuahna chu duhsakna hmanga siam,
Duhsakna chu a taka lantirna;
Hmelṭhatna dik tak chuan mit ni lovin,

Thinlung ril ber a khawih che si ṭhin a!

Ti êma ka thinlung khawih chetna chu,
Lirnghing hnathawh let thawka tháwk nâ chu;
Tuipui so bulh bulh aia nasa chu,
Hmangaihna thlifim lakah an nep lua!

Vanin duhsak taka mi enkawlna,
Leiin malsawm tinrenga mi vurna;
Khuanu'n duhawm taka mi enkawlna,
Duh tak, i tân chauh ka hlan zawh tak kha!

I lei kum chhiar chu ṭhatnaa pungin,
Angel rual i hnenah ka rawn tir e;
An ṭangah lungmuangte'n hahchawl langin,
Vante chuan i chhip hliahkhuh nuam rawh se!

Piancham chibai bûkna duhawm ber chu,
I tân ka rawn hlan, ka thinlung ngei chu!

          "Vawiin hi eng ni nge a nih i hre miah lo a ni maw ?" 

           Ka chuktawlha zawhna lo thleng zingah, he thu hian ka mit a la fal nalh mai. Zawhna mi zawttu hi eng lai pawha ka mit la êm êmtu a ni reng dawn si a!

           "Eng nge ni ta kha?" ka mawl ka lantir nasa ang tual tual a, ka piantirh ata ti em ema ka mawl ât ka la hre ngai lo!

           "Hre lo law law mai rawh" a rawn ti ta reng a, mahse a nui tih ka hai hauh lo!

           "I birthday a ni maw kha?"

POETRY - IV

Mangṭha, mangṭha, ka ropuinate u,
Chu chu hringmi dinhmun dik tak a ni;
Beiseina hnah duah chawr no takte chu,
Rei lote chhûng bak an duah ngai loh hi!

Nipui chu thlasikin a zui thuai a,
Vawt chuan a zung nen lam tiṭawih zovin;
An ropui vanglaina pâr ang a thliaha,
An zung nen lam a ei chhiat ṭhin ang hian!

Ka thinlung chu zai thler sak huau ang maiin,
Ropuina chuai thei leh bumna tinreng;
Duhsak dernate chuan an tai thler ṭhin,
Indona hmuna thihna thla zâr ang!

Chumi dawtah Lucifera anga,
Tlakchhiat hlenna lo thleng ta ang kha!

Ka suihlunglên leh Vau thla!

Suihlung mû ang a lêng, mi run ngei e,
Hmana lên lai ngai lo kan awm lo ve;
Kâr a hla, suihlung a lêng zual chuang e.

Hmêl di lo, sum leh rêl puan an hlan e,
Mi û khuandîm hnu nau ang lo ṭap maw?
Keia suihlunglêng riangvai min chan e.

Ṭhuvâ indî a au sang thinglerah,
Thu tin dî hril ka nuam suihlung dam nân;
A riang biahnêmin min chhawn maw ê.