𝑳𝒐𝒗𝒆 𝒐𝒇 𝒎𝒚 𝒍𝒊𝒇𝒆!

Thihna kut vawtin mi man niah chuan,

Sûnna mittui chhuahin mi ţah lul suh,

Thihna dâr ri vawt raih i ngaihthlâk chu,

Khawvel bawlhhlawh, rulhutte'n an chenchilh,

Rihsâng ka kaina râlkhel dâr ngei chu!

Duhtak, ka chhamhla tlar hi ngaithla rawh,

Ka kut chhuakte ni lovin nangmah zawk,

Ka hmangaihna che leh i lairila,

Ka hlimthla chambang duhawm aţanga,

Lûngchhiat vanga kei mi sûnna nun,

Thinlung taka i lo neih theih zawk nân!

Aw duhtak, he tlar i thlir hunah chuan,

Vut chu vut veka a chan mek hnuah;

Ka sakhming rial anga dai tur chu,

I leilia lam nawn lam nawn lovin;

I mi lo hmangaih tawh ţhinna zawk kha,

Romei iangin thamral lo zawk rawh se;

Khawvel chuan a tawnhriat mitin thlir che se,

Nuihsawhna ni lo ngaihsânna zawkin; 

An thinlung mit lo ti var mawlh rawh se.

𝐂𝐡𝐡𝖚𝐧𝐠𝐫𝐢𝐥 𝐓𝐡𝐢𝐡𝐧𝐚!

Hmuh theih pangtiah nâ reng an awm lo,

Pangpâr vul lai tluka sakruang duhawm,

Thla bial vanglai ang mize ngaihawm ber,

Thinlung leh thlarau lam chawlawl nun chu;

Ngaihtuah tin indona râpthlak ber ang,

Thawk lâk hnuhnung apiang a nâ zel a,

Hnehtu nun reng hmêlhriat phâk lohna chu!

Tiang leh lung chuan ruh tliahna thlen rawh i,

Thu erawh chuan hringnun a uai tliak thei;

 'Ka țha a sin' tih chuan ser nung thupin,

Thinlung chu huan thuhrûk a chang zo ta;

A hungna bang chu lawn liam rual loh tur,

Thihna ni si lova hringnuna nung thihna chu!

Dam lohna aia dam lohna dam lo;

Kehsawm azawnga thinlung keh chhe ber!

Mithmuhte'n chakna reng an thlen lo;

Thinlung ruak luah khat zo an awm hek lo,

Ngah nei nun inbuatsaih, nghah chhuah nei lo;

Thlek lam leh hawi lam reng reng mumal lo,

A tawpa mi tin hahchawlhna zawn chu-

Hahdam taka muthilh hlen riai riaina,

Harh leh tawh ngai lo tura mit chhinna;

Chu nun chu mihring thlakhlelh ber, hlauh ber!

𝐁𝐞𝐢𝐝𝐚𝐰𝐧𝐧𝐚 𝐊𝐡𝐚𝐰𝐯𝐞𝐥

Beidawnna pangawinzialte'n ka nun,

Kum tam tuihna rengin a chiah hnâwn loh,
Chhim thlipui hrâng iang an nuai chiam chiam a,
Ka chakna thahrui hloh tak ka ngai e!

Hmuh theih loh hmêlma, beidawnna favah,
Mi âh hlum tuma mi veh mi vehtu,
Ka chakna thahruiin min hlamchhiah lai,
Chakna reng nei lo ka nun rûntu!

Ka beidawnna tlâng chhip sâng takah chuan,
Khua chuanin tlâng râwt hniam theitu tur reng,
Ka hmu zo lo, ka vahvaihna khuavel,
Thim zing mupa a chan tak riai riai hi!

Beiseina mei dê a mit hlum zel a,
Phûrna chhe tê pawh nguainain a chhilh!
Êng ri riai hma lam panna kawng chhitu,
Ruah phingphisiau hlekah a mit zel e.

Muthilh hlenna piah lam ram ka thlir a,
Kal ta mi huaisente chauh tawn fiah chu,
Eng khawvel nge ni ang, hriat a ni lo,
Chatuan tawrhna nge hlimna famkim zawk?

Liam mai châkna mi petu beidawnna,
Mi azawnga mi fuih phûr thiam ber chu!
Kei, thlemsam kumkhua i zûnah ka uai,
Mangţha, tiin thu ka thlah ve mai dâwn e!

Mi chelh khawmuan tum ik ka tawng lo e,
Mi laiah nazawng ka ngai chuang hek lo!
Kiang mai rawh mi titu ka thisente'n,
Engti zai zia nge an tih hauh loh hi!

Ka tha a ţhum zo, ka buan tawh lo'ng e,
A hruihrual chuan mi zem ngheh tial tial hi,
Ţanlak chiam chhan tur reng nei ta lo i,
Lem zawng mi la lem pil púk ngei dâwn hi!

Mι rετhει κα να ηι τεhlυl ε̂m !

Ka vahvaihna khawvel ram zau takah,

Ka dinhmun hrethiam reng reng an awm lo,
Ka phurrit phurh ngaihtuah thiam a,
Ka nghawngkawl bah hreawmzia an hre hek lo!

Ka nun hriat fiahna thlifim  thaw tur reng,
A ni, ka harsatna min chhawktu tur,
Ka tawnhriat manganthlâk ber lak ata,
Ka nun hahchawlhtirtu reng an awm lo!

Leilung chhûlchhuak vanga ka natna chu,
Leilung vekin zahngai takin hring se aw,
Ka tawrhna lak ata mi chhanchhuakin,
Hahchawlhna phêrah mi muttir mahna!

Ka ngai êm che, ka Lal ka Chhandamtu,
Nang thlauha duh taka ka mi vawn chuan,

Thlan thima mi zalh duh tâwk zo lovin,

Aw, mi rethei ka va ni tehlul êm!

A ʟᴇ̂ɴɢ ᴠᴀᴡɴɢ ᴠᴀᴡɴɢ﹐ ɪ ᴛᴀᴡɴᴀʜ

Ka nu ţuan tul ka dawn e,
Zâm chiai romei iang zovin;
Pângla ka chan suihlung a lêng ngei.

Vawiin ka ram ţuan chu maw,
Zing ri riai kan Zotlângsangah;
Zawlkhaw pual ka ngai Lenmawii.

Tinkim dawna riang hlei hluanin,
Ţahzai ka sa sawntlung belin maw;
Bawngtê ianga tlâng chuan ka nuam ing.

Kan intiamna khua romei zâm,
Biahthu tin kan hrilna Zothlifim kâra’n;
Kumsul vei hian khua min tlai zo dawn e.

Lo haw rawh nui hiau mi chhawn la,
Vâl riang awmhar chhâm ang ka zâl hi;
Di ţhenna chung khua rei tawh a nâ lua.

𝐇𝐦𝐚𝐧𝐠𝐚𝐢𝐡𝐧𝐚 𝐥𝐞𝐡 𝐇𝐮𝐚𝐭𝐧𝐚 𝐊𝐚𝐫𝐜𝐡𝐞𝐡

Engtin zinkawng nuam ka zawh theih ang ni?
Hahchawlhna hlimawm, ka lakah inthupin,
Laikhumah mutmu reng ka tuah lohna,
Zing zan tam ka laka inluling chu.

Chhun leh zan inhmelma reng ţhinte chuan,
Thu khat vuain sa ui an tan dun a,
Hreawm taka min nghaisak dun tak hi,
Ţiauvut tluk ka lungngaihna rihzawng chu.

Nimahsela, inthiam lohna nei suh,
Rose pâr mawi tak chuan hling a nei a,
Tui hna fim tak paw'n chirhdiak a pai hi,
Ngêt pawhin pangpâr an ker ve cháwk ngai.

I fel lohnate'n chhiatna inpein,
Ka chung thu, rorelna hmaah pharhin,
Mahni leh mahni ka inngensak a,
Hmangaihna leh huatna, min kârchehtu.

Hmêlma duhawm ber chu do zo loin,
Darkar tin sawisakin ka awm nang e.

𝐇𝐋𝐀 𝐏𝐔𝐈

 

Mangţha, leilung malsawmna zawngte u,
Khawvel, a chin hriat lâwk phâk rual lohah,
Hringnun hlimna chu a tisa châk zawng,
A puitlinna kawng tinah lo niin,
Chungte chu thihna râl erawh chuanin,
Inawmtleina satliah lêkah chhuahin,
A thalfang laka fihlim an awm lo,
Mi hausa chuan rangkachakin hriselna,
Rinchhana nei turin a lei thei lo,
Natna enkawltu meuh pawh an boral,
Engkim, tawp hun nei tura siam niin,
Thihna hripui chuan mi tin min hrut hi!
Mawina chu pangpâr chuai leh ţhin ang mai,
Boruakah hlimna thli a fawn ral a,
Lalte pawh ţhalai takin an thi ţhin,
Vaivutin hringmi mit a chhin hlentir,
Thahrui chakna pawh thlanah vui liamin,
Thil lüngte’n mi chak an ker chhiat ţhin hi.
Finna chuan duhtâwk a neih lohna nen,
Thihna chhang hîng a tem a ţul si a,
Hremhmuna lû latu chuan ngenna thu,
Ngaihthlâkna tur bêng rêng a nei si lo.
Chuvang, i chunga thihna lo thleng tur,
Duhthawh taka kuangkuahin lo lawm rawh,
Van ram chu kan rochun tur zawng a ni,
He lei erawh pialral luhna kalkawng,
Mi tin tâna lemchan dawhsân hunna,
Fiahna meipui a pal tlangna a ni,
Rawhtuina mei kal tlanga ropuina,
Chatuan chawlhna a panna kawng hahthlâk! 

𝐌𝐢 𝐦𝐚𝐰𝐥 𝐬𝐚𝐥𝐭𝐚𝐧𝐠

A tân thu chuan awmzia reng nei lovin,
Thutiam pawh tin ther tlukin a hlu lo,
A kâm chhuak feikibar ang niin,
Thinlung hliamtu a nih a inhre lo.

Chhechhamna chu nawhchizuar tiamkam ang,
Thu thlunna pawh pângla anga nghet lo,
Phuar zawmtu thir hrui, lazai sín tak ang,
Mahni inkhawngaihnaa khat liam fo!

Hmar arsi anga nghet thinlung ngei chu,
Ek lûng ang maiin ka thinhrik zo va,
Ni anga danglam ngai lo ngaihtuahna,
Chu ngei chu ka chhiatna bul a ni ta!

Chakna chu kâwlah Ni anga liamin,
Thahrui pawh zan thimah a tlanchhia a,
Lûngchimna chuan lûngtenna a hringin,
Lûngngaihna chuan thimah a hnutchhiah ta!

𝐋𝐮𝐧𝐠𝐥𝐞𝐧 𝐳𝐚𝐢 𝐤𝐚 𝐬𝐚 𝐞.

Ngai r’u, tho leh fa zalêng rualte’n,
Suihlungrualin van hmangaih pâr kan tlan a,
Kei zawng, ka Lal duh lai kan ti e. 

Kan ngaih lai Isua a mawi ber mai,
Rethei naufa lûngngaia rum min hruai a,
Min phuar chiai e, hmangaih hrui ngeiin.

Saron pâr mawi Isua pâr tlanin,
Lâ leh val tin zai ri mawi a fawn vel e,
Isua pâr kan tlan e nui hiauvin.

Zion ram ngai zawng khua hmunah aw,
Lêngza ila inţhen thu reng sawi lovin,
Lungrualte’n dâr ang i lêng za ang.

Mahse kan lênna Leitlângpuia’n,
Mite’n an lûngkham ber e, hripui lêng hi,
Fak hla sak chawl r’u min lo ti e.

Ka ngai mang e, ka lal ram hlun tur,
Tah chuan fak hla mawi rem chawl hian ka ring lo,
Zai nêmin an fak ang Beramno.

Chhûng tin kaina rûnah kan tlei lo,
Saisen têta nuhnûn tui ngai ang hian maw,
Kan ngai vawng vawng che Lalnunnêmtê.

𝐌𝐈 𝐕𝐀𝐊𝐕𝐀𝐈 𝐊𝐇𝐀𝐖𝐍𝐆𝐀𝐈𝐇𝐓𝐇𝐋𝐀̂𝐊 !

 
Hun tam liamin pâr tam an ţil zo ta,
Lungngaihna ngulzem kâra'n bo zovin;
Hriat ngai loh ngena ka ţah vawng vawng a,
Hriat reng ţhinte ka hlauh ngawih ngawih ni le!
Ka kut thlâkna sulhnu vanga inchhir,
Kut thlâk loh suangtuaha ka châk si hi;
Tawnloh hmangaihna ngaia kûr diamin,
Ka tawn hmangaihna ka hlamchhiah si ţhin!
Engkim ka chanpual, eng neih nei si lo,
Damchhan leh thihchhan tlâk zawnga vakvai!

𝐅𝐀𝐊 𝐇𝐋𝐀

Ngai r’u tho leh fa zalêng rualte’n,
Suihlungrualin van hmangaih pâr kan tlan a,
Kei zawng ka Lal duh lai kan ti e.

Kan ngaih lai Isua a mawi ber mai,
Rethei naufa lûngngaia rum min hruai a,
Min phuar chiai e hmangaih hrui ngeiin.

Saron pâr mawi Isua pâr tlanin,
Lâ leh val tin zai ri mawi a fawn vel e,
Isua pâr kan tlan e nui hiauvin.

Zion ram ngai zawng khua hmunah aw,
Lêng za ila inţhen thu reng sawi lovin,
Lungrualte’n dâr ang lên ka nuam.

Mahse kan lênna Leitlângpuia’n,
Mite’n an lûngkham ber e hripui lêng hi,
Fak hla sak chawl r’u min lo ti e.

Ka ngai mang e, ka lal ram hlun tur,
Tah chuan fak hla mawi rem chawl hian ka ring lo,
Zai nêmin an fak ang Beramno.

Chhûng tin kaina rûnah kan tlei lo,
Sasentêta nuhnûn tui ngai ang hian maw,
Kan ngai vawng vawng che Lalnunnêmtê.