Hringchan

Hai ang thang la, zingtian kawl lo eng,
Zantiang si-ar ten tin zai an rel ta e;
Chhaktiang kawlrawn turni engmawi no nghial hian,
Siang lawina run in a rawn chhun ta.

Khawfing chat kawl eng hnuaiah laikhum ka zal,
Dawngral piah mualah au rawl a lo ri e;
"Hrai duh leng rual tho ru, hailawn chawiin,
Lei hringnun tawi te a ral hma hian."

Bawh-ar lo pau, laituala ngir lengrualten,
"Khar lai hawng ru, kan hun liam zel si;
Chatuan kawngkhar pana kal hringmi lengte,
Kir zai rel reng hian kan mawi si lo"

Kumsul vei hian lunglen a tho leh e,
Chhun nitin awm khawhara ka dawn khawl hian;
Thing tin chhawl hnah hlui uai ten an til zel a,
Lentu chal tawh hnu uai thar leh e.

Pi pu te vanglai leh an vul ni zawng te,
Mualpui an liam chatuan mual rawnah;
An sulihnu vulmawi ten a bawm chiai e,
Siktui thiang dam diai a luang cham del.

A ngurpui za tam zingphul an liam ta a,
An nun tinuam tihlimtu ningzu erawh;
Sirva zaithiam ten zaiah an chawi zel e,
Hmun hring cham del par vulmawi zawng nen.