Ram Hmasawnna atana Zirlaite

Lunglei Government College Students Union chuan Lunglei Gov’t College 32nd Annual Magazine a ziah tur thupui min rawn tuk a, hetia Megazine meuha thuziak tur a sawmna ka dawn vawikhatna a ni a, ka tan chuan hriat reng tlak a ni kumkhua tawh ang! Magazine chungchangah hian thalo ka tih em em pakhat chu mahni College Magazine Zirlai ten ngaihlut nachang kan hrelo leh lehkha chhiar kan peih ta mang tlatlo hi a ni. Magazine te hi pawnlam mite leh mipuite tana chhuah an ni bik lova, i tan pawh a ni ve tho tih hre thar turin zirlaite ka han ka fuih thar ve che u a ni. Lunglei-ah hian ziak mi kan nei tlem telh telh a, zirlai naupang ten hma in rawn lak loh phei chuan nakin lawkah Lunglei atang hian thu leh hla chhiar tur avang hle lovang tih sawi har tak a ni ta!

Zirlai kan nih avangin College-ah kan kal a, lehkha  kan zir thin. Mahse hei hi i tana pawimawh ber a ni lo, pawimawh ber zawk a chu Nangmah (Self) atanga Zirtirna (Education) i dawn hi a ni. Zirlai naupang chuan Zirtirna chi hnih a dawng ngei ngei thin. Pakhat zawk chu Zirtirtute hnen atanga a dawn a ni a. A  pahnihna leh a pawimawh zawk erawh chu mahni atanga chhuak Zirtirna i dawn hi a ni. Chu zirtirna i dawn chuan i hmalam nun kawng thui tak a sialsak dawn che a, hlawhtlinna i hmuh tur pawh i phutawk chiah chiah zel a pe dawn che a ni. Zirtirna-in nghawng chhuah tha leh ropui tak a neih chu ‘Midangte tan tlemte tal a tangkaina neih’  hi a ni. Zirna kan tih hi kan hman thiam phawt chuan kan engkima kan engkim a ni thei. Zirna kaltlangin Nun phung i zir chhuak thei a, Zirna hian nangmaha theihna awm rawn vulh lianin, thiltihtheihna neiah siam che a tum a, i remtihna a nghak mai chauh a ni zawk.

Zirlai duhawm tak tak te u, Zoram dinhmun dik tak in hre lovang tih ka va’n hlau em! He kan ram neih chhunah hian Eirukna, Pawngsualna, Tualthahna, Rukrukna, Inrawkna, Dan palzutna leh a der mai a Pathian biakna a thleng mek tih hre mawlh ang che u. Peon atanga Secretary Level thlengin a thei apiangin an eiru ni maiin kan hre tawh a, mi fel tak tak awm ve te pawh kan ring hlei thei tawhlo! Sawrkar hnalak a awm reng rengin rinhlelhawm taka thawktu lak a thleng reng a, MPSC meuh pawh kan ring hlei thei tawh lo!  An hlawhzat kan hriat chian em em te hausak theih zia kan hre vek a, an hlawh bak atang lo chuan heng an thil neih zozai hi neih ngaihna a awmlo tih lah kan hai hek lo! Chuti chung chuan an chungah Hremna emaw Dan lekkawhna emaw a thleng thei ngai si lo! Danglamna rawn thlen thei tu i ni a, i ngam em?

Tuna Zirlai kan neih mek te u, nakin lawka kan Hnam Pasaltha emaw kan Hnam Hmelma emaw in la rawn ni dawn a, in duhthlanna a zirin Zoram Khawvelah hian Danglamna, a hmasawn zawng emaw a hnungtawlh zawngin emaw in thlen thei tih in hriat ka duh hle bawk. Tunah ngei pawh hian Chona (Challenges) thar leh ropui tak, kan nun khawih che tute  kan hmachhawn mek a. Eirukna a hluar em em a, Pawngsual lah nise hriattur a awm reng bawk! Pathian thu sawi thiam tak tak leh thu tha tak tak sawi thin Pathian mi (an thusawi ang a awm lem chuanglo) inti an rawn inlar mek a, anmahni avang hian kan thlarau nun erawh chuan hma a sawn hauh si lo. Dikna kenkawh tum chuan hmelma a neihsa na khawvelah inrawn thang chho mek a, mi dawihzep tan hlawhtlinna a awm thei tawh lo. Mi huaisen pawn tuarna a dawng mawlh mawlh tawh mai a ni!

Zirlai duhtak te u, he khawvela Zirna run in belh hian Nun (Life) siam tur in a ni lawmni lehkha in zir?  Sum leh pai thawkchhuak ringawt tur ni lovin Chanvo (Destiny) nei tur a koh in ni tih in in hria em? Hlimna (Happiness) ringawt ni lovin midang tana tangkaina nei tura lehkha zir in ni tih in in hria em? He Zoram hian mihring sangkhat a neih belh leh ai chuan mi pakhat, thinlung taka midang tana a nun hlan phal an awm chuan kan ram tan chu chu a tha fe zawk. Education hi engkim min ruahman saktu a ni a, a tel lovin hmasawnna a awm thei ngai lo! Zirna Run kan belh laia kan nun kan rem fello anih chuan nakin lawkah Nun Beidawng kan awm teuh dawn a. Ruahmanna fel tak nei mi erawh hlawhtlinna hian a hran san ngai lo reng reng a, a thawhrim rah seng tirin hlawhtlinna a pe ngei ngei thin.

Ram siamthat duhna rilru pu Zirlai kan tamlo hle niin a lang a, enge a chhan ni ang aw ka ti fo thin. Ram tana thawh hi Thalai tan ni lovin kan nu leh pa te leh Upa te chanah a tam zawk hi chuan kan dah niin a lang a, keini telve na chi a kan ngaihlohna hi kan tihsual lian tak a ni thei. Kan thiamna te hi keimahni tan chauha hman tum kan pung tual tual niin a lang bawk. Tuna kan MLA te zingah pawh hian zirlai an nih lai atanga ram han vei thin an tam lovang tih a hriat reng mai. Kan MLA te zingah hian mi thiam tak tak kan nei ve ngei mai, an MLA puite ai chuan a lan pawh an langsar deuh nge nge niin a lang. Mahse an thiamna kaltlanga an hnungzuitu tur chherchhuah an thiamlo erawh hi chuan an thiamna zik hi a bul deuh tlat niin a lang in ti ve thin em? Indian Economic than vak nachhan pawh mi thiam Dr Manmohan Singh kan neih vang a ni. A hmalakna kan hmuh atang hian Ram siamthat nan hian mithiam kan mamawh zia pawh kan hriat phah ngei tawh ka ring.

Kan ram hruaitu leh mi ril pui pui te pawn Thalaite khawvel-ah kan cheng mek an ti chamchi a, thalaite tana kawng hawn erawh an la tum em em chuang lo. Ram siamthat nana Thalai te lo buatsaih a, kawng kawhhmuh nachang hria pawh kan awm chuang lo niin a lang leh zel bawk. Thalaite rilru a ram veina neihtir tur chuan Phurna (motivation) kan pe tur a ni a, kan zirtir tur a ni bawk. Ram veina chang an hriatlohna chhanah anmahni hi dem em em tur an ni pawhin a lang lo. Nitina an hmuh an Zirtirtute hian zirlai naupangte rilruah ram veina thinlung an dahsak a an than lentir a pawimawh hle a ni. India ram zau puiah hian keini Hnam tlemte awm hi engtin nge hmasawn zawnga kan kal theih ang tih ngaihtuah tluk tluk a hun tawh tehlul nen ngaihtha tak hian  kan la awm mai mai chu a ni si.

Eton College, England chhuak mi 10 chuang te chu British Prime Minister an ni a, an PM naupang ber David Cameron pawh hi he College chhulchhuak tho hi a ni. Zirna kawngah lehkhathiam tak tak an awm biklo, an public result pawh a tha em em ngai chuanglo. Mahse an zirlai naupangte reng reng chu Hruaitu (Administrator) tha tak ni turin an enkawl puitling thin a, chu chu he College hmingthanna chhan ber pawh a ni. Waterloo Indona a Napoleon-a hnehtu Duke of Wellington-a pawh khan hnehna a chan theihna chhan chu Eton College a a lo kal tawh vang a ti tawp mai a ni. Eton College ang hi kan neih leh neihloh chu nangmah ngei khan i hria a ni lawm ni kha? 

Zirlai i nih laia ram hmasawnna tur atana i tangkaina leh i zir zawh tawh hnu a ram tana i tangkaina tur thliar hrang ta ila a tha awm e. Zirlai i nih tlat avangin i lehkhazir aia pawimawh i nunah an awm tur a ni lo! Daihzai taka inhman erawh i thiam tur a ni a, Hunbi (periodic) neia nung turin tan ila tur a ni. Zirlai i nih lai a Ram Hmasawn nana tha i thawh ve theih tur hi a tam vak theilo. Chuvang chuan tha tak leh thiam taka i zirlai i zawh theih chuan nakinah i thiamna leh finna i neihte chu ram leh hnam tan a lo tangkai tawh ang a, chutih hunah chuan ramchhiat thatah mawh i phur ve tawh dawn a lo ni ang.

Lehkha i zir zawh hnu chuan Sorkar hna i thawk thei a, mimal sumdawnna i khawih thei bawk. Ram roreltu MLA pawh i ni thei a, NGO ang pawn i in hmang thei bawk. Heng zawng zawngah hian Ram tana Rawngbawlna a awm vek a, a taka chantir theitu chu nangmah ngei kha i ni bawk. Economist ropui tak niin Zoram hi Economically in i thantir thei a. Politicallly pawn ram hmasawnna i thlen thei. Administrator ropui tak pawh i ni thei a, Gov’t Servant thawhhlawk tak pawh i ni thei bawk. Eng pawh thawk la, rinawmna leh ram leh hnam hmangaihna leh mahni mihringpuite tanpui chakna i neih tlat chuan Ram Hmasawnnan hian tangkaina i nei lo thei lovang.

A tawp berah chuan ti hian thurawn ka han pe leh teh ang che. Ram hmasawnna kawnga hmala tur chuan rilru siam fel hmasak a ngai a. Ram siamthat duhna rilru leh ngaihtuahna seng peihlo leh duhlo tan chuan heng kan thu inhrilh hian awmzia a neilo! Zirlai mahni hmasial tak tan Ram siamthat ngaihna a awmlo. Chan ngam a ngai a, midangte tana nun hlan phala ngai a, mahni Mizopuite hmakhua ngai tak chunga rilru i siamfel anih loh chuan i lakah beiseina engmah he Zoram hian a nei lo! Chuvang chuantun atang ngei hian i rilru siam fel la, nakin lawka hma i lak dan tur pawh duangfel la, ruahmanna fel tak nen i nun kha hmang la, he Zoram tan hian kawl a eng ngei ang.