Tlakawrh Lehkhabu ka hmuhdan

Lehkhabu release na-ah hian sawm ka nih ve ngai lemloh avangin ka la kal ngai miahlo! Mahse rinloh tak maiin kan thianpa Zofa H Chhangte (Maneiha) chuan Tlakawrh (Counselling Kaihhruaina) 9th Oct, 2012 khan a release a, kal ve tura min sawm miau avangin ka va tel ve ta a, vannei ka inti ta riau mai a ni. Tin, Lunglei hmun ngeia Lehkhabu chhuah ngam an awm hi a lawmawm lehzual a. Chubakah he function-ah hian zaithiam emaw political figure emaw an tel miahlo kha ka lawmna tizual leh zeltu pakhat a ni bawk.

Tlakawrh (Sava hming) lehkhabu ang hi lehkhabu dang, Mizotawnga ziak la awm ngai miahlo niin an sawi a, hei hian he lehkhabu hlutna hi a belhchhah kan tilo thei lovang. He lehkhabu hi phek 127 a chhah a ni a, cheng 70 man chauh a ni. Lehkhabu kawmah hian mipa pahnih leh hmeichhe pakhat lemziak, damdawi ti thin niawm tak te, coat ha ;eh neck-tie awrh si pencil drawing (?) a ziak a lang a, Thing Khawro tak leh Notice Board 7 a awm bawk a, a ziaktu rilru hi hriatthiampui a har phian mai. Ruihlo ti leh neck tie awrh pha chin niawm tak a thianga an awmdun dan atang hian Counselling hi mi lian leh te tan, huanpzo tihna a ni mai thei.

A chhung thute hi hmun 3-ah thendarh an ni a, Then-1 na-ah hian Counselling chungchang sawifiahna leh nihphung chi hrang hrang Thupui nei Bung-10 lai an awm a. Then-2 na-ah hian Thutawi 5 an awm leh a. Then-3 na-ah Hla Chham chi 5 an awm bawk. Thu leh hla mai nilo, thawnthu (lehlin) leh hla chham chi thleng thlenga a a lo inhnamhnawih hian a ziaktupa ka lo la hriatchian lohzia min hmuhchian tir a, eng ang chiahin nge kan la hmelhriat chhoh zel dawn tih chu hunin a la rawn hril mai turah ngai ang.

Lehkhabu chhiar nuam ka tih reng reng chu a Lay-out hmuh nuam, mam tha leh paragraph then hrang inzat chho thin hi a ni pakhat a, chu chu he lehkhabu-ah hian felfai takin kan hmu a, nula inchei fai tak ang maia ngainatawmah a chhuah ti ila kan tisual tampui hauh lovang! Tin, Vanneihtluanga ten an uar em em, thupui neihtir hun leh hmandan a hre riau mai a, chung a thupui atang te chuan a pengkual duah lova, a hun takah a titawp thiam riau bawk. Chubakah Counselling lamah hian kan la pachhiat deuh avangin Saptawng thumal hman ngai a tam riau mai a, mahse chungte chu nalh tak maiin Mizo Tawngin a letling mam tha hle hlawm a, Sap tawng hi a thiam riau a, Zotawng hi a thiam lehzual niin a lang.

He lahkhabu ziaktupa hian a subject a hre hnehsawh hle mai a, a zira zir chhuak anih piahlamah hian atakin Counselling hi a practise thin in, a ti thinte zingah pawh a mikhuallo hle niin a lang tlat mai. Counselling Theory chi hrang hrang a han sawite hi a taka nunpui tawh niawm fahran hian a sawifiah thiam riau pek a, chuvang chuan hriatthiam har em em a awm mang miahlo bawk. Mi naran leh lehkha pawh thiam lemlo, Counselling class la thin tan pawh hriatfiah a har dawn loh rualin mithiam tan pawh hnualsuat chi niin a lang lo bawk.

A ziaktu hian a sawi chipchiar bawk a, ngun taka he lehkhabu chhiar zo i nih ngat chuan Counsellor tha tak i nih phah loh pawn Counselling awmzia dik tak, a tihdan tur, a pheldarh dan tur, a sehhmeh tur, a ei tur sa leh a paih ngai lai hrim hrim chu i hre ngei ngei dawn a, chu chu i tana hlawkna ropui tak a ni ngei bawk ang. Counselling neihdan tur te, awmdan tur te, chetdan tur te, tawngkam hman tur te, boruak siam danglam dan te, rilru puthmang tur te, tihtur leh tihloh tur te thlengin chiang takin tarlan a ni a, mi naran mai mai pawh ni la, Counsellor tha takah i chhuak ngei ngei ang, i duh phawt chuan.

A bik takin ruihhlo ngaite zinga thawkte tan he lehkhabu hi a tangkai lehzual mai awm mang e. A dik a dik chuan heng hmuna thawkte hi training nei hranpa em em lova thawk ve tawp mai, a thente phei chu patient atanga Counsellor-a kaichho an awm nawk thin a. A hranpaa training an nei ve thin anih pawn he lehkhabu ang em em a chipchiar hi chuan training an neih ka ring lemlo, chuvang chuan heng anga thawkte tan phei chuan he lehkhabu hi chu lei ngei ngei tur niin ka hria, a tul khawp mai.

He lehkhabu-ah hian Counselling hrang hrang a rawn sawi chipchiar hle mai a, mi tam tak chuan a awm tih pawh kan hriatlohte an ni nual mai. Christian Counselling, STI/STD Counselling, Blood Bank Counselling, ART Counselling, Community Care Center Counselling, Health  leh Marriage Counselling, Abuse/Violence Counselling, Suicide Counselling, Abortion Counselling, Adoption Counselling leh Career Counselling thlengin a hawl kim hle mai a, hei hian mi chhiarzau tak leh thil chikmi tak anihna a rawn tarlang nawn leh chiang hle mai a, a awm mai mai lo tawp tih a lang reng mai. 

He lehkhabu ziaktu hi mi huaisen ve tak chu a ni phawt mai. Mi tam takin an hlauh ruk leh an chenpuite hnen baka an sawirik ngamloh Kohhran kalphung diklo lai nia a hriat a rawn sawilang hmiah hmiah mai hi ka duhlai tak pakhat a ni tlat mai. Kohhran lama kan hruaitute pawhin he lehkhabu hi chhiar ve sela a va tha dawn em! Mitinin Counselling kan mamawh vek, mahse Counsellor tha erawh kan vai hle thung. Chuvang tak reng a ni kan piantharna pawh hi kan bosal zung zung thin reng ni. Kohhran pawn nasa zawka tan a lak a ngai a, Counsellor tha ni tura Kohhran mi a buatsaih thiam pawh a pawimawh hle mai. Then khatna chu.

Tunah chuan Then Hnihna lo chuangkai tawh ang. Ka thiana hi a thuziak ka la chhiar miahlo mai a, mahse hei a thutawi ziah han chhiar hian thu leh hla lamah mikhual chet-in a che leh mang tlat pek lo! A thutawi rawn tarlante hi tak tha ngel ngawl tak an ni. Nautihtlak chungchang a han letling hi hre hmasa lo ila chuan a ma irawm chhuak a maw i ti ngei ngei ang. A zawhna siam pawh hi a chhangtu tur dik takte hian an chhang ngam ang emaw chu? Anih loh leh kohhran leh mipui aware nachang kan hriatphah ang em?

A thawnthu tawi pahnihna hi a phuahchawp nge a tak tih hriat a har leh nek mai. Tunlai hmeichhe dinhmun, a bik takin tleirawl sikul kallai nun a rawn phawrhchhuak nalh leh hle mai a. Hmangaihna lamah pawh hian a zei zek lovang tih sawi har tak a ni. Ni, tleirawlte awmdan hi hriatthiam a har takzet zet a ni. Rin phak bak hian an khawsa ta fo mai hi a mak a, chumai bakah an nu leh paten a heti tak maia an han thlah zalen leh an ngaihzamsan mai hi a mak ka lo ti ve em em thin a ni. Nu leh pa tan chuan he lehkhabu hi chhiar ngei chi a ni.

A dawt leh ah hian Mizoram dinhmun rapthlakzia a rawn tarlang leh a. Thalai, a bikin hmeichhia ten hei hi chhiar ngei se a va tha dawn em! Sex-ah kan tlan nasa tih chu kan hre vek, mahse nau tihtlak tam ta lutuk mai leh AIDS natna darh chak ta lutuk mai hi Kristian rama thleng chi a ni ngai dawn em ni? Kan ram hi a dam mawlhlo a ni ber mai, khawilai mai pawh hi pan vei ang vek ni ta mai hian ka hre thin. Nu leh paten an eiru a, fanu fapa ten kan lo chenral a, sualbawihah kan tang ta dul dul ni berin a lang.

A dawt leha mi Salvation Camping nge kan mamawh Counselling tih hi inhnialna tichhuak thei tak a ni. Salvation Camping lo hian kan piangthar thiam tawh tlat lo mai a, kohhran pawn a thlakna tha zawk tun thlengin a la hrelo chu a ni bawk si. Mahse rei daihlo, lu tihai em em tu anih tlat avangin Counselling neih a rawt ang hian kal ta ila enge kan an ang tih hriat a chakawm khawp mai. Camping neihdan tur thurawn pe ngam khawpin a huaisen a, a rilru-ah a vei lian hle tih a lang. Tin, kan pianthar dan nia a sawi hi thudik tak niin a lang, piangthar der kan tam hle dawn a lo nih hi tihtur a ni.

Retheihna chungchang a ziah hi a tha leh pek hle mai. Harsatna leh manganna thlentu anihna a phochhuak thiam riau mai a, retheihna avanga miten an tihduhloh an tihfo thin nachhan pawh a sawifiah tha khawp mai. Chuti taka buaina thlentu chu hnualsuata, umbo daih a duhna hian a mihringpuite laka a rilru puthmang dik tak a tarlang chiang hlein ka hre bawk a, a thil thlir dan ang hian thlir thiam ta theuh ila retheihna hi kan umbo thei mai ang em? 

Then thumna hi chu ka tuina leh ka ngaihven loh lampang tak a ni. Sawi tur pawh ka nei em em lo, mahse hetiang ang hlachham chi phuahchhuak ve tur hi chuan theihna ka neilo tih ka inhre chiang em em a, chu chuan ka thiana hi mi special tak a ni tih a tarlang nawn leh a ni ber mai. Thuziak mite reng reng hi mi dawihzep an awm ka hre ngai manglo, mahse han at-huai ta vak erawh an awm chuang bawk lo. Lehkhabu chhuah ngam chin erawh risk la ngam, mi huaisen dik tak an ni, chutiang mi thian a ka nei leh Lunglei thalai zingah an awm hi a lawmawm hle ani.

Lunglei ziakmi i nih chuan chan pawh huamin Lunglei-ah ngei Lehkhabu Release thin la, zai mi inih chuan Lunglei-ah ngei hian Release Function huaihawt ngam ang che. Aizawl lama va release awt awt ho hi Lunglei mipuite pawh hian hriatthiamna chin kan neih a hun tawh khawp mai. Tin, MLA ni lo, a taka i thu leh hla tuipuitu che tlangzarhna-ah sawm ngam la, mi vantlang tena an chan ve theihna turin i theihtawp chhuah thin bawk ang che. Risk la ngamlo tan hlawhtlinna mualah ke pen ve theih a ni ngai lo. 

A tawp berah chuan, he lehkhabu tlawm tak anga lang, mahse a ruka hlu em em si, chhiar phawt loha hriatthiam theih ni si lo leh a hlutna hmuhchhuah theih si loh hi lei la, chhiar la, nunpui la, midang tan malsawmna thlentu ni ang che.