Hmanni lawkah zirlai naupang zingah hun kan hmang a, chuta ka thil hmuhchhuah chu Zirlaite hian Politics-ah hian inrawlh tumna em em emaw han tel tumna an lo nei em em lemlo tih hi a ni. Chubakah Mizoram sum leh pai dinhmun te, sorkar hmalak dan te, budget awmzia te leh heng lam kaihhnawih reng rengah te hian hriat a lawi an lo nei reng reng lo mai tih ka hmuchhuak bawk. College level-ah pawh heti deuh tho hi a lo la ni leh zel a! Chuvang chuan Zoram hian tuna kan zirlaite atang hi chuan ram siamthatna kawnga ke pen tur thalai han beisei tur em em kan neilo niin ka hria.
An zavai tih theih deuh thaw tena an beisei ber leh an lehkhazir chhan ni ber a lang a chu an zirlai zir zawh thuai thuai a, a rang thei ang bera hnathawh tur zawn bak an rilru-ah hian a awm lemlo niin a lang a, chumi anih avanga han dem viau tur erawh chu an ni lo. Chuvang chuan kan tun dinhmunah chuan Party Thalai te chungah kan mit a fu lo thei ta lova ni. Zoram nghahfak thalai kan neihte hi tuna Party Thalai rual hi an nih si chuan kan ram tan hian kawl a eng mawh khawp dawn niin a lang ta. Tin, Party Thalai Movement han en hi chuan Politician ropui leh rintlak, ram tana chhenfakawm tur Mizoram tan hian an vang duh hle dawn niin a lang bawk.
Ngun taka thil chikmi leh ngaihtuah mite tan chuan hai rual a ni lo. Thalai rual hmalakna zawng zawng hian ram hmasawnna lam a hawilo reng reng! Mahni a ngaihtuahna seng a, ruahmanna buatsaih a, kan ram tana tangkai tur leh ram siamthatna tur atana tangkai hmalakna tur duang chhuak a, chumi anga hmalatu tur hi tun thleng hian hmuhtur an la awm eihlo reng reng! Thalaite hnathawh ber chu party dang sawisel a, a tul hun apianga an pute thlavang hauh kha ni maiin a lang. An pute hi an dik emaw diklo emaw lam an ngaihtuah ngai lova, an pute theuh hi an tan em em a, an tanchhana kha a ram tana tha nge thalo tih reng an ngaihtuah ngailo!
Heng thalai rualte hian an Party hruaitute hi an Pathian biak em ni aw tih tur khawpin an hlau a, an zah ni pawn a lang heklo! An thiltih diklo thup mawina hmanrua a an tan hrehloh dan atang ringawt pawh hian kan ram nghahfak atan an tlak lo hrim hrim niin a lang. An pute khalh ngil tumna emaw tha zawk a hmalakdan emaw an diklohna-ah chutiang zawk chuan tia thurawn pe pawh an awm ngailo niin a lang, hriattur a vang em mai! An pute thiltih that loh sawichhuaktu lo sawisel a, an pute lo fakmawi chiam a, an diklohna a lo tan chiam mai chauh hi an thiam emaw tihtur Party thalai pawl kan nei thup mai hi a vanduaithlak hle dawn niin a lang a, tiang kan nih reng chuan kan hmabak hi a englo tial tial zel dawn tih a chiang reng mai.
Anih leh tun dinhmun a an awm chhan ni thalaite vang chauh em ni kan tih chuan nilo ti a chhan tur a ni si ang. Tunhma atanga Party hruaitu tena an thalai pawl an hman duhdan kha tun thlengin a la pangngai reng. Pressure Group ang deuhthaw a hman mai theih angin an chhuah a. Party dangte nena thu leh tisa-a inbeihna reng rengah an hmachhuan berte chu heng kan party thalai rualte hi an lo ni tawh thin anih kha! Politician dik leh a ngaihna hria, nakin lawka chhanfakawm tur ang chi reng reng Party hruaitute hian an thalaite-ah hnutchhiah emaw kawhhmuh emaw an awm ngai lo niin a lang bawk!
Mite ngaihsan zawnga hmalak hi thil har a ni lo reng reng, huaisen a ngai tih mai a ni zawk! Hengte pawh hi kan thalaite hian an hrelo nge an ti ngamlo zawk? Anmahni khaptu an lo awm reng nge khaptu awmlo mahse hmalak an peihlo zawk? Rulling thalai i nih chuan in MLA te an diklohna-ah vawikhat tal i sawiselin i finchhuah tawh em? Opposition thalai inih avang khan Rulling MLA te dik lohna leh in party-in rulling an beihdan tur ruahmanna dik leh fel i siam tawh em? Tun thleng hi chuan hetiang ang a hmalakna nei thei hi a la awmlo niin a lang.
Rulling kan nih ang bawk hian Opposition kan nih hian hnathawh tur a tam em em tih kan hrelo em ni? Sorkar hmalakna zawng zawng venpui kha Opposition hna tur anih laiin hetianga hmala ngam leh peih an awm si lo! Pawl emaw mimal ang ten thil diklo an haichhuah kan hriat reng pawh hian kan thawkchhuak peihlo chu anih ber tawh hi a! A theih hram chuan Contract tlem thawh a, pawisa lakluh kha an tum ni vek hian a lang thei hial zawk a ni. Rulling Thalai nih kan thiam lova, Opposition Thalai nih lah kan thiam bawk hek lo!
Nakin lawka Mizoram min hruaitu turte dinhmun chu tiang hi a lo ni ta a. Mipuite hian enge beisei tur kan neih tak ang le? Mi tha te leh fel te ei hlumtu Party atchhilhna boruak te, ram siamthat tumtu pawh arpanchuktuilo ang maia chhuah duh rual Party Thalai kan neihte-ah hian miputen rinna kan nghat ngam lo reng reng tih a chiang e. Political College awmlo mahse Thalai Pawl atang hian Politics hi a zir theih a, zirna kan neih chhun pawh a ni mai thei. Mahse tha taka inzir chhuak leh ram tana mi tangkai tur leh Zoram Politics hmel thlak danglam dawrh thei tun thleng hi chuan an la awmlo niin a la lang rih tlat mai!
A thim a var pawh thlulo, dawt sawi hreh hauhlo, ngaihdan siam mumal theilo, ti rawh tiha ngaihtuah chiang hauh lova ti mai thin te kan in ngaihtuah chian a ngai hle mai. Anihna ang taka thil awmdan hmu reng, chuti chung pawha anihna anga pawm duh hauhlo Party Thalai rual te kutah Zoram Mipuite hian he kan Zoram hi kan hlan duh ang maw, a teuh lo mai! Dikna ngaisang a, rinawmna nena hmalatu leh Pathian tih chunga Politics khel thalai khawiah nge in awm zawh tak? Tin, kan Thalai hruaitute zingah hian Pressure Group awmzia hre miahlo zu han awm thei a! Kan hruaitute ngaihdan hi a sanglo hle mai a lo ni.
Politician senior tena an thalaite hnutchhiah an tum hi tun ang anih reng hi chuan beisei leh chuan tur a awm thei chuang dawn em ni? Thalai chher puitlin kawngah hian ti reng hian em ni hmasawn lova ke in pen reng dawn? Rorelna dik leh fel a awm theih nana nakin lawka kan ram hruaitu tur kalkawng chu heti zawng hi maw lo ni dawn? Politics zirna runpui ber Party chhungkua hi tunge Zirnain Ropuiah chhuahthei dawn che u tih hi Mizoram mipui, a bikin thalai tena kan zawhna che u a ni e.
No comments:
Post a Comment