Mafaa - Zofate arsi êng a chuai ta maw?

A hmel chu chîk takin han thlir teh khai. Pa hmelţha leh zahawm zawng a ni mawlh lo. Mahse, a hmel phena mi inphahhniam tak mai chuan mitdel a ko haw a, mi anglo thlengin amah ngainatna an neih phah a nih si hi! A incheina man tlawm tak, fashion khawvelah phei chuan a pian thiam loh vang ngawt pawha chhim tura an sawm ngai loh tur hmel a pu nang a. Mi ropui leh lian ber berte hmaah thu a han sawi meuh chuan, khawvela ţawngkam mawi leh nalh ber ber, ţawng inlawn ţha lutuk maia a titi vawr thiamna chuan a hmaa ding mi liante meuh pawh vau dai thei tlat lawi si, thu leh hlaa a hausakna ren rual loh hmachhawn ngam an vânzia aţang pawhin mi pakhat nih tling mihring a nihzia thup a rem mawlh lo va ni!

‘What needs my Shakespeare for his honour’d Bones,

The labour of an age in piled Stones,

Or that his hallow’d reliques should be hid,

Under a Star-ypointing Pyramids?

tiin kum 1616-a boral ta William Shakespeare-a thlavang hauhna kan hmu a. A thih hnu kum 16 a liam tikah, kum 1632 khan John Milton-a chuan a hla hril kaltlangin W. Shakespeare-a nihna a rawn chhui ta a. Zawhna chu amah vekin tihian a chhang zui ta zel a, a ropuiin a va han chawi sâng thiam tehlul êm!

Dear son of memory, great heir of Fame,

What need’st thou such weak witness of thy name?

Thou in our wonder and astonishment,

Hast built thy self a live-long Monument.

Hei aia ropui hian Mafaa hi chawimawi, chawisan ngaihna a awm chuang bik lo! Zofate thu leh hla khawvela a hming dai tawh ngai lo tur, thu leh hla tuipui hleuh pha chiah lova vaukama ni lum ai chin pawhin an hmelhriat ber Pu Mafaa chu hun lo tak maiah kan ţhen a lo ngai ta mai hi Zoramin lungchhiatthlak a ti a. Chhim a hnim a, hmar a ngui zo a. Chhak a lungphang a, thlang pawh a ţap rawih rawih bawk. Chubakah Zofate leilung rah phak chin tawh phawtte chu an ngui zo ta a nih hi.

A fawmkhawm kim teh e – Literature huang chin rin fel hi thil har tak a nih lai leh khawi hi nge a ramri chin kham tur tih kawngah khawvel hi a lungrual lo nuaih a. Mafaa danglamna em em chu thu leh hla huang hrang hrang; thawnthu tawi (short story writer), hla hril (poet), fakseltu (critic), fuihtu (motivator), deusawhtu (satirist) chawimawitu (acclaimed writer), hlimhlawp (humorist) ţhehtu nih kawnga rualkhûm mi hrâng, rual û zawkte leh ţhangtharte’n an ngaihzawn kawp tlat mihring hi tunge chhing zo thei ta reng ang ni?

A kam chhuak ţhenkhatte chu siktui luang ri her her ang maia nun chiah hnâwng thei an nih laiin a inhrosa thawm erawh sapui râwl ang maia nelawm loh an ni si ang. Favang tlai nêma thlifim thaw heuh heuh ang maiin a kut chhuak ţhenkhatte chuan zûn an nei bawk ţhin. Fur ruahtui baw hawk hawk ang maia rik buan buan changte pawh a nei fo bawk. A hranpa takin tuma’n nihna pe lo mah se, riangvai takin thu leh hla humhalhtu pasalţha nihna inpe chawpin a ţul hunah chuan tumah dim lo ngam khawpin dikna ţan tur a nih tawh phawt chuan mahni chauh pawha sa pel ngam, mi rothap zet a ni bawk.

Kohhran hmangaihtu – Mafaa hi mi tam tak chuan Zu in mi nia an hriat avang hian ni maw, Pathian thuah hian an dah hniam ţhin hle a. Mahse, Miss & Mister, Idol & Icon a tel tam zawkin an lehkhabu ngainat ber Bible tia an chhan liam ngawt ai chuan Mafaa hian Pathian thu hi a lo chîkin a lo zir peih mai piahah a lo chhiar nasa ngang mai tih a kutchhuak aţang hian a lang chiang a nih hi. A nun sual a hriat reng lai pawhin Pathianin amah a hmangaihzia, a tâna a fapa mal neihchhun a rawn pêk ropuizia hi sawi nuam a tih lai ber ni maite hian ka hre ţhin.

Kohhran hi a khak hreh hauh lo, chumi avang ngawta kohhran dodaltu ang thaw thanga amah lo chhuah duh an  awm reng lai pawhin kohhran faksel hi a tim phah chuang ngai lo a nih kha. Kohhran hi kan ţawng tidaltu leh ţawng dik lo hmuchhuaktu a nihzia hi a veiin a sawi pawh a sawi zing hle ţhin. Mihring zingah kan mi ngaih pawimawh leh hmangaihte bak, an ţhatna tura va zilh an awm ngai reng em ni? ‘Kohhrana kan Mizo ţawng hmannain a hnam puma kan ţawng a kaihhruai a, a kaihher nasat theihzia han ngaihtuah hian kohhrana kan Mizo ţawng dik hman a ţulzia chu a lang chiang hle’ tiin ţawng leh sakhuana kalkawp pawimawhzia hre zinga mi tlem tê, au chhuahpui ngam khawpin kohhranah hian a inti neitu reng ţhin a ni zawk.

Mi zawng zawng a hria emaw ni le? - A takin Mafaa hi kawm ve hman lovin a kam chhuakte pawh ka beng hian vawikhatmah la hre ve si se lo mah se, a kut chhuak tam zawk kan lo chhiarin kan lo zir ve tawh  ţhin a. Mak hi ka tithei êm êm ringawt mai a ni! Zoram khawvela mi langsar tawh phawtte chu a hre satliah ni mai lo hian an ţhian ţha ber niawm tak hian anmahni thlahna thu a ziak thei ziah hi Mafaa ropuina leh tluk rual loh a nihna niin ka hre ţhin. Pastor hmingthang a han boral a, thlahna thu a han ziak chhiar zawh meuh chuan chhûng leh khat ang maia hnaivaiin a chhuah thei zel a.

Chutah, Zofate zinga bawl hlawh ber ber, fiamthu thiam a han boral ve leh a. Thlahna thu a han ziak chhiar zawh meuh chuan nitina inkawm ţhin, ţhian ţha ber ang maiin a chhuah thei zel a! Ani ang reng renga mi versatile hi an la awm ngai pawhin ka hre lo! Vanglaini kaltlangin Aizawl pa tu emaw han boral se, anmahni thlahna thu a ziak zawng zawng han keu let chang hian Mafaa hian mi hniam bera kan ngaihte leh mi ropui bera kan hriatte pawh angkhat vekin a lo hmelhriatin a lo ngaina thei zel hi tu han tluk rual loh a mize duhawm ber a ni ti pawh ni ila, kan sawi sual kher lovang!

Ram leh hnam veitu dik tak a ni – ‘Hmuh theihna mit nei reng chung si a, kan chhehvela nunrawnna, retheihna leh rawva-na hmu duh reng reng lote kan awm a. Tunah ve lem, ţanpuina dawng thei chu thiltithei chhinchhiahnaah kan ngai thawthang tawh a. Mi hrisel pangngai, pianţo ţha tak, hnathawk thei, sawrkar ţanpuina ringawt nghak leh a thlawna dawn theihna thil beisei huam huamtute ka mitthla kal zut zut a! Ri leh thawm hriat theihna beng pahnih nei reng chung si a, tisa leh rilru natna tuarte au thawm leh rum ri bengkhawn duh reng reng lote kan awm a. Mi ţhenkhat chunga hleihneihna te, inthleithlakna te, rorel dik lote sawi chhuak duh lo va ngawih bopui mai mai kan awm’ tih a ziak aţang ringawt pawh hian a thu ziak dang chhiar miah lo mah ila, ram leh hnam dik taka veina thinlung nei a nihzia hai rual a awm lo!

Lehkha hi a va chhiar nasa awm êm – Hei hi a ni, Mafaa nuna entawn tur pakhat ka tih chu ni. Hmangaihna, vahvaihna, lunglênna, ţahna, hlimna, tawrhna, nun hlimawm leh fiamthu etc lam hawi ziaktu zawng zawngte hi a mimalte têin a va hre ta vek emaw tih mai turin a sap a vai thu ziaktu ropui ber berte kut chhuak hi a chhiar vek tawh bik a nih hi tih mai tur zuk nia! A thu ziak remchanna lai tak nena inrem thlapin chung mite thu ziak a han phawrh fuh nalh nalh thei zel mai hi tluk rual loh val a nihna chu a ni. Chu lai chu engtin nge ni kha tiin zawhna han zawt ta ila, chhan theih loh a nei lo anga, tih tur khawpin a hriatna a tuihnângin a nun a tam ber chiang a ni. A knowledge zau tak avangin mi tê ber aţanga mi lian ber thlenga kawm thei vek mihring, nun  tam pai niin amah ang hi kan va vâng êm!

History of literature hi a bye-heart emaw tih mai tur khawpin a belbul a. Greek aţanga Post Modern Literature thleng hian hriat loh a nei mang bar lo tih tur khawpin a hriatna a zau a. Tin, thil reng reng a chhinchhiah thei tlat zel leh, a ţul hun apianga chung a thil chhinchhiah a han phawrh mai theite kha amah ka ui zualna lai tak pawh a ni reng a ni. Engtikah emaw chuan a kiangah lo ţhuin William Shakespeare-a kut chhuak ka lehlin te, a sonnet Mizo ţawnga ka lehlin bakah ka kut chhuak hrang hrangte min la thlirpui ve ang a, thu leh hla tuipuiah kan la cheng dun ve ngei ang tia ka duhthusamte chu a thamral zo ta si a, ka malin ka riang ta ngawih ngawih ni berin ka inhre hial nia!

Kawng engkim a ziak thiam! – Mafaa ropuina chu engkim a ziak thiam emaw tih mai turin eng lam hawi pawh ziak se, a ngaihnawmin a thu ziakah min chentir vawng vawng thei tlat zel a. A mit hi a fiah ngang mai a, thil tê ber bera kan ngaihte thleng hian a hmuhhmaih ngai lo ni berin ka hre ţhin. A thu ziakah khan kan zuk chengin kan zuk thlen chilh thei nghal zel maite hi mi pakhat a nihna tarlangtu pawimawh tak a lo ni. Mite ang bawkin nula chungchang a han seprawtuite hi han chhiar ve teh khai –

‘Khawi lam vantirhkoh kawng bo nge ni ta! Ka thisen zâma ka thisen kal tluang pangngai hi thawklehkhatah a chawl ţhup ni berin ka hria. A pianfung a mawiin a taksa a inphut tawk hle a. ‘Ria chum bat’ kan tih ang hi a ni ber awm e. Nula hleitling tak, fit nga leh inchi nga vela sang a ni a. Ka rin dan chuan kum 20 pel tawh a nih pawhin thla tamin a la pel lo tawp ang. A hmelţhat dan chu a paw fiah kâk a, amah a ngo a, a vun rawng chuan a var lam aiin a êng lam a hnaih lek lek. Mit tlang-kawm a nei lo nachungin a ‘meng vam ham mai a’, a hmuite lah chu a sen nung siah a. Khabe zum lem deuh, biang ki lek lek a ni’ a han tih ngawt pawhin vai zinga Zo lanu duhawmzia a puang chhuak mawi vawng vawng mai a nih hi maw le!

Letling thiam mi ril ber – Lehkhabu 8 meuh siam tawh mah se, lehlin a tihchhuah erawh ka hre hauh lo. Mahse, a article tihfiah nâna Writer/Poet lar ber berte kut chhuak a lehlin ka thlir chang chuan he lamah pawh hian kal ta se, mi ropui ber zingah a inchhuah leh tho ang tih hi ka chiang a ni! Pu JF-a te, James Lianmawia te, Pu Lalrawna te aia a hniam bikna tur reng ka hmu lo. Chu ai mah chuan, Mizo taka Jf-a’n a lehlin - ‘Let Hercules himself do what he may, the cat will mew and dog will have his day’ – khawvela mi chak bera an sawi pawh duh leh ka chungah inluling rawh se – zawhte chuan ngiau hun a la nei ang a, ui chuan ek ţhing tawn fuh hun pawh a la nei ang a, zangkhua pawhin bungbut hun a la nei ve chek ang tih hi en la.

Mafaa’n ‘The fault, dear Brutus is not in our stars, but in our self’ a tih ‘Ni e, kan van a duai a ni lo bawihte, keimahni kan duai zawk em a ni!’ a tih hi a hniam zawk ang maw? ‘My last rose of summer’ tih pawh ‘Ka nipui rose pâr hnuhnung ber’ han tih hnap maite pawh hi! Keats-a’n, ‘My greatest torment since i have known you has been the fear of you being a little inclined to the Cressid’ a tih angte – ‘Ka hmelhriat tirh aţang chea min nghaisa hreawmtu ber chu Val-kuah-lawr- ziarang i pu palh ang tih ka hlauhna hi a ni’ a han ti maite hi a pui rem rem teh e!

Mizo hla, sap ţawnga lehlin kawnga a duai lohzia mawlhte hi! Ni tla ngai lo Zion khawpui tiha chang pakhat a lehlin – Where the redeemed throng robed in glory abide, There’s a place for me there beyond the tide – a han tih hian hla bu en miah lo pawhin – Puan ropui sinin an lêng tlansa te, Ka tân hmuna awm ve chu ramah chuan - kan ti nghal zut zut a nih hi! Precious blood, precious blood that flawed on the rugged tree, Save me from sins and set all the transgressor free, What purged sin-stains away is the precious blood of Calvary – a han tihte hian leiliin – Thisen hlu thisen hlu thing krawsa chunga luang kha……..kan ti nghal thei a ni lawm ni? Tu hian nge chhing zo ngai dawn ta ni?

Chawikangtu ropui ber – Ziakmite zingah hian Mafaa tluka ziakmite chawisangtu leh Zoram mipuite hmaa zuar chhuak thiam tumah an la awm ngai lo! Writer thar ber berte a fuih awl lo a, mipuite hnenah a zuar chhawngin amah pana beltute lah a tihlawhchham mai mai ngai bawk hek lo. Mafaa’n lehkhabu chhuak thar chungchanga thu ziak a neih phawt chuan chu lehkhabu chu mi tam takin an lei nghal duak duak zel! Mafaa kha poetry ngawtah a tuiral lo, hla tluang pangngai, sap ţawnga phuah a tuipuiziate hi a mak tih mai loh chu sawi tur ka hre tawh lo. Hranghlui hla aţanga tun lai hla satu tharlam ber ber thleng khan a lo hre bel em em zel a nih kha!

Mi bik tih loh rual a ni lo! – Zofate zingah hian mi tlem tê chauh tak takin thu ziak leh ţawngkama sawi kawp thiam an lo piang pheuh pheuh tawh a. Mafaa erawh chuan thu a ziah thiam tluk bawkin thu zuk sawi thiam a! Thuhriltu zingahte hian he nihna nei kawp hi vâng tak an ni! Eng pawh han sawi se, beng hian a ngaithla dawk dawk a! Thinlungin nipui laia ice cream ang maiin a keih bawrh bawrh zel a nih hi! Sawi tur a va la tamin ziah belh duh ka va la ngah êm! Mahse, keini ang duangin Mafaa-te ang han fak ve hi zawng, mi tam tak mit timimtu leh beng tingawngtu mai kan chang dawn si a. Mi pawi kan sawi mai mai zawk ang tihte pawh ka hlau hlel lo ve.

Mangţha –

Are you sure,

That we are awake?

It seems to me,

That yet we sleep,

We dream.

William Shakespeare - A midsummer Night’s Dream.

Nunna chu  hlimthla ang chauha ral mai ţhin, zing daifim dam chhûng tluka tawi, tuktinpâr ang maia vuai thuai ţhin a ni si a. Mahse, thihna rau rauah mi ţhenkhat chu an hausak avangin an thi ropui a. An chhûngte vanga ropuina dawng pawh an awm bawk ţhin. Nimahsela, journalist aţanga infiamna lama inhmang te, Pathian thua rawngbawlna nei leh ram roreltu bakah rampawn thleng thlenga amah sûnna hun neitu, mi lian leh mi tê berte pawhin amah vui tura inkiltawihna reng an neih lohna mihring chu a ropui êm avangin leh chânna nasa tak a nih avang zawkin he leia sathaukhawnvar êng tak chu sathau luangral tawh mah se, mi tam tak nunah erawh nitin a êng zual deuh deuh zawk dawn a lo ni.

Sweet rose, fair flower, untimely pluck’d, soon vaded,

Pluck’d in the bud and vaded in the spring!

Bright orient pearl, alack, too timely shaded!

Fair creature, kill’d too soon by death’s sharp sting!

Like a green plum that hangs upon a tree,

And falls through wind, before the fall should be!