Saw mihring han lam dan vel chu le !

Mizo kristian tam zawk hi chu thil chik lo mi ni tura lo piang ve hrim hrim anna lai, mi chungchang thu kan sawi duh danah hian a lang chiang ţhin ngawt mai. Harhna inkhawmpui leh inkhawmpui hrim hrim bakah Tualchhûng inkawmpui hmang ţhin kohhran kan ni vek a.

Chutianga hun kan hmanna hlawhtlin leh hlawhtlin loh tehfung ber pakhata kan leklam chu kan zai ţhain kan lam nasain kan hlim em tih hi a ni fo mai. Khuang hnih nena ţang et awta kan han lam hi chu hmuhnawm tham tak a ni ţhin si a.

Mi ţhenkhat, mi aia lam uchuak leh lam maksak tak tak, an lam lai video lo la-a vantlang hriattirna (social media) lama thehdarh kan hmu ţhin a. Thupui (subj) dang zawng aiin kan lawm fal emaw tih turin kawmentu pawh kan tam theiin ţhenkhat ţawngkam phei hi chu fate benga hriata sawi lan chi pawh an ni lo!

Mahse, engkim tehfungah Bible hmanga heng thil ţhinte hi lo teh tur kan nih laiin chutianga tehfung leka mipui zirtir tum kan awm ngai lo erawh kan mize ţha lo lai tak niin ka hre ţhin. Engtin nge Bible-in a sawi dan kha i lo bih dawn teh reng ang.

Philistia mite’n khan Israel fate an do hnehin Thuthlung Bawm an chhuhsak kha a ni a. Davida kha Israel mite’n lal atân hriak an thih tih Philistia mite’n an lo hriat khan amah do turin an inbuatsaih ta nghal a. Davida pawhin Pathian rawnin Philistia mite do turin Rephaim ruam a pan ta a nih kha.

Philistia mite chu Lalpa’n a lo tiam tawh ang ngeiin an han hneh a, Thuthlung Bawm pawh Jerusalem lamah hawn an tum ta a. Mahse, kalkawngah Uzia’n Bawm tla tur venga a khawih avangin a chungah thihna lo thlengin Davida chuan Bawm chu Jerusalem lama a hawnpui ngam ta tlat lo. Tichuan, Git mi Obededom-a inah a dahtir ta ngawt a.

Pathian Bawm kawltute malsawm an nih dan Obededom-ate chhûngkaw chunga thil thlengte hi sawizui châkawm tak a ni. Obededoma-te chhûngkuain Pathian Bawm an kawl avangin malsawmna an dawng tih Davida’n a lo hriatin Jerusalem lama Bawm chu hawnpui zai a rel ta a nih kha.

Kalkawng tluanin rimawi tinreng nen Lalpa Bawm chu an zawn haw ta a. Lal Davida meuh pawh chhiahhlawh nulate hmuh atâna mawi lo khawpin a lam nasa ta a nih kha. Chu chu Saula fanu Mikali chuan a lo hmuhin a zahpui a, Davida chu a chhuahchhal ta vei ngawt a, tifuh lo tak a ni!

Mikali’n Lalpa faka lam Davida a sawisel avanga a chunga thil lo thleng hi rapthlak tak a ni. A dam chhûngin fa reng reng a hring ta miah lo, a ching ta tlat mai a nih kha. Davida khan Mikali’n a lam dan a zahpui thu a hrilh khan Davida khan chu aia nasa pawhin Lalpa fak tur chuan a la lam theih thu a la hrilh ta deuh deuh a nih kha.

Chuvangin nang pawh ringtu, fimkhur hle ang che. Pathian faka lam tam takte lam dan chu tisa phûrna vang a ni teh meuh mai. Mahse, Thlarau Thianghlim pawlna changa mite sawisel hlawh khawpa lam pawh an awm tho ţhin tih Davida nun aţang hian kan hmu chiang hle a nih hi.

I chungah Lalpa thinurna a lo thlen ve loh nân leh i chungah anchhia a lo thlen loh nân i hmui veng ţha la. Social media lama lam maksak i hmu ţhin a nih pawhin ngawih chu i tân a ţha zawk tih hre thiamin fimkhur hle rawh. A nih loh zawngin a chhan hriat hauh si lohin i chungah Lalpa’n thil ţha lo a thlentirin a lo thlentir reng tawh pawh a ni thei si a!