𝐒𝐡𝐚𝐤𝐞𝐬𝐩𝐞𝐚𝐫𝐞 𝐒𝐨𝐧𝐧𝐞𝐭 𝟏𝟖 - 𝐊𝐡𝐚𝐰𝐯𝐞𝐥𝐚 𝐒𝐨𝐧𝐧𝐞𝐭 𝐦𝐚𝐰𝐢 𝐛𝐞𝐫𝐚 𝐚𝐧 𝐜𝐡𝐡𝐚𝐥 𝐟𝐨 !

𝘚𝘩𝘢𝘭𝘭 𝘐 𝘤𝘰𝘮𝘱𝘢𝘳𝘦 𝘵𝘩𝘦𝘦 𝘵𝘰 𝘢 𝘴𝘶𝘮𝘮𝘦𝘳'𝘴 𝘥𝘢𝘺?

𝘛𝘩𝘰𝘶 𝘢𝘳𝘵 𝘮𝘰𝘳𝘦 𝘭𝘰𝘷𝘦𝘭𝘺 𝘢𝘯𝘥 𝘮𝘰𝘳𝘦 𝘵𝘦𝘮𝘱𝘦𝘳𝘢𝘵𝘦,

𝘙𝘰𝘶𝘨𝘩 𝘸𝘪𝘯𝘥𝘴 𝘥𝘰 𝘴𝘩𝘢𝘬𝘦 𝘵𝘩𝘦 𝘥𝘢𝘳𝘭𝘪𝘯𝘨 𝘣𝘶𝘥𝘴 𝘰𝘧 𝘔𝘢𝘺;

𝘈𝘯𝘥 𝘴𝘶𝘮𝘮𝘦𝘳'𝘴 𝘭𝘦𝘢𝘴𝘦 𝘩𝘢𝘵𝘩 𝘢𝘭𝘭 𝘵𝘰𝘰 𝘴𝘩𝘰𝘳𝘵 𝘢 𝘥𝘢𝘵𝘦:

𝘚𝘰𝘮𝘦𝘵𝘪𝘮𝘦 𝘵𝘰𝘰 𝘩𝘰𝘵 𝘵𝘩𝘦 𝘦𝘺𝘦 𝘰𝘧 𝘩𝘦𝘢𝘷𝘦𝘯 𝘴𝘩𝘪𝘯𝘦𝘴,

𝘈𝘯𝘥 𝘰𝘧𝘵𝘦𝘯 𝘪𝘴 𝘩𝘪𝘴 𝘨𝘰𝘭𝘥 𝘤𝘰𝘮𝘱𝘭𝘦𝘹𝘪𝘰𝘯 𝘥𝘪𝘮𝘮'𝘥;

𝘈𝘯𝘥 𝘦𝘷𝘦𝘳𝘺 𝘧𝘢𝘪𝘳 𝘧𝘳𝘰𝘮 𝘧𝘢𝘪𝘳 𝘴𝘰𝘮𝘦𝘵𝘪𝘮𝘦 𝘥𝘦𝘤𝘭𝘪𝘯𝘦𝘴,

𝘉𝘺 𝘤𝘩𝘢𝘯𝘤𝘦, 𝘰𝘳 𝘯𝘢𝘵𝘶𝘳𝘦'𝘴 𝘤𝘩𝘢𝘯𝘨𝘪𝘯𝘨 𝘤𝘰𝘶𝘳𝘴𝘦, 𝘶𝘯𝘵𝘳𝘪𝘮𝘮'𝘥;

𝘉𝘶𝘵 𝘵𝘩𝘺 𝘦𝘵𝘦𝘳𝘯𝘢𝘭 𝘴𝘶𝘮𝘮𝘦𝘳 𝘴𝘩𝘢𝘭𝘭 𝘯𝘰𝘵 𝘧𝘢𝘥𝘦

𝘕𝘰𝘳 𝘭𝘰𝘴𝘦 𝘱𝘰𝘴𝘴𝘦𝘴𝘴𝘪𝘰𝘯 𝘰𝘧 𝘵𝘩𝘢𝘵 𝘧𝘢𝘪𝘳 𝘵𝘩𝘰𝘶 𝘰𝘸'𝘴𝘵;

𝘕𝘰𝘳 𝘴𝘩𝘢𝘭𝘭 𝘋𝘦𝘢𝘵𝘩 𝘣𝘳𝘢𝘨 𝘵𝘩𝘰𝘶 𝘸𝘢𝘯𝘥𝘦𝘳'𝘴𝘵 𝘪𝘯 𝘩𝘪𝘴 𝘴𝘩𝘢𝘥𝘦,

𝘞𝘩𝘦𝘯 𝘪𝘯 𝘦𝘵𝘦𝘳𝘯𝘢𝘭 𝘭𝘪𝘯𝘦𝘴 𝘵𝘰 𝘵𝘪𝘮𝘦 𝘵𝘩𝘰𝘶 𝘨𝘳𝘰𝘸'𝘴𝘵;

𝘚𝘰 𝘭𝘰𝘯𝘨 𝘢𝘴 𝘮𝘦𝘯 𝘤𝘢𝘯 𝘣𝘳𝘦𝘢𝘵𝘩𝘦 𝘰𝘳 𝘦𝘺𝘦𝘴 𝘤𝘢𝘯 𝘴𝘦𝘦

𝘚𝘰 𝘭𝘰𝘯𝘨 𝘭𝘪𝘷𝘦𝘴 𝘵𝘩𝘪𝘴 𝘢𝘯𝘥 𝘵𝘩𝘪𝘴 𝘨𝘪𝘷𝘦𝘴 𝘭𝘪𝘧𝘦 𝘵𝘰 𝘵𝘩𝘦𝘦.

 

- - - - - - - - - - - - - - - - - - - - - - - - - -

𝘕𝘪𝘱𝘶𝘪 𝘬𝘩𝘢𝘸 𝘵𝘩𝘪𝘢𝘯𝘨 𝘯𝘦𝘯 𝘬𝘢 𝘩𝘢𝘯 𝘬𝘩𝘢𝘪𝘬𝘩𝘪𝘯 𝘢𝘯𝘨 𝘤𝘩𝘦?

𝘈𝘯𝘪 𝘢𝘪 𝘤𝘩𝘶𝘢𝘯 𝘯𝘢𝘯𝘨 𝘤𝘩𝘶 𝘪 𝘯𝘢𝘭𝘩𝘪𝘯 𝘪 𝘳𝘪𝘯𝘢𝘸𝘮 𝘩𝘭𝘦 𝘴𝘪;

𝘕𝘪𝘱𝘶𝘪 𝘱𝘢̂𝘳𝘵𝘦 𝘤𝘩𝘶 𝘵h𝘭𝘪 𝘤𝘩𝘩𝘦 𝘷𝘢𝘬𝘷𝘢𝘪𝘪𝘯 𝘢 𝘤𝘩𝘩𝘦𝘮 𝘵̧𝘪𝘭 𝘮𝘢𝘪 𝘮𝘢𝘪 𝘢,

𝘕𝘨𝘢𝘪𝘩 𝘩𝘮𝘢𝘯 𝘳𝘶𝘢𝘭 𝘭𝘰𝘩𝘷𝘪𝘯 𝘢 𝘷𝘶𝘭 𝘩𝘶𝘯 𝘱𝘢𝘸𝘩 𝘢 𝘵𝘢𝘸𝘪 𝘴𝘪;

𝘊𝘩𝘶𝘯𝘨𝘵𝘶𝘳𝘯𝘪 𝘭𝘢𝘩 𝘤𝘩𝘩𝘶𝘮 𝘳𝘢𝘯𝘨 𝘬𝘢̂𝘳𝘢 𝘢 𝘣𝘪𝘬𝘣𝘰 𝘭𝘰𝘩 𝘭𝘦𝘩,

𝘕𝘪𝘱𝘶𝘪 𝘴𝘢𝘵 𝘷𝘢𝘯𝘨𝘭𝘢𝘪 𝘵𝘢𝘬 𝘤𝘩𝘶 𝘵𝘢𝘸𝘳𝘩 𝘻𝘢𝘸𝘩 𝘮𝘪 𝘢 𝘯𝘪 𝘴𝘪 𝘭𝘰;

𝘓𝘦𝘪𝘭𝘶𝘯𝘨𝘪𝘯 𝘥𝘶𝘩𝘢𝘸𝘮𝘯𝘢 𝘵𝘪𝘯𝘳𝘦𝘯𝘨 𝘢 𝘤𝘩𝘩𝘶𝘢𝘩 𝘵̧𝘩𝘪𝘯𝘵𝘦 𝘮𝘦𝘶𝘩 𝘱𝘢𝘸𝘩,

𝘕𝘪𝘱𝘶𝘪 𝘷𝘢𝘯𝘨𝘭𝘢𝘪𝘢 𝘬𝘩𝘶𝘢𝘳𝘦𝘭 𝘭𝘦𝘩 𝘤𝘩𝘩𝘪𝘢𝘵𝘯𝘢 𝘭𝘢𝘬𝘢𝘩 𝘢𝘯 𝘤𝘩𝘶𝘢𝘪 𝘮𝘢𝘪 𝘵̧𝘩𝘪𝘯;

𝘐 𝘷𝘢𝘯𝘨𝘭𝘢𝘪 𝘥𝘶𝘩𝘢𝘸𝘮𝘯𝘢 𝘦𝘳𝘢𝘸𝘩 𝘤𝘩𝘶𝘢𝘪 𝘩𝘪𝘢𝘯 𝘢 𝘮𝘢𝘸𝘪 𝘭𝘰 𝘷𝘦,

𝘔𝘢𝘸𝘪𝘯𝘢 𝘵𝘪𝘯𝘳𝘦𝘯𝘨 𝘪 𝘤𝘩𝘩𝘢𝘸𝘮𝘵𝘦 𝘭𝘢̀𝘮 𝘢𝘯 𝘤𝘩𝘶̂𝘭 𝘯𝘨𝘢𝘪 𝘭𝘰𝘷𝘢𝘯𝘨;

𝘛𝘩𝘪𝘩𝘯𝘢 𝘮𝘦𝘶𝘩 𝘱𝘢𝘸’𝘯 𝘪 𝘭𝘢𝘬𝘢𝘩 𝘩𝘯𝘦𝘩𝘯𝘢 𝘢 𝘤𝘩𝘢𝘯𝘨 𝘭𝘰’𝘯𝘨 𝘦,

𝘒𝘢 𝘭𝘦𝘯𝘨𝘻𝘦𝘮 𝘩𝘭𝘢 𝘤𝘩𝘶𝘢𝘪 𝘭𝘰 𝘵𝘶𝘳𝘢𝘩 𝘪 𝘤𝘩𝘦𝘯𝘨 𝘳𝘦𝘯𝘨 𝘵𝘢𝘸𝘩 𝘢𝘯𝘨𝘢;

𝘒𝘩𝘢𝘸𝘷𝘦𝘭 𝘢 𝘤𝘩𝘶𝘢𝘪 𝘩𝘮𝘢 𝘭𝘰𝘩 𝘮𝘪𝘩𝘳𝘪𝘯𝘨 𝘥𝘢𝘮 𝘤𝘩𝘩𝘶̂𝘯𝘨 𝘻𝘢𝘸𝘯𝘨,

𝘊𝘩𝘶𝘢𝘪 𝘯𝘪 𝘩𝘮𝘦𝘭 𝘳𝘦𝘯𝘨 𝘪 𝘩𝘮𝘶 𝘵𝘢𝘸𝘩 𝘥𝘢𝘸𝘯 𝘭𝘰 𝘢 𝘯𝘪 𝘻𝘢𝘸𝘬 𝘦!

 

- - - - - - - - - - - - - - - - - - - - - - - - - -

            He hla hril bulţan nân Shakespeare-a hian thiam takin zawhna, ‘𝑵𝒊𝒑𝒖𝒊 𝒌𝒉𝒂𝒘 𝒕h𝒊𝒂𝒏𝒈 𝒕𝒂𝒌 𝒏𝒆𝒏 𝒌𝒂 𝒉𝒂𝒏 𝒌𝒉𝒂𝒊𝒌𝒉𝒊𝒏 𝒅𝒂𝒘𝒏 𝒄𝒉𝒆 𝒆𝒎 𝒏𝒊 𝒂𝒏𝒈?’ tiin, 𝑹𝒉𝒆𝒕𝒐𝒓𝒊𝒄𝒂𝒍 𝑸𝒖𝒆𝒔𝒕𝒊𝒐𝒏 mawlmang tak, mahse mi tin hriat thiam theih tur ţawngkam lerh ni si lo, mahse hmangaih zûn kai chiai si, a lo dawngsawngtu tâna hei tluka zawhna duhawm in zawh leh ngaihna awm thei chuang tawh lo tur, zawhna phena a rûka hmangaih ber chawisânna leh fakna thu inzam tel bawk si a han zawt ta a.

            England ang ram vawt leh hnâwng, ruahtui tamna leh chhum zin phui mupna angah chuan, Mizote tâna favang khaw thiang leh boruak nêm tak tluka hun nuam a awm lo ang bawkin, an nipui lai hun, thing tinin pâr an chhuah a, boruaka thinlung zangkhaina leh zalenna rim nâm chiaina hun tluka hun nuam leh hun duhawm a awm thei tawh chuang lo.

            Kumtluana an hun nghahhlelh ber Nipui leh Nipuiin a rawn ken tel, khawvel mawina leh hmuhnawmna zawng zawng chu, a tleirawl hmangaih ber duhawmna leh hmuhnawmna nen Shakespeare-a hian a han tehkhin chho ta a. Zawhna duhawm ber tih hial tur chu, chhanna azawnga chhanna ngainatawm ber, zawhna duhawm ber lehthal ţhak khawp hmangin a han chhang zui zat a nih hi!

            Nipui khaw thiang tak ai thlawt chuan i duhawmin, ani ai thlawt chuan i zia pawh a nghetin i rinawm zawk ka ti hle si a, tiin faknain bul a han ţan ta a. Shakespeare-a hun laia 𝑻𝒆𝒎𝒑𝒆𝒓𝒂𝒕𝒆 an hman reng rengin mi zawiawi leh nungchang nelawm tak, ti thawt thawt lo, bawih hnâp sawina a ni zel a. Shakespeare-a hian duhthawh takin a ngaihzawng chu, Nipui aia a duhawmna leh, Nipui khaw thiang tak aia ngainatawm a nihna a rawn puang chhuak ta a ni.

            Tlar thumnaah hian ‘𝑻𝒉𝒆 𝒅𝒂𝒓𝒍𝒊𝒏𝒈 𝒃𝒖𝒅𝒔 𝒐𝒇 𝑴𝒂𝒚’ tiin 𝑺𝒚𝒎𝒃𝒐𝒍𝒊𝒔𝒎 mawi tak, Nipui rawn thawt tirh hun aiawh sawina kan hmu a. Chu Nipui hun duhawm tak chu 𝑷𝒆𝒓𝒔𝒐𝒏𝒊𝒇𝒊𝒄𝒂𝒕𝒊𝒐𝒏 -ah ‘𝑹𝒐𝒖𝒈𝒉 𝒘𝒊𝒏𝒅𝒔...’ hmangin sawisaka a awm dan min hrilh ta a. Nipui a rawn thawt tirh hun laia, thli thaw vûk vûkin hnah a chhem ţil chum chum lai Imagery hmuhnawm tak chu han thlir la, i mur chem chem ve tho ang ti raw?

            Shakespeare-a thu leh hla hi chu a heti tlat zel a. Tlar khat lekah pawh thu tam tak, inhne rem zaihin a khung thiam a. A hla tlar hnih khat lekah hian rei tak min cham khawmuantir thei tlat zel a nih hi. Tlar li-naah pawh chu Nipui lo lan chhûng chu hun rei lo tê a nihzia, a ngaihzawng anga rinrawla neih mi a nih lohna, a ngaihzawng laka Nipui famkim lohna chu hmeichhe ân thiam ber ang maiin a han sawi chho ta hlawk hlawk mai a nih hi.

            Tlar nga-na kan en chuan Nipui laia Ni sa vul mai, tawrhhlelhawm tak chu Metaphor ‘𝒆𝒚𝒆 𝒐𝒇 𝒉𝒆𝒂𝒗𝒆𝒏’ hmangin a rawn tehkhin a. Nipui ti Nipuitu ber pawh thil tawrhhlelhawm takah chhuah khawloh sakin, a châng leh chhum dum kârah lawm hman lek loha a bik bo thu hmangin a han sawi hnâwm thul! Inhnial nikhuaa lamţang atân Shakespeare-a aia thlan tur an awm chuang eng em ni?

            Tlar rûkna-a Ni a 𝑷𝒆𝒓𝒔𝒐𝒏𝒊𝒇𝒚 dan leh, Ni hmelhmang 𝑴𝒆𝒕𝒂𝒑𝒉𝒐𝒓 hmanga ‘𝒉𝒊𝒔 𝒈𝒐𝒍𝒅 𝒄𝒐𝒎𝒑𝒍𝒆𝒙𝒊𝒐𝒏 𝒅𝒊𝒎𝒎'𝒅’ a han chirhtheh kual vel hi chu pui tak a ni! Tlar sarihnaah hian Leilunga duhawmna nei thil tawh phawtte, khuarel chhiatna leh khuarei laka an chuai dan, an mawina leh duhawmnain tawp chin an neih dan, a hnu tlar zela a ngaihzawng erawh chuai ve ngai lo pathiante ang a nihzia tihfiahna turin a han chhampual ta a.

            Tlar kua-na kan han kai chiah hian, ţawnghmang thiam theihtawpa ngaihzawngte fakna leh chawimawina thu kan hmu chho ta reng a ni. He tlara a ngaihzawng hlimthla (𝑰𝒎𝒂𝒈𝒆𝒓𝒚) kan hmuh mawlmang tak, ‘𝑬𝒕𝒆𝒓𝒏𝒂𝒍 𝑺𝒖𝒎𝒎𝒆𝒓’ tehkhin thu nalh mang kheng hmanga a rawn chhep chhuah tluka thu lawmawm hi, ngaihzawngte hnen aţanga dawn leh tur a awm thei tawh chuang awm lo e.

            Tlar sawmna-ah hian chu a ngaihzawng duhawmna leh mawina chu engtikah mah an chuai ve theih ngai loh tur thu hmangin a thuchheh a han uar (𝑯𝒚𝒑𝒆𝒓𝒃𝒐𝒍𝒆) zual sauh sauh a. Mihring lo piang tawh phawtte chu chuai leh mai tur kan nih hre reng mah ila, duhthusam theihna thinlung neitu he mihring hian, a theihtawp chhuaha uara duhthu a sam hi Siamtu pawhin min phalsak tlat a lo ni.

            Tichuan, tlar sawmpakhatnaah hian Thihna chu rawn 𝑷𝒆𝒓𝒔𝒐𝒏𝒊𝒇𝒚 lehin, chutih rual chiah chuan Davida thihna hlimkawr ruam 𝑺𝒂𝒎 𝟐𝟑-𝒏𝒂 -a kan hmuh ‘𝑺𝒉𝒂𝒅𝒆’ ngei kha, thiam takin Shakespeare-a hian a rawn kharchhawng ta a nih hi. Shakespeare-a hian 𝑴𝒆𝒕𝒂𝒑𝒉𝒐𝒓 𝒍𝒆𝒉 𝑷𝒆𝒓𝒔𝒐𝒏𝒊𝒇𝒊𝒄𝒂𝒕𝒊𝒐𝒏 hmangin he hla hril hi a rawn chawi nung a. Chu taka chu mitthlaa kan lo hmuh fiah theihna turin 𝑰𝒎𝒂𝒈𝒆𝒓𝒚 fiah felfai takin a thuam mawi belh ta a nih hi.

            Thihna meuh pawhin a ngaihzawng mawina leh duhawmna a ţhiah theih loh tur thu leh, mihring dam chen, khawvel dam chhûng zawng, a hla hril chuai thei tawh loh tur kaltlangin, a ngaihzawng chu pathiante ang maiin a vul reng tur thu hmangin he hla hril ropui hi a khar ta a ni. He Sonnet pumpuiah hian tlartir thumal inang, 𝑨𝒏𝒂𝒑𝒉𝒐𝒓𝒂 an tih ‘𝑺𝒐 𝒍𝒐𝒏𝒈 𝒂𝒔 𝒎𝒆𝒏 𝒄𝒂𝒏 𝒃𝒓𝒆𝒂𝒕𝒉𝒆, 𝒐𝒓 𝒆𝒚𝒆𝒔 𝒄𝒂𝒏 𝒔𝒆𝒆, 𝑺𝒐 𝒍𝒐𝒏𝒈 𝒍𝒊𝒗𝒆𝒔 𝒕𝒉𝒊𝒔, 𝒂𝒏𝒅 𝒕𝒉𝒊𝒔 𝒈𝒊𝒗𝒆𝒔 𝒍𝒊𝒇𝒆 𝒕𝒐 𝒕𝒉𝒆𝒆’ te, Vowel thumal inang ‘𝑺𝒉𝒂𝒌𝒆’ leh ‘𝑴𝒂𝒚’ tiha ‘A’ thumal 𝑨𝒔𝒔𝒐𝒏𝒂𝒏𝒄𝒆 pawh hmuh tur a awm neuh neuh a.

            ‘𝑰‘ thumal lam rik dan inlalawn pawh tlar 5-9-ah hian kan hmu a nih hi. Aw le, sawi tur la tam mah se, duh tawk ma dawn ila. Engvangin nge he Sonnet hi khawvela Sonnet mawi ber ang hiala an ngaih, tiin ka ngaihtuah fo a. A Sonnet zingah hian Sonnet 18 aia mawi leh thûk, nalh leh ril tih kei chuan ka nei ve khanglang hlawm a. Mizo-a ka lehlin khi Shakespeare-a sonnet ka lehlin zingah chuan 𝑭𝒓𝒆𝒆 𝑽𝒆𝒓𝒔𝒆 kan hmanna awmchhun a ni.

            Mahse, engdang vang mah a ni lo. Mi tin chhiar theih tura mawlmang, mawi leh thûk bawk si, tehkhin thu leh hla rua mawlmang leh fiah tak hmanga, Sonnet phuah dan tur kimchang zawm thlap chunga, hriat fiah awl tak, ngaihzawn awm bera a chhuah theih vang tih loh theih a lo ni lo. Tak a, he a ngaihzawng kan tih leh ţhin tleirawl hi, mipa a ni tih erawh hre ta reng ila!