𝐂𝐡𝐡û𝐧𝐠𝐫𝐢𝐥 𝐓𝐡𝐢𝐡𝐧𝐚 !

Blank Verse  !

 

Aw nang hmuipui pu, fak hla siam thiam ber,

‘Hmangaih chaw tui ber; ri mawi’ titu khan,

Hmangaihna vanga veka hla lungrûn lo piang,

Chhûngril ţah mittui tlingte’n an thuam mawi!

 

Khawharna peng ţhuam tin mil hla thlûk nâ,

Lûnglênna vawrtawpte’n an hrin hla tlar,

A remna ri mawia’n dam lai thlan zawh thawm,

Tlar tin lûngchhe insût thawm ri’n an zem,

 

Sirva zai thiam âw lungkuai iang an rem,

Ri fán kâra nunhlui ngaihawm thawnthu,

Nghilh rual loha inlâr chhuahtir theitu hla,

Kham hnawka ngaihthlak i nuam takzet maw?

 

Aw Shakespeare, rimawi chu la bo daih la,

A ni, chhepchher tum ri nen làm la bo r’u!

Lunglên hla hril phuah bansan la’ngin,

Khawhar hla lungrûnte mual liamtir zawk rawh!

 

Ka bengin ri mawi thawm a ngêi hluah hluah a,

Ka tisa pengte’n fak hla diriam an châk!

Hla mawi rem thiamte huatnaa khatin,

Hmangaih hla lung tilêng phuahtu zawng pawh!

 

Chung ri mawi rem thawm leh hla hril tlarte’n,

Hmangaihna thük dai hnu chhem nung ţhinin,

Nawmna reng pai lo, vur khawna saruak,

Silhfen lova zâl nun min chantir si!