𝐋𝐚𝐫𝐧𝐚 𝐊𝐡𝐚𝐰𝐯𝐞𝐥 𝐡𝐢 𝐞𝐧𝐠 𝐜𝐡𝐢𝐚𝐡 𝐧𝐠𝐞 𝐦𝐚𝐰 𝐚 𝐥𝐨 𝐧𝐢𝐡 𝐥𝐞 ?

(Just an illusion by Julia Zahra)

Kum 1982 daih tawhah khân, British Band ‘Imagination’ chuan, lârna khawvel behchhan hla mawi leh ril tak, Just an Illusion hla hi an lo phuah a. Dutch Band pakhat; BZN (Band Zonder Naam – pâwl hming nei lo tihna niawm tak a ni) te’n hlawhtling takin an lo sa lâr ta a nih kha. Dutch zai thiam âw mawi zet mai, van phaiphulêng ri fawn hlerh hlerh ang maia zai thei Julia Zahra-in, unplugged-a rawn tichhuak ve lehin, kan tribal beng paw’n timur kai chhuak thei khawpin a lo ngaithla ve ta dauh dauh a nih kha. 

Kha hla châng thum lek khân, mi lârte khawvel pang leh lam, mi nazawngin kan zuk luhchilh ve loh chanchin, lungchhiatthlak êm êm si chu khaw êngah a rawn tarlang ta a. Kan ramah pawh lâr châkna hian ţhangtharte thlîngah vêtin, an thauah a man tlat a. Kawng hrang hrangin, mahni phâk ang tâwk zelah lâr an khel luai luai a ni hi. A bik takin zai thiam niha lâr châkna hian, khawvel huapin ţhangtharte nun nasa takin a thununsak tlat a, beidawnna nuna lut an tam phah êm êm a nih hi.

Hlawhtlinna avanga lârna khawvel chu, khawi hmunah pawh thlenna nuam leh changkang ber ber, lirthei chhuak thar apiang, ei tur man to ber ber, suangtuahnain a ban phâk apiang neih theihna, khawi kipah mite umzui leh ngaihven hlawhnain a rawn luah khat ta a. Pawn lam mit thlirna aţanga mite ngaihsân leh awh rawn nihna chu, hlawhtlinna tlâng chhip chuanna zawng a ni teh meuh mai. Mahse, chu lârna khawvel pang khing leh lam, a hmai phel leh lam, mite’n an sawi chhuah zen zen loh chu, ţah leh ha ţhialna mai a lo ni si. 

Zai thiam vanga hlawhtlinnain a chhawm lârna chu, mi fate hriat lohin a man pêk ngai a lo ni reng si. Mihringin zalenna a neih chu chhuhsaka awmin, a taksa leh a âw zawng zawng, a inchei dan leh a khawsak duh dan zawng zawngte chu, hralh sumah an chan tak vek avangin, mana lei an ni ta a, mahni ta pawh an ni ta lo. Chuta china nun ipikna leh zalenna boruak hip tur reng a awm lohna khawvel chu, ţawngkâ maia sawi chhuah thiam rual loh, bawm tawta khung beh tlat ang nunah a lo chang ta a ni.

Zai thiamin a hla thar a tihchhuah apiangte chu, khermei thei ang bera lo endiktu (critic) te’n, fakna aiin sawiselna lai tur ngawt an zawng ta emaw tih mai turin an lo ching phar ţhin a. Zai thiamte pawh lemchanna khawvelah hnuh luha awmin, an nihna dik tak anga an lan chhuah theih hun awmchhun chu, mahni chauha an awm laiin a ni ta deuh tlawng mai a lo ni. Kawi tinah hlawkna beiseia ngaihsaktu der hlirin, tho tle rualin sa thi uih an bawm ang maiin an zim hut hut nitin reng ta mai a ni.

Tleirawl kum 16 leka upa a nih laia, ‘Baby one more time’ vanga khawvel huapa rawn lâr chhuak ta, Britney Spears-i khân a hla pakhat, ‘Lucky’ tihah he nun hi lungchhiatthlak zetin a rawn tarlang a. ‘Early morning, she wakes up; Knock, knock, knock on the door; It's time for make-up, perfect smile; It's you they're all waiting for’ tiin, a nun a chhangkhamzia hi i hmu thei em? ‘She's so lucky, she's a star; But she cry, cry, cries in her lonely heart, thinking; If there's nothing missing in my life, Then why do these tears come at night?’ 

He hla tlar tawitêin, mi zawng zawng ngaiha mi hlawhtling, sum a maktaduai tel la lut rúih rúih chung sia, a nuna ruak hnawh khah zawh loh awm tlat chanchin min hrilh laia, a bianga mittui luang ngiai ngiai hi i zuk hmu thei ang ti raw? Hei hi a ni, lârna khawvelin lawmman a pêk tak chu lo ni! Shakespeare-a lemchan Henry V-ah khân, England lal hmingthang ber chuan, “I would give all my fame for a pot of ale and safety (ka hmingthanna zawng zawngte hi, rakzu no khat leh ka sahimna nen thleng ka nuam zo ta)” a ti thlawt mai a nih kha! 

Endiktu leh mi nazawngin an nun dan an sawi chhiat bawrh bawrh a, a hla thar apiang an fakselna hnuaiah pawh, chawlh zai reng rêl thei lovin anmahni siam liantute duh danin zaia mipui awih a ngai reng zel a. Taksa leh ngaihtuahna hah rimtawng lutuk laka tal chhuah nân, taksa leh ngaihtuahna tiphur thei leh tithatho thei zu leh damdawi nen mipui hmaah lem an chang chhunzawm zel a. Mipui hmaa an zai lai chauh zawngin nuam tihna a lo awm ve mai bawk ţhin. Chu nun chhawrdawh chuan tawpintai a nei lova, duh pawh ni se chawlh mai theih a ni tawh lo.

Britney-i bawk hian, ‘Lost in an image, in a dream; But there's no one there to wake her up; And the world is spinning, and she keeps on winning; But tell me what happens when it stops?’ tiin lû hai chiaina mangram chanchin chu min hrilh ta a. Mite awh leh ngaihsân rawn ni si kha, thinlung taka hmangaihtu leh ngaihsaktu tak tak erawh an hmu zo si lo. Chuvang chuan a ni, Rock n Roll lalpa Elvis-a meuh pawh dawmtu nei lova mual a liam a, King of Pop nihna hial hlawh chhuaktu M. Jackson-a pawh ran thisawn ang maia mual a liam tak ni! 

Khawvel mipate it rawn Marylyn Monroe-i meuh pawh a thih dâwnah meuh chuan, bawihsâwmtu reng a nei lova nih kha. Khawvel huapa mi lârte êm chu tluk phâk lo mah se, Zofate zinga mi lâr kan neihte pawh hi han thlir teh. Pit dawr tia lek kan ramah hian mite hriat hlawh viau mah se, a rûk taka an nuna khawharna, hahdam taka mut siai siaina tur nghehchhan duhawm nei si lo engzat tak awm ang maw? He lârna khawvel pang khing nun zet hi chu, a chan a chauvin a riang váwng váwng a lo ni.

Chuvang chuan a ni, Isua ai pawhin kan lâr zawk ti khawpa he khawvel daidartu John Lennon-a meuh pawhin, a nun ruak tak aţangin duhthusam khawvel ‘Imagine’ a din chhuah phah ta hial a lo nih kha. An chan chauhzia he hla siamtu hian a han hriat chhuah meuh chuan, âwrâwl tawpin, ‘For it’s not too late, oh it’s not too late’ tiin he lârna khawvela liluh ve lo tur hian mi tin a fuih ta ráwih ráwih mai. Kan Mizo mi lârte hi phâk ang tâwkin an nun ka lo thlir ve ţhin a. Mipui hmuhah zawng an hlim hmêlin nuam an tih hmêl ţhin ngei mai. 

Mahse, a châng chauh hi zawngin an mitmeng dul raih, nui lui tih hriat taka an infuih lai, phâk baka mite hmuha lan mawi ngaihna avanga rilru hahna, an hmêla lo lang chhuakte hi in lo hmu ve ţhin em? “Mipui hmuha ka lo zai ta kher kher kha, khawvela ka inchhirna ber a lo ni” tia hmeichhe zai thiam pakhat testimony-te hi dâwt a nih a rinawm mawlh loh. Kan model, kan artist leh zai thiam leh mi lâr tak tak zingah, Lal Isua hmanga an nuna ruak hnawh khat si lo, mite hriat loha lârna khawvel zet hi chu, ‘Just an Illusion’ tia ţap keuh keuh ţhin an lo awm nual reng mai lo maw?