𝐇𝐥𝐚 𝐭𝐡𝐮 (𝐳𝐚𝐰𝐡𝐧𝐚) 𝐩𝐚𝐤𝐡𝐚𝐭, 𝐦𝐢 𝐫𝐮̂𝐧 𝐞̂𝐦 𝐞̂𝐦𝐭𝐮 𝐜𝐡𝐮 !

'O Romeo, Romeo, wherefore art thou?' tia Juliet-i'n zawhna lûngchhiatthlak tak a zawhte hi, khawvel hnùk a tiulh ţhin a. Pu Rokunga'n, 'Hrai te, khaw nge i chûn ve kha, Mahte'n laikhuma i lo zâl le?' tia fahrah nun lûngrûn tak kaltlanga zawhna ţihbaiawm tak a zawhte pawhin, thlîng a vit ngáih ţhin.

Thlarau Thianghlimin Pu Thangate, khawharna ruama a'n tei rek rek laiin a rawn pawl ta a. Thlarau mitin nakina ringtute chawlhna tur van ram, mihring suahtuahnain a them pawha a ropuizia a suangtuah phâk loh khawpui chu, fiah taka a han thlirtir ta a. 

Chu hmun nuam leh ropui lutuka cheng ve tur chuan, Evi thlah kal zel chhul chhuak tawh phawtte hnenah sawmna pêk chhuah a ni ta a. Rev S. Lianruma'n, 'Thisenin a hawng ta, zalenna ram; Ka thlarau chu mawlh chu zawng ve la' tiin, chu hmun chan loh a hlauhzia min hrilh láwm láwm a nih hi.

Mahse, thisen meuh chhuah a ngaihna kaltlanga sawmna lo ri chhuak ta chu, awlsam taka lo chhan mai theih a ni tlat lo. Khawvel thil zawng zawng thlauhthlak zet a ngai tlat a ni. Chu chu khawvela chengte tân erawh, thiltih awlsam lo tak mai a lo ni si a. Hmuh theih loh hmangaihna khawpui ai chuan, he leia ropuinate chuan min au nâ zawk si ţhin.

Tihna tem tawp lo tura Pathianin a anpuia min siam, Evi vir ching chéng lutuk vanga thihnain, kut pawh thawh lova a thlahte zawng zawng min tukdawlnaah, chhûngkhat leh lûngduh ber berte pawh kan inthlah liam a lo ngaih phah ta a nih hi. 

Chu thihnaah chuan engkim hi tawp fel vek ni se, buai a ngai tawh hauh lo tur a ni a. Mahse, thih hnu piah lama khawvel pahnih lo la awm tur, chatuan daih ni bawk si chuan, kan chhûngril nun a vilh ru tlat a, Shakespeare-ate meuh pawhin, 'To be or not to be' tih thu tawi lâr ber an lo phuah chhuah phah ta a nih kha. 

Pu Thanga pawhin Zofa dam lai tawh phawtte hnenah, thling vit ngáihtu zawhna heti hian a lo zawh phah ta a -

Pakhat zela an kal bovin,
An kiam ţhin chhûngkaw tinreng;
Lûngduh zawng zawng chatuan hmunah,
Kim leh ni a awm ang em?

Mi tam zawk lûngkham duh loh zawhna hi, kan duh emaw duh lo emaw kan la chhang ngei dâwn a. A chhanna kan pêk huna kan awm dan erawh chhim leh hmar ang hlauh a ni thung dâwn a ni. Van ram meuh kan thlen tawh hnuah pawh, thihna leh natna reng awm tawh lohna hmunah, vawi khat lûngngaih a la awm tlat dâwn zu nia!

Ţhenkhatin lawmna mittui hruk hul sen loh nen, he zawhna hi an chhang ang. Ţhenkhat erawh natna vawrtawp, lûngchhiatna thûk ber aţangin he zawhna hi an chhang thung ang. Nuin a fa a zawng ang a, pain a thlahtu a zawng ruai bawk ang. Mahse, tumahin sawmna sem chhuaktu Lal Isua erawh an chhuahchhal ngam si lo ang.

C. Luri pa, Rev C Saikhuma pawhin, a fapa duat a han chân meuh kha chuan,

Dam lai piah chatuan ram ka thlir ţhin a,
Sam ang inţhen hnute kan in tâwk leh ngei ang em?

tiin, tim takin zawhna a han zawt te te a. Paulate'n Pathian fapa neitu chuan mahniah hriatna a nei, tih hre chhuak leh vatin, thlamuanna rau rauah pawh van rim nâm chiai chhanna,

Chung Pathian malsawmtu leh dawt sawi ngai lo chuan,
Hmangaihte tân a tiam ka ringhlel lo

tiin, hmangaih chân tawhte hnenah, a thih hnu kum tam liamah pawh thlamuanna thu chah a la sawi ta reng a nih hi. Zoram ringtu, nu leh pa, u leh nau te u, engtik emaw chuan kan hmangaihte kan chânin, tunah pawh kan thlah liam mek a nih hi ti r'u? He khawvel thila kan hmangaihte, an nawmsak loh hlau reng rengin kan dawm a.

Mahse, thih hnu piah lam ramah hian, i u leh nau, i nu leh pa, i pi leh pu leh laina zawng zawngte nen, kim takin thawhlehnaah Lal Isua kiangah chatuan kawngka kan hawng tlâng dâwn em tih ngaihtuahna avangin, mutmu reng tuah thei lovin i nitin hun i chhiar liam ngai em le?

Van hmun ropui, hmangaih ramah khian, kim leh ni a awm ang em tih zawhna hian, mi rûn êm êm a ni si a. Khita van hmun nuamah khian, tlante'n Beramno faka an zai hunah, khawhar takin tlantu kan fak a nih ngat chuan, inchhirin awmzia reng a nei tawh ngai dâwn lova nih hi.