𝐊𝐚 𝐥𝐮𝐧𝐠𝐥𝐞̂𝐧𝐧𝐚 𝐤𝐡𝐚𝐰𝐯𝐞𝐥 𝐭𝐚𝐰𝐫𝐡 𝐡𝐚𝐫 𝐛𝐞𝐫 !

Favang hun duhawm chuan hriat rengna duhawm rawn her chhuahpuiin, thlasik boruak vawt râih pawhin tawnhriat duhawm berte chu an thâmral phal lovin, thlifim kârah ka hriat chhuah ngei theih turin a rawn chhem phei del del a. Hriat rengna nun neitu khawngaihthlak êm êmna chu, amah chauha chu hriat rengna nun a vawn nun rengna chu a ni si. Pachhiatna lungchhiatthlak ber pawh nun khawharna, hmangaihtu reng tawng lova inhriatna nun a ni ngai e, tia Mother Teresa–i’n a lo sawi tawh a taka temtu nih chu a nâ a ni!  

Kâr tluana ruah a sûr cherh cherh reng a, chhumin duh taka min tuam chiai chiai reng hnuah, tukin chu kâwlah favang ni êng mawi tak lo chhuak chuan, thlasik rim a rawn nâm chhuahpui chék chék a. Boruak pawh a rawn vawt riai riai mai. Zing aţangin lunglênna, khawharna nena ţangkawp chuan ka tirilah min ţham er er reng a. Ka mitthlaah theihnghilh hlen atâna ka duh ngawih ngawih nun hlui ngaihawm, ka ngaihtuahnaah ka nun ata nawh reh ka tum tawnhriatte chuan, lam hla tak aţanga chhûng khat hnai belh tak hian min rawn chenchilh ta a.

Hman hmanah Lalthangliana Hnamte-in mangannain a pawlh chiat khawharna hnuaiah –

Thlafâm lu sûn iang rêng hian maw,
Ka ţap ţhin nun hlui dawn kir chângin,

Aw min hnêmtu rêng awm tak ang maw? 

- tih hla a lo sak thawmte chuan, he khawharna khawvelah hian malin ka lêng bik hauh lo tih min hrilh a. Favang tlai ni nêm tak hnuaiah, kawta phul zawlah nula tlangval rualte chuan zan lama rimawi hmanga min awihna tur hmanrua an rem fel mawlh mawlh a. Reiek tlâng pawh romei zâm kârah fiah takin hmuh theih a ni. Kha favang hun nuam taka tawnhriat duhawm ka tawnte kha, tunah zawng khuarei an chang zo ta.

Pate-a hla, ‘Ka dam lai thlipui a ral hunin’ tih lungrûn zeta kaihhlektuin, rûnthlâk zeta a duhthusam –

Hmanah chuan khua hmuna lêng kan ni,
I thlir ang thangvana lêng zawng khi,
Tah tê khian chhingmit suihlung rual dun ila.

Tunah kan kârah zamualpui lian a tla,

- tia a lo puanna hlate chu, duh vang reng ni lovin sak a ngaihna khawvelah hian, 

Ka dawnin suihlung a lêng zual ţhin,
Ţhal favang lelte a lo kiu leh ang a,
Khua hmuna kan lên lai kha lungrûn,
Dawn chângin mi û, ka bang thei lo

- tih hlatea inhnêm mai loh chu, chan reng kan nei ta lo. Chhûngril a sihhnip zova, mittui a lo hnai mai a nih hi. Khâng hmun nuam tak ni ţhin, tunah erawh lung tilêng mai chang zo tate chu mitthlaah lo lang iarh irahin,

Tunah nau ang ka ţah châng ni hian,
Tlâng khan ţhuam chul lo tur khu ka thlir,
Tun thlenga ka nghilh loh mi û nen,
Suihlung ruala kan lênna.

- tiin ngaihtuahna a vak vel ruai a nih hi! Khâng ni liamta aţanga vawiin thleng hian, vawi tam ni a lo chhuakin a tla leh tawh ngei e. Mahse, kan kaihlek hla pakhatin,

Ţhal favang tlai ni tla êng mawi hian,
A liampui lo ka suihlung lên,
Awi a nâ e, ka fâm dawn kei zawng,
Dam takin lungrûn mangţha.

- tia thih a cho uaih uaih ang maiin, hringnunah thlakhlelh tur a vâng zo ta. Vankhamate’n lungchim taka,

Sûl ang min tum loh ka hai lo,
Mahse, aw ngaihzual, i zûn zâmin,
Zamanhmawng thing ang min phuar vel e,
Fâm hma loh chuan nang ngaih ka bâng dawn lo.

- a lo tihte chu, chhûngrila ţap zawih zawih chunga sak a ţulna khawvelah kan cheng a ni si a. An sawi fâm Lalzova’n, ‘Ka chan tawkah ka lungawi lo; Ka dam chhan ka luah zo si lo’ a lo tihna thinlung ang neitu nih chu, thil thlakhlelhawm zawng a ni mawlh lova ni. 

Khawharhna leh lunglênna hi tu ma pumbilh theih loh, phal taka Khuanu’n kan hnena a semzai a nih vangin, Lalţanpuiate’n, ‘Lunglênah khawtlângpui zalêng ka pel’ tia khawharhna khawvela champion ang zia zânga a lo insawinate hi, huat ahnekin thinlungin a ţawmpui ru ngawih ngawih zawk si a. 

Khawharna leh lunglênna khawvel leh duhthusamna hi inzawm tlat, phel hran theih hlek loh an nih angin, PS Chawngthu-in, 

Kan chhuah tlâng zing riaiah phul bawm dingdi,
Siahthing zâr mawi, lawhlei pâr nen,
A kâra’n hlimte’n biahthu di hrilin,
Lên ka nuam duh lai lênmawi nen.

- tiin, he favang boruak dam ruih, a mi zûk erawh nâ tak ni si hnuaiah hian, ‘Ti êma lung tiawi leiah, An la piang ngai lo’ tia F. Rokima-te’n tu emaw chanchin an sawi ang lanu mawlh khan, Pachuapa lung reng a awi kumtluan leh dawn a nih hi!