𝐘𝐌𝐀 𝐃𝐚𝐲 𝐏𝐮𝐚𝐥 – 𝐓𝐥𝐚𝐰𝐦𝐧𝐠𝐚𝐢𝐡𝐧𝐚

 

(In vaiin YMA Day chibai ka bûk a che u)

            Sakhuana talhtum chuan chhung leh khat, thisen zawmpuite meuh pawh ţhenna ramah min vaw darh chum chum a. Politik thli chhia chuan ţhenawm leh ţhian ţha inlaichinna chhem nghingin, hmelma koham ber ang maiin min inngurtir bawk. Duhamna thlipuiin mi thil ti theite ngaihtuahna tui lian ang maia hrut nù zovin, mi retheite pawngnek turin an inailum tawn a. Rethei leh hausa inkâr pawh fur tui lian ang maiin a kuam a zau ta tial tial bawk.
     

         Sakhuana leh khawtlâng nun, nitina mipuite nun danin inzawmna leh kut suiha kal dun an thiam miau loh avangin, kâr khat chhûngin ni khat tui ang kan luangza a. A bak ni dang zawngah erawh khual hmelhriat loh ang maiin kan inpel nghawng nghawng mai a nih hi. A Thanglura dan takah, bel keh phuar khawm theih loh ang mai kan ni zo ta. Sumdawnna, contract leh therhlo avangin kan inmihran zo ti tih ta bawk.  

         Chhim leh hmar, chhak leh hrang inzawm lo ang mai kan nih zawh mêk lai hian, thumal pakhat, hming ni sia hmuha khawih theih loh, Abstract Noun kan tih, thumal pahnih khat maia sawi fiah theih hauh loh, dai kil kâra pamal tâna a chhenfakawm tluk zeta pucca building chhawng ir eih uaia chengte tân pawha thlauhthlak phal loh tur thumal; ‘Tlawmngaihna’ erawhin Zofate hi hrui khat min la vawntir hram hram ţhin a nih hi! 
  

           Zan rei tak, ruah a buak hawk hawk laia chhanchhuah ngai chhan tura lungrual taka ke min pentirtu, kangmei a inhlap ţhuai ţhuai pawha chhanhim ngai chhan tura thih pawh hlau lova min chettirtu, tui lian a so bawrh bawrh pawha nun chhan tura tui thuk lama min zuanthlâktirtu, kawm chhaka ruaipui ţheh a nih mêk laia kawm thlanga chhuanchham chhawmdawl tura ruai buatsaihna hmun min kalsantir theitu, ram leh hnam himna kulh a nghin dur dura hrui khat vuana Zofate min chettirtu Tlawmngaihna hi, YMA Day a lo thlen hian vul zual zel rawh se. 
       

        He thumal, tlawmngaihna hi thlana kan phumbo a nih ngai chuan, uite vawih khum ang maiin Zofate hi pan lam bik pawh nei lo, hruaitu pawh nei mumal lovin kan phi cheng ang a. Mahni seh seh mualah tiin kan tla darh nuai tawh ang. He tlawmngaihna kan vuiliam hunah chuan, rethei leh pachhiate tân khaw thim a rawn cheng tawh ang a.
    

      Ţanpuitu nei lo leh baihvaite khawvel chu, chhun vanglai taka ni thim thut ang maia manganthlak a ni tawh ang. Hrui khat vuan tura sakhuanna leh politik-in thil tih theihna reng a neih loh avangin, tlawmngaihna a boral ni chuan Zofate chan hian maian chan pawh a tluk tawh bawk hek lo ang. Chuvangin, he thumal a boral loh nân leh a vul zual zel theih nân, nang leh kei hian mawhphurhna kan nei vek tih hriain, tlawmngaihna i chawi nung zel ang u.