𝕿𝖊 𝖊𝖈𝖍𝖔 𝖉𝖊 𝖒𝖊𝖓𝖔𝖘...

Hriatna tura duan ka beng hian ri mawi,

Beng hriatna luhkhunga thinlung verhtu,

Thisen zam tin fan za chiai chiai ţhintu,

I âwkâ a hriat lohna a rei ta!

 

Nipui laia siktui luang hër hër ang,

Favang sirva chiap thawm mawi tak ang khâ,

Ţhal laia zo thlifim tleh heuh heuh ang,

Nunna làm siam ţhatu i nui ri khâ!

 

Hriatna beng tihpin a ni ta em ni?

Beng hmulte'n hriatna an khuh  zawk em ni?

Aigupta ţam tlak vanglai ang mai khân,

I âw châkin ka beng a ţam zo ta!

 

Van phaiphuleng ri fán ang i âw khân,

Vantirhkohte lemlawi ri ang ri fëk,

Thinlunga hlimna thlipui tlehtirtu,

Khâ ngei khân biahthu min hlan nawn lul rawh!

𝐌𝐢 𝐦𝐚𝐰𝐥 𝐬𝐚𝐥𝐭𝐚𝐧𝐠

 
A tân thu chuan awmzia reng nei lovin,
Thutiam pawh tin ther tlukin a hlu lo,
A kâm chhuak feikibar ang niin,
Thinlung hliamtu a nih a in hre lo.

Chhechhamna chu nawhchizuar tiamkam ang,
Thu thlunna pawh pângla anga nghet lo,
Phuar zawmtu thir hrui, lazai sîn tak ang,
Mahni inkhawngaihnaa khat liam fo!

Hmar arsi anga nghet thinlung ngei chu,
Ek lung ang maiin ka thinhrik zo va,
Ni anga danglam lo ngaihtuahna chu,
Chu ngei chu ka chhiatna bul a ni ta!

Chakna chu kâwlah Ni anga liamin,
Thahrui pawh zan thimah a tlanchhia a,
Lungchimna chuan lungtenna a hringin,
Lungngaihna chuan thimah a hnutchhiah ta!

Exotic Verse!

Dithlifarfém ruahmal far fep fep iang,
A tân hriat loh hmui fawhna duhawm ber;
Thim chhah ber tawn tlanga thinlung pawhtu,
A nun pum chiahzawp zo vek chunga;
Kuangkuahna tuihnâng bera chiah hnâwnna, 
Thinlung manganna uairittu laka;
Chakna thahrui a chharna thurûk chu!

Ţawngkam nà ber !

Chhulin a kâ a âna, chî pawhin,
Demna feikibar, thir linga deh tluk,
Thing lera khai kån tluka hmuhsit hlawh,
Anchhia nen làm min rêlna a nâ lo!

An thu hlaah thathona tur reng reng,
Hma lam pan châkna nena chhawn tur fuihna,
Awngphah la-a zial mum chhan tur reng reng,
Hmun thim ber pan châkna bak min thlen lo!

A awm a ni, an manganna thûk tak,
Hriatna reng, hriat thiamna pêk ni hek lo,
Chau taka ka tluksawpna laikhumah,
Anni ka khawngaih phâk rual an ni lo!

Chéksawlhna thurolum, hmuhsitna nen,
Chungte ai chuan kha ţawngkam khat a nâ,
Ka thlingte làm khawro phahna ngei kha, 
Ţawngkam azawnga tawi ber a ni si!

Harh chhan hmu tur lovin harh beisei suh!
Chak chhan nei lo chak thlawn, a pamhmai lua!

Hriat Fiahna !

Chhe lailet der chu zahawm ber angin,
Rinawmna diar khumtu a ni ang maw?
Zahpuiawm ber chuan fel ber ang maiin,
Thianghlimna silhfen a sin ngam ang maw?

He thinlung khawngaihthlak ber hi em ni,
Lainatna tel lova an sawisak chu?
Rinna laka rinna nghattu em ni,
Rinawm lo taka an bum nilen chu?

Hmangaihna chuan hmasâng ata tawh kha,
Diriam leh chêksawlh lo hlawh tawh mah se,
Tukdawl rual loh thahrui a neih ţhin kha,
Tenawmnate'n hual vel eng ang mah se.

Ngaihdamna nun khawiah nge a awm tak?
Hriat thiamna chuan nâ tak maia mi khák!

𝐀𝐰 𝐇𝐦𝐞𝐢𝐜𝐡𝐡𝐢𝐚 !

I hmêl mawina duhawm ber phenah khân,

Rûl mi chùk nâ ber a invial si maw!
I hmêl pawisawi lo ber phenahte chuan,
Nunrãwnnain bupui a chhep tak a! 
Lemchan thiam chungchuang ber an sawi anga,
Ţhuro nun nêm, choak nungchang pu si, 
Beramno hmul hliahkhuh, sihal thinlung pu,
Thianghlimna pathiante kâra bawlhhlawh,
Pawnchhe hnângkhâia tenawm ber an sawi,
Sakruang duhawm phena hmelma koham, hlauhawm ber,
Hremhmun luah lum tur zinga mi thianghlim,
Mi suaksual zahawm ber, ka hmangaih chu!

Pachuau Hla Thûk

 

Hun kut 'râwngin a nuai chhiat ka hmuh a,
Hausakna chapo phum bova awmin,
In ropui tlusawp chhe tate zawng nen,
Biak in laichhuatah hringfa ruang zalhin,
Tuipui mangang rum thawm lûngchhiatthlâkah,
Thil nihpung inthlak danglam ka hmuh khân,
Thil reng reng ţawih ral ta ka ngaihtuah a,
Tlâkchhiatna chuan nâ taka min ţhialin,
Hun chu rawn hrângin ka hmangaih ngei chu,
A la rawn la bovin, duhthlanna pawh,
Hnuaichhiahin chân hlauhna vanga mittui,
Ka ngaihtuah, chu bak thlan tur awm loh hun.

Hringnun Tuifinriat Lawnglêng.

Tuifinriat zau taka lawnglêng vakvai,
Tui fawn nawrna lam apianga tawlh ţhin,
Vaukam thleng tura kal ngaihna hre lo,
Pan tur pawha tha chakna nei lo chu!

Vawi tam thlipui leh ruahpui do hântu,
Enkawltu mumal reng tawng ngai lo chu! 
Lawng thing leh a karfungte làm mawih tawh,
Li vir pana muang taka tawlh del del chu!

Chhei! a vanglai nite chuan lawng chungnung,
Mit la tak, chuan hlawh ber a nih vei nen!
Chhul thinga a keu tirh phat ata tawh,
Tuipui thlifimte nghahfâk a ni kha!

Litengsawl leh suar kam chhia dai dárin,
Tui zàng khauh lakah hnehna a chang ţhin,
Tuipui suamhmang leh thil chhe vakvai pawh,
Hmar arsi êng hnuaiah a tudawl ţhin!

Hriatpuitu lawngin a sut hma loh zawng,
A  hriat chian lawngin a suasam hma leh,
A thahrui chakna a chhàh hma kha chuan,
Hnehtu lawnglêng, tuipui ngamtu a ni!

Thahrui chakna ni lo, hmuh theih loh thâ,
Hmanrua reng thawh lova mi tudawl thei,
Tuifinriat mawnga rûn rem tawh tura,
Nawr piltu lawng a tawn hma loh kha chuan!

𝐀 𝐛𝐫𝐨𝐤𝐞𝐧 𝐦𝐚𝐧 !

 
He was a man of secrets,
Of pain and anger inside him,
He closed the door of his heart,
And tight laces on his brows.
He once opened himself naked,
Stood bare in front of love's garden,
Proudly praying a love of songs,
And he made a hell of a mistake!
Hence, a person of interest and conflict,
Of a heart wounded deep inside,
Roaming the earth without a plan,
And hope he abandoned along the way.
What do you know of him?
Why would you judge first,
But cast a judgment upon his life?
And blamed him for not being perfect!
Flee, flee thou sadistic thoughts,
Away, away thou impertinent mind,
Find a cocoon and learn from it,
How a butterfly breaks it and became a beauty!

That Woman !

Ani chu rakzu fir tûi ber ang hian,
Kâm chhûngah thlum taka inchiahzawpin;
Hrawka sâ thla riai riai, nawmna paia,
Pumpui siam nuam ţhin ang a ni si a.
Ani chu ri mawi fân riai ang a ni,
Bengin lungchim taka a ngaihthlak a,
Tisa peng tinrenga mur rawn thlentu,
Lunglênna khawvel mi hruttirtu chu.
Chuvang chuan a ni, ngawlvei ang ka nih,
Ka kâ leh beng reng, nitin nâ an tawrh!

Nun khaw râm !

Lang theia lemchanna, chhûngril ţahna,

Hmuh theiha pang dam, chhûngril dam lohna,

Kal hmasate'n an paltlang nun khawhar,

Khawvel ngaiha nun hausa neite kha!

An chauhna kâwlrâwnah ngei hniak chhuiin,

Pindan lairila an ţahna hringnun,

Chhun lai tak anga puanzar châkawm hi,

Anni iang thlanah ka phum dawn em ni?

Ţiauvut delh reng anga rit ka hringnun,

Ruahpuivanawn sûr hnan ka mittui far,

Hma lam pan tura chakna reng nei lo,

Nun hrâng kâra relh bona zawngtu chu!

Vawiin chuan hlimna reng her chhuahpui lovin,

Naktukin beiseina vüng a chhuah lo'ng,

Thla tamah hlimna a zai thei lo a, nun khaw râm !

Kum tamna pawh lungngaihna mai a ni!

Hlimna a sosân poh leh lungngaih a hnai,

Lawmna pawh dumde mei dêt chhûng daih ţawk,

Ka pian ni chhul reh pin ni se la aw,

Chhula a keu ni a her chhuak lo tur!