𝐏𝐀𝐂𝐇𝐔𝐀𝐔 𝐇𝐋𝐀 𝐇𝐑𝐈𝐋 – 𝐗𝐗𝐗 (Myanmar tleirawl sûnna hla hril)

Myanmar politik kal sual vangin sipai lamin, lainatna nei hauh lovin mipui chunga nunrâwnna chem an vilik a nih kha. Sipai rorêlna duh lova mipuiin lungawi lohna an lantirnaah, Myanmar tleirawl tê, kum 19 mi vel lêk chu silaimuin a deng fuh ta hlauh mai a. A nunna hial a chân phah ta a nih kha.

Zalenna ţana ke a penna kawnga a thu sawite chuan, Zoram mipuite mai bakah khawvel thinlung a dek zár a. Mi tam takin an sûna, ropui taka vuiliam a ni ta a nih kha. Kha tleirawl pual khân hla hril ka phuah ve a, hei hi a ni e.

- - - - - - - - - - - - - - - - - - - - - - - - - 

Aw thihna, uangin intivei mai suh,
Mi tin hlauh leh ţihkhai zawng i ni ngei,
Chelh din rual lohva hringfa lem zotu,
Angkhata mi tin zûk hlum zotu chu!

Khuavang nau ianga duhawmte meuh pawh,
Thil lüng leh rim chhia maia chhuah theitu,
Lalna leh thuneihna tukdawl zawh loh,
Leilûng chhulchhuak laka hnehtu ropui!

Hei en rawh, nang ngamtu che a lo kal,
Mi azawnga lâ tuaitir tê mai chu!
Lainatna tel lova i hriam hmanga,
I âh thlûk ngei chu, a nun reng si hi!

I chhuantawlawl, hun diriam phak loh,
I hriam, khuarei hmanga chhilh bo zawh loh,
I hun favah hriamin a fîk chhum loh,
Kumkhuaa nang tithângtlawmtu tur chu!

Lâ tuaitir chuan hmangaihna hriam lêkin,
I chhiahhlawh nunrâwnna a hmachhawn ta,
Lâ duhawm chuan zalenna chawi sângin,
I thlunglû a tihhai tak váwn váwn hi!

Thihna kut vawta i man niah chuan,
Sûnna mittui aia’n huaisenna dâr,
Khawtlâng dûng tluanah a rik tak zawk hi,
Romei iang thâmral lo tur zalenna!

Kil tinah nang hnehtu fakna hla mawi,
Van phaiphulêng iang a fawn del del e,
Khawvel rumţhaihtu deuhsawhna lûngrûn,
Lungchim taka hringfate’n an rem chu! 

Zofa, lâ duhawm ruang chu chung si-âr,
Zalenna khuahkhirhtu leilung êntu,
Beiseina nung tuhtu duhawm berah,
Mi tin hmuh turin thangvanah chhiah rawh. 

Zalenna nghaisak ni lo chhuah chângin,
Huaisenna kawng botu tân hruaitu nghet,
A hlutna teh phâk loh leh cho rual loh,
Hun thuhnuaia kun ngai lo ni tura’n!

Ţhenkhat pianpui ropuina chang an awm,
Ţhenkhat thawhrim vanga mi ropui pawh,
Ţhenkhat ropuina an bel luih an awm,
Nang zawng, ropui taka thihna hnehtu! 

Tuaitê, nang ang reng tu nge awm tawh ngai?
Kum tamnate chuan i lakah hnehna,
I kimtlâng mawinate uai chûl turin,
Thiltihtheihna reng an nei ngai lo ang!

Thihna lem thiam kawngah nang tluk tur reng,
A tuk ţhat ber ţumah meuh pawh Khuanu’n,
Tlak lei a hrual puitling tawh lo’ng e,
I tenawm lai ber pawha hriak thïh tlak! 

Thihna thinlung sahal, chawlhna hmu lo,
Tukdawla thunun thei an awm ngai chuan,
Nang, hmei alaia lâ lehnghal tluk hi,
Piang leh hian khuavel a mawi ang em ni?

Nang chuan thihna chu pasalah neiin,
Lûngchim taka i kuangkuah tak hi le,
Hun lo taka nipui pangpâr duhawm,
Vur tlate’n chhilh bo hlen an tum ang chu.

Mahse, ka tuai duhawm, i mawi chuang e,
Thihnain mi tin min zûk zawhah pawh,
Nunrâwnna meuh thlana an vui liamah,
He hla hril hmangin i nung reng zawk ang!  

𝐋𝐮̂𝐧𝐠𝐧𝐠𝐚𝐢𝐡𝐧𝐚 𝐇𝐥𝐚 𝐏𝐮𝐢 !

Aw, ka lûngngaihna leh manganna hi,

A kuam chin zau zawng, thûk zawng leh tam lamte,

Teh theih, buk theih leh hlam theih ni teh se,

Hriatpuitu a’n lei leh van ka au tur!

Tuifinriat mawng ang maia thim chhah ber,

Leia ţiau vaivutte buk rihzawng ang,

Vana arsite anga chhiar sen loh,

Chuti takin ka nun a nâ si a!

Mit khaw hmuhnate làm a vai zo a,

Beng hriatna pawh tihpin a ni zo ta,

Thâwl lâk hlekah ruh chùktuah a nâ a,

Nunna pawh thih châkin a sahal e!

Beidawnna chuan nâ takin mi diriam,

Beiseina paw’n fahrah iang mi thlauhthla,

Thling kâra ka nun tui kâng chat mêk chuan,

Tuihnà tharlam reng a mamawh hek lo!

Manganna hruihrualin mi hlapna chu,

Dam lai tân tawrh zawh mi rual a ni lo,

Lûngngaihna fei hmawrte’n min chhûnna pawh,

Rawhtuina mei let sarih tluk a thîp!

Vanrţian chu thim chhah mûp ang a ni a,

Chhun vanglai ber khawkhênna ram ang,

Tlai ni nêmah tawrhna a zual ting a,

Zan thim hnuaia mi mangang aurâwl chu!

Khuanu zahngaihna chuan mi thinhrik a,

A lainatna kâng ngai lo paw’n mi kalhlen,

Ka tuhrah phurtu nghâwngkawl a tliak e,

Hmangaihna, ţhuam ang mi dotu hmêlma!

Tuifinriat zau taka lawnglêng vakvai,

Nawr kaltu thlifimte’n an hransan,

Thihna thlan khur pan tura chakna reng,

Lawng karfunga pai lo mi khawngaihthlâk! 

Ka laka hriat thiamna pai hringmi reng,

Ka lûngngaihna ruam mi fanpuitu nen,

Ka ţahna mittui sûntu tu mah reng,

Ka tawng lo, kâwlkil piah lam ram thlengin! 

Aw, vawi khat chiah mi khawngaih thei lo’m ni?

Vawi khat chauh mi chhanchhuak leh dâwn lo’m ni?

A ni, vawi khat chiah mi chhâwk hahdam rawh,

Ka nun, hremhmun mei hliau iang a nat hi! 

𝐈𝐧𝐩𝐮𝐚𝐧𝐧𝐚

Leilung hi tûr chak ber a lo nih a,
A chhia leh a ţha hriatna thing pawhin,
Pathian anpui tân thihna a thlen chuan,
Bumtu rûl ber ânchhia vanga thihna,
Tem si lo a nih laiin kei engvang?
Tumna leh duhthlanna ka pianpui kher?
Ka tihsual rah, sual tawpkhâwka puan paw'n,
Pathian nen kan inzawmna a tihchah kher?
Heti khawpa zahngaihna awlsam leh,
Thilthlawnpêk ni si engvang Pathianin,
A thinrimna berhbu hmanga mi vau?
Lalpa, tu ka nih chung thuahte zawng,
Engtin ka hnial ngam tehlul ang che ni?
Mahse, thisen thianghlim kaltlang khera,
Tlanna i rawn thawh dan hi mak ka ti!
Nang chuan kei hi mi âtchilh a lo ni,
I mi ngaihtuahnate chu ţiau vaivut,
A tam lam ka hriat rual loh ai pawhin,
A nasain a lo tam hle si a,
Ka sualnate chu mite'n hrem tlakah,
Bata ruatah an ngai lui a nih paw'n,
Nangin mi theihnghilhsak ţhinnate chu,
I mi khawngaih vang a ni reng fo ang!

𝕿𝖊 𝖊𝖈𝖍𝖔 𝖉𝖊 𝖒𝖊𝖓𝖔𝖘...

Hriatna tura duan ka beng hian ri mawi,

Beng hriatna luhkhunga thinlung verhtu,

Thisen zam tin fan za chiai chiai ţhintu,

I âwkâ a hriat lohna a rei ta!

 

Nipui laia siktui luang hër hër ang,

Favang sirva chiap thawm mawi tak ang khâ,

Ţhal laia zo thlifim tleh heuh heuh ang,

Nunna làm siam ţhatu i nui ri khâ!

 

Hriatna beng tihpin a ni ta em ni?

Beng hmulte'n hriatna an khuh  zawk em ni?

Aigupta ţam tlak vanglai ang mai khân,

I âw châkin ka beng a ţam zo ta!

 

Van phaiphuleng ri fán ang i âw khân,

Vantirhkohte lemlawi ri ang ri fëk,

Thinlunga hlimna thlipui tlehtirtu,

Khâ ngei khân biahthu min hlan nawn lul rawh!

𝐌𝐢 𝐦𝐚𝐰𝐥 𝐬𝐚𝐥𝐭𝐚𝐧𝐠

 
A tân thu chuan awmzia reng nei lovin,
Thutiam pawh tin ther tlukin a hlu lo,
A kâm chhuak feikibar ang niin,
Thinlung hliamtu a nih a in hre lo.

Chhechhamna chu nawhchizuar tiamkam ang,
Thu thlunna pawh pângla anga nghet lo,
Phuar zawmtu thir hrui, lazai sîn tak ang,
Mahni inkhawngaihnaa khat liam fo!

Hmar arsi anga nghet thinlung ngei chu,
Ek lung ang maiin ka thinhrik zo va,
Ni anga danglam lo ngaihtuahna chu,
Chu ngei chu ka chhiatna bul a ni ta!

Chakna chu kâwlah Ni anga liamin,
Thahrui pawh zan thimah a tlanchhia a,
Lungchimna chuan lungtenna a hringin,
Lungngaihna chuan thimah a hnutchhiah ta!

Exotic Verse!

Dithlifarfém ruahmal far fep fep iang,
A tân hriat loh hmui fawhna duhawm ber;
Thim chhah ber tawn tlanga thinlung pawhtu,
A nun pum chiahzawp zo vek chunga;
Kuangkuahna tuihnâng bera chiah hnâwnna, 
Thinlung manganna uairittu laka;
Chakna thahrui a chharna thurûk chu!

Ţawngkam nà ber !

Chhulin a kâ a âna, chî pawhin,
Demna feikibar, thir linga deh tluk,
Thing lera khai kån tluka hmuhsit hlawh,
Anchhia nen làm min rêlna a nâ lo!

An thu hlaah thathona tur reng reng,
Hma lam pan châkna nena chhawn tur fuihna,
Awngphah la-a zial mum chhan tur reng reng,
Hmun thim ber pan châkna bak min thlen lo!

A awm a ni, an manganna thûk tak,
Hriatna reng, hriat thiamna pêk ni hek lo,
Chau taka ka tluksawpna laikhumah,
Anni ka khawngaih phâk rual an ni lo!

Chéksawlhna thurolum, hmuhsitna nen,
Chungte ai chuan kha ţawngkam khat a nâ,
Ka thlingte làm khawro phahna ngei kha, 
Ţawngkam azawnga tawi ber a ni si!

Harh chhan hmu tur lovin harh beisei suh!
Chak chhan nei lo chak thlawn, a pamhmai lua!

Hriat Fiahna !

Chhe lailet der chu zahawm ber angin,
Rinawmna diar khumtu a ni ang maw?
Zahpuiawm ber chuan fel ber ang maiin,
Thianghlimna silhfen a sin ngam ang maw?

He thinlung khawngaihthlak ber hi em ni,
Lainatna tel lova an sawisak chu?
Rinna laka rinna nghattu em ni,
Rinawm lo taka an bum nilen chu?

Hmangaihna chuan hmasâng ata tawh kha,
Diriam leh chêksawlh lo hlawh tawh mah se,
Tukdawl rual loh thahrui a neih ţhin kha,
Tenawmnate'n hual vel eng ang mah se.

Ngaihdamna nun khawiah nge a awm tak?
Hriat thiamna chuan nâ tak maia mi khák!

𝐀𝐰 𝐇𝐦𝐞𝐢𝐜𝐡𝐡𝐢𝐚 !

I hmêl mawina duhawm ber phenah khân,

Rûl mi chùk nâ ber a invial si maw!
I hmêl pawisawi lo ber phenahte chuan,
Nunrãwnnain bupui a chhep tak a! 
Lemchan thiam chungchuang ber an sawi anga,
Ţhuro nun nêm, choak nungchang pu si, 
Beramno hmul hliahkhuh, sihal thinlung pu,
Thianghlimna pathiante kâra bawlhhlawh,
Pawnchhe hnângkhâia tenawm ber an sawi,
Sakruang duhawm phena hmelma koham, hlauhawm ber,
Hremhmun luah lum tur zinga mi thianghlim,
Mi suaksual zahawm ber, ka hmangaih chu!

Pachuau Hla Thûk

 

Hun kut 'râwngin a nuai chhiat ka hmuh a,
Hausakna chapo phum bova awmin,
In ropui tlusawp chhe tate zawng nen,
Biak in laichhuatah hringfa ruang zalhin,
Tuipui mangang rum thawm lûngchhiatthlâkah,
Thil nihpung inthlak danglam ka hmuh khân,
Thil reng reng ţawih ral ta ka ngaihtuah a,
Tlâkchhiatna chuan nâ taka min ţhialin,
Hun chu rawn hrângin ka hmangaih ngei chu,
A la rawn la bovin, duhthlanna pawh,
Hnuaichhiahin chân hlauhna vanga mittui,
Ka ngaihtuah, chu bak thlan tur awm loh hun.

Hringnun Tuifinriat Lawnglêng.

Tuifinriat zau taka lawnglêng vakvai,
Tui fawn nawrna lam apianga tawlh ţhin,
Vaukam thleng tura kal ngaihna hre lo,
Pan tur pawha tha chakna nei lo chu!

Vawi tam thlipui leh ruahpui do hântu,
Enkawltu mumal reng tawng ngai lo chu! 
Lawng thing leh a karfungte làm mawih tawh,
Li vir pana muang taka tawlh del del chu!

Chhei! a vanglai nite chuan lawng chungnung,
Mit la tak, chuan hlawh ber a nih vei nen!
Chhul thinga a keu tirh phat ata tawh,
Tuipui thlifimte nghahfâk a ni kha!

Litengsawl leh suar kam chhia dai dárin,
Tui zàng khauh lakah hnehna a chang ţhin,
Tuipui suamhmang leh thil chhe vakvai pawh,
Hmar arsi êng hnuaiah a tudawl ţhin!

Hriatpuitu lawngin a sut hma loh zawng,
A  hriat chian lawngin a suasam hma leh,
A thahrui chakna a chhàh hma kha chuan,
Hnehtu lawnglêng, tuipui ngamtu a ni!

Thahrui chakna ni lo, hmuh theih loh thâ,
Hmanrua reng thawh lova mi tudawl thei,
Tuifinriat mawnga rûn rem tawh tura,
Nawr piltu lawng a tawn hma loh kha chuan!