𝐇𝐫𝐢𝐚𝐭 𝐭𝐡𝐢𝐚𝐦𝐧𝐚 𝐤𝐡𝐚𝐰𝐢𝐚𝐡 𝐧𝐠𝐞 ?

 

An thinlunga hriat thiamna, khawiah nge?

An mita fiah taka hmuh theihna pawh?

An benga nghik thawm ngaihthlak thiamna pawh,

Hriat fiahna ruai reng an kil thiam si lo.

Puanzar phena hlimthla hmu thiam lovin,

Lukhum hnuaia sakruang zinkawng zawh nen,

Ri lo va rum thawm, ţap rawih rawih thawm leh,

Pindan ril chhûnga mangang aurâwl nen!

A zinkawng zawh khawharthlak, thim chhahzia,

A chhûngril ber rilţamna tlai ni awm lo,

A thlarau nun làm saruaka vakvai,

Lei hreawma lungchhe vankaia chu!

A kâ rengin a tawrhzia puang lovin,

A chetzia pawhin a hreawm chanchin,

A leili nen an puangzar ngai lo ve,

Ngawih rengna, a ţanga a pawmtlei chu!

𝐏𝐡𝐮𝐧ṭ𝐢𝐡𝐚 𝐥𝐞𝐡 𝐓𝐮𝐚𝐥𝐯𝐮𝐧𝐠𝐢

 

Khaw nge ka awmna hmun hi ni ta ngai?

Lei nge van tih reng ka thliar hrang thiam lo.

Tuipui hnâwng kâr nge meipui vâm chheh kâr zawk?

Tun hi eng hun darkâr bi nge ni le?

Hah rimtawngna nge lu sûnna hmun zawk?

Thih nawmna nge Dam thlakhlelhna nun zawk?

Nunna meuhin thihna a zar buai a,

Thihna chu nung taka a lawm tak hi!

Vawi khat mai ni lo mi tihhlum tak hi,

Mitmeng remhriatna phena thinlung sak;

Cheksawlhna leh entleuna pai chunga,

Bumna tinrenga chawivul inlemna!

Ka thinlung pachhiatna laka hnehtu,

Ka khawhmuh lamin an chawimawi Lalnu;

I kâm chhuak rimawi tinreng zingah te,

Khawngaihna ri mawi thawm a reh ta si!

I heh thianghlimna pârzû ka tlan chuan,

Eng intiamkamna khawlhkham nge a ken tel?

Mahni lam insalbeha intiamna,

Chu chuan lungawina zawng mi thlen ngei e.

Nang erawh chuan sal angin mi lei ta a,

Hnuaichhiah nun mi hnawn ta hlauh zawk si hi;

Hralh suma mi tlanna avangin,

Ka kâm chhuak tih tlawma phuarbeh a ni.

Vawi tam tak i mi fawhnate ngei chuan,

Thinlung lei khek hmunah chanvo neiin;

Nawmchennain a man mi ţhing si a,

Vawi tam mi khawih chingpenna chu eng nge?

Kawlphe tluka rang, nawmna pai si lo,

Batna lehkha phek tichhah zualtu;

Rulh zawh loh tur thlenga tam bat belhna,

Vawi za fawh pawha intlanna awm lo!

𝐓𝐮 𝐧𝐠𝐞 𝐡𝐫𝐞 𝐭𝐡𝐢𝐚𝐦 𝐧𝐢 ?

 

A hmêla ânchhe züngzâm inphaman,

A mitmeng dûl râih, thlanmual anga reh,

Tisa vun mâm tak ţhin, chûl riai riai chu,

Tawrhna namênlo ziarâng an ni si!

Tisa phûrnate'n mual an liamsan a,

Thathona pawh vau zamin a kimki!

Thahrui chakna, rial anga dai zovin,

Mithmuh tinrengte pawh hneawm zawhna!

Thla mawina chu thinlung lungchhiatna mai,

Thla bial vanglai duhawmna pawh dawt thu!

Favang khaw nawmna chu hun tiam chhûng chauh,

Tiamthu lek phei chu ek lûng thubarawh!

Mihring hriatna parûk kaihthawha awm,

Hriatna famkim thlentu lakbonaah,

Mihringa beiseina, hma lam panna,

A kawngte làm chilh bova awm ta chu!

Ani chu kâwlphe leh ţek tla hnuaia,

Hmangaihna fahrin, a lova tlei lo,

Nunkhaw nawmna tehfung leklam bul ber,

Chu ngeiin a hransan a ni si a!

Tu nge ani chu hre thiam ngai ang ni?

Tu nge a nun chhûngril hmu fiah ngai ang?

𝐌𝐢𝐧 𝐚𝐮 𝐯𝐞 𝐡𝐢𝐚𝐧 𝐤𝐚 𝐫𝐢𝐧𝐠 𝐬𝐢 𝐚...

 

Rûn a ngui ruai, khawmual tlângtluanin,

Ka thinlai hmarpui suar ang a chim ni kha;

Nêmte'n tlai tin a her chhuak ţhin e.

Pûkpui angin ka hmu thim ruai ruai,

Ka di lênna chûl ram fan changin;

Kan nun puan ang a hlui thei lo'ng e.

Awmhar tinkim ka dawn zo lo ve,

Suihlûng ti lêng pualchang rual mual an liam e;

Zatlâng lam kaia ka zuk hmuh le.

Min tuarpui thiam lo ka di ngaih chu,

Chunnu lûng a lêng zan thla êng zâm kârah;

Phunchawng lelthâng ţahna kan vuan e.

Hlimte'n lên lai ni a liam zo ta,

Ka ngai mang e kan sul i hnu mual liam lo;

Chûl hnu'n ngaiin mi au ve ngei ang.

𝐙𝐨𝐫𝐚𝐦 𝐊𝐨𝐡𝐡𝐫𝐚𝐧 𝐦𝐚𝐦𝐚𝐰𝐡 𝐦𝐢 𝐚 !

 

        Zoram kohhran (kohhran pawl zawng zawng sawina a ni zel ang) chet dan leh rorêl dan hi, Baibul nen hian kan lo chîk tawn ve tawh ngai em? hmu ve ngeiin ka ring. 

        Zoram kohhran hnârkaitu; Pastawr, Upa leh Rawngbawltu (T.Upa etc rorêl thei chin) tam zawkte hi mihring mihrinna kawngah pawh mi fel tak tak, khawvel leh mipui mimir ngaih pawha mi fing leh dik thluam pailgaak lei halt ka naw chhuanawm thaw khat, fimkhur taka kohhran tâna rorêl ţhin an ni deuh vek a. Kohhran rorêlna sâng ber, Synod leh General Assembly Inkhawmpuite hi han thlir ila, an ni thlup vek mai.

        Fimkhur tak leh dai buak hlau tak, puithu thei ang berin ro an rêl ţhin a nih hi. Chutiang bawkin Tualchhûng Kohhran enkawltute pawh an ni vek e. hnârkaitute hi an fingin an remhre êm êm vek a.

         Mahse, kan Lal Isua a lo pian tirh phat ata, kan Pathian thil tum bulpui pakhat chu mi fing finna leh remhre rem hriatna hnawl a ni tlat si! Vanlalsailova thu sawi dik zet mai chu, kohhran enkawltu chu Thlarau mi, Thlarau Thianghlimin a pawl ţhin an ni tur a nih laiin, kan kohhran enkawltute erawh khawvel thila fing leh remhria deuh hlir an nih zawh tak hi!

        Kan rorêl fel thluam mai te, kan rawngbawlna peng hrang hrang dik thluam mai te, inkhawmna ina kan awm dan leh kan thu sawi zahawm êm êm mai te hi han thlir ila, kraws thu chu boral mekte tân chuan âtna a ni h si nen hian a inhmeh lo kual vel vek tawh a ni ber! 

       Khawvel aţangin harsatna a lo chhuak a, khawvel ngaihdanah zawng inkhawm loh hi a dikin a fel thluam mai! chhûngte humhalhnaah in ţangkai hek lo!' tiin Zoram kohhran enkawltute hi a rawn khak bawrh bawrh mai nia! a ti hmiah mai! 

       Zoram kohhran hruaitu tam zawkte hi chu an fingin an remhre leh lutuk tawh a! hi han en chiang mah ila, khawvel ngaiha âtthlak leh khawvel ngaiha awm leh mawi lo lam zawng hlirin a nih hi maw le, Thlarau hruaia awm a kohhrante chu an chet ţhin le! 

        Pentikos nia Thlarau Thianghlim lo thleng kha, khawvel ngaihah chuan zu rui buai ang maia nû bût a nih si kha! ! , âtthlak taka Pathian hruaia awmte an nih ngai hi! 

        Tualchhûng kohhran zingah, hei hi chu kohhran tih atân a mawi lo, a kohhran zia lo te hi kan han ti thla ve rawk zel a! takte hian, Zoram kohhran hi a kai harh thei ngang lo! fel ni sia kohhran enkawltu a mamawh ngawih ngawih a lo ni e!

       A tawp nân hei hi sawi ang. Mi â, nu deuh bùt kan tih hian mi phutkhat, mi ang mang lo leh khawsak dan thlenga mi chhawih lam kan sawina a ni lo e. kan tihna zawk a ni. An chet dan leh khawsak phung bah deuh nuaih mah se, an rilru leh ngaihtuahna erawh Thlarau Thianghlim uaona hnuaiah a fim êm êm reng zawk ţhin a lo ni e.

𝐏𝐀𝐂𝐇𝐔𝐀𝐔 𝐇𝐋𝐀 𝐇𝐑𝐈𝐋 - 𝐈

 

Ka vanglaini liam tate thlir kirin,

Hunbi chhiar vawi tam ka paltlangte nen,

Nipui hnah ţiak tir leh thing hnah tlakawlh,

Thlasika uaia chûl tate zawng pawh.

Ka vanglai nite chuan keipui koham,

Zan vak sihal sa seh tur zawng ruai leh,

Rûl chùk nâ mi leh rûlhlaite nen làm,

Ka hringnun fiahtu an chang tawh ngei e.

Khaw pum natna ka phurh nite liamin,

Diriamna leh chêksawlh tinrengte nen,

Hmai fang mawina chuaia chûl tate pawh,

Mi chak ber angin ka hmachhawn ţhin kha!

Khuanu'n khaw vawt tawrh dam dan mi zirtir,

Mual liam tate mangţha thiamnate pawh,

Nipui leh ţo ruah do daih dan nen làm,

Fiahna kaltlangin an thurûk ka hria!

Mahse, aw nang mi alaia hmeichhia,

Ka chunga i thiltihtheihna thurûk,

Tha reng thawh lova mi tukzalna hi,

A tawrh dam dan reng ka zir thiam thei lo!

Tharum chu hriamin a chhanglet lem lo,

Fakna pawh lawmthuin a chhunzawm lo,

Thinrimna chu reh ria tudaiin,

Lunglênna làm hnawl turin a chak si!

Thinlung ang renga sàk eng nge awm ngai?

Luhlulna tluka hmêlma lian awm maw?

A tuamtu sakruang nu hnâp phenah chuan,

Mi rilru sak ber a biru si a!

Khawiah nge thinlung nêmna thurûk chu?

Lung anga ngawichawi leili chakna pawh?

Ngaihtuahna tinreng luah ţhintu zawhna,

A chhanna reng hre lovin ka chau ta!

𝐈 𝐓𝐞𝐥 𝐋𝐨 𝐍𝐮𝐧 !

Thlaler hmun khawro, tuihna reng awm lo,

Rah chhuah lova thing ro züng thi mek leh,

Thlasik khaw vawt tak, thlîngte lam vïlhtu,

Riakmaw ianga zâr tin hnawl ka hringnun!

Ka mawina, zan thim hnuaiah thâmralin,

Ka chakna thahrui hnùk, chhàha awmin,

Ka uanthuanna ngei chuan mi nuihsawh si,

Ka chhuan ber, ka tlakchhamna kumhlun tur!

Lawngpu rěngin an tlawh ngai loh tuipui,

Hruaitu hmar arsi bikbosan lawnglêng,

Hawi lam neia khalh ngiltu rěng nei lo,

Tuipui thlifimte chhem lên chhem lên chu!

Ka nunna hnùkpui chuan mi thlauhthla a,

Thlarau rethei vakvai, chawlhna hmu lo,

Chhûngril zialtu, nunhlui mual liam ngei chu,

A lo ni, ka chantawk, ka kumkhaw ro!

𝐊𝐚 𝐇𝐫𝐢𝐧𝐠𝐧𝐮𝐧 𝐙𝐢𝐧𝐤𝐚𝐰𝐧𝐠!

 

Hun tam liamin pâr tam an ţil zo ta,
Lungngaihna ngûlzem kâra'n bo zovin;
Hriat ngai loh ngena ka ţah vawng vawng a,
Hriat reng ţhinte ka hlauh ngawih ngawih ni le!

Ka kutthlakna sulhnu vanga inchhir,
Kutthlak loh suangtuaha ka châk si hi;
Tawn loh hmangaihna ngaia kûr diamin,
Ka tawn hmangaihna ka hlamchhiah si ţhin!

Engkim ka pual, engmah lem ka neih loh,
Ka hringnun keimaha ka zawn mek chu, 
A tak ram chu chiang taka hmu tain,
Hringnun hi engmah lo mai a lo ni.

𝐋𝐮𝐧𝐠𝐥𝐞𝐧 𝐳𝐚𝐢 𝐤𝐚 𝐬𝐚 𝐞.

Ngai r’u tho leh fa zalêng rualte’n,
Suihlungrualin van hmangaih pâr kan tlan a,
Kei zawng ka Lal duh lai kan ti e.

Kan ngaih lai Isua a mawi ber mai,
Rethei naufa lungngaia rum min hruai a,
Min phuar chiai e hmangaih hrui ngeiin.

Saron pâr mawi Isua pâr tlanin,
Lâ leh val tin zai ri mawi a fawn vel e,
Isua pâr kan tlan e nui hiauvin.

Zion ram ngai zawng khua hmunah aw,
Lêng za ila inţhen thu reng sawi lovin,
Lungrualte’n dâr ang lên ka nuam.

Mahse kan lênna Leitlângpuia’n,
Mite’n an lungkham ber e hripui lêng hi,
Fak hla sak chawl r’u min lo ti e.

Ka ngai mang e, ka lal ram hlun tur,
Tah chuan fak hla mawi rem chawl hian ka ring lo,
Zai nêmin an fak ang Beramno.

Chhûng tin kaina rûnah kan tlei lo,
Saisen têta nuhnûn tui ngai ang hian maw,
Kan ngai vawng vawng che Lalnunnêmtê.

Ţ𝐚𝐰𝐧𝐠𝐤𝐚𝐦 𝐤𝐡𝐚𝐭 𝐥𝐞𝐤 𝐧𝐚 𝐛𝐞𝐫 𝐬𝐢 𝐜𝐡𝐮 !

 

Chhulin a kâ a âna, chî pawhin,

Demna feikibar, thir linga deh tluk,

Thing lera khai kån tluka hmuhsit hlawh,

Anchhia nen làm min rêlna a nâ lo!

An thu hlaah thathona tur reng reng,

Hma lam pan châkna nena chhawn tur fuihna,

Awngphah la-a zial mum chhan tur reng reng,

Hmun thim ber pan châkna bak min thlen lo!

A awm a ni, an manganna thûk tak,

Hriatna, hriat thiamna reng pêk ni hek lo,

Chau taka ka tluksawpna laikhumah,

Keia khawngaih phâk an ni lul lo e!

Chéksawlhna thurolum, diriamna nen,

Chungte ai chuan kha ţawngkam khat tê chauh,

Ka thlingte làm khawro phahna ngei kha, 

Ţawngkam tawi leh nâ ber a ni si a!

Harh chhan hmu tur lovin harh beisei suh!

Chak chhan nei lo chak thlawn, a pamhmai lua!

𝐋𝐔𝐍𝐆𝐙𝐈𝐍𝐍𝐀

A thla a zâp e, chung vanlaizawla'n,
A phar del del ţhin, chhum lênna kârah,
A nun sual thawm ri, ka lûng chimtu chu,
A baihvaina, ţah lai mittui kotu!

Karei! thlipui hrângin a nuai chiam ţhin,
A ni, thim chhahin a bawm lúk ţhin hi,
A tualchaina hmuna riangvai tak a,
Hringnun a buanna khawvelin mi rün!

I hringchan ngai thiam thei hian ka mawi lo,
Rei tak ang maw i, hringnun sual hun chhûng?