𝐏𝐀𝐂𝐇𝐔𝐀𝐔 𝐇𝐋𝐀 𝐇𝐑𝐈𝐋 - 𝐈

 

Ka vanglaini liam tate thlir kirin,

Hunbi chhiar vawi tam ka paltlangte nen,

Nipui hnah ţiak tir leh thing hnah tlakawlh,

Thlasika uaia chûl tate zawng pawh.

Ka vanglai nite chuan keipui koham,

Zan vak sihal sa seh tur zawng ruai leh,

Rûl chùk nâ mi leh rûlhlaite nen làm,

Ka hringnun fiahtu an chang tawh ngei e.

Khaw pum natna ka phurh nite liamin,

Diriamna leh chêksawlh tinrengte nen,

Hmai fang mawina chuaia chûl tate pawh,

Mi chak ber angin ka hmachhawn ţhin kha!

Khuanu'n khaw vawt tawrh dam dan mi zirtir,

Mual liam tate mangţha thiamnate pawh,

Nipui leh ţo ruah do daih dan nen làm,

Fiahna kaltlangin an thurûk ka hria!

Mahse, aw nang mi alaia hmeichhia,

Ka chunga i thiltihtheihna thurûk,

Tha reng thawh lova mi tukzalna hi,

A tawrh dam dan reng ka zir thiam thei lo!

Tharum chu hriamin a chhanglet lem lo,

Fakna pawh lawmthuin a chhunzawm lo,

Thinrimna chu reh ria tudaiin,

Lunglênna làm hnawl turin a chak si!

Thinlung ang renga sàk eng nge awm ngai?

Luhlulna tluka hmêlma lian awm maw?

A tuamtu sakruang nu hnâp phenah chuan,

Mi rilru sak ber a biru si a!

Khawiah nge thinlung nêmna thurûk chu?

Lung anga ngawichawi leili chakna pawh?

Ngaihtuahna tinreng luah ţhintu zawhna,

A chhanna reng hre lovin ka chau ta!

𝐈 𝐓𝐞𝐥 𝐋𝐨 𝐍𝐮𝐧 !

Thlaler hmun khawro, tuihna reng awm lo,

Rah chhuah lova thing ro züng thi mek leh,

Thlasik khaw vawt tak, thlîngte lam vïlhtu,

Riakmaw ianga zâr tin hnawl ka hringnun!

Ka mawina, zan thim hnuaiah thâmralin,

Ka chakna thahrui hnùk, chhàha awmin,

Ka uanthuanna ngei chuan mi nuihsawh si,

Ka chhuan ber, ka tlakchhamna kumhlun tur!

Lawngpu rěngin an tlawh ngai loh tuipui,

Hruaitu hmar arsi bikbosan lawnglêng,

Hawi lam neia khalh ngiltu rěng nei lo,

Tuipui thlifimte chhem lên chhem lên chu!

Ka nunna hnùkpui chuan mi thlauhthla a,

Thlarau rethei vakvai, chawlhna hmu lo,

Chhûngril zialtu, nunhlui mual liam ngei chu,

A lo ni, ka chantawk, ka kumkhaw ro!

𝐊𝐚 𝐇𝐫𝐢𝐧𝐠𝐧𝐮𝐧 𝐙𝐢𝐧𝐤𝐚𝐰𝐧𝐠!

 

Hun tam liamin pâr tam an ţil zo ta,
Lungngaihna ngûlzem kâra'n bo zovin;
Hriat ngai loh ngena ka ţah vawng vawng a,
Hriat reng ţhinte ka hlauh ngawih ngawih ni le!

Ka kutthlakna sulhnu vanga inchhir,
Kutthlak loh suangtuaha ka châk si hi;
Tawn loh hmangaihna ngaia kûr diamin,
Ka tawn hmangaihna ka hlamchhiah si ţhin!

Engkim ka pual, engmah lem ka neih loh,
Ka hringnun keimaha ka zawn mek chu, 
A tak ram chu chiang taka hmu tain,
Hringnun hi engmah lo mai a lo ni.

𝐋𝐮𝐧𝐠𝐥𝐞𝐧 𝐳𝐚𝐢 𝐤𝐚 𝐬𝐚 𝐞.

Ngai r’u tho leh fa zalêng rualte’n,
Suihlungrualin van hmangaih pâr kan tlan a,
Kei zawng ka Lal duh lai kan ti e.

Kan ngaih lai Isua a mawi ber mai,
Rethei naufa lungngaia rum min hruai a,
Min phuar chiai e hmangaih hrui ngeiin.

Saron pâr mawi Isua pâr tlanin,
Lâ leh val tin zai ri mawi a fawn vel e,
Isua pâr kan tlan e nui hiauvin.

Zion ram ngai zawng khua hmunah aw,
Lêng za ila inţhen thu reng sawi lovin,
Lungrualte’n dâr ang lên ka nuam.

Mahse kan lênna Leitlângpuia’n,
Mite’n an lungkham ber e hripui lêng hi,
Fak hla sak chawl r’u min lo ti e.

Ka ngai mang e, ka lal ram hlun tur,
Tah chuan fak hla mawi rem chawl hian ka ring lo,
Zai nêmin an fak ang Beramno.

Chhûng tin kaina rûnah kan tlei lo,
Saisen têta nuhnûn tui ngai ang hian maw,
Kan ngai vawng vawng che Lalnunnêmtê.

Ţ𝐚𝐰𝐧𝐠𝐤𝐚𝐦 𝐤𝐡𝐚𝐭 𝐥𝐞𝐤 𝐧𝐚 𝐛𝐞𝐫 𝐬𝐢 𝐜𝐡𝐮 !

 

Chhulin a kâ a âna, chî pawhin,

Demna feikibar, thir linga deh tluk,

Thing lera khai kån tluka hmuhsit hlawh,

Anchhia nen làm min rêlna a nâ lo!

An thu hlaah thathona tur reng reng,

Hma lam pan châkna nena chhawn tur fuihna,

Awngphah la-a zial mum chhan tur reng reng,

Hmun thim ber pan châkna bak min thlen lo!

A awm a ni, an manganna thûk tak,

Hriatna, hriat thiamna reng pêk ni hek lo,

Chau taka ka tluksawpna laikhumah,

Keia khawngaih phâk an ni lul lo e!

Chéksawlhna thurolum, diriamna nen,

Chungte ai chuan kha ţawngkam khat tê chauh,

Ka thlingte làm khawro phahna ngei kha, 

Ţawngkam tawi leh nâ ber a ni si a!

Harh chhan hmu tur lovin harh beisei suh!

Chak chhan nei lo chak thlawn, a pamhmai lua!

𝐋𝐔𝐍𝐆𝐙𝐈𝐍𝐍𝐀

A thla a zâp e, chung vanlaizawla'n,
A phar del del ţhin, chhum lênna kârah,
A nun sual thawm ri, ka lûng chimtu chu,
A baihvaina, ţah lai mittui kotu!

Karei! thlipui hrângin a nuai chiam ţhin,
A ni, thim chhahin a bawm lúk ţhin hi,
A tualchaina hmuna riangvai tak a,
Hringnun a buanna khawvelin mi rün!

I hringchan ngai thiam thei hian ka mawi lo,
Rei tak ang maw i, hringnun sual hun chhûng?

𝐃𝐄𝐄𝐏 𝐄𝐔𝐋𝐎𝐆𝐘 !

 

Khawngaihin, i mi zilh hi bansan rawh,
Chhihri-a tui a luang tlang ang maiin,
Ka bengin a ngaithla lek fang si a,
Hnêmna thu chuan hlawkna reng mi pe lo.

Kei anga nâ tawk vetu chauh lo chuan,
Kei ang taka midang hmangaih vetu,
Chu mi vanga kei ang taka hlim chu,
Hruaiin dawhtheih thu sawi turin ti rawh.

A lungngaihna ruam zau leh thûk zawng, kei ang,
Ka rimtawngzia ang zela min hnem tur chu,
Ka lungngaih thûkzia ang zela hnêmtu chu,
Ka tawrh ang tak lo tuar ve tawhtu ngei chu!

Chu mi chuan nang ang maia nui chunga,
I lungngaihnate thlauhthla rawh tia, 
Mi tawrhpui aia mi fuih a thlan chuan,
Han hruai la, a thu zawmin ka awm ang.

Mahse, chutiang mi reng reng an awm lo!
Mi’n min zilhin min hnêm tum mah se la, 
A taka tawnhriat reng la nei lo ta chuan,
An thinlung vittu, thurawn mai an ni!

Thinurna so sâng chu thurawn hmanga,
Enkawl dam mi a ni lo ang bawkin,
Thinlung chawmawlhna pawh khaidiat,
Lazaia siam hmanga phuar a theih loh!

Nunna chu thâwk lâk hlekah a nâ a,
Thute vangin a rûm hlum lo chauh bawk,
Lungngaihna tlakbuakin a hrem hnena,
Dawtheihna sawi chu mi tin hna! ni lo!
 
Ka tuar tluk zeta nâ hreawm tuar chung hian,
Eng chakna leh thiltihtheihna mahin, 
Thurawn zawm turin theihna pakhatmah,
Tu hringfa mah hian an nei thei ngai lo’ng!

Chuvangin thurawn min pêk chu ban rawh,
Ka lungngaih hla, fak hla aia a rin hi!

𝐏𝐚𝐜𝐡𝐮𝐚𝐮 Ţ𝐚𝐡 𝐇𝐥𝐚

 

Zînga ka sualna ka hriat reng fo chuan,
A ni varţian khawfing a chah rualin,
Laikhum ka zâlna tuipui kam hmunah,
Ţiauvut ang nitin mi delh rip ţhin!

Ka bawhchhiatna, ka sil fai zawh loh chuan,
Vanlaizawla ni a cham lai ngeiin,
Ka chhipah tuifinriat rihna angin,
Mi chhipchhuantirin mi kal paitir hi!

Ka khawlohnate avang liau liuain,
Thim hnuaiah hlawhchhamnain mi nghaisa,
Kawng ngil leh mam reng zawh tur nei lovin,
Luhlulna erawh ka chanpual a ni!

Lungngaihna chirhdup lukhama  zâlin,
Hreawmna belmang, ka hmai thuhrûkna,
Khawharna pawnpui hmanga inzialin,
Kâwlkil tawp retah ka biru ta a!

Thlamuan reng ka nunnain a duh lo,
Hringfa kâ aţanga zilhhauna pawh,
Rimawi hneawm, lung kuaina reng nei lo,
Mi delhtu Lalpa kut a rit lua e.

Eng chena rei nge mi diriam anga,
Eng tia rei nge thimah mi hnutchhiah ang?
Lalpa'n mi chenchilh lai nite ngaiin,
A ţanga mi pawm lai ni ka thlahlel.

Mihring fapa inlamletna kawng thui,
Kawngkam tina buar leh hnim hlingneite'n,
Ka tisa peng tin an tai thler tak hi,
Tisa a nâ lo, thlarau a ni rum!

𝑨 𝑫𝒊𝒔𝒑𝒊𝒓𝒊𝒕𝒆𝒅 𝑺𝒐𝒖𝒍 !

𝔎𝔞𝔴𝔩𝔨𝔦𝔩 𝔩𝔦 𝔞𝔱𝔞 𝔟𝔢𝔦𝔡𝔞𝔴𝔫𝔫𝔞 𝔱𝔥𝔩𝔦𝔭𝔲𝔦,

𝔙𝔞𝔫 𝔠𝔥𝔥𝔞𝔴𝔫𝔤 𝔞𝔱𝔞 𝔯𝔲𝔞𝔥𝔱𝔥𝔦𝔪𝔭𝔲𝔦 𝔳𝔞𝔫𝔞𝔴𝔫 𝔫𝔢𝔫;

ℜ𝔲𝔞𝔥 𝔪𝔞𝔩 𝔱𝔦𝔫𝔞 𝔟𝔢𝔦𝔰𝔢𝔦𝔫𝔞 𝔯𝔞𝔩 𝔰𝔲𝔯 𝔠𝔥𝔲𝔞𝔫,

𝔎𝔥𝔲𝔞𝔯𝔨𝔥𝔲𝔯𝔲̂𝔪 𝔪𝔞𝔴𝔫𝔤 𝔫𝔢𝔦 𝔩𝔬𝔳𝔞𝔥 𝔪𝔦 𝔱𝔥𝔩𝔞𝔥 𝔱𝔞!

 

ℌ𝔩𝔞 𝔱𝔞𝔨𝔞 𝔟𝔢𝔦𝔰𝔢𝔦𝔫𝔞 𝔱𝔥𝔞𝔴𝔪 𝔣𝔞𝔴𝔫 𝔯𝔦 𝔠𝔥𝔲,

𝔅𝔞𝔫 𝔭𝔥𝔞 𝔰𝔦 𝔩𝔬𝔳𝔞 𝔨𝔞 𝔲𝔪𝔫𝔞 𝔨𝔞𝔴𝔩𝔯𝔞𝔴𝔫;

𝔉𝔲𝔦𝔥𝔫𝔞 𝔠𝔥𝔥𝔦𝔪𝔟𝔞𝔩 𝔷𝔞𝔪 𝔯𝔞𝔩 𝔯𝔦𝔞𝔦 𝔯𝔦𝔞𝔦 ţ𝔥𝔦𝔫 𝔭𝔞𝔴𝔥,

𝔅𝔢𝔦𝔡𝔞𝔴𝔫 𝔱𝔦𝔷𝔲𝔞𝔩𝔱𝔲, 𝔭𝔥𝔲𝔯𝔯𝔦𝔱 𝔱𝔥𝔲𝔞𝔥 𝔥𝔫𝔦𝔥 𝔪𝔞𝔦!

𝔏𝔢𝔦 𝔱𝔥𝔲𝔞𝔥𝔱𝔥𝔦𝔭 𝔨𝔞𝔯𝔞'𝔫 𝔨𝔞 𝔷𝔞𝔴𝔫𝔤 𝔳𝔢𝔩 𝔠𝔥𝔦𝔞𝔪 𝔞,

𝔖𝔦𝔯𝔳𝔞𝔱𝔢 𝔱𝔲𝔞𝔩𝔠𝔥𝔞𝔦𝔫𝔞 𝔟𝔬𝔯𝔲𝔞𝔨𝔞𝔥 𝔫𝔢𝔫,

𝔗𝔲𝔦𝔣𝔦𝔫𝔯𝔦𝔞𝔱 𝔱𝔞𝔴𝔭𝔞 𝔣𝔦𝔫𝔫𝔞 𝔥𝔫𝔢𝔫𝔞𝔥 𝔭𝔞𝔴𝔥,

𝔎𝔞 𝔥𝔪𝔲 𝔩𝔬, 𝔥𝔞𝔥𝔠𝔥𝔞𝔴𝔩𝔥 𝔡𝔞𝔦𝔥𝔩𝔦𝔪 𝔥𝔪𝔲𝔫 𝔱𝔥𝔦𝔞𝔫𝔤!

𝔐𝔞𝔴𝔦 𝔞 𝔟𝔬, 𝔫𝔞𝔩𝔥 𝔞 𝔨𝔦𝔞𝔪 𝔡𝔲𝔥𝔞𝔴𝔪𝔫𝔞 𝔫𝔢𝔫,

𝔅𝔲𝔞𝔦𝔫𝔞𝔞 𝔨𝔥𝔞𝔱 𝔥𝔯𝔦𝔫𝔤𝔫𝔲𝔫 𝔥𝔞𝔥𝔱𝔥𝔩𝔞𝔨𝔞𝔥 𝔥𝔦𝔞𝔫!

𝐒𝐞𝐭𝐚𝐧𝐚 𝐭𝐡𝐚𝐧𝐠𝐤𝐚𝐦 𝐟𝐮𝐡 𝐛𝐞𝐫 – 𝐈𝐧𝐬𝐭𝐚𝐠𝐫𝐚𝐦 𝐥𝐞𝐡 𝐓𝐡𝐥𝐚𝐥𝐚𝐤𝐧𝐚 𝐀𝐩𝐩𝐬 𝐇𝐫𝐚𝐧𝐠 𝐇𝐫𝐚𝐧𝐠 𝐇𝐢 !

Tun huna Setana’n mihringte, a bik takin ţhalai rualho a thangvalha a awhna fuh êm êm, a lamţanga mi a siamna leh a thuhnuaia min dahna hmanraw hrang hrang; Instagram, Tiktok, FB etc te hi i ngaihtuah chiang tawh ngai reng em? Heng hmanraw hmanga Setana’n kan ţhalai rualho a thunun dan, a salbeh dan hi i ngaihtuah tawh ţhin reng em?

Mahni thlalak lawm êm êm, mahni video buaipui reng renga hmanhlel ţhalai tamzia leh, heng ţhalai rualhoin an hriat miah loha Setana bawiha an kun dan hi i chhut ngai reng em? Mi, Pathian neitu tak tak leh Pathian hretu ni lo, Pathian mi hriatte meuh pawh he Setana thangvalaha an awh leh mai ţhin dan hi, ngun taka ngaihtuah a va hun ta êm! 

Mi tam zawk chuan heng hmanraw hmanga mahni thlalak leh video buaipui hi a sualna an hre hauh lo. Chuti khawpa finga mihringte bumtu Setana thangvalh hi, Pathian aţanga chhuak finna nen lo chuan zuk man thiam a har reng a ni. “Ka mite chu hriatna an tlakchham avangin tihboral an ni” tih thu hi, tun huna mi tam tak hruai bova kan awm mêk dan a ni tih i han chhui dâwn teh ang hmiang.

Lucifer-a kha atirah chuan Cherub hriak thìh ngat a ni a. Amah chei mawina lunghlu chi 9-te khân, vantirhkoh dang zawng zawng khumin an chei chungnung bik a. Pathian thu chuan, “Mawina tinreng” tiin Lucifer-a nihna a sawi thlawt mai a nih kha. Chu mai bakah finnaa khat a la ni zui lehnghal! Mi tam tak chuan Lucifer-a tlukchhiat chhan kha Pathian an châk vang, Pathian ang maia awm tum vang tiin an sawi leh mai ţhin.

Mahse, Baibul chuan engvanga Lucifer-a kha tluchhe ta nge tih chiang taka min hrilh nen chuan a inang chiah lo. Lucifer-a khân mawi a intih êm avangin amah leh amah kha a inen ngawih ngawih reng a. Nalh a intiin mawi chungchuang a inti ngang mai. Amah leh amah kha a inbe lo chauh a ni ber. Ti hian kan mitthla thei ang. A thlalak, lunghlu mawi ber bera a inthuamnate kha a thlir ning thei thlawt lo a ni ber.

Vantirhkoh dangte nen a han inkhaikhin ţhin a, anni laka a mawi chungchuan bikna, vantirhkoh dang zawng zawngte aia a hmêlţhatna mawlh khân a rilru zawng zawng a luah khat tlat reng a. A theihna hmun apiangah, a remchan dan ang angin, a hun leh hmun pawh thlu lovin a mawina mawlh mai kha chhuang taka lantir reng châknain a khat tlata ni ber. Engtin nge chu chu thu dik a ni tih kan hriat a, kan sawi theih? 

baibul chuan chiang takin Lucifer-a khawsazia hi min hrilh tlat a ni. “I hmêlţhatna chuan i thinlung a ti chapo a, i ropuina chuan i finna lam a ti khawlo zo ta a nih kha” (KJV) tiin Ezekiela kal tlangin kan hre ta a nih hi. “I mawina avanga lo chapoin, i ropuinain i finna ti khawlovin” tiin BSI chuan a letling thung.  Hei taka hi Lucifer-a tlukchhiatna, Varparh nihna ata Setana a lo nih takna chhan chu a ni ta a ni.

He Setana zia, mahni leh mahni ţha intihna, mahni leh mahni inchawimawi duhna taka hi tun lai ţhangtharho buaina leh hri chhe vei chu a lo ni ta a ni. Mahni leh mahni in pathianna hi Setana ze dik tak niin, kan nula leh tlangval rualte’n mahni thlalak an han buaipuizia, nitina an hun khawhralna a han nih zawh tak dan hi, Setana thangvalah an awhna taka chu a lo ni ta a ni. Mahni thlalak hi an bihin an thlir ngawih ngawih mai a nih hi! 

Kristianna hi a fir ţha êm êm a, chu chu kan mizia nen hian a inmil thlawt si lo. Ringtu inti ve si, Insta leh Apps dang lawm êm êm nihte hi a Pathian thu lo bur a. Mahse, chutiang sawi ţhin mi chuan ţhalaite lawm a hlawh thei ngai lo thung! Setana bawiha Adama a tluk luh phat aţang khân, mihring thinlung hian pathian (idol) tur a mamawh ngawih ngawih ta a. Chu zia chu Zoram ringtu leh ţhalai rualho nunah pawh nghet taka tuhin a awm ve ta tlat a nih hi. 

Thlalak loh tur kan ti lo a, mahni thlalak phochhuah loh tur pawh kan ti bawk hek lo. Mahse, mahni thlalak leh video kan post-na rilru, chapona leh mite aia chungnung zawk anga lan duhna, Setana ze dik tak kal tlanga kan inpho chhuahna zawk erawh ringtu tih atâna mawi lo, Pathian thu lo leh Setana thuhnuaia kunna a ni kan ti mai zawk a ni e. He thu ziak hi miin a hnial duh a nih chuan, a thu a ni. Mahse, Pathian thu a hnialkalh tih erawh inhre mawlh thung rawh se. 
 

𝐓𝐡𝐞𝐨𝐥𝐨𝐠𝐢𝐜𝐚𝐥 𝐃𝐞𝐛𝐚𝐭𝐞 – 𝐓𝐫𝐢𝐧𝐢𝐭𝐲 𝐯𝐬 𝐎𝐧𝐞𝐧𝐞𝐬𝐬.

Tunlaia sawi hlawh tak, Dr PC Biaksiama leh UPC Pastawr thu inchuh chungchang thuah hian ngawi reng ila mi fing kan ni mai tur. Mahse, kan Baibul-ah chiang takin hun hnuihnunga thil thleng tur a sawi, zirtirna dik lo lo awm tur thu avang chauh zawkin, ât kan so dâwn a nih ber hi. Dr Biaksiama hian hniak phawi hauh lovin UPC kohhran chu kal sual tiin a puh thlu der a. Chu chu UPC lam hian ngaithei lovin an chhanglet ve hmiah bawk.

Ţ𝐨𝐛𝐮𝐥 – Pathian pakhata mi nung pathum (Trinity) Thurin hi Tertulian-a vawrh chhuah niin, Trinity tih thumal hmang hmasa bertu erawh Theophilus-a, Antiokei khuaa mi a ni thung. Ani hian BC 2-naah khân he thumal hi a lo sawi ri tawh a ni. Mahse, Thurin anga rawn vawrh lar bertu erawh Tertulian-a tih hi khawvel pawm dan a ni.

Oneness Thurin ve thung hi chu kum 1913 khân N. America ram aţanga rawn vawrh chhuah niin alang thung. Kohhran thurin inhnialna aţanga lo chhuak a nih dan chipchiar sawi ka tum lem lo a. A tlângpui kan hriat theih nân heng Thurin pahnih ţobul hi heti hian ka han tarlang mai a ni tih kan hre dâwn nia. 

𝐊𝐚 𝐡𝐫𝐢𝐚𝐭 𝐭𝐡𝐢𝐚𝐦 𝐯𝐞 𝐝𝐚𝐧 – Lal Isua vana a lawn dâwn khân a zirtirte hnenah, “Hnam tina mi zirtirahte siam ula, Pa leh Fapa leh Thlarau Thianghlim hmingah chuan baptis ula” tiin thu a pe a. Lal Isua thu sawi ka han ngaihtuah châng apianga ka rilrua lo lang ziah chu, eng vangin nge Lal Isua hian mi pathum hming a lam a, chung mi pathumte chu mi inang, intlukpui, sang bik leh hniam bik awm chuang lo, angkhat anga a sawi tih hi a ni.

Vana a lawn hnua amah lo la ringtu tur apiangte chu mi pathum hming kher lama baptisma chantir turin a zirtirte thu a pe tlat hi, ngaihtuah chian ngai lai tak niin alang tlat a ni. Pathian hi mi nung pakhat chauh lo ni ta se, eng vangin nge mi pathum hming a lam rik lawi si? A nih loh leh heng mi pathum hming a lam rikte hi mi inang, nihna thuhmun ni ta se, eng vangin nge hming hran ţheuha a lam si?

Pathian ve meuh chuan midang hming lam ri tel khera ringtu a siam a rinawm si loh. Ama hming kha ringtu siam nân a tâwkin a rintlâk êm êm tur a ni si a. Thil buaithlâk deuh ta chu, Thuthlung Hlui hunah khân Pathian chu pakhat chauh a ni tih chiang takin a inziak tlat hi a ni. Chuti chung si chuan a fapa a rawn piantir dâwnah meuh chuan a aiawh, Thlarau Thianghlim a rawn tir tlat lawi si. “Mari neih hi hlau suh, a nau pai lai chu Thlarau Thianghlim laka mi a ni asin” tiin Josefa hnenah thu a rawn hrilh tlat a nih kha.

Thlarau Thianghlim laka mi a nih si chuan, Isua kha Pathian fapa zawng a ni chiah lo deuh tiin kan hnial thei dâwn tlat. Pathian chuan a Thlarau Thianghlim a rawn tir alawm kan ti dâwn a nih chuan, Lal Isua berin chu Thlarau Thianghlima chu Pathian laka mi hrang, amah Isua ngei lakah pawh mi hrang angin a sawi tlat lawi si. Isua ngeiin, “Ka kal in tân a ţha e, ka kal loh chuan Thlamuantu (Thlarau Thianghlim) chu in hnenah a lo kal dâwn si lo. Ka kal erawh chuan in hnenah ka rawn tir ang” tiin, Pathianin Thlarau Thianghlim Mari hnena a tir ang bawkin, Lal Isua pawhin kan hnenah Thlarau Thianghlim a rawn tir ve leh ta a nih hi.

Heng thute aţanga lang chiang êm êm chu, Pa, Fapa leh Thlarau Thianghlimte hi mi hrang ţhiau ni siin, inzawmna an nei tlat tih hi a ni. He thu hi kan hnial dâwn a nih ngai chuan, Pathian thu kan hnial tihna tluk a lo ni tawh ang. Kan hmelhriat loh ber (ti mai ang) Thlarau Thianghlim lah chu Lal Isua meuhin, “Thlarau Thianghlim meuh sawi chhia chu ngaihdam an ni lo ang” a la ti tak deuh deuh a! Tin, Pa, Fapa leh Thlarau Thianghlimte hna chanpual hi a inang lo vek tih kan hre thei bawk. 

Pathian chu Thlarau a ni a, tu mahin a hmêl hmua nungdama awm thei an awm lo tih thu Mosia hnenah Pathian ngeiin a sawi a. Chuti a nih si chuan, Thlarau Thianghlim kan tiha hi Pathian chu a ni mai dâwn lo’m ni ti ta ila. Baibulah Thlarau Thianghlim chu Pathianin a thil ruahman hrang hrangte ti hlawhtling turin a tir lawi si. Chu mai bakah Isua ngei pawhin vana a lawn hnuah, he khawvela amah ringtute thlamuan turin a rawn tir tih kan hre bawk si. Pathian leh Isua aiawh zotu chu, Pathian leh Isua tluk a ni tih loh rual a ni lo.

 
Tichuan, Pathian chu pakhat a ni tih chiang takin kan hria. Mahse, chu Pathian kaihhnawihah chuan Lal Isua leh Thlarau Thianghlim hming an rawn lang ve zel tih Baibul kal tlang ngeiin kan hmu a, hnial rual a ni lo. Lal Isua hi Pathian nen thuhmun an nih lohzia chiang taka lantirtu chu, thihna hneha a rawn thawh leh hnu khân, Lal Isua kha tu emaw chuan, ‘Hming zawng zawnga Hming Chungnungber’ a pe ta a nih kha. Tin, ‘Lei leh vana thuneihna zawng zawng ka hnenah pêk a ni tawh’ tiin Lal Isua khân tu emaw hnen aţangin thuneihna a dawng tih chiang takin kan hmu thei bawk. 

He tu emaw kan sawia hi Juda-te Pathian Jehova lo midang tu mah an awm thei lo. Van ram kan thlen hun tur ka ngaihtuah châng chuan, Pathian thuin mi tu mahin Thlarau a nih tlat avanga Pathian an hmuh theih dâwn loh laiin, a aiawhtu Lal Isua erawh lalţhutthlenga a ţhu kan hmu ngei dâwn tih Baibulin chiang takin min hrilh si a. Isaia inlârna thu hi kan ngaihtuah tawh ngai em? Mi pakhat, lalţhutthlenga ţhu a hmu a. Chu mi chu vantirhkoh thla 6 neite’n, “A thianghlim e, a thianghlim e, a thianghlim e” tiin, vawi thum zel an au a. Pathian a thianghlim e, Isua a thianghlim e, Thlarau Thianghlim a thianghlim e, tia an sawina tiin kan sawi thei ang! 

Pathian leh Isua hi mi pa hnih an nih lanchianna Baibul châng tam tak awm zingah, “Miin mi hmangaih chuan ka thu a zawm ang a, ka Pain ani chu a hmangaih ang..” tiin a sawi a. A la tawp mai lo, “A hnenah KAN lo kal ang a, a hnenah KAN awm reng ang” tia Johana 14:23-in a sawi aţang hian hnial rual lohin mi pahnih an nihzia a hriat theih a nih hi. Han hnial leh ngaihna chuang reng kei chuan ka hre tawh lo. Pathian hi Thlarau a ni tih Baibulin a sawi a. Chuti a nih si chuan eng vangin nge Pathian Thlarau chuan etc tih ţawngkam hi Baibulah a chuan leh ţhin? Chhan dang a awm thei lo.

Mahse, chutih mêk lai chuan Pathian leh Isua chu mi thuhmun, angkhat an nih lawi sizia Baibul vekin min hrilh chiang hle si. “Tu pawh mi hmu chu kei mi tirtu hmu a ni. Tu pawh mi ring chu kei mi ring a ni lo, mi tirtu ring a ni zawk e” tiin Isua ngeiin a sawi a nih hi. Chu amah tirtu chu tu nge a nih tih Isua vekin heti hian a sawi leh bawk. “Keimaha phuahchawpin ka sawi lo, Pa mi tirtu chuan ka sawi tur leh ka hrilh tur hi thu mi pe zawk a ni” tiin, Pathian tirha he khawvela lo kal a nihzia hnial ngaihna reng awm lovin a sawi a nih hi. 

Ramhuai, vantirhkoh kal sualte meuh pawhin Lal Isua hi Pathian fapa a nihzia, “Isu, Pathian Chungnungbera fapa, kei leh nang eng nge kan inzawlna?” ti meuha an hriat chian êm êm lai hian, chung ramhuaite vek chuan Isua chu, “Nang ka hria a che, Pathian mi thianghlim i ni e” tiin Pa leh Fapa chu mi thuhmun an nihzia an hai mawlh lova nih hi. Heti chung pawha sawi dan danga sawi theih kan la nei a nih ngai chuan, Baibul kalhtu, Baibul thu lo anga thil nihna sawi kan awm tihna a ni ngei tawh ang.

𝐙𝐢𝐫𝐭𝐢𝐫𝐧𝐚 𝐡𝐢𝐦 𝐥𝐨 – Lal Isua kha he khawvelah min chhandam turin a lo kal a. Mahse, min chhandam hman lo. Hei tluka zirtirna dik lo leh zirtirna hlauhawm a awm leh thei tawh chuang kher lo ang. Hawh u, i fimkhur hle teh ang u. Kan kohhran leh kan kohhran thurin kan ţan luatna kawngah, kan ngaihdan leh pawm dan mila Baibul her mil zel kan tumna takate hi hun hnuhnunga zirtirna dik lo, tluksanna thlentirtu an la ni ngei dâwn tih kan hriat a hun tawh hle si a!