CAG Report ka bihchianna atanga ka hriatchian em em chu mihring ngaihhlut zawng a zirin mihring hian a lemin lemchan a zir kual vel mai mai tih hi a ni! Chuvang chuan lemchang thiamte lemchan zir chhunzawmna turin atso ni lovin mawlna thlarau ka’n chang leh ngawt mai anih dawn pek hi!
Economic Sector, Public Sector Undertakings ni lo hnuaiah hian thil fello tak tak mai, point 9 lai mai hmuhchhuah a ni a, heng bakah hian thupbo then a awm em em ang tih lo hre tel ta bawk ila a tha ang e. RD Dept hnuaia IAY hnuaiah hian Thingtlang khaw 25, Aizawl leh Champhai Block hnuai chauha hmalakna endikah chuan hlawkna hmu tura thlan (Beneficiaries) chungchangah hian Waiting List a Rank emaw Seniority a thlan tur anih lai hian duhsak zawng thlanna nasa tak a awm a, chumai ni lovin, hmun thenkhatah phei chuan Waiting List-a awm miah lo thlan an ni teuh mai tih hmuhchhuah a ni.
Kum 2008-13 chhung khan State Gov’t hian tlai uchuak lutuk (Inordinate delays) in State share Rs 63.71 leh Rs 82.47 Lakhs ve ve Aizawl leh Champhai Block tan hian a release tih hmuhchhuah a ni a, hei hian ngaihtuahna a tithui khawp mai. Bank lama dah ni ta sela, pung tam tak awm hman a ni chiang hle a ni.
District 6 a thuneituten Proposal an thehluh muan lutuk avangin GOI chuan Central Assistance, kum 2012-13 atana IAY sum kan dawn tur Rs 92.57 Lakhs ngawt mai min paih sak hi a na ngawih ngawih a, Office nuam taka thu leh motor changkang neih hian hnathawh chak a hril lem lo tih a tilang chiang ngawt mai!
IAY hlawkna tel tur, Aizawl leh Champhai hnuaia mite hnenah hrialhriatna tha (Awareness) dawn loh avangin DRI scheme hnuaia Marginal Interest atanga Loan an lak tur lak nachang hriatloh phah hialna a awm a, eng tak chu Resource Persons te hian ti thin tak ang maw?
IAY hnuaia Central Sector Scheme hriat belna leh hriatchianna neih loh avang liau liauin Aizawl leh Champhai Block hnuaia Beneficiaries te hian he Scheme hnuaia hlawkna hrang hjrang an dawn theihte chu an dawng leh lo bawk a. Hetiang tak hian kan Sorkar leh a thawktute hian mipui an lo ngaihthah thin hi kan hriat loh vanga tun thlenga la chhunzawm an ni tih kan hria em?
Industries Dept hnuaiah hian sawi neuh neuh a tam hle bawk a ni. Kum 2010-2013 chhung atan khan tlangram, inkalpawh harsatna hmuna chengte tan Transport Subsidy Claims Rs 1203.26 Lakhs lai chu State level Committee (SLC) chuan a remtih (approved) sak thlap a, kum 2010-2012 chhung khan NEDFi kaltlangin Rs 864.91 Lakhs lai mai pekchhuah (Disbursed) a ni. Ngun leh zuala endiknaah erawh chuan kum 2008-2009 chhunga Rs 964.06 Lakhs lai mai, approved tawh chu NEDFi lam hian an kum 2009-2010 kum tawp thleng khan an finalised (close) miah lo tih hmuhchhuah a ni a. Heng claims (Chanpual) reng rengte hi an tlak leh tlak loh endik vek tur anih laiin NEDFi lam hian Industrail Units Claims 390 leh Transport subsidy atan hian engmah endikna (Scrutinised) lohvin Rs 766.87 Lakhs lai mai a pechhuak leh ngawt thung a ni. Hei lo pawh hi Rs 98.03 Lakhs pekchhuah chungchangah pawh endikna reng a awm chuang lo.
Chuti anih si chuan Claims hian mipui a thleng tak tak em, endikna nei ta sela chuan mipui, a hmang tangkai tur ten an hre ngei ngei tur a ni si a? Chumai a la ni lo, Aizawl, Lunglei leh Saiha Dist 3 ah te hian he Subsidy hmang hian kum 2010-12 chhung khan Rs 100.54 Lakhs pekchhuah a ni a, mahse a takah hemi kaihhnawiha hmalakna pakhatmah hmuh zui tur reng reng CAG hian an hmuchhuak zo lo!
PSU kan tihte han bih leh ta thuak thuak ila. State hian PSU 6 kan neih a, chungah chuan thawktu mi 265 an awm bawk a. Kum 2012-13 a an turnover (Hralh chhuah hlawkna) zat chu Rs 5 Cr chauh a ni a, GDP-ah effect eng tham mah a nei lo! Chutih lai vek chuan heng PSU te hian Rs 3.67 Cr chuang an hloh a, an hlohzat tling khawm phei chu Rs 51.34 Cr zet a tling tawh a ni. Chutih lai chuan Investment an la uar sauh sauh thung si a, a manganthlal tak zet zet a ni. ZIDCO in an hloh nasa ber a, MIFCO in an dawt bawk a. CAG lam hmuhchhuahah chuan Rs 38.16 Cr hi fimkhurna leh hmathlirna nen chuan chhan theih anih chianzia an tarlang bawk a ni. PSU te hian an loss reng mai a, chuti chung chuan eng mawng pawpah tui thun kan la bang thei si lo zawng anih hi!
No comments:
Post a Comment