Inthlan a hnaih tak viau ah chuan rilru a awm han sawichhuah te pawh hi mi vantlang nihna ah ngaih a nih deuh tawh avangin he mi Tittle duhawm lemlo tak duh vang pawh ni chuang lo hian rilru a thil awm han sawi ve te pawh hi tha phian in ka hria. Khawvela thil tha han tih mai pawh har lemlo tak a chu INFAK hi a ni. Mirethei te tan a mi kan chawimawi kan ve theih dan awlsam deuh chu tawngkam a han infak hi a ni mai a thil harsa a ni lemlo. Nula hmeltha vaklo te pawh hi i van hmeltha em tiin han fak zauh ila, an lawm ve em em a, hmelchhia an nihna pawh theihnghilh hialin nula hmeltha ah an in ngai ve fo thin.
Lawmawm ve deuh a sin! Nihna lo anga lan chhuahna a nihna chen te pawh hi a awm tlat. Mahse kan Hotu M.L.A rual zingah he infakna zia a awm lo hrim hrim a hi a mak ka ti a ni. An mahni zingah hian tumah hi a thawh tha em a fak pawh a phu a, kan pawl ni lo mahse hei zet zawng faktlak a ni ti a an mahni han infak thawm ri hriat tur a hi a awm lo hulhual deuh thaw a chu a ni. Party worker ten an Pu ber an han fakthawm ri kan han hriat fo te hi chu a laka tlaktlum an duh vang leh chanvo tha, a faktu pawl ten an beisei vang mai mai a fak an nih avang hian han lak thu tak tlak vak chi hi a ni lem lo.
Hengho te lah hian an Pu te hi an han fak nasa thei khawp a,an mahni nihna theihnghilh hial khawpin arpan chuktuilo ang lekin an Pu te an han chhuah fo mai thin te phei hi chu a nuihzathlak duh zawk phian mai. An Pu te hian an lo nuihpui ve vur vur ang nge ni a an lo zak ve viau ang aw te ka ti mai mai thin. Mahse kan Politician ho hri pai tha deuh mai chu Zahtheihlohna hri an pai a hi a ni. Tin, heng kan Pu duhtakte ho hi tunlai film chang thin ho hian an tluklo hle hian ka hre thin. An ni zawng han inzirna vak pawh nei lo hian Lemchan hi an thiam em em mai a.
Duh hun hun a nui thei an ni te, a tul a nih chuan han tum hmuk thei, hlauhawm deuh a facial expression siam thiam deuh, tah a tul hun a a taptu te ai maha tuarna zawk ang mai a tap leh mai thei, tul hun ah chuan tu pawh ka Nu ka Pa han ti thla zen thei an nihna te hi ropui dangdai ve deuh a sin! An mahni hrechiang ngailo deuh te phei hi chu tun thleng pawn an la bum zaih zaih theih hi. Mahse mi bum an hrat lutuk a, an mahni pawh hi bum let han ni ve fo thin tawh mahse tak tak emaw an ti fo tawh tlat thung zu nia! Ka lo vote ang che te hi han ti ila an lawm ve em em a, min bum nasa bawk a han bum let ve hlak te pawh hi an phu ve reng hian a hriat tlat, chhia leh tha hriatna a hrin fa theuh theuh kan tih duhzawng te pawh a in ang fo ang chu!
Nimahsela heng kan Pu duhtak, an hming pum pawh a kan koh phal thin loh khawp a mipui ten a kan duat rawn te hian thiam miah loh an neih ni a ka hriat a chu an M.L.A pui hnathawk tha han fak a chawimawi a hi a ni. An mahni pawlni lo te hnathawh that an fak em loh pawn anmahni pawlte zinga mi tal hi chu fak tlak an hmu ve fo awm thin si a tiin ka lo ngaihtuah ve fo thin. Mahse chiang ta a chu Lal Davida’n ka nu’n sual in mi pai a an tih hi an han pai nasa bik khawp a in Itsikna te hi a hrikpui nen an pianpui tel tlat mai a, heng hrikpui hi han khuih thlak sak mai tum pawh hian an la phal lo tum hrang a, naupanlai a nu ten kan hrik samkhuih sin a khuih thlak an tum a kan hreh deuh ang tung khan an tang ve tum hrang a, mahse keini kha chu kan hrik neih chhan a kha kan balh vang mai kha a nia.
Inrinni ah fai takin kan inbual fai a a reh ve leh mai a, mahse kan Pu te ho hi zawng fai ngaina em em an han ni hlawm tlat leh thung si a kan inang theilo zawng a nih hi. Vanram pawh hi bawlhhlawhna nei miah lova luh tum kha an ni a nga, keini bal deuh ho nen chuan kan kal na tur a hrangin chunglam Lal khian a siam mai te pawh a la ngai ta ve ang, an In a thlen a an dawhkan han kilpui ringawt pawh kan harsat hi. Hetiang hi kan nih tak nuaih si ah chuan darthlalang pawh ngai miah lova lo lang chiang ta a chu a tu a mah hi faktlakin hna an thawk thalo a ni ngei ang. Sawiselna ringawt mai an hlawhna chhan te pawh hi faktlak a an hna an thawh loh avang te pawh a ni ang. Tin, function khawlum em em ni pawh a coat mawi tak leh nghawngawrh nen a thlan tla hluam a an thu hah ve tawh tak, a tum a ma‘n an fak peih loh na chhan pawh hi fakna chhan tur an hmuh loh avang a ni ngei ang.
Mahse hetiang ringawt a han inchhuah chhiat te chu an campaign hah teh lul nen kei chu ka ngai ngam lo ve. Fakna ri han dawng ve reng reng teh se ka hnen atang tal hian, lawmman pawh min pe ve mial dah mai thei a sin! An zahtheihlohna ah hi chuan fak duhtawk ta ila, nula lak a him tak a an la awm thei te hi kei chu fak an phu ka ti. Khawilo an kalna ah nula an staff kherlo pawh an hruai zin teh lul nen mualpho lo leh thlalak thlahrang hmuh tur a an pho chhuak ve duh miah lo te te hi an fakawm thlawt in ka hria. Kan nula ten an hrat teh lul nen, lar na tur tha tak kha an tan chuan a ni ve ngei dawn si a.
Fimkhurna lam ah hian kan tluklo khawp mai dawn a lo nih hi. Sum bo awm chuang miah lova eiruk an thiam em em te hi a ni fak an phu em em na bawk a chu. Sum a awmlo an tih pawn an dak em em kan hre ngai si lova, kan ram a heng thalai awmawlte hi zirtirna tha han pe thei phei se la chuan kan ram hian hma a sawn ngei ang. Mahse an mahni anglo tak a sum hmang thiam an chherchhuah theih dawn chuan a an in hriat loh avang chauh a hetiang a thalai te hma dawn tak a an awm erawh hi chu fak an phu thlawt bawkin ka hria. Tin, an taimak em em na ah hian fak an phu bawk. Office tlai tak ah an han banga, an duh vang reng ni lovin mi tam tak ten an lo nghak a, chaw an ei hman tawk a, an inbual fai a, tichuan an inleng te an han kawm ta thin a hi a hahthlak tur zia ka hriatpui avang hian ka faklo thei lo bawk.
Hah tawng khawng hi chuan mahni nu leh pa te pawh kan be tha peih thin lo a ni a, an ni zawng nakin lam a ropuina thlir ranin an tih theih ni miah lo tur tih pawh an rilru that em avangin leh an mahni concern ni miah lo mahse an mahni hah tak a lo hmu tu te hi nakin ah chuan an tan a hah taka an lo che chhuak ve tur a an lo phut ve ngam tur an nihna hre ran in an lo be tha hram hram a, nakin ah ngatinge ka lo lenna chhan kha a va hlawhtling ta love an han tih pawh a a chhan na tur harsatna leh manganna hnuai a an lo duang lawk fel vek tawhna te ah hian fak hi an phu thlu ngang bawk a ni. Kei zawng ka chhuang a nia kan Lal hmelthura te ho hi.
No comments:
Post a Comment