Hriatchianloh

Duhber, ti tak maia i reh si chuan,
Ka ai tawnghmang thiam Vahui,
Biahzai nem hlan thiam rawn tirin,
Hmangaih hlaril rawn hlan tir che ka nuam e!

Hmanah zawng hmangaih biahthu ka hlan tawh thin che,
Tlangval thaza thutiam, a phur lai a reh a thamral ang ni lovin,
Mawihnai takin ka lawm che, tlangval ten nula vehthlem nana an ti ang ni lovin,
Hawihhawm takin ka chhawn che, i awhna thangkam tum ni hek lovin!

Hmangaihna hi chuan mihring a hneh lutuk thin a,
Tum loh tak tak thlen phah a awl tih ka hria e,
Khuanu tangnem belh lai reng pawh hian,
Huatthu sawi leh tih thlengin min phalsak fo reng a ni!

Thil reng reng tha sa leh chhe sa an awm chuang lova,
Hmangaihna pawh a chhe lam leh tha lam a awm bik lo,
A vulh lendan a zir zawkin duhtak,
Hmangaih nunnem leh nunrawng an piang a ni zawk ngai e!

Dikna leh Hmelthat inkawp rem i hria maw?
Dikna chuan ama milin hmelthatna a siam danglam a,
Hmelthatna erawh chuan dikna tho hi,
A zepui pakhat lepchiahna lamah a thlem kawi zawk ziah a ni si!

Mihring chuan a thutiam hlen ai chuan bawhchhiat a ching si a,
Rilruah tumna a awm chhung chuan thutiam a reh lovang,
Phurna a reh rualin thutiam pawh a reh mai thin a,
Hremhmuna thlak ang maiin a thi nghal thin tih i hria e!

Hmangaihna pawh khuarei hian a danglampui thei a,
Kumkhaw rin atan zawng amah mai chuan a tlak hlek lo,
Khuarei hian a pangti lumna a chhem dai thei a,
Rinawmna leh Beiseina nen erawh a tangrei thei tih mi hriatsak ang che!