Hringnun - IV

Hmarchhak kiltawp retah rorel palai fuankhawm,
An rel hringfa sual hmabak leh anchhia,
Sual thawi damna reng palai ten hre lo hian,
Roreltu lairil a fan ngei e!

Thutiam bawhchhiat atan a mawi lo,
Hmangaih luangliama erawh a tlei mawlh lo,
Khawpui mawi atan a ruak hringmi tel lovin,
Mahse a rorel thiat ngam an awm si lo!

Rorel Agenda thar lo chhuak,
Aw, Van khawpui fakna rimawi a khat,
Hmangaih reh awmlohna ngei,
Dar chanve zet a reh ta, thawm reng a awm lo!

Tlanna kawng a thui, a hniam lua,
Luruh hmun zawh lo hian kawng dang a awm lo'm ni?
Tawrh lungngaih tawp kaltlang lo hian remna a awmlo maw?
Van mithianghlim zawhna chhanna-in duhawmna a nei lo!

Van lal nau rianghlei hluan e,
Hringfa hmangaih kara phatsanna,
Khawngaih rorel hremna talhfiah nena inchhawn,
Hriatfiah a thiam mawlh lo!

Hringmi lunglai rulpui tura khat hian,
A dawhthleng reng a rem fuh lo,
Mahse pumpelh dang awm lo,
Kalvari mualphona mai lo chu!

Mahse mualphona tawp hringfa tan damna famkim,
A thisen far vana Roreltu hmaa hlan,
Hringfa tan a hlutna chhutchhuah a mawi lo,
Nau ang hlimna erawh van thlenpui tur, a va mawi em!