Tu Hraileng Nge I Nih - II

Luangliam Thawhhnihna!

Nizana mipa lepchiah ang maia ka rilru ka phawrh kha,
Lepchiah leh ngaihna awm tawh chuang lo chu,
I lakah hian nawhchizuar dawrtu ang maiin,
Hmangaihna hruia phuar beh chung siin at ka han so leh teh ang!

Tu hraileng nge i nih chiah teh reng tak tak le?
I chun leh zua ten Greek thawnthu iangin pathiante an pawlna atanga lo piang i ni zawk em?
I pianphung duhawmna hian lei mi mawina reng a an lohva,
I hmelte pawn pathiannu hmel an put tlat mai le?

I vanmi hringchan lei tlafual mawina hi,
Keia lei tawng an tih hian sawifiah tum lo se a fiah zawk ang,
Ka thinlung chhung hailang turin tawnghmang ka thiam lova,
Ka vei hrithla thiam lovin ka mal tuar ta ngawt ngawt anih hi!

Leilung mawitu duhawm mi ringhlel suh teh,
I laka ka nungchang hi ka hriatthiam phak i ring bik em ni?
A chhan ka hriatloh hi a chhan ka hriat phawt loh zawngin,
Chhanna pek tur chhan ka nei lo reng a ni!

Mi ringhlel dawn anih ngai chuan e, van arsi en duhawm,
Van khian a enna mi pe tawh lo se la,
He lei hian eitur chaw eitur mi pe tawh bawk hek suh se,
Hlimna ten mi hnuchhawnin, beidawnna chuan mi lo hmuak mawlh rawh se!