Aigupta hripui vei tluka tuarna,
Thinlung leh mit hmuhte insualna chu;
Ka hringnun khawngaihthlak tak pachhiatna,
Ka hmaifang chuar khawlohnate ngei chu!
Meichher chu chhit en atana an siam,
Rangkachak pawh thuammawi atan an duan;
Chhang tuihnai tak pawh ei atan an siam,
Hmaifang thatna pawh hman atana duan!
Thilsiam mawi leh duhawmte fakna ri,
Leili thiamna tawp hmanga chawimawina;
Thangtlawm taka ngaihna chu sualna hri,
Thuhnu dawn lek lova i huaibakna!
Chuai tir mai suh sual huat i duhawmna,
Parvul tir rawh nun thianghlim ka mawina!
2. A beauty.......
Hmangaihte pathiannu ka saltanna,
I hlutna chuan ka hmabak tinghetin;
Ka hlahril palai atan ka hmanna,
Ka duhawmna hriattirna ni lovin;
I laka ka mawhphurhna tarlangtu,
Mawhphurhna sang ber leh hlu ber niin;
A lakah duhawmna hial vuaicha chu,
Inngaihhlutna lam an boral si thin;
Aw nang, tlai ni nem thlifim thaw heuh heuh,
Mawina leh duhawm tinrenga an thuam;
Zan tlai nem chung si-ar iang leng veuh veuh,
Boruak thianghlim tinrengte tan fachuam;
Chu ai pawn nang chu i thianghlim zawkin,
I mawiin i nalh chungchuang ka ti thin!
3. Tell me.......
I zanmang duhawm tinreng min hrilh rawh,
Nang nena thlir dun ka nuam dawn si a;
I thinlungin a hlauh ber min hrilh rawh,
Nang nena hmachhawn dun ka chak si a!
I hringnun duhthusamte min hrilh rawh,
Nang nena chen dun ka thlahlel si a;
I ngaihtuahna ril ber mi hrilh hre rawh,
Chungahte chuan telve ka chak si a!
I thuruk ril ber berte mi hrilh rawh,
Venhimpui ka tiam chak hle si che a;
I thinlungin a thlakhlelh mi hrilh rawh,
Thlakhlelhna phuhruk ka chak hle si a!
Thil tha ber ber duhsakna che chu aw,
Ka tan hlimna ber a ni si a maw!
4. Riang chuang.....................
A ngur hraichawi leng em ni i nih le?
Rianghlei val tahnan biahthu hlan rem lo,
Ka zur ngei e zing tlaini lenin e;
Lungduh loh biahzai hlan ka thiam si lo.
Turnipui sen vung hrang a na lua e,
Sakhmel chhawl ang hnim zuai leh ruai ruai ang;
Kumsul veiah hlei ten dang dawn lo e,
Di lo hian kumsul vuiliam leh ngei ang.
Ka nu an sang mi hau suh ka tlai lua e,
Kei zawng ka zam del del romei iangin;
Suihlunglenin pangla iang ka leng e,
Thlehte dungdawn vanrang chhuma lengin.
Pheiphung a na lenrual ka pawl zo lo,
Awmkhua a har, chungturni ka zo lo.
5. Min ngai ve ang maw?
Khuangruah chiar nghian zochhum zing kara’n maw,
Sakhmel chhawl ang hnim Lenmoi mi tah rawh;
Chung kawri nem kal ruai ruai hnuaia’n maw,
Lenmoi ngaih lunglen chhumzingin min tawh!
A cham nuam lo khual khaw zawlah ni rei,
Chhing khual kal laiin ka lung min len chuang;
Thuam ang do zo lo ve chhun ni a rei,
Nau ang tahna zankhua hrui ang sei zual!
Zawlkhawpui laitual tleitir za tam leng,
Ka thai tur cho rua leng ve ang i maw?
Rianghlei hluan mi tahtir suihlung a leng,
Cho rual ka thai tur an piang na nge maw?
Duh leh tlang za-in mi rel luai rawh se,
Hmana rualdi ngaih ka bang thei lo ve!
6. A Simple Love Sonnet!
I zanmang duhawm tinreng min hrilh rawh,
Nang nena thlir dun ka nuam dawn si a;
I thinlungin a hlauh ber min hrilh rawh,
Nang nena hmachhawn dun ka chak si a!
I hringnun duhthusamte min hrilh rawh,
Nang nena chen dun ka thlahlel si a;
I ngaihtuahna ril ber mi hrilh hre rawh,
Chungahte chuan telve ka chak si a!
I thuruk ril ber berte mi hrilh rawh,
Venhimpui ka tiam chak hle si che a;
I thinlungin a thlakhlelh mi hrilh rawh,
Thlakhlelhna phuhruk ka chak hle si a!
Thil tha ber ber duhsakna che chu aw,
Ka tan hlimna ber a ni si a maw!
7. My love........
Ka Hmangaihna che hi Tuipui ni se,
Leilung reng hmuh tur a awm tawh lovang;
Ka hmangaihna che hi Thaler ni se,
Vaivut bak hmuh tur i nei tawh lovang!
Infawhna hi ruahmal far ang ni se,
Ruah baw hawk i hnenah ka surtir ang;
Inkuahna hi mitkhapkar ang ni se,
Darkar tam i hnenah ka rawn tir ang!
Ka hmangaihna che hi Arsi ni se,
Zantin Chawngmawii iang a eng zual ang;
Ka hmangaihna che hian thla nei ni se,
Thlawk chungin ka invawrh sang tual tual ang!
Hringmi nui mawi tak hi Tui ang ni se,
I hnenah Tuifinriat ka rawn tir ang;
Hmangaihna kan tih hi mihring ni se,
I hnenah keimah ngei ka rawn kal ang!
8. Musing Sonnet
Nipui tlai lam thaw lum vam hiam iang a,
A thaw lum sa huam huam mi chelh dingtu;
Nawmna vawrtawp thlipui an tleh lai a,
Kiltin atanga min chhem nghing thintu!
Faifuk ri iang chhemdam thlifim tleh chuan,
Nawmna vawrtawp thinlung puthmang siamin;
Huih chhoh thlifim bah nuaiha thleh chuan;
Hun hlimawm vawrtawpa hnaih an hril thin!
Telphawk thlipui a ka tanga chhuak ten,
Thinlung hmun kilkhawr fanchhuak zovin;
Hriatna thazam inphaman chho chiai ten,
Nawm vanga thlarau khurhna an thlen thin!
Vahtlai thli iang a awrawl sangah tak,
Tisa ngaihtuahna ruak a thlen tak!
9. Tlawhloh ram dai.....
Lei lalram hla tak piah, chhum zin chiaina,
Kawlvalen chham piah atangin a ni;
Thlifim ten an rawn len a rimtuina,
Amah thlakhlelhna chuan mi koh tak hi!
A chanchin thangvel chuan mi chenchilh e,
Thliarkar theihnghilh tawh chu ka va ngai em!
Hringfa ten an nghilh tawh hnu nang hian e,
Lalte thlahchhawn hnuhnung hi mi hria em?
Lei miten min hnuchhawnin min hrem a,
An sualnain ka thinlung ti chhiain;
Thim hnuai saltanna hmuna khung hran a,
Beiseina lam a beidawn tawh laiin.
Nang, mitin thlakhlelh leh zawn ruk thin hi,
Bansan lova ka zawn zel tak che ni!
10. Hmangaihna
Hmangaihna chu mi huaisente kalkawng,
Chakna duhawm tak hmanga kaihhruaina;
Famkimna ni lo, beiseina kalkawng,
Famkim beisei vanga thinlung hawnna!
Thinlung zahawmna tikhawlo zova,
Thianghlimna, chirhdupa hnim phum luiin;
Rilru natna tawp leh mei kaltlang a,
Thinlung damna damlo lo thleng chauh thin!
Thlan thim kaltlang zeta nun thar neihna,
Mi huaisen thisen vawta chantir zet a;
Natna paltlang zeta parmawi chhuahna,
Nau vei tluk zeta na duhawm ngei kha!
Mi dawihzep tan Hmangaihna chu channa,
Mi huaisen tan Hmangaihna chu hnehna!
11. Pachuau Sonnet 3
Hun chuan upa tiin mi thliar suh se,
Zai khata nang nen kan zal dun si chuan;
Ka hmaifang lo zur chuai deuh tawh mahse,
Thihna em tawrhna lo thleng si lo hian.
Duhawmna tinreng i khawlkhawm zawkin,
Ka thinlung puanzar kaihthlera awm chuan;
Nang leh kei pumkhata min siam zawkin,
Hunin ngah nge upa bika mi puan?
Aw ka duhtak, engah nge i buai ni?
Ka tan ni lo i thatna tur zawkin,
Fimkhur taka nang ka pawmtlei che ni;
Duat taka damlo an enkawl angin.
I thinlung chu hlan let tawh loh turin,
Mi hlan rawh damchhung ka vawnhim turin.
No comments:
Post a Comment