Chhinlung hi khawiah nge a awm ?

Tukin Vanglaini article kan en chuan a chunga thupui hmang khian Pu C. Lalaudinga thu ziak ngaihnawm tak mai chhiar tur kan hmu a. Mizote ţobul (origin) chhuina a nih avangin mi tinin kan ngaihven tur thil a ni.

Date 25/7/2019 khan Mizo thil hlui vawng ţhatu (?) INTACH leh MAL chuan 'Symposium on Chhinlung' tih an huaihawt a. He hunah hian Resource Person pahnih, a tak ngeia China ram han luh chhuah mi pahnih Paper ngaihthlak a ni.

Mahse, mak tak maiin heng mi thiam pahnih hi an thuhmun ta tlat lo a. Resource Person an koh hmasa zawk, Rev Lalremliana chu kum 2012 khan China rama Sichuan Province-a Sinlung khuaah a han kal a.

Tichuan, Sinlung khaw chanchin tlangpui report pawh lehkhabu-in a ziak nghe nghe a ni. A lehkhabu-ah hian Map pawh tarlangin Yalong luikama Sinlung khua pawh chiang takin a tarlang vah mai a. Sinlung chu pûk ni lovin khua ngei niin a tarlang.

Resource Person pahnihna Dr Rema Chhakchhuak ve thung chuan Missionary hna thawka China University-a hna a thawh laiin Sichuan Province-a Sinlung khua a hmuh loh thu bakah Yalong lui ruam vel hi kum 1951 vela China Communist-in ram hminga a phuah vel mai mai nia a rin thu a sawi a.

A Paper thlawp tur hian Pu Malsawmtluanga, China rama Missionary-a awm, College kai tura han in admit chuan Rev Lalremliana thu ziak hi a dik theih loh thu leh amah ngeiin a hmuh loh thu Aizawl Post lamah a lo chhuah tawh thung a ni.

Mak ka tih tak em em chu engvangin nge kalkhawm mi thiam pui pui hian Resource Person pahnihte Paper Present hi khawi zawk nge thu dik tih finfiah tuma anmahni an insawi fiahtir loh tih hi a ni.

Rev Lalremliana hian chiang tak maiin Map nen thlap lehkhabu a ziak a. Chutih rual vekin China University lama kum 7 chuang han awm Dr Rema hian hman ni lawka a lehkhabu tihchhuahah heng mi hrang hrang, China-a Mizote awm thu leh khua pawh awm ngeia sawitute thu sawi hi a finfiahna a hmuh loh thu a ziak kalh bawk si.

Hnam Upa leh changkang kan tihte hian an hnam ţobul an chhui chhuakin ţhangthar tân ziakin an dah thlip thlep ngai a. Chuvangin keini Mizote pawh hian kan ţobul kan hriat hi a hun tawh tak zet a ni. Kan lo chhuahna hi khaw chhak a nih hai rual a awm lo.