Thil thleng thei ngai pawha kan rin loh, suangtuahna hmang pawha thleng thei tur pawha kan ngaih loh hi, sum duh luatna avangin a thleng ta fo mai.
Social Media lam aţangin damlo lungawi lo leh daktawr-in damdawi a chawh ringhlela fiah ngattute thu leh hla kan chhiar ta zauh zauh a. Sawi thar mawlh mawlh a ţul ta.
Private Clinic hawngtu daktawr ţhenkhat chuan Daktawr Ethics bawhchhiain anmahni dawrtute sum siam nân taka hmang an awm ta nual niin a lang.
An Clinic-ah kalin an hmaah kan va ţhu a. Kan natna kan sawi dek dek a, a enga mah hmain an lehkhaphekah damdawi lei tur an han ziak tlar nghal dul ţhin hi chuan ngai a ti ţha mawlh lo!
Diagnosed pawh nei ik lo, hmanraw pakhat pawh thawh lo va damlo natna hre zung zung thei daktawr hi kei ngei pawh hian a takin ka lo tawng tawh a.
Damlo natnain a mamawh bak baka damdawi chawh ching Daktawr-te chungah hian thil tih theih a tam lua lo khawp mai. Heng mite hian an daktawr puite thlengin an tihmingchhe ţhin a nih hi.
Sum tam tak aiin hmingţhat hi thlan zawk tur a nih thu kan Pathian thuin min hrilh a. Duham luat avanga damlo kaltlanga sum hai luh ching te, thluaka sum lut natna vei vanga damdawi ţul lo thleng thlenga damlo chawh ching te hian Pathian ram an lut tawp lo ang.
Daktawr kher hi chu Pathian rawngbawlna ki peng pakhat niin kan mi hmasate kha chuan he rilru pu hian daktawr an zir chhuak ţhin a nih kha. Mahse, hun a lo kal zel a, nu leh pa tam tak zingah sum ngaihtuah vang chauha fate daktawr zirtir ching an rawn awm ta a.
Chung nu leh pate chu an fa daktawr rawn ni ta te chuan rawn chhun fuhin an thinlung chu sumin bawihin mahni mihringpuite rawngbawltu an nihna an hre chang map tawh ţhin lo a nih hi. Hei tluka dam lai reng boralna nun a awm chuang lo ang.
Ka ngaihtuah chian poh leh tun lai kan nu leh pate ngei hi he Zoram damloh chhan, hnufual chhan, thinlung a lo bawlhhlawh tak chhan, sum pathian chhan, Zonunmawi hloh chhan, ramin hma reng a sawn theih lohna chhan niin ka hre ta tulh tulh mai!
No comments:
Post a Comment