Pathian thute hi kan thurin anga kan chhiar a nih ngai chuan, Lalpa Pathianin hmeichhia vawi hnih a siam tih hi kan chhiar thiam ngei tur a ni.
Pakhatna chu Pathian anpui bawka siam, ni rûk nia a siam kha a ni. Bung 1:27 khan mipaah leh hmeichhi-ah a siam a. A siamna hmanrua pawh lei vaivut a nih thu Bung 2:7-ah kan hmu a nih kha.
He mi ţuma a hmeichhe siam hnenah hian thuneihna zau zet mai a pe bawk a. Lei leh vana nunna nei tawh phawtte chungah thu a neihtir riap mai a ni.
Tin, an pahnih hian chi tam taka inthlah pung tur leh an thu thua khawvel awmtir phalna thu a pe bawk a. Mahse, fa pawh an neih hma hauhin Eden huan a lo lan meuh chuan he hmeichhia hi a awm ve tawh tlat lo.
Eden huana awm lo, Pathianin a siam tawh ni si thil kan hmu leh a. Chu chu Bung 1:20 aţanga a siam tuia cheng leh vana cheng tur savate a siam phawt a. A dawtah leia cheng turte a siam leh chauh tih kan hmu a.
Bung 2:17 kan en hian Pathianin Adama amah chauha Eden huana a khawsa ta tlat chu lainatin a kawppui awm tur a siamsak leh ta a! Mahse, mihring ni tawh lovin ramsa leh chunglêng savate an ni daih nia!
Mahse, Adama ţanpuitu tur leh a kawppui tura a siamsakte hian Adama lunglênna leh khawharna a hnem zo lo tih chiang takin kan hmu a. Chuvang tak chuan a vawi hnih nân a nâk ruh aţangin Evi a siamsak leh ta a nih kha.
A hmaa Pathianin anmahni anpuia an siam hmeichhia nen khan hmelţha leh sawiselbo, intluktlang an ni tlat. An hmelţhat leh famkimzia kan hriatthiam theih nân chuan Mosia'n Pathian a hmuh hnu khan mihringin mitlawngin a hmel kha Israel fate'n an thlir ngam tlat tawh lo.
Puanin a hmai a khuh ta ţhin a nih kha. Tin, hmel danglamna tlanga Lal Isua'n van hmel a putzia kan hmuh leh bawk kha. Chhuidawn theih ta chu hei hi a ni; chungnun zawk inchuhin emaw intih thiam lohna an nei a.
A bawhchhetu zawk pawh hmeichhia a ni ngei ang. Ni lo se, Eden huan a chang phak ve tur a ni ngei ang. Pathian lahin ama anpuia a siam a nih tlat avangin he hmeichhe chungah hian chuti maiin kut a lek thei bik lo a ni ngei ang.
Zofate'n Chawngtinleri, ramsa chunga thuneitu kan nei ang bawkin hnam hrang hrang pawhin kan Chawngtinleri ang hi an nei deuh zel a! Pathianin a thu a sût kan hmu hauh lo reng a ni, an chunga thu nei turin a ti tawh tlat a nih kha.
Pathianin a anpuia a siam hmeichhia hi tawhkhirh zet ni ngei tura a lanna chu Adama'n a han hmuh phata a ţawngkam aţang hian a ni. Thunei âw takin mipa aţanga lak chhuah a nih avangin, 'Hmeichhia a ni tur a ni' a tih ngam danah reng mai hian!
A tawp berah bawhchhiatna hlimthla hmasa ber Bung 2 tawpah hian kan hmu ta a. Adama tân chuan Pathian kha a lo chawrchhuahna, a inpui a ni a. Mipain hmeichhia a ângchhûngah la lutin a nu leh a pa a kalsan ang tih a nih tak hi.
A fapa Adama chuan he thu zawmin Pathian a kalsan ta ngei reng a. Mihring aţanga siam hmeichhia hian Pathian anpui nihna a nei pha ta lo va. A tân chuan Adama han duhawm turzia kha chhut tawh mai rawh. Bawhchhiatna vawi hnih khawih hman ta he hmeichhia zet hi chuan lû an tihai chamchi ta reng a nih hi!
No comments:
Post a Comment