Mizote hian Pathian thu kan lo chhiar thiam tawk lohzia, a bik takin Thuthlunghlui awmzia kan hriat phak lohzia hi thûk tak a ni. Chung zinga pakhat chu han tarlan ka duh tlat a ni.
Genesis chang tir aṭang hian ka han chhiar a, hriatthiamna reng nei lo va ka lo chhiar rei tawhzia hi ka zak lek lek zawk mai. A tirin Pathianin lei leh van a siam a, tih ka'n chhiar a.
A dawt leh chiaha lei a tih ngawt hi ngaihtuah teh. Tun anga leilung nei a ni awkawng lo. Tui hlir tui hlir niin chu chuan awmze thûk zet a han nei nghal pang a! Pathianin êng lo awm rawh se, a tih hian tui aṭang veka thil siam a nihna kan hmu ta!
Mihring pawh hi nu pum chhûnga tui aṭanga lo piang kan ni reng a. Nakin zelah a hnam thlan Israel fate tân tui leh mei pawimawhzia kan hmuhna tur a ni ta a ni. Pathianin ni khat dana a thil siam danah hian ni khat danglam zet mai a awm ta a.
Ni hnihna bika Pathian thil siamte mawlh mai hian nun an tibuai chamchi ta a. Thlarau khawvel a siam ta tlat a ni. Vanah tui a awm a, leiah a awm bawk a. Chung inkârah chuan Pathianin a hmelma, khawvel Generation ropui lo awm tawhte'n pathian biaka an biak ṭhinte a dah ta tlat mai a ni.
He ni hi a danglam kan tih chhan pawh he ni hnihnaa a thil siamte chiah hi Pathianin ni 6 chhûnga a thil siamte zinga ṭha a tih ve miah lo awmchhun an ni bik ta tlat a ni. Chhiar ve chiah te, Pathianin ṭha a ti hle tih ni dangah chuan ziah lan vek a ni bik tih i hmu ang.
Tin, ni 5 ni hian thilmak tak a siam leh a. Tui aṭangin thil nung hrang hrang a siam a ti mai lo! Tuipuiah sa lian pui pui a siam a zuk ti kher a. Rannung hlauhawm pui pui tia sapṭawng lama a inziakna pawh a awm kher bawk! Chung zinga pakhat, a kâ aṭanga mei alh thaw chhuak thei, miin thawnthu mai maia an ngaih Leviathan, Joba bua lo lang hmasa ber, Sam bu leh Isaia bua lo lang hi a ni.
China lamin dragon an uarte hi mak ti hle suh. Sam bu kan ena Joba bu kan bih chuan Leviathan hi tuipuiah ringawt a lo khawsa teuh lo mai! Khawmualah Pathian ngeiin thlalera awm mihring ei turin a talhsak tlat a ni. Mahse, Amah ngei lo chuan tumahin leviathan hi tihlum thei an awm hauh lo!
Tin, Isaia kan en chuan Dragon, tuia awm tiin a sawi leh chiah a. Tin, Isaia vek hian Leviathan hi rulpui tiin a lam nawn a lam nawn bawk. Aw le, ni hnihnaa a thil siam ka tih hi kan awih lo a nih chuan Enoka bu kan bih a ngai ang. Bih tur kan nei lo anih thung chuan Aigupta aṭanga Israel fate chhuah dan aṭangin kan hmu thiam thei mai si ang.
Aigupta khan heng pathian hrang hrangte hi an biak piahah an lim hmangin an inhung phui chûk a. Chung an biak pathiante chu Mosia hmang khan a hneh ta nghauh nghauh mai a nih kha. Chungu an bia a, khau nen lam! Thisen an bia a, pathian 10 an biakte lakah a chungnunzia a lantir ta chiah reng a ni.
Pathianin Mosia hmanga chhuah thu a pêk tawh hnu zetah Exodus bung 14 khan Aigupta ramri hnaih tak Baal Zephon hmunah kher riaka let leh turin a rawn ti ta tlatte kha a lo mak lo. Kha hmunah ngei khan tuipui pathian lim an awm khup a, Pathian lakah a la tlawm tlat loh vang leh Aigupta mite'n Pathian tak a nihzia an hriat nân a ni, a va muttir kher ni.
Engvang nge kan tih chuan Israel fate khan Aigupta pathiante kha hun rei tak chhûng pathian atâna an lo biak tawh vang niin chung pathian an biak zawng zawng laka hnehtu leh ropui zawk a nihzia leh chawimawia a awm theih nân a nih vang chauh a ni. Ten Plague of Egypt tiin kan sawi liam mai a. A ni ngawt lo, an pathian biakte sawina a ni zawk.
Pharoa leh a sipaite'n an rawn um ta chiah a, an riahna hmun an enin an hlau mangang ta chul mai reng a nih kha! Pathian lah hi a han khirh kual peih khawp a. Mosia khan anṭam chi fang khat lek pawh rinna nei tawh tur zawng a ni. Mahse, mangang zetin Pathian a au ta a.
Pathian lahin ṭha zaia chhang ta lo chuan engah nge mi auh buai, i tiang kha la la lek mai ta che an ti zui nek kher a! A tawpah tuipui pathian, ni hnih nia a siam tui hnuaia awm ngei kha a tlawm ta a nih kha. Aigupta pathiante kha chak tak an nihzia kan hriat theihna chhan chu Jejebeli'n Pathian zawlnei ropui a thah chimih titih theih dan aṭang leh Eliza meuh pawhin a hlauhzia aṭang khan a ni.
Tichuan, tirhkoh Paula khan Ephesi bung 6:12 kaltlangin ni hnihnia Pathian thil siamte fiah takin tihian minhrilh ta a nih hi. 'Kan buante hi tisa leh thisen an ni si lo, lalnate leh, thuneihnate leh, he thim chunga khawvel roreltute leh, van hmunahte thlarau sualho awmte an ni zawk e.'
Eliza kha tawlailir aia chakte khan a thlawk fua fua thei a nia! Juda-ho lahin khatih hun lai khan a aia ropui an tam an la ti ta dah a! Mahse, thim lalpuina dawng Jezebeli lakah khan an boral mawlh mawlh mai si a ni. Eliza pawhin hremna Lalpa lak aṭangin a tawh phak zek a nih kha.
Rinna kawnga hei chen kal tawh inti si hian Thlarau Khawvel hi kan hmelhriat hlawl lo va. Pathian hi engkim tithei a nih rualin Nature Law leh eng dan emaw kalh hian a che fo lo. Babel insak aṭang khan a lang reng. Juda lehkhabu hluiho kan bih chuan, leirawhchan piahah dawi buin an inhung phui tlat a.
Chuvangin Pathian engkim tithei kan tiha meuh pawhin Thlarau khawvelah chet a lak dan engtin nge kan tih chuan an ṭawng a tih hransak ta ringawt a nih kha. Thlarau khawvel kan man loh luat vang chauh a ni heti zat kohhran hrang kan awm tak chhan chiah pawh hi lo ni.
Pathian chetna apiangah an loinrawlh zat zat a. Pathianin an chungah chutin engmah a ti ngawt ngai si lo. Anni kaltlang zawka ropui a nihna lantir tum reng renga lei leh van siam tirh ata lo bei ngat ngattu a ni zawk tih hi hriat fo tur a lo ni.
No comments:
Post a Comment