Ka sualna ka hriatreng fo chuan zingah,
A ni varţian khawfing a chah rualin,
Laikhum ka zâlna hmunah tuipui kam,
Ţiauvut ang maiin mi delh ţhin si a!
Ka bawhchhiatna reh thei lo ngei chuanin,
Vanlaizawla ni a cham lai ngeiin,
Ka chhipah tuifinriat rihna angin,
Mi chhipchhuantirin mi kal paitir hi!
Ka khawlohnate avang liau luain,
Thim hnuaiah hlawhchhamnain mi nghaisa,
Kawng ngil leh mam reng zawh tur nei lovin,
Luhlulna erawh ka chanpual a ni!
Lungngaihna chirhdup lukhama zâlin,
Hreawmna belmang, ka hmai thuhrûkna,
Khawharna puanpui hmanga inzialin,
Kâwlkil tawp retah ka biru ta a!
Thlamuanna ka nunin a duh lo a,
Hringfa kâ aţanga zilhhauna pawh,
Rimawi hneawm, lung kuaina reng nei lo,
Mi delhtu Lalpa kut a rit lua e.
Eng chena rei nge mi diriam anga,
Eng tia rei nge thimah mi hnutchhiah ang?
Lalpa'n mi chenchilh lai nite ngaiin,
A ţanga mi pawm lai ni ka thlahlel.
Mihring fapa inlamletna kawng thui,
Kawngkam tina buar leh hnim hlingneite'n,
Ka tisa peng tin an tai thler tak hi,
Tisa a nâ lo, thlarau a ni rum!
No comments:
Post a Comment