Pathian ni hian inkhawm miah lovin han teichhuak ila, inkhawm a awm tih hre miah lo mi hausa fa an tam sawtzia i hmu thei ang. Inkhawm ai chuan an lirthei silfai leh ţhiante nena titi ta mai mai i hmu ţeuh ang.
Veng changkang tak pakhata an Upa chu hmingchhe taka eirûknaa inhnamhnawih, tang thei si lo a ni. Veng dang pakhat leha an Upa pawh a in leh lo aţangin a eiru tih a chiang ngawih ngawih bawk. Mahse, pulpit chumin thu ţha a sawi a, a nung lem lo a ni mai!
Veng pakhata an Upa leh chu retired tawh, mahse a hnathawh hun laia eirûk thubuai nei, engtin tin emawa hlin loh a ni bawk. Heti hi a nih reng laiin heng mi lian kan tihte ina lêngluta, Malsawm Colney-ate anga, "Eh hei, i eirûka i sak a ni maw?" ti lung lung ngam kan awm si lo.
Chu ai chuan an thil neih hlutte, itna mitin kan thlirsak zawk a. Kohhran leh khawtlang tâna mi inphalah kan duh ru ţhum zawk a nih hi. Kohhran dal ta lutuk leh sual rapthlak ti chung pawha mi zah kai theihna khawtlang kan nih ţanna chiah hi Europe kohhran tlukchhiat chhan pakhat a ni.
Europe ang bawkin nakin lawkah kan ţhalai rual leh nu leh pa zingah Pathian pawh awm ring lo, inkhawmin awmzia a neih hre lo an pung thur thur dawn tih a lang reng. Pathian ni zing an ngaih pawimawh ang hian an hna hi ngai pawimawh se, tia ţhenawmpa inkhawm tur thlir liam patling pawh an tam ta!
Eirûkna kawnga fihlim lo Upa leh Upa lo fate tâna pawi em em tur chu an nunin Pathian a hlat tial tial tur hi a ni. SE pakhat chuan, "Kei chu thawhlawm leh inkhawm vel hi ka buaipui lo tih lo hre teh u" tiin kum 2016 daih tawh khan kohhran a lo hnar tawh.
He hun lo thleng tur hian Pathian aţanga sual sim harhna tak tak kan chang lo a nih phawt chuan matheilovin tun aţanga kum 15 a ral pawh ngai lovin min rawn nuai ngei ang. Europe rama kohhran tlukchhiat dan han zir hian kan nun hian he kawng hi a zawk mek tih hai rual a awm lo.
Tin, tuna zing ţawngţai kal ţhin mi tlem tê an boral zawh hunah chuan zing ţawngţaite pawh tihtawp a ngai ngeiin a rinawm tlat a ni. Chhim leh Hmar kohhran a hausak thur thur laia an mi leh sate, thlarau ţama an ţamzia i hmuh duh phawt chuan Frederick Lalrindika rawngbawlna hi thlir mai rawh.
Davida khan englai mahin Saula kha Pathian hriak thih, tlusual a nih a hai ngai loh avangin a sâwt ngam ngai lo. Mahse, thusawitu tam tak leh Pastawr zingah meuh pawh thlarau dik an chan fiah si lova Pathian hriak thih nia langte sâwt ngam pawh an lo chhuak ta!
Heng zawng zawng lak ata kan fihlim theih nân hlim lam zawnga inkhawm buatsaih lovin thutak zawnga nung tura kohhran inzirtirna her danglam a ngai ta a nih hi. Revival chu kan ti ve ngei a, inkhawm chhûng bak revive thei lo nun hi paihin sual huata a tak taka ringtu nun nunpuinaah chauh kan ram damna tak tak a awm dawn a lo ni.
Zawlnei Isaiate'n tawrhna namênlo tuar chunga thu an puan lawm lawm lai khan ngaihsak an hlawh pha lo va. Mi zingah pawh awm thei lova Jakariate'n Jerusalem an ţah ngawih ngawih lai khan tu'n an bengkhawn ngai lo. Sawisak an hlawh hial hlawm zawk a, Puithiamte blacklist an nih hlawmzia kan hre vek e.
Chung ang tak chuan Pastawr Chhawnate'n ţap chungin dai an fang a, Zoram an ţah a. Zawlnei Saikhumate'n vakvaiin thu an hrillawk dik a. Mahse, engahmah an thu leh hla ngaithlak chu sawi loh, mi â chhuahin kan chhuaha hmuhsit an hlawh ta zawk a.
Hun hnuhnungah in tu leh fate'n ka thu hrilin pitar putarte'n inlârna an mang ang tih inziak ring kan ni reng chungin Kelkang harhna chhimtu ţhalai rualte thu puan leh kan pipute inlârna nuihzata zawlnei an awm tawh lo kan tih biaih biaih tawhna ramah Zoram a lo chang ta a nih hi.
-Lalremliana Pachuau
No comments:
Post a Comment